3
1 में ट्यारे भाई त भेणिओं! किस कि परमेश्वरे तुस मसीह जुए दुबारी जीओ असे, त तुस स्वर्ग अन्तर जे असु, तस पाणे कोशिश करे, जेठि मसीह अभेईं परमेश्वरे सुमले कना बिश कइ राज करण लगो असा। 2-3 तुस त अपु पापे गुणी जे मर गो असे त तुं जीवन मसीह जुए परमेश्वर अन्तर सही सलामत असा, त स्वर्ग अन्तर जे असु तस पुठ अपु ध्यान लाए, ना कि इस धरती चीजी पुठ। 4 तोउं, जपल हें जीवने भण्डार मसीह दुबारी पूरे शान त महिमा जुए एईयाल, त अस बि तस जुए साते निश्ते।5 तोउं त अपु जिसमे बुरी इच्छाई बेलि जीण छड़ दिए त नाजायज रिश्ता रखुंण, बेशर्मे कम करण, बेख्याल जीण, सद अपु इच्छाई मोह अन्तर बिशुण त लालच करण जे कि मुर्तिपुजा करणे ईं असीa, इन्हि सम्हाई बुरे कम केआं दूर बिशे। 6 किस कि इन्हि कमी के बझई जुए ईं परमेश्वरे सज्जा तेन्हि पुठ एन्ती जे निआंग ना मानते। 7 तुस बि यीशु मसीह पुठ विश्वास करणे पेहले एन्के ईं सम्हाई बुरे कम कर कइ जीन्तेथ। 8 पर अभेईं तुसी लेहेर किढ़ण, अणबण भुण, नफरत करण, चाथि करीण, नभन नभन बचारुण त सम्हाई बुरे कम करण छड़ देण। 9 त यकी होरी जे झूठ न बोलुण, किस कि तुसी अपु अपु पापे गुण त कम, शहमे ईं लिडआई छो असे।b 10 तुं धे परमेश्वर यक नोउआं गुण दुतो असा जे परमेश्वरे बुद्धि बेलि हर रोज अपु सृष्टिकर्ता ईं बणुण लगो असा।c 11 तेस गुण अन्तर कोई खास नेईं। ना यहूदी ना गैर यहूदीd, ना खतने बाड़े ना बगैर खतने बाड़े, ना टन्हा, ना खोड़ा, ना बिश्टe होर ना चनालf, बल्कि सद मसीह खास असा, जे सोबी विश्वासी अन्तर असा।
12 तोउं त, शुचा त परमेश्वरे चुणो ट्यारे मेह्णु ईं दाह त भलाई कते रिहे।g अपफ जे घट समझे, लाह रख कइ परेम जुए धराण दिए त केसे बि चीज पुठ रोभ ना किढ़े। 13 यकी होरी के कमजोरी सीढ़े त गलती माफ करे। अगर केसे कोई शिकायत भोल त जीं प्रभु तुस माफ किओ असे, तीं तुस बि यक होरी माफ करे।h 14 तोउं अपफ बुच परेम जुए बिशे किस कि परेम असी सम्हाई जोड़ कइ रखता।
15 तुस हर यक कम त ब्योरा मसीहे दुतो शान्तिi बेलि करीण दिए, किस कि तुस यक जिसमे ईं शान्ति जुए बिशुण जे भिहो असे। त तुस हमेशा परमेश्वरे धन्यवाद देन्ते रिहे। 16 मसीहे वचन हमेशा याद कते रिहे त सम्हाई बुद्धि जुए यक होरी शिचाले, त खबरदार करे। अपु अपु मन अन्तर परमेश्वरे भजन, शुची आत्माई दुतो छुआंरी, त घुरेई धन्यवाद देन्ते लाण दिए।j 17 तुस चहे कुछ कम करे या कोई बोक करे, जे बि करण असु, तस ईं याद रख कइ करे कि तुस प्रभु यीशु प्रतिनिधि भो त तसे बेलिए परमपिता परमेश्वर जे धन्यवाद दिए।
विश्वासी मेह्णु के जीणे बारे
18 ए जिल्हाणुओ! मसीहे वश अन्तर जीं बिश्ति, तीं अपु अपु धाणि वश अन्तर बिशे।k
19 ए मेह्णुओ! अपु अपु जुएली जोई परेम करे त तेन्हि जुए टटोरी कइ ना बिशुण।l
20 ए गभुरुओ! हमेशा अपु अपु ईये बोउए बोक मनीण दिए, किस कि परमेश्वर एसे बेलि खुश भुन्ता।m
21 ए गभुर बाड़िओ! गभुर वेबझह कशि कइ ना रखे। ना त तेन्के हिम्मत टूट घेन्ति।n
22 ए गुलामो! इस धरती पुठ अपु अपु मालिके सम्हाई बोके माने। सद तेन्के सामणि ईं ना, बल्कि तेन्के पतोबारी बि तेन्हि खुश करणे कोशिश करे।o सच्चे मन जुए त प्रभु यीशु हेरी डर कइ तेन्के सेवा करे। 23 त तुस जे बि कते, तस पूरे मन लाई कइ, ई समझ कइ करे कि तुस मेह्णु जे नेईं बल्कि प्रभु जे कमुण लगो असे। 24 याद रखे कि प्रभु तुसी तसे हकदार भुणे ईनाम देन्ता, जे तेन जुबान दुतो असी, किस कि तुस सच्चे बि यीशु मसीहे सेवा कते। 25 पर जे गलत कम कता, तस गलत कमे सज्जा बजन केहर-बेहरी मेई घेन्ति।p