यरुशलेम शेहरे विश्वासी जे दान
9
1 अब तेस दाने कमे बारे जे विश्वासी मेह्णु के लिए कते, तुसी जे लिखुण जरूरी नेईं।a 2 किस कि मदत करणे जे इच्छा तुं मन अन्तर असी तेस अउं पेहलाई दी जाणताथ। तढ़ि लिए अउं मकिदुनिया राज्य मेह्णु के सामणि घमण्ड जोई बोता कि तुस अखया राज्य मेह्णु त पारु केआं खड़ तेयार असे। होर तुं जोश हेर कइ सुआ विश्वासी मेह्णु दान देण चहन्ते। 3 अउं एन्हि भाई तोउं लंघाण लगो असा, कि तुं बारे अस जे घमण्ड कते, से झूठा न लौता भो। जीं मेईं तेन्हि जे बोलो असु, तीं तुस तेयार भोई बिशे। 4 ईं न लौतु भो कि जपल कोउं मकिदुनिया राज्य विश्वासी, मोउं जोई साते एई कइ ईं हेरियेल कि तुस तेयार नेईं, तोउं असी जे तुसी पुठ अत भरोसा हरालो असा, से खतम भोई घेन्ता त असी लजीण एन्तु। पर तिखेईं असी केआं ज्यादु त तुसी लजीण एन्तु। 5 तोउं त, मेईं एन्हि भाई जे इ बोलुण जरूरी समझु कि से मोउं केआं पेहलाई तुसी केईं घिए। तुसी खुले मन जोई दान देणे जे जुबान दुतो थी, तस तेयार रखे, ताकि ए दान अपु मर्जी जोई दुतो दान भोल, ना कि केसे दबाव अन्तर या जोर जब्बरदस्ती कर कइ दुतो दान।दान कीं देण
6 इस बोकी ख्याल रखे कि जे घट बांता, से घट लुणता, त जे सुआ बांता से सुआ लुणता। 7 तोउं त, दान केसेरी दबाव अन्तर ना देण, होर ना सुआ कष्ट अन्तर देण। बल्कि दान ततर देण जतर कि हर यक जेईं अपु अपु मन अन्तर सोचो असा, किस कि परमेश्वर तेन्हि जोई परेम कता जे खुले मन जोई दान देन्ते। 8 परमेश्वर तुसी पुठ हर किस्मे कृपा कइ बटता, जेसे बेलिए तुसी कदी कोई कमी ना भुन्ति, बल्कि हर यक भलु कम जे दान देण लिए तुसी केईं सुआ किछ बच घेन्तु। 9 जीं कि धरमे कताब अन्तर लिखो असु,
“से जे खुले मन जोई गरीबी कें धे दान देन्ता,
तसे खरे कम हमेशा याद रेहन्ते।”b
10 तोउं त, जे बाणे बाड़ी कें धे बिएजु देन्ता त खाणे बाड़ी कें धे खांजे देन्ता, से तुन्धे बाण जे सद बिएजु ना, बल्कि तुं खुले मन जोई दुतो दाने फल बि, केहि गुणा बधाई कइ देन्ता। 11 ईं कर कइ तुसी केसे कनारा कोई कमी पेशी न भुन्ति, ताकि हर वकत तुस खुले मन जोई दान कइ बटियेल। जपल अस तुं दान गरीब मेह्णु केईं पुजान्ते, त से परमेश्वरे धन्यवाद कते।
12 किस कि दान करणे एस शुचे कम करणे बेलिए सद विश्वासी के जरूरत पूरी न भुन्ति, बल्कि मेह्णु के बेलिए परमेश्वरे सुआ धन्यवाद बि भुन्ता। 13 ई सेवा करणे बेलि तुसी अपफ जे साबित किओ असु कि तुस मसीहे खुश खबरी मानते त तस मान कइ होरी के ख्याल रखते। ईं हेर कइ सुआ जेईं परमेश्वरे महिमा कते। 14 त जे खास कृपा परमेश्वरे तुसी पुठ किओ असी, तसे लिए से तुसी याद कते त बोडे चह जुए प्रार्थना कते।
15 परमेश्वरे दुतो दानेc लिए तसे धन्यवाद करे, किस कि तसे हेसाब कोई दी ना बटता।