4
1 ए मालिकों! तुस बि अपु अपु गुलाम जुए न्याय त सुसुर उरतीण-बरतीण दिए, किस कि तुं बि यक मालिक असा, जे स्वर्ग पुठ असा।aहोरी शिक्षा
2 में ट्यारे भाई त भेणिओं! समोझि कइ जब्बर प्रार्थना दुआ करे त परमेश्वरे गुणगान करे। 3 अपु प्रार्थना दुआ अन्तर असी जे बि दुआ करे कि मसीह अन्तर परमेश्वरे जे नियको योजना असी, तसे बारे प्रचार करुण जे असी सुआ मौका मेईंयाल, जेसे प्रचार करणे बझई जुए अउं अभेईं जेहेल अन्तर असा। 4 प्रार्थना करे कि अउं मसीहे बारे खुल कइ बोल बटुं जीं मोउं करुण लौतु।
5 अविश्वासी मेह्णु बुच बुद्धि त परमेश्वर हेरी डर कइ जीए, ताकि तुस हर मौके सुसुर फायदा नी बटियेल।b 6 तुं बोक हमेशा मिठि भो लौती। त तुस अपु बोकी बारे सोचते रिहे, ताकि तुसी पता लगाल कि एन्हि बुच कोई अगर तुं विश्वासे बारे पुछियाल त तसे कीं जवाब देण।
अखिरि बोके त नमस्कार
7-8 मेईं हें ट्यारा भाई त सेवा अन्तर हें साथी तुखिकुसc तुसी केईं लंघो असा, ताकि तुसी हें हालते बारे पता लगियाल। जपल से एईयाल त में बारे सम्हाई बोक तुसी बतान्ता, त विश्वास अन्तर तुसी हिम्मत देन्ता। से प्रभु यकीन लेएक सेवक असा। 9 तस जुए मेईं उनेसिमुसd बि लंघो असा, जे तुं अठियाणि भो। से बि यकीन लेएक भाई त ट्यारा असा।
10-11 अरिस्तर्खुस जे मोउं जुए कैदी असा, यीशु जेस जे अस यूस्तुस बोते, त मरकुसe जे बर्नबासे रिश्तेदार लगता, त जेसे बारे तुसी जे बोलो असु कि अगर से तुसी केईं एईयाल त तस जुए सुसुर उरतीण-बरतीण दिए, ए सम्हाई भाई तुसी जे नमस्कार कते। यहूदी मेह्णु बुच सद एईएं असे जे परमेश्वरे राज्य लिए मोउं जुए कष्ट कते त मोउं हिम्मत देन्ते। 12 मसीह यीशु सेवक इपफ्रास बि तुसी जे नमस्कार कता।f से तुं अठियाणि भो त हमेशा तुसी जे प्रार्थना कता रेहन्ता कि तुस विश्वास अन्तर सिद्ध भोई कइ परमेश्वरे इच्छा पुठ बस घियेल। 13 सद तुसी जे ना, बल्कि लौदीकिया त हियरापुलिसg शेहरे विश्वासी मेह्णु जे बि से कष्ट कता रेहन्ता। एसे उगाह अउं देन्ता।
14 तस जुए हें ट्यारा वैद लूकाh त देमास बि तुसी जे नमस्कार कते। i
15 लौदीकिये शेहरे विश्वासी भाई भेण जे त खास कर निम्फा भेणि त तसे गी जे सतसंग किठा भुन्ता, तेन्हि सम्हाई जे छने में कनारा नमस्कार करे। 16 जपल ई चिट्ठि तुं अठि पढ़ी घियेल त एस लौदीकिया शेहरे सतसंग अन्तर बि पढ़ण जे लंघाण दिए, त जे चिट्ठि तेन्हि केईं असी, तस तुस अपु बुच बि पढ़ीण दिए।
17 त अरखिप्पुस जे बोले कि जे सेवा करणे जिम्मा प्रभु तसे धे दुतो असा, तस बड़े ध्यान जुए करे।
18 अउं पौलुस अपु हथे बइ ए नमस्ते लिखुण लगो असा। याद रखे कि अउं मसीहे बझई जोई कैदी असा। परमेश्वरे कृपादृष्टि तुसी सम्हाई पुठ भुन्ति रिहे।