थेस्सलुनीका शेहरे मेह्णु
जे प्रतिनिधि पौलुसे पेहली चिट्ठि
नमस्कार
1
1 ट्यारे थेस्सलुनीकाa शेहरे भाई त भेणिओं! में पौलुसे, सिलवानुसेb त तिमुथियुसे कनारा तुसी सोबी जे नमस्कार।तुस जे हें परमपिता परमेश्वरे त प्रभु यीशु मसीहे सतसंगे भो, तुसी प्रभु कृपादृष्टि त सुख शान्ति मेती रिहे।
आमीन
थेस्सलुनीका शेहरे मेह्णु के विश्वास त कम
2 ए भाई त भेणिओं! अस टाहो जेईं रोज तुसी जे परमेश्वरे धन्यवाद कते त लगातार तुसी जे प्रार्थना कते। 3 त हें परमपिता परमेश्वरे सम्हाणि तुस विश्वास अन्तर जे कम कते, परेम जुओई जे मेहनत कते त हें प्रभु यीशु मसीह पुठ जे तुं पक्की उम्मीद असी, तस याद कते।
4 होर, ए परमेश्वरे ट्यारे भाई त भेणिओं! असी पता असा कि परमेश्वरे तुस सम्हाई चुणो असे। 5 किस कि जपल असी खुश खबरी तुसी शुणाई त से सद बोक नेओथ, पर तठि शक्ति त शुची आत्मा, होर पक्का विश्वास थिआ। तुसी त पता ईं असा कि अस तुं भलाई लिए तुं बुच कीं बिशतेथ। 6 त तुसी सोब कष्ट त लज सही कइ परमेश्वरे वचन शुची आत्माई खुशी जुए मान छड़े। त जीं प्रभु चहन्ता, होर जीं अस कतेथ, तीं तुस बि करण लगे। 7 अब त तुस ईं बण गो असे कि पूरे मकिदुनिया त अखया इलाके अन्तर जे विश्वासी असे से सोब तुं ईं बणुण चहन्ते।
8 किस कि तुसी केईआं परमेश्वरे वचन अभेईं ना सद मकिदुनिया त अखया इलाके अन्तर प्रचार भुण लगो असा, बल्कि तस केआं बाहर बि भुण लगो असा। त जेठि जेठि बि अस घेन्ते, तठि मेह्णु परमेश्वर पुठ तुं विश्वासे बारे बोके कते। असी कुछ बि बोलुण ना एन्तु। 9 किस कि से अपफ हें बारे बतान्ते कि तुसी हें कीं आबिश किओ थिउ, त कीं मुर्ति पूजा छड़ दी कइ यक सच्चा त जीन्ता परमेश्वरे सेवा करण जे मन बदला। 10 होर से ईं बि बोक कते रेहन्ते कि तुस कीं परमेश्वरे कुआ यीशु मसीह स्वर्ग केईआं एणे हेरी बिशो असे। परमेश्वरे से मरो मेह्णु केआं दुबारी जीन्ता किओ असा त यीशु असी परमेश्वरे एणे बाड़े कोप केआं बचान्ता।