अपु प्रतिनिधि भुणे बारे पौलुसे जवाब
(10:1—13:10)
पौलुसे अपु सेवाई बारे जवाब देण
10
1 अउं पौलुस अपु कनारा तुं छनेअरे कता। में बारे सुआ जेईं बोते कि मुंह सामणे भोल त डरोरा, होर दूर भोल त सक्त। अउं पौलुस मसीहे ईं नरम बण कइ तुसी जे बोता 2 छने, जपल अउं तुसी केईं एऊं त तुसी जुए सक्त बरताब करणे लिए मजबूर ना करे। किस कि जे बोते कि में जीणे लियागत धरती हिसाब जुए असी, तेन्हि धमकाण अउं जाणता। 3 आं, ए बोक त सच्ची असी कि अस इस धरती पुठ बिश्ते, पर अस मतोके हिसाब जोई झगड़ीन्ते नओं। 4 बल्कि अस जे हथियार घिन कइ मडीन्ते, से इस धरती ना। से त परमेश्वरे ती ताकतवर हथियार असा। तसे बेलि अस शैताने नियको ताकत खतम कते त झुठी बेहेस मुकान्ते। 5 अस परमेश्वरे ज्ञाने खिलाफ हर यक सोच मुकाई छते त सोबी के मन मसीहे वश अन्तर कते, ताकि सोब तसे निआंग माने। 6 त जपल तुस पूरी निआंग मानते, त अस तेन्हि निआंगी ना मानणे बाड़ी जे सज्जा देन्ते।7 तुस मेह्णु सद बाहरी बइ हेरते। अगर केसे अपफ पुठ एत भरोसा असा, कि से मसीहे भो, त तसे लिए ईं समझुण बि जरूरी असु, कि जीं से मसीहे भो, तीं अस बि मसीहे भिन्थ। 8 तोउं त, अउं अपु तेस हके बारे जे प्रभु तुसी बरबाद करण जे नेईं, बल्कि बणाण जे हेन्धे दुतो असे, तेस बारे अगर घमण्ड करुं त अउं ना लजिन्ता। 9 तुस ईं ना समझे कि अउं अपु चिट्ठि बेलिए तुसी डराण चहन्ता। 10 किस कि केहि केहि बोते, “तसे चिट्ठि वजनदार त असरदार भुन्ति, पर से हेरण सुआ कमजोर असा त तसे बोके बि गावेई ईं भुन्ति।” 11 जे ईं बोते, से ई जाण घिए कि जे जे बोके अस पतोबारी चिट्ठि अन्तर लिखते, तेन्हि तुं सामणि कर कइ हरालते बि। 12 अस अपफ तेन्हि मेह्णु जोई बराबरी करणे कोशिश न कते, जे अपफ खास मानते। किस कि से अपफ मुर्ख भुण साबित कते, जपल से यकी होरी बराबरी कते, त अपु औकात बि हरालते। 13 जीं बि भोल, अस अपु हद केआं ज्यादा कदी घमण्ड न कते। पर तेस सेवा तकर घमण्ड कते, जे परमेश्वरे असी जे ठहरेरो असी, जेस अन्तर तुस बि असे। एसेरी मुताविक अस घमण्ड बि कते। 14 तुसी पुठ घमण्ड कर कइ अस अपु हद पार करण नेईं लगो, किस कि सोबी केआं पेहले अस मसीहे खुश खबरी शुणान्ते शुणान्ते तुसी तकर पूज गो असे। 15 त अपु सेवा केआं बाहरी, केसे होरी के सेवा पुठ, अस घमण्ड न कते। पर असी भरोसा असा कि, जीं जीं तुं विश्वास बधियाल, तीं तीं तुं बझई जोई, हें सेवाई मुताविक, अस बि बधते घेन्ते। 16 तोउं, अस तुसी केआं बि दूर दूर तकर घेई कइ खुश खबरी प्रचार कते। पर होर जगाई होरी जे कम किओ असु, तढ़ि लिए असी घमण्ड करणे कोई जरूरत नेईं। 17 जीं कि धरमे कताब अन्तर लिखो असु,
“जेस जेईं घमण्ड करण असा,
त से प्रभु पुठ घमण्ड करे।”a
18 किस कि अब्बल सेईंए भुन्ता, जेस प्रभु अब्बल मानता। न कि से, जे अपु अपफ अब्बल बणता।