यहूदिया राज्ये विश्वासी लिए दान देणे बारे
(8:1—9:15)
खुल कइ दान देण
8
1 त ए ट्यारेओ! अभेईं अस मकिदुनिया राज्ये सतसंग अन्तर परमेश्वरे जे बोडी दाह भुओ असी, तसे बारे बताण चहन्ते। 2 से तेन्के इम्तिहान अन्तर खुश रिहे त ती गरीबी त कष्ट अन्तर बि खुल कइ दान दिता। 3 तेन्के बारे अउं इ उगाही देन्ता कि से अपु हिसाब जुए, केहि केहि जेईं त हद केआं बि ज्यादा दान दुतो असा। 4 एस दान अन्तर त यरुशलेम शेहरे विश्वासी मेह्णु के मदत करण अन्तर हेस्सेदार बणुण जे तेन्हि घड़ी घड़ी हें छनेअरे किउ। 5 त तेन्हि हें उम्मीद केआं बि बध कइ पेहले त अपफ प्रभु हवाले भुओ, पता परमेश्वरे इच्छाई जोई से हें केहणा मनण लग गे। 6 तोउं त असी बि तीतुसे छनेअरे किउ कि जीं तेन तुं बुछ ई खरु कम करणे शुरुवात कइ छो असी, तीं तस पूरा बि करे।7 होर जीं कि तुस विश्वास अन्तर, वचन अन्तर, ज्ञान त सोबी किस्मे कम अन्तर त हें लिए परेम अन्तर बधो असे, तीं इस दाने कम अन्तर बि बधीण दिए। 8 अउं एसे बारे कोई निआंग देण नेईं लगो, बल्कि होरी के जोश हेर कइ तुं परेमे सच्चाई परखणे लिए बोलुण लगो असा। 9 तुसी हें प्रभु यीशु मसीहे कृपाई बारे त पता असा। से कीं स्वर्ग अन्तर अमीर भोई कइ बि तुं लिए इस धरती पुठ गरीब बण कइ जमा, ताकि तसे गरीब बणणे बेलिए तुस अमीर बण घिए। 10 एस कमे बारे अउं तुसी जे यक सलाह देन्ता, जे तुं लिए खरी असी। पारु, तुसे थिए जेन्हि सोबी केआं पेहले दान देणे शुरु किआ, त सोबी केआं पेहले दान देणे इच्छा बि तुन्धेरी थी। 11 तोउं त, तुं लिए अब ईं खरु असु कि एस कम अब तुस अपु कमाई हिसाब जोई पूरु करे। तुस तीं मन लाई कइ पूरु करे, जीं मन लाई कइ तुसी दान देणे बारे सोचो थी। 12 किस कि अगर तुस खुले मन जोई दान दियेल त परमेश्वर खुश भुन्ता। त तुसी केआं जत भोई सकतु, तत दान दिए, ना कि इधौरीया-ओधौरिया, टाइ-टुई कइ। 13 अउं ईं ना चहन्ता कि होरी सुख देणे लिए तुसी कष्ट लौता लगो, बल्कि अस चहन्ते कि सोब बराबर लौते। 14 इस वकत तुं अमीरी तेन्के गरीबी दूर कती, ताकि एणे बाड़े रोज अन्तर तेन्के अमीरी तुं गरीबी दूर कइ छड़ियेल। त ईं कर कइ बराबरी भोई घेन्ति। 15 जीं कि धरमे कताब अन्तर लिखो असु,
जेन्हि सेa सुआ बेह्ढ़ो थिउ, तेन्के सुआ ना भु,
त जेन्हि धिक भइ बेह्ढ़ो थिउ, तेन्के घट ना भु।b
तीतुस त तसे साथी
16 परमेश्वरे जइ करे कि तेन तुं बारे तीतुसे धे बि तीं मन दुतो असा, जीं हें असा। 17 किस कि तेन सद हें छनेअरे बझई जुए ना, बल्कि से अपफ बि तुं बारे सोचता। तोउं त, से खुश भोई कइ तुं ए एण जे राजि भुआ। 18 तस जुए अस यक होरा भाई बि लंघाण लगो असे। सोबी सतसंग एस भाई बारे बोते कि से खुश खबरी प्रचार करण अन्तर सुआ कष्ट कता। 19 तस केआं बध कइ, अस जे दान नेणे सेवा करण लगो असे, एस अन्तर असी जुए साते बिशुण जे सोबी सतसंगे से नियुक्त किओ असा। किस कि अस परमेश्वरे महिमाईं लिए त मदत करण जे ईं ए कम कते। 20 त अस ना चहन्ते कि दान देणे इस खरु कम करण अन्तर कोई बि हें बुराई करियेल। 21 किस कि अस तेस कम करण जे कष्ट उठाण लगो असे जे कम ना सद प्रभु खुश कता, बल्कि मेह्णु बि सही लगतु।
22 तेन्हि दुहि जुए, अस हें यक होरा भाई बि लंघाण लगो असे, जेन सुआ कमे बेलि साबित किओ असु कि से मदत करण चहन्ता। अब त से हउ बि मदत करण चहन्ता किस कि तुसी पुठ तसे सुआ यकीन भोई गो असा। 23 तीतुसे बारे अगर कोई पुछता त से खुश खबरी प्रचार करण अन्तर में साथी असा त तुसी बुछ सेवा कता। जे होरे भाई एण लगो असे, से सतसंगे चुणो अपु प्रतिनिधि असे। तेन्के बेलि मसीहे सुआ महिमा भुन्ति। 24 तोउं त, एन्हि मेह्णु जे मसीह अन्तर तुस अपु परेम हराले त साबित करे कि तुं बारे अस किस रोभ लान्ते। तोउं होरे सतसंगी बि पता लगियाल।