गभुर त ई बोउ
6
1 ए गभुरुओ! अपु ईये बोउए बोक मनीण दिए, किस कि प्रभु मानणे बाड़ी जे ई करण जचतु। 2-3 परमेश्वर दुतो ए पेहली निआंग असी, जेसे जुए यक अशुश बि जुड़ो असी,“अपु ईये बोउए इज्जत कर,
तोउं सोब किछ तोउ जे सुसुर भुन्तु त
तु सुआ साल जीन्ता।”a
4 ए गभुरु बाड़िओ! तुस अपु गभुर इरुह लेहेर ना दिआए! बल्कि प्रभु दुतो बुद्धि त धीरज जुए तेन्हि शिक्षा दी कइ वश अन्तर करे।
गुलाम त मालिक
5 ए गुलामो! तुस डर कइ त मन अन्तर इज्जत रख कइ जीं मसीह मानते तीं धरती पुठ अपु अपु मालिके निआंग मनीण दिए। 6 सद तेन्के टीर अगर ना, बल्कि परमेश्वरे इच्छाई हेसाब जुए मसीहे गुलामे ईं हर बेले तेन्हि खुश करणे कोशिश करे। 7 तेन्के कम प्रभु कम समझ कइ खुशी जुए करे। 8 किस कि तुसी पता असा कि जे जे भलाई अस कते, प्रभु गुलामे या मालिके कोई फरक ना रख कइ सेईंया वापिस देन्ता।
9 त ए मालिकों! तुस बि तेन्हि जुए तिहांणि इज्जत जुए बरताब करे। तेन्हि डराण त धमकाण छड़ दिए, किस कि तुसी पता असा कि तुं त तेन्के मालिक स्वर्ग पुठ असा, जे केसे जोई बि केहर-बेहर ना कता।
आत्माई लड़ाई जे हथियार
10 ट्यारे भाई त भेणिओं! अखिर अन्तर, अउं बोता कि विश्वास अन्तर बस कइ प्रभु ताकती बेलि अपफ ताकतवर बणाए। 11-13 किस कि अस मेह्णु जुए लड़ाई करण नेईं लगो। पर अस धरती सम्हाई ताकते, जीं अन्हारु अधिकारी भूत प्रेती त अम्बरे सोब दुष्ट आत्माई के सेनाई खिलाफ लड़ाई कते। त लड़ाई जे परमेश्वरे दुतो सम्हाई हथियार त बचाणे औजार लाण दिए, ताकि तुस शैताने हर यक कोशिश नाकाम कइ बटियेल। 14 त परमेश्वरे सच्चाई मझीने ईं कश कइ, तसे भलाई कबच ईं लाई कइ, 15 खुश खबरी बेलि जे शान्ति एन्ती तसे बूटे ईं लाई कइ तेयार बिशे, 16 एन्हि जुए यीशु पुठ विश्वास बि अपु ढाले ईं नी कइ डट कइ बिशे, ताकि शैताने हर यक जाओ बाण हुशाण बटियेल। 17 परमेश्वर जे तुस बचाओ असे, तस सच्चाई टोफ लाई कइ, त परमेश्वरे दुतो वचन, जे कि शुची आत्माई तलवार भो, तस नी कइ 18 हर बेले, हर चीजी लिए शुची आत्मा बेलि प्रार्थना, दुआ कते रिहे। हेरी बिशे त होरे शुचे मेह्णु जे लगातार दुआ कते रिहे।
19 खास कइ मोउं जे दुआ करे कि जपल बि मोउं मसीहे बारे बोलुणे मौका मेआल, त अउं पूरे हिम्मत जुए खुश खबरी अन्तर जे परमेश्वरे नियोको योजना असी, तस बोल बटुं। 20 इस बझई जे अउं मसीहे कैद भुओ राजदूत असा। प्रार्थना करे कि अपु कैद अन्तर बि जीं मोउं करुण भोल, तीं अउं पूरे हिम्मत जुए तसे बारे बोता।
अखिरि बोके त नमस्कार
21-22 मेईं, हें ट्यारा भाई त प्रभु सेवा अन्तर यकीन लेएक तुखिकुस तुसी केईं लंघो असा, ताकि तुस तस केआं में बारे शुणे कि अउं कीं असा त कीं बिश्ता। त से तुसी विश्वास अन्तर बि हिम्मत दिए।