पौलुस त झूठे प्रतिनिधि
11
1 काश में घमण्ड करणे जगरियार धिक तुस सीढ़ियेल। छने, में शुणे! 2 जीं परमेश्वर तुसी जे चिन्ता कता, तीं अउं बि चिन्ता कता, किस कि मेईं तुसी सद यक मेह्णु जे मतलब मसीह जे यक शुची त अब्बल कुवांरी दुल्हन ईं पेश करण जे जुबान दुतो असी। 3 तुस अपल तकर मसीह जे शुची भक्ति त विश्वास अन्तर सुसुर थिए। पर अब अउं डरता कि जीं सृष्टि शुरुवात अन्तर तेस कीड़े लचेरणे बोकी के बेलि हब्बाa भटक गो थी,b तीं तुं मन बि भटक त नेईं गो? 4 किस कि तुं बुछ अगर कोई होरे यीशु बारे प्रचार कते, जेसे बारे असी नेईं किओ त तुस तस झठ मानते। होर तुसी होरी ईं आत्मा मेओ असी, जे तुसी पेहले नेओथ मेओ, त तुस होरी ईं खुश खबरी मानते, जे असी प्रचार नेईं किओ। 5 पर अउं सोचता कि एन्हि खास प्रतिनिधि के सामणि अउं बि केसे केआं घट नेईं। 6 आं, बेशक मेईं भाषणवाजी शिचो नेईं, पर ज्ञान त शिचो असा ना? ईं बोके असी कत लिंगि यकदम साफ साफ तुं अगर हरालो असी।7 तुसी खड़ करण जे, अपफ घटाई कइ कि मेईं पाप किआ ना? किस कि मेईं मुफत अन्तर परमेश्वरे खुश खबरी तुसी जे प्रचार जे किआ। 8 मेईं होरे सतसंगी केआं मदत नी नी कइ, जीं से लूट छड़े, ताकि तुं सेवा करुं। 9 तुसी जुए साते भुणे टेम बि, मेईं अपु जरूरती के बेलि तुस परेशान ना किए, बल्कि मकिदुनिया राज्य केआं मितर एई कइ में जरूरत पूरी कतेथ। तोउं त, जीं पेहले केआं कता अओ असा, तीं अगर जे बि अउं तुसी केईआं अपु खर्चा ना करवान्ता। 10 मसीहे सच्चाई जपल तकर मोउं जुए असी, पूरे अखया राज्य अन्तर कोई बि मोउं इस बोकी पुठ रोभ लाण केआं रोक ना बटता कि अउं मुफत अन्तर खुश खबरी प्रचार कता। 11 ईं अउं इस बझई जुए बोलुण नेईं लगो कि अउं तुसी जुए परेम न कता। परमेश्वरे पता असा कि तुस मोउं कत ट्यारे असे।
12 तुसी केईआं अपु खर्चा ना करवाणे मेईं जे फैसला नीओ असा, अगर बि तस पुठ अउं पक्का बिश्ता, ताकि अपफ जे बोडे प्रतिनिधि बताई कइ जे तुसी केईआं दान नेन्ते, तेन्हि मोउं जुए बराबर भुणे कोई मौका ना मेईंयाल। 13 किस कि से ना कोई मसीहे प्रतिनिधि असे, होर ना सच्चे मन जुए सेवा करणे बाड़े असे। से त बस, मसीहे प्रतिनिधि भुणे ढोंग कते। 14 ई कोई हैरान भुणे बाड़ी बोक नेईं। शैतान बि त ईं ढोंग कता, जीं से यक चिलकता स्वर्गेदूत भो। 15 त अगर तसे सेवक तसे ईं धरमे कम करणे ढोंग कते त कोई नोई बोक नेईं। यक रोज तेन्हि अपु कमे फल जरूर मेता।
प्रतिनिधि भुणे खातिर पौलुसे कष्ट
16 अउं दुबारी बोता कि, मोउं कोई जगरा ना समझे। पर अगर तीं समझते त जीं जगरी के बोके शुणते, तीं में रोभ लाण बि धिक शुणे। 17 त अभेईं में ए बोक परमेश्वर केईआं नेईं, बल्कि में जगरियारी कनारा असी। 18 सुआ जेईं त इस मतोके हिसाब जोई रोभ लान्ते, त धिक अउं बि लान्ता। 19 होरी जगरी के बोके त तुस बोडे ज्ञानी के ईं मज्जे जुए शुणते, त में बि धिक शुणे। 20 तुस तेन्हि बोडे अराम जुए सेहन्ते, जे अपफ बोडे बणान्ते, तुसी गुलाम बणाई कइ, अपु फायदा लिए लूटते, बरबाद कते, त तुं बेज्जती कते। 21 पर असी तुसी जुए ई ना किउ त तुसी कि लगतु कि अस कमजोर असे ना?
पर अउं यक जगरे ईं बोता कि अगर कोई केसे बोकी पुठ रोभ लाणे हिम्मत कता त अउं बि हिम्मत कर कइ रोभ लान्ता। 22 से बोते कि से इब्रानी मेह्णु भिन्थ, त अउं बि बोता कि अउं बि इब्रानी भो। से अगर अपफ जे इस्राएली बोते त अउं बि इस्राएली भो। से अगर अपफ जे अब्राहमे ऊड़ी बोते त अउं बि तसेरी ऊड़ी भो। 23 अउं जगरे के ईं बोता, कि मोउं जे बोले कि सेईंए मसीहे सेवक भिन्थ ना? मेईं तेन्हि केआं बि ज्यादी मेहनत किओ असी। मसीहे लिए अउं सुआ लिंगि जेहेल अन्तर छो असा, सुआ लिंगि चाबुके बइ खओ असी त केहि लिंगि अउं मरते मरते बचो असा। 24 यहूदी मेह्णु मोउं पुठ सद यके लिंगि ना, बल्कि पन्ज पन्ज लिंगि उनताड़ी उनताड़ी चाबुकी बइ दुतो असी। 25 तेन्हि यक लिंगि मोउं पुठ घोड़िआ दुतो थी। टा टा लिंगि त गैर यहूदी मेह्णु अउं लठि बइ मडो असा। टाई लिंगि से जहाज टूट गा जेस पुठ अउं चढ़ो थिआ। पूरी यक रात दन अउं समन्दर अन्तर तैरता रिहा। 26 मेईं घड़ी घड़ी सफर किओ असा। मेईं दरियोउ, डाकु, अपु यहूदी मेह्णु, गैर यहूदी मेह्णु, शेहरे, अरुणि धारे, समन्दरे त झूठे भाई के खतरी के सामणा किओ असा। 27 मेईं सुआ राति खड़ खड़ कटोओ असी। सुआ लिंगि मोउं सुसुर खांजे न मेउ। केहि केहि लिंगि त ढुका टिशा त बजन झिणि के ठन्निहार सेहन्ता रिहा। 28 अब होर की बोलुण? मोउं हर बेले सोबी सतसंगी के चिन्ता लगी रेहन्ती। 29 की बारा! केसेरी कमजोरी हेर कइ कि अउं कमजोर न भुन्ता ना? होर, अगर कोउं जेईं पाप अन्तर फसता त की मोउं दुख न लगता ना? आं, मोउं तीं लगता। 30 तोउं त, अगर अउं घमण्ड करण बि, त सद तेन्हि बोकी पुठ, जे में कमजोरी हरालती। 31 जे हमेशा धन्य असा, से परमपिता परमेश्वर त प्रभु यीशु बोउ जाणता कि अउं झूठ ना बोता।