इफिसुस 4

विश्वासी अपफ बुछ उई मी कइ बिशुण

1 ए ट्यारे भाई त भेणिओं! ई सोब बोक नजर अन्तर रख कइ अउं, जे प्रभु कैदी असा, तुसी जे हथ जोड़ता कि जेस बझई जोई परमेश्वरे तुस भिहो असे, तसे हेसाब जुए तुस अपु जीवन जीण दिए। 2 मतलब, तुसी बुच कोई रोभ न किढ़े, होर ना उश्क बिशे। पर लाह रख कइ, परेम जुए यक होरी कमजोरी सीढ़ण दिए। 3 परमेश्वरे दुतो आत्माई बेलि अपफ बुच उई मी कइ बिशणे टेम यक मन रखणे कोशिश करे।

4 अस सोब विश्वासी मसीहे यक जिसम बणते। होर परमेश्वरे असी सोबी कें धे यके आत्मा दुतो असी। परमेश्वरे जिखेईं तुस भिहो थिए, तिखेईं बि यक उम्मीद जुए भिहो थिए। 5 यक ईं प्रभु, यक पुठ ईं विश्वास कते, यके लिंगि ईं पुओणि अन्तर चुसते। 6 त सम्हाई के बि यक ईं परमेश्वर त बोउ असा, जे सम्हाई केआं बोडा, सम्हाई के बेलि कम कता त सम्हाई अन्तर असा। 7 पर मसीह केआं मेओ दाहे हेसाब असी हर यक जेईं किछ ना किछ खास वर मेओ असा। 8 तोउं त धरमे कताब अन्तर यीशु बारे लिखो असु

“जिखेईं यीशु लड़ाई जीत कइ खड़िया अपु जगाई गा,

त तेन अपु दुश्माण कैदी बणाई कइ नीआ त मेह्‍णु कें धे तोफा दिता।”

9 इठि हेरे, लिखो असु “खड़िया अपु जगाई गा”। इसे मतलब कि से उन्निया, पाताल अन्तर बि गो थिआ। 10 जे उन्नि पाताल अन्तर गो थिआ, से सेईंया भो, जे सम्हाई अम्बर केआं बि खड़िया चढ़ा ताकि से सम्हाई किछ सुसुर करे, जीं भुओ लौतुथ।

11 त तेन केसे विश्वासी धे अपु प्रतिनिधि बणणे, त केसे होरी धे भविष्य वाणि करणे, त केसे धे खुश खबरी प्रचार करणे त केसे होरी धे विश्वासी के पुहाल बणणे त केसे धे परमेश्वरे वचन शिचालणे वर दिता। 12 ताकि ए सम्हाई मी कइ तसे कम करण जे सोब विश्वासी मेह्‍णु तेयार करियेल त सतसंग जे कि मसीहे जिसम भो, तस बणाल। 13 ई कम से तपल तकर कते जपल तकर विश्वास अन्तर त परमेश्वरे कोईये ज्ञान अन्तर हें मन यक ना भोई घेयाल, त अस यक सिद्ध मनख भोई कइ तसे ईं ना बणियेल।

14 तोउं अस गभुर के ईं नदान ना रेहन्ते, जे हर किस्मे गलत शिक्षाई बेलि बेहक घेन्ते, त जेन्हि दुष्ट मेह्‍णु अपु अपु चलाकी जुए ठगते। 15 बल्कि अस परेम जुए सम्हाई किछ पुठ मसीह अन्तर बधते घेन्ते, किस कि अस परमेश्वरे सच्चाई पुठ जम कइ बिश्ते। मसीह जीं मगिर भो, 16 से असी सम्हाई जेईं यक होरी जुए जोड़ता त यक बणान्ता, ताकि अस सम्हाई अपु अपु कम सुसुर कर कइ होरी सुहलियत करे त सम्हाई अपफ बुच परेम अन्तर बधियेल।

विश्वासी चाल चलण

17 ट्यारे भाई त भेणिओं! इस बझई जुए प्रभु केआं मेओ हके बेलि अउं तुसी जे बोता कि अभेईं केआं तुसी अविश्वासी मेह्‍णु ईं ना जीण, जेन्के मन अन्तर कऊ भरिए असा। 18 किस कि बेअक्ली त अपु रोभे बझई जुए तेन्हि अन्तर कोई समझ नेईं त परमेश्वरे जीवन केआं से बखरे भोई गो असे। 19 तेन्हि भलाई बुराई कोई फरक ना पड़ता त से अपु अपु इच्छाई मोह अन्तर बिश्ते ताकि सम्हाई गलत कम कइ बटियेल। 20 पर तुस अलग ईं असे, किस कि तुसी मसीह केआं तीं नेईं शिचो। 21 बल्कि तुस अपफ तसे बोक शुणो असे त यीशु सच्चाई बारे शिचो असु। 22 अपु पेहलकण चाल चलणे बारे तुसी शिचो असु कि जे पुराणे गुण, गलत इच्छाई बेलि खराब भोई गो असे, तस छड़ दिए। 23 त शुची आत्मा तुं गुण नोउआं बणाण दिए 24 त नोउएं गुणे बेलि जीण दिए, जे परमेश्वरे इच्छाई हेसाब जुए असे, ताकि तुस परमेश्वर ईं धर्मी त शुची बणियेल।

नोई जिन्‍दगी जीणे नियम

25 तोउं त, तुस सम्हाई झूठ बोलुण छड़ दी कइ अपु अपु भेयाड़ जे सच्चु बोले, किस कि अस यक होरी अंग भिन्थ। 26 उश्कियेल बि त केसे घा दी कइ पाप ना करे त ब्यादि तकर उश्की न बिशे, 27 किस कि लेहेर शैताने धे असी पाप कराण जे मौका देन्ती। 28 से जे चोरता, हउ ना चोरुण, पर तस अपु हथे बइ अब्बल अब्बल कम करण, ताकि से बि होरी मदत कइ बटियेल। 29 तुं जिभुड़ केईआं कोई कुस्तुरी कुस्तुरी बोक ना निसो लौती, पर से बोक निसो लौती, जे खरी त होरी के मददगार भोल। 30 शुची आत्मा दुख ना दिए, किस कि तसे बेलि परमेश्वर तुसी पुठ मुहर लोओ असी कि तुस तसे भिन्थ। 31 तुसी सम्हाई अणबण, लेहेर, बेहेस करण, खशोरिण मडीण, चाथि केआं त सम्हाई बुराई केआं दूर बिशुण। 32 पर यक होरी पुठ दाह करे त नरमी जुए पेश एईए। जीं परमेश्वरे मसीह अन्तर तुं सम्हाई पाप माफ किओ असे, तुस बि तीं यकी होरी कमी पेशी माफ करे।