कुरिन्थुस शेहरे मेह्णु जे
प्रतिनिधि पौलुसे पेहली चिट्ठि
पूरी धरती अन्तर हें देश भारते ईं कोई देश नेईं। इठि ना सद हर यक जाति मेह्णु बिश्ते त किस्मी किस्मी भाषाई बि बोते। इठि होर धरमे मेह्णु असे। त हें इठियाणि मेह्णु के जीणे तरीका अलग अलग असा।
लगभग दुई हजार साल पेहले युरोप महाद्वीपे, कुरिन्थुस शेहर अन्तर बि इहांणि थिउ। तठि होरे होरे जगाई मेह्णु बिशतेथ त तेन्के जीणे विचार बि अलग अलग थिआ। जपल यीशु मसीहे खुश खबरी तठि पुजी, त तठि बि मसीहे सतसंग बणा। पर सतसंग अन्तर ईं सुआ गलत कम भुण लगे जे इस टेम बि भुण लगो असे। त चले, यीशु मसीहे प्रतिनिधि पौलुसे लिखो इस चिट्ठि पढ़ कइ पता लान्ते कि सतसंग अन्तर अगर फूट भुन्ति त की करुण। ब्याह त नाजायज रिश्ता रखणे बारे, मुर्ति केईं चढ़ो चीजे बारे, प्रभु बेह्लु बारे, शुची आत्माई वरदान बारे, यीशु दुबारी जीणे बारे त सुसुर सतसंग करणे बारे प्रतिनिधि पौलुस की की बोता?
इस चिट्ठि पढ़ कइ हेरे कि ईसवी 53-54 अन्तर लिखो ए सोब बोके कोठि तकर सही असी, होर हें ईं देश अन्तर जीण जे ए की की सलाह देन्ती।
विषय सूची
नमस्कार त शुरुवाती बोक (1:1-9)
सतसंग अन्तर फूट भुण (1:10—4:21)
सतसंग अन्तर खरा खोटा स्यापा (5:1—6:20)
ब्याहे बारे सलाह (7:1-40)
सवाल करणे लेएक रीति रिवाजे बारे सलाह (8:1—11:1)
सतसंग करणे बारे सलाह (11:2—14:40)
दुबारी जीणे बारे शिच (15:1-58)
अखिरि बोक (16:1-24)