टगड़ियारी गभुर भुण
5
1 ट्यारे भाई त भेणिओं! किस कि तुस परमेश्वरे ट्यारे गभुर भिन्थ, त तसे गुणे हेसाब जुए जीण दिए। 2 जीं मसीहे किओ थिउ, तीं तुस बि अपु जीण अन्तर होरी जे परेम हराले। तेन असी जोई परेम किआ, त जेन भकती बइ परमेश्वर खुश भोई घेन्ता, अपफ तीं यक अब्बल भकत बण कइ से असी जे चढ़िआ। 3 तोउं त जीं शुचे मेह्णु लेएक असा, तीं जीए। नाजायज रिश्ता रखणे, बेशरम कम करणे, त होरी लालच करणे त दूर, एन्के बारे बोक करण जे बि तुस अपफ बुच कोई बझह न रखे। 4 तुसी बुच ना कोई गन्दे लब्ज, ना मुर्खी के बोक, होर ना बेशर्मे हसी मजाक भुण लौते, किस कि ए सोब तुसी जुए ना जचतु। पर तुसी बुच परमेश्वरे धन्यवाद बोक भुओ लौती। 5 ई तुस जाण रखे कि जे गलत तरीके जुए जिसमे संमंध रखते, जे बेशरम कम कते त जे होरी लालच कते, से मुर्ति पुजणे बाड़े के ईं परमेश्वर छड़ दी कइ होरी चीजी के पता घेन्ते। मसीहे त परमेश्वरे राज्य अन्तर एन्हि मेह्णु के लिए कोई बांट नेईं।6 हेरी बिशे, एन्के बारे अपु शिक्षा बेलि कोई तुसी धोखा ना दियेल। किस की इन्हि बझई जुए ईं परमेश्वरे सज्जा तेन्हि पुठ एन्ती जे तसे निआंग ना मानते। 7 तोउं त, तुस तेन्हि जुए ना घिए। 8 किस कि पेहले तुस बजन परमेश्वरे अन्हारु अन्तर जीन्तेथ, पर अभेईं परमेश्वरे भेएड़ एणे बेलि तुस टगड़ियारे ईं भोई गो असे। त जे टगड़ियार अन्तर बिश्ते, तेन्के ईं जीण दिए। 9-10 त प्रभु जी जीं औजतु, तीं जी कइ हरालिण दिए, किस कि जे टगड़ियार अन्तर बिश्ते, से हमेशा अब्बल कम कते, सुसुर बिश्ते त सच्चाई बोते। 11 त अन्हारे अन्तर बिशणे बाड़ी के कम, जेसे बेलि मेह्णु कोई भलाई ना भुन्ति, तस केआं तुस दूर बिशे, बल्कि तेन्के बुराई अपु टगड़ियारी बेलि हराली छड़। 12 किस कि अन्हारे अन्तर से जे नियको कम कते, तस बारे बोक करणे जे बि लज एन्ती। 13 पर जपल टगड़ियार एन्ती, त तेन्के सम्हाई नियको कम सोबी नजर एन्ते 14 किस कि टगड़ियारी बेलि सम्हाई कुछ केई घेन्तु। तोउं त ईं बोते
“उंघणे बाड़िआ, भो खड़,
मारो मेह्णुआ, दुबारी जीण दे।
ताकि मसीहे टगड़ियार तोउ पुठ चिलकियेल।”
15 तोउं त, अपु जीणे तरीके पुठ नजर रखे। मुर्खी के ईं ना जीण, पर समझदारी के ईं जीण। 16 हर मौके पुठ भलाई करणे कोशिश करे, किस कि बुराई करण जे इस टेम सुआ जेईं असे। 17 तोउं त परमेश्वरे इच्छा की असी, तस सुसुर समझीण दिए ताकि मुर्ख ना बणियेल। 18 त अराख पी पी अपु जिन्दगी खराब ना करे, पर शुची आत्माई मदते बेलि अपु जिन्दगी कटे। 19 तुस जपल यक होरी जुए मीते, त भजन, होर शुची आत्माई दुतो छुआंरी बेलि त घुरेई लाई कइ यक होरी हिम्मत दिए। मन अन्तर प्रभु यीशु जे घीत लाए। 20 सम्हाई चीजे बारे, हर बेले हें प्रभु यीशु मसीह नओं पुठ परमपिता परमेश्वर जे धन्यवाद दिए। 21 त मसीह इज्जत देणे खातिर यक होरी वश अन्तर बिशे।
धाणि जुएली
22 ए जिल्हाणुओ! तुस जीं मसीह अन्तर बिश्ति, तीं अपु अपु धाणि वश अन्तर बिशे। 23 किस कि जीं मसीह अपु जिसम सतसंगे मगिर भो त तस बचाणे बाड़ा भो, तीं धाणि बि अपु जुएली मगिर भो। 24 त जीं सतसंग मसीहे वश अन्तर बिश्ता, तीं तुस बि हर चीज अन्तर अपु अपु धाणि वश अन्तर बिशे।
25 ए मेह्णुओ! जीं मसीहे सतसंग जुए परेम किआ, तिहांणि तुस बि अपु अपु जुएली जोई परेम करे। तस सतसंग जे अस असे, असी बचाण जे से अपफ भकत चढ़ा।a 26 त अपु वचने बेलि अस पाणि ईं धुई कइ साफ कर कइ शुचे किए।b 27 तेन ई इस बझई जुए किउ ताकि असी अपफ जे यक ईं दुल्हन बणाए, जेस केईं ना कोई दाग धब्बे, त ना कोई खराबी भोल। पर, से शुचा त अब्बल भोल।
28-30 कोई बि अपु जिसम जुओई दुश्माणी न बरतता, बल्कि तसे देखभाल कता। त किस की अस मसीहे जिसम सतसंगे अंग भो, से बि तिहांणि सतसंगे ख्याल रखता। त धाणि अपु जुएली बि ईं ख्याल रखण जरूरी असा, जीं से अपु जिसमे ख्याल रखता। किस की जे अपु जुएली देखभाल कता, से अपु देखभाल कता।
31 धरमे कताब बि बोती,
“इस बझई जोई, जपल यक मेह्णु जुएली रखता,
से अपु ईया बोउ केआं बखी कइ अपु जुएली जुए जुड़ता।
त से दुहे मी कइ यक बणते।”c