तिमुथियुस लंघाण
3
1 तोउं त, जपल असी केआं हउ न बिशिउ त असी एथेन्स शेहर अन्तरa अकेले बिशणे ठीक किउ। 2 त असी मसीहे खुश खबरी अन्तर हें भाई त परमेश्वरे सेवा करण अन्तर हें साथी तिमुथियुस तुं भेएड़ जे लंघा, ताकि से विश्वास अन्तर तुसी मजबूत कराल त हिम्मत दियाल, 3 जेस बेलि कोई बि भाई या भेण इन्हि दुखी त कष्टी के बझई जोई डर ना घिए। किस कि तुस अपफ जाणते कि असी इन्हि जुए बिशुण असु। 4 किस कि पेहले बि जपल अस तुं अठि थिए त अस तुसी जे बोतेथ कि असी दुख त कष्ट सेहण जरूरी असे। होर इहांणि बि भु, जेस तुस बि जाणते। 5 तोउं त जपल मोउं केआं बिशियेरु नेओथ त तुं विश्वासे हाल चाल पुछुण जे तिमुथियुस लंघा। किस कि मोउं डर थिआ कि जीं तीं कर कइ शैताने तुस परीक्षा अन्तर गोताई छो भोल त हें कमाई इहांणि बेकार भोई गई।तिमुथियुसे बधिआ खबर
6 पर अभेईं तिमुथियुस, जे तुं भेएड़ केआं वापिस अओ असा, तेन तुं विश्वास त परेम बारे बधिआ खबर शुणाई। होर तेन असी जे ईं बोक बि लाई कि तुस असी बोडे परेम जुए याद कते त जीं अस तुसी जोई मीण चहन्ते, तीं तुस बि असी जोई मीण चहन्ते। 7 तोउं त ए भाई त भेणिओं! तुं ईं विश्वासे बझई जुए असी एत दुख त कष्ट अन्तरb बि शान्ति मेओ असी। 8 किस कि अगर तुस विश्वास अन्तर मजबूत बिशियेल त हें अन्तर बि नोउआं जोश एन्ता रेहन्ता।
थेस्सलुनीका शेहरे मेह्णु जे पौलुसे प्रार्थना
9 जे सुख तुसी परमेश्वरे सम्हाणि हेन्धे दुतो असा, तसे बदले तुं बारे असी परमेश्वरे कीं धन्यवाद करुण? 10 अस भ्यागे ब्यादि ईं हथ जोड़ कइ प्रार्थना कते कि तुसी जोई झट मीण जे एन्ते, त तुं विश्वास अन्तर जे कमी असी, तस पूरा कते।
11 त अभेईं हें पिता परमेश्वर त हें प्रभु यीशु मसीह तुसी जोई मीण जे असी अपफ बथ हरालाल। 12 त प्रभु ईं कराल कि जीं अस तुसी जोई परेम कते, तीं तुस बि ना सद अपफ जुओई, बल्कि होरी जोई बि परेम करे त परेम अन्तर बधते घिए। 13 ताकि, से तुं मन ईं शुचा बणाल कि जपल हें प्रभु यीशु मसीह अपु सोब शुचा मेह्णु जुए एन्ता त हें परमेश्वरे त बोउए सम्हाणि तुं मन बजन दोषे मेईंयाल।