पौलुस अपु कमे याद
2
1 ए भाई त भेणिओं! तुसी पता असा की हें तुं भेएड़ एण बेकार न भु। 2 होर ईं बि कि तुं भेएड़ एण केईआं पेहले फिलिप्पी शेहर अन्तरa असी पुठ कीं दुख त कष्ट अओ थिआ। फि बि परमेश्वर हेन्धे हिम्मत दिती कि अस सोबी दुख तकलीफ अन्तर बि पूरे जोश जुए परमेश्वरे खुश खबरी तुसी शुणाई। 3 किस कि हें बोके कोई उतियाणे-पतियाणे बाड़ी नेईं, ना बुरी विचार जुए, होर ना छल कपट जुए असी। 4 पर अस ईं बतान्ते जीं परमेश्वर अस यकीन लेएक समझ कइ अपु खुश खबरी जिम्मेबारी दुतो असी। त हें मकसद मेह्णु खुश करण जे ना, बल्कि परमेश्वर खुश करण जे असा। किस कि सेईंए हें मने भियो परखता। 5 किस कि तुसी त पता असा, होर परमेश्वर बि हें उगाह असा कि अस ना कदी चाथि कतेथ, होर ना लालच जे बहाना बणान्तेथ। 6 होर बेशक मसीहे प्रतिनिधि भुणे खातिर अस तुसी केआं कुछ मांग कइ बटतेथ। पर अस ना तुसी केआं होर ना केसे होरी केआं इज्जते आश थी। 7 पर जीं जिल्हाणु अपु गभुर पाड़ती, तीं असी बि तुसी जुए खरे नरमी कइ उरताउ-बरताउ। 8 असी तुस अत ट्यारे भोई गो थिए कि हर वकत तुं ख्याल एन्ताथ। तोउं त अस ना सद परमेश्वरे खुश खबरी तुसी जोई बांटण चहन्तेथ, बल्कि अपु अपु जिन्दगी बि देण चहन्तेथ।9 तुसी हें कम त कष्टे बारे याद कते कि अस कीं भ्यागे ब्यादि कम कतेथ, ताकि परमेश्वरे खुश खबरी प्रचार कते टेम केसे गरका ना लौते लगो। 10 तुस अपफ हें उगाह असे त परमेश्वर बि हें उगाह असा कि तुसी विश्वासी बुच हें चाल चलण कीं शुचा, नेक त खरा थिआ। 11 तुसी पता असा कि जीं बोउ अपु गभुर समझान्ता, हिम्मत त अराम देन्ता, तिहांणि अस बि तुसी सोबी जे कतेथ, 12 ताकि तुं चाल चलण परमेश्वरे लेएक भुओ लौता, जे तुसी अपु राज्य त महिमा हेस्सा देण जे भिआन्ता।
13 तोउं त, अस बि हर वकत परमेश्वरे धन्यवाद कते कि जपल असी परमेश्वरे वचन तुसी शुणा त तुसी से मेह्णु के वचन ना, बल्कि परमेश्वरे वचन समझ कइ माने। (ए सच्चे बि परमेश्वरे वचन भो) होर से वचन अभेईं तुसी विश्वासी अन्तर कम करुण लगो असा। 14 किस कि ए भाई त भेणिओं! तुस बि परमेश्वरे तेस सतसंगे ईं बणि गो असे, जे यहूदिया राज्य अन्तर यीशु मसीह अन्तर असे। किस कि जीं यहूदिया राज्ये विश्वासी यहूदी मेह्णु केआं कष्ट सेहो थिए, तीं तुसी बि अपु देशे मेह्णु केआं कष्ट सेहे। 15 तेन्हि यहूदी मेह्णु प्रभु यीशु त भविष्य वक्ते मार छड़े। तस केआं अलावा तेन्हि असी बि सुआ कष्ट दिता। तोउं त परमेश्वर तेन्हि हेर खुश नेईं, किस कि से सम्हाई मेह्णु के विरोध कते। 16 से होरे मेह्णु जुए तेन्के बचणे बारे बोक करण जे बि असी ठाकते,b ताकि तेन्के पापे घड़ु भरी घियाल। पर अभेईं परमेश्वरे भयंकर लेहेर तेन्हि पुठ एई गो असी।
पौलुसे इच्छा
17 ए भाई त भेणिओं! जपल अस तुसी केआं थोड़े देरे लिए दूर भोई गो थिए, हांलाकि नजर केआं, मन केआं ना त तुं तीं हप्पड़ लगा त तुसी जोई मीण जे असी हउ बि सुआ कोशिश की। 18 तोउं त अस खास कर अउं पौलुस यक लिंगि ना, बल्कि घड़ी घड़ी तुं भेएड़ जे एण चहा, पर शैताने अस रोक रखो असा। 19 भला हें उम्मीद, हें खुशी, त हें रोभ की असा? जपल हें प्रभु यीशु एईयाल त कि तुस हें रोभ त खुशी ना भुन्ते ना? 20 हें खुशी त रोभ तुसे भिन्थ।