रोम शेहरे मेह्णु जे
प्रतिनिधि पौलुसे चिट्ठि
“ना देणी भुई बुध त मंगड़ भुआ बार” उजवाण तुसी सुआ लिंगि शुणो भोल। ए अस तेन्हि मेह्णु जे बोते, जे कुछ ना कुछ बहाना लान्ते, पर मगो चीज ना देन्ते। इहांणि होरे बि मेह्णु असे, जे कुछ ना कुछ बहाना लाई कइ बोक ना मानते। से सोचते कि से सुआ चलाक असे, पर तेन्के चलाकी सुआ टेम ना चलती।
ई चिट्ठि प्रतिनिधि पौलुसे पेहले सदी कोई 56-57 साल अन्तर, रोम शेहरे विश्वासी मेह्णु जे लिखो थी। तपल से कुरिन्थुस शेहर अन्तर थिआ। रोम शेहरे सतसंग अन्तर केहि यहूदी जाति मेह्णु थिए त केहि गैर यहूदी मेह्णु बि थिए। से अपु अपु बहाना लाई कइ होरे विश्वासी भाई भेणि पुठ दोष लान्तेथ। पर पौलुस तेन्हि समझान्ता कि सोब जेईं गलती त पाप कते, होर कोई जेईं बि ईं नेईं जे धरमे करमे बेलि पापे सज्जाई केआं बच सकता। पर जे यीशु मसीह पुठ विश्वास कता, परमेश्वर तसे गलती त पाप माफ कर कइ तस धर्मी बणान्ता।
इस चिट्ठि अन्तर पौलुसे होरी बि सुआ बोकी के बारे लिखो असु। तेन्हि बोकी के पता लाण जे त हर यक बहाने जवाब जाणणे लिए तुस इस चिट्ठि पढ़ीण दिए। होर पता करे कि मेह्णु इस चिट्ठि जे किस “इसाई धरमे मूल शिक्षाई कताब” बोते।
विषय सूची
नमस्कार त शुरुवाती बोके (1:1-17)
यहूदी त गैर यहूदी मेह्णु, सोब पापे वश अन्तर (1:18—3:20)
परमेश्वरे इच्छा - विश्वास करणे बेलि बचुण (3:21—4:25)
मसीह अन्तर नोई जिन्दगी (5:1—8:39)
इस्राएली मेह्णु बेलिए परमेश्वरे योजना पूरी भुण (9:1—11:36)
विश्वासी मेह्णु के चाल चलण (12:1—15:13)
पौलुसे योजना त अखिरि बोक (15:14—16:27)