इफिसुस 3

गैर यहूदी बुच पौलुसे सेवा

1 में ट्यारे भाई त भेणिओं! मसीह यीशु बारे उगाही देणे बझई जुए ईं अउं पौलुस तुं लिए कैदी भुओ असा। 2 तुसी जरूर पता भोल कि तुं भलाई लिए परमेश्वरे दाह करणे खबर तुसी बुच प्रचार करणे जिम्मा मोउं मेओ असा। 3 से नियोको सच्चाई प्रभु अपफ निस कइ मोउं जे बोली, जेसे बारे मेईं अगर बि लिखो असु। 4 अगर तुस में चिट्ठि पढ़ते त मसीह अन्तर जे नियोको सच्चाई असी, जेस अउं जाणता, तस तुस बि समझ घेन्ते। 5 परमेश्वरे ई नियको सच्चाई होर जुगे मेह्‍णु कें धे नेओथ दुतो, पर अभेईं परमेश्वरे आत्माई शुचे प्रतिनिधि त भविष्य वक्ती जे बोलो असु। 6 नियको सच्चाई ई असी कि खुश खबरी बेलि यीशु मसीह अन्तर गैर यहूदी बि परमेश्वरे हकदार बण गो असे त यक जिसमे त परमेश्वरे जुबाने हकदार असे। 7 त परमेश्वरे दाह जुए जे दान मोउं मेओ असा, तसे शक्ति जुए अउं तेस खुश खबरी प्रचार करणे बाड़ा बणो असा। 8 सोबी शुचा मेह्‍णु के अगर में किछ औकात नेईं। तोउं बि परमेश्वरे मोउं पुठ इ दाह की कि अउं मसीह अन्तर जे बेहिसाब अमीरी असी, तेसे खुश खबरी गैर यहूदी शुणान्ता। 9 त सोबी मेह्‍णु के अगर धरती बणुण केईआं जे नियोको बोके सोब बणाणे बाड़ा परमेश्वर बारे असी, तसे राज खोलुण, 10 ताकि सतसंग बेलि परमेश्वरे हर यक ज्ञान अम्बरे मुखिया त अधिकारी अगर हरालियेल। 11 ई सोब तसे तेस अमर योजनाई हेसाब जुए भु, जे तेन हें प्रभु यीशु मसीह अन्तर पूरी किओ थी। 12 इस मसीह पुठ विश्वास करणे बेलि त तस जुए मीणे बेलि अब अस पूरे हिम्मत त उम्मीद जुए परमेश्वर अगर घेई बटते। 13 तुसी जे, जे कष्ट अउं सेहन्ता, एसेरी बेलि तुं फायदा भुन्ता। त अउं हथ जोड़ता कि तुस अपु हिम्मत ना छड़े।

हें लिए मसीहे परेम

14-15 तोउं त, जेस केईआं स्वर्गे त धरती हर यक बणो असे, तेस बोउ परमपिता अगर अउं प्रार्थना कता 16 कि से अपु बेहिसाब अमीरी केआं अपु आत्माई बेलि तुं मन ताकत जुए भरे। 17 तोउं मसीह पुठ विश्वास अन्तर तुस बस घियेल। 18-19 तुस त होरे सोब विश्वासी मसीहे परेम अन्तर सीरे टाए त बस घिए, ताकि तुसी ई बिझयेल कि तेसे परेम कत खड़िया, कत डुघा, कत लम्मा त कत बोडा असा, जे कि समझ अन्तर ना एन्ता। एसे बेलि परमेश्वरे ज्ञान जुए भरी कइ तुं गुण तसे ईं बणियेल।

20-21 अभेईं तसे सतसंगे बेलि त यीशु मसीहे बेलि तेस परमेश्वरे महिमा जुग जुग भुओ लौती।

अभेईं, जे ताकतवर असा त जे अपु शक्ति जुए असी अन्तर कम कता, जे हें मगण केआं त सोचुण केआं बि तीं ज्यादा कम कता, तेस परमेश्वरे महिमा भुओ लौती। आमीन!