पौलुसे दर्शण त ज्ञान
12
1 अउं हउ बि रोभ लान्ता। चहे रोभ लाणे बेलि कोई फायदा ना भोल, तोउं बि अउं अपु दर्शण त प्रभु राजेa बारे रोभ लान्ता। 2 अउं त सद यक मसीहे विश्वासी भिन्थ। तोउं बि परमेश्वरे मोउं चौधा साल पेहले स्वर्ग तकर घिन गो थिआ। पता नेईं कि ए सच्चे बि भुओ थिउ, या सद दर्शण थिए। परमेश्वर जाणता। 3 मोउं पता नेईं कि ए मास त लहु बाड़ी जिसम अन्तर भुओ थिउ या आत्माई जुए, परमेश्वर जाणता। 4 तथ तेनि ईं ईं बोके शुणाई, जे में बेलि कदी बोलीणी नेईं त जेस बोलुणे मनख इजाजत नेईं। 5 अउं सुआ खुशी जुए ए बोक बोता। तोउं बि मोउं रोभ लाण भोल त अउं अपु कमजोरी छड़ दी कइ होर केस बोकी पुठ बि रोभ ना लान्ता। 6 अगर मोउं रोभ लाण बि भोल, त अउं जगरी के ईं ना बोता, बल्कि अउं सच्चाई बोता। तोउं बि, अउं रोभ लाण केआं रुकता, किस कि अउं चहन्ता कि जे बि अउं बोता त कता, तेस केआं ज्यादा मेह्णु मोउं ना समझे। 7 त स्वर्गे इन्हि खास दर्शणे बेलि रोभ न लाण जे जीं यक जिसम अन्तर कांटे पुड़णे चिड़ंगे ईं भुन्ति, तीं यक चिड़ंग मोउं मेओ असी। से यक शैताने दूत ईं असा, जे मोउं भुंजान्ता रेहन्ता त सुआ रोभ लाण केआं रोकता। 8 एस मुकाण जे टाई लिंगि मेईं प्रभु जे प्रार्थना की। 9 पर तेन बोलु “में कृपादृष्टि, तोउ साह्मती, किस कि जपल तु कमजोर भुन्ता, तपल में ताकत तोउ सुसुर केई घेन्ति।”b तोउं त, अउं अपु कमजोरी पुठ हउ बि रोभ लान्ता ताकि मसीहे ताकत मोउं पुठ केईयेल। 10 तोउं त, मसीहे खातिर अउं अपु कमजोरी, बेज्जती, मेह्णु के भुंजाण, गरीबी त दुख बोडे खुशी जुए सेहन्ता। किस कि जपल अउं कमजोर त लचार असा, तपल ईं अउं ताकतवर असा।कुरिन्थुस शेहरे सतसंगे बारे पौलुसे चिन्ता
11 अउं यक जगरे ईं बोलुण लगो असा! में कनारा बोल कइ मेन्धे हिम्मत देणे बदले, तुसी मोउं जुए जब्बरदस्ती किओ असी। अउं कोई खास नेईं, तोउं बि तेन्हि बोडे बोडे प्रतिनिधि केईआं केसे बि हिसाब जोई घट नेईं। 12 तुसी जुए साते बिशणे टेम, मेईं सुआ धीरज जोई चमत्कारे कम त ताकती कम कर कइ यक प्रतिनिधि भुणे सबूत तुसी हराले। 13 तुस कि केसे बोक अन्तर होरी सतसंगी केआं घट असे ना? ना! पर तुसी पुठ अपु खर्चे पाणि भार ना छड़ण, अगर तुसी में गलती लगती त छने मोउं माफ करे।
14 हेरे, अब अउं टेके लिंगि तुं आ एण जे तेयार असा, पर अउं तुसी पुठ केसे किस्मी भार ना बणता। किस कि मोउं तुं धन दौलती ना, बल्कि तुं चह असी। किस कि गभुरु अपु ईया बोउ जे जोड़ुण ना एन्तु, बल्कि ईया बोउ अपु गभुर जे जोड़ुण एन्तु। 15 जेठि तकर में बोक असी, अउं तुं लिए अपु सोब किछ बेचण जे तेयार असा, अतु तकर कि अउं अपु अपफ बि तुं लिए बेचीण जे तेयार असा। अगर अउं तुसी जोई सुआ परेम कता, त तुस बि त मोउं जोई सुआ परेम कते। कते नउ ना? 16 ईं भोई बटतु कि तुसी बुच केहि केहि सोचते भोल कि “बेशक पौलुस असी पुठ भार न बणा, तोउं बि तेन चलाकी जुओई अस फसाई छड़े।” 17 मोउं जे बोलीण दिए कि जे मेह्णु मेईं तुसी केईं लंघो थिए, तेन्के बेलिए कि मेईं तुसी केआं कोई फायदा उठा ना? 18 मेईं तीतुस समझाई कइ त तेस जोई हें यक होरा भाई तुसी केईं लंघो थिए। त कि तीतुसे तुसी धोखा दिता ना? कि तसे बरताब हें ईं ना थिआ ना? अस दुहे जेईं यके आत्माई नक्से-कदम पुठ ना हंटे ना?
19 ए ट्यारेओ! शयद तुस ईं समझते भोल कि अस ई सोब अपफ बचाणे लिए बोलुण लगो असे। पर जे कुछ अस बोलुण लगो असे, परमेश्वरे उगाह मान कइ मसीहे विश्वासी भुणे खातिर बोलुण लगो असे। जे कुछ बि अस कते, से सोब तुं तरक्की लिए असु। 20 किस कि मोउं डर असा कि जपल अउं तुसी केईं एऊं त तुस तीं ना भोल जीं अउं चहन्ता, होर अउं बि तीं ना भोल जीं तुस चहन्ते। ईं ना भो कि, तुसी बुच झगड़ा, लेहरीण, यकी होरी खिलाफ भुण, यकी होर हेर जड़ुण, यकी होरी बेज्जती करीण, चाथि करणी, घमण्ड करण त छंग-छीट लगो भोल। 21 मोउं डर असा कि, जपल फि अउं तुसी जोई मीण जे एऊं, त तुं तेन्हि पापी के बझई जोई मोउं परमेश्वरे सामणि लजीण एईयेल। होर तुं नाजायज रिश्ता रखणे त लूचा लफंगे कम त होरे बुरे बुरे कमी के पछतावा ना करणे बझई जुए मोउं ती दुख लगाल।