थेस्सलुनीका शेहरे मेह्णु
जे प्रतिनिधि पौलुसे पेहली चिट्ठि
सोचे कि केसे दूर शेहरे कुछ मेह्णु जोई तुं मितरी भुई। पर तेन्के हालात हेर कइ तेन्हि केईआं तुसी ज्यादा उम्मीद नेईं। तोउं बि, अजगता तुसी खबर मेती कि तुं मितर तुसी तीं मानते त तुं बोलो बोके याद कते। त तुस खुश ना भुन्ते ना? शयद तिखेईंए तुस तेन्के फोन नम्बर मिआन्ते, या मैसेज कर कइ तेन्के हालचाले पता कते। पर पुराणे जमाने अन्तर मेह्णु चिट्ठ लंघान्तेथ, ताकि यकी होरी हाल चाल पता लाआल त कुछ संदेश बि दियेल।
इस चिट्ठि अन्तर बि इहांणि भुओ असु। प्रतिनिधि पौलुस अपु दोका प्रचार यात्रा पुठ जपल थेस्सलुनीका शेहर पुजा त तठि तसे कुछ मितर बण गो थिए। पर यीशु मसीह पुठ विश्वास करणे बझई जोई तठि तेन्के विरोध भुओ थिआ। पौलुस तठिआ होरे शेहर जे घेई गा, पर तसे मन तसे मितरी जोई थिआ कि से कीं असे। पर सुआ विरोध अन्तर बि से यीशु मसीह पुठ विश्वास कते रिहे। जपल पौलुसे साथी तिमुथियुसे तस जे ई खबर शुणाई त पौलुस सुआ खुश भुआ, होर ई चिट्ठि लिखि।
इतिहासकार मानते कि नया नियमे सोबी केआं पेहली चिट्ठि ई भो। त चले इस चिट्ठि पढ़ कइ पता कते कि अखिर पौलुसे अपु मितरी जे की की बोके लिखो असी, होर तेन केस बोकी बारे सलाह दुतो असी। तेन ई चिट्ठि लगभग ईसवी 50-52 अन्तर लिखो थी।
विषय सूची
नमस्कार (1:1)
थेस्सलुनीका शेहरे मेह्णु के विश्वास त कम (1:2-10)
पौलुस अपु कमे याद (2:1-16)
पौलुसे इच्छा (2:17-20)
तिमुथियुस लंघाण (3:1-5)
तिमुथियुसे बधिआ खबर (3:6-8)
थेस्सलुनीका शेहरे मेह्णु जे पौलुसे प्रार्थना (3:9-13)
परमेश्वर खुश करणे जीवन (4:1-12)
प्रभु दुबारी एण (4:13-18)
प्रभु यीशु दुबारी एणे जे तेयार बिशुण (5:1-11)
अखिरि बोके (5:12-22)
अशुश त नमस्कार (5:23-28)