7
1 त ए ट्यारेओ, परमेश्वरे इ सोब जुबान हें धे दुतो असी। त चले, जे कुछ बि हें आत्मा त जिसम अन्तर मैल असा तेस दूर करे। त परमेश्वर मनी कइ यकदम शुचा बणे।पौलुसे खुशी
2 अपु मन हें लिए खोल कइ रखे। असी न केसेरी बुरु किउ, न कोउं बरबाद किआ, होर न केसेरी फायदा उठा। 3 अउं तुसी दोष देण जे नेईं बोलुण लगो। किस कि मेईं तुसी जे पेहलाई बोल छो असु कि तुस हें मन अन्तर ईं बस गो असे कि अस तुसी जुओई साते जीण मरण जे बि तेयार असे। 4 मोउं तुसी पुठ पूरा भरोसा असा। अउं तुसी पुठ सुआ घमण्ड कता। मोउं ती शान्ति मेई। हें अत दुख तकलीफ अन्तर भुणे बावजूद बि तुसी हें हिम्मत बधाई त खुश कइ छड़े।
5 जपल अस मकिदुनिया राज्य आए, तपल असी धिक भइ बि शान्ति ना मेई। असी सोबी कनारा दुख तकलीफ मेतीथ। बाहर मेह्णु के झगड़ीण थिउ त मन अन्तर डर थिआ। 6 पर जे दीन दुखी मेह्णु के हिम्मत बधान्ता, तेन परमेश्वरे तीतुस भाई लंघाई कइ हें हिम्मत सुआ बधाई। 7 सद तसेरी एणे बेलि हें हिम्मत ना बधी, बल्कि तुसी जे हिम्मत तसे धे दुतो थी, तस हेर कइ बि ती खुश भुए। हें लिए तुस कत दुखी असे त हें बारे तुस कत परेशान भुन्ते, तसे बारे तेन असी शुणाउ। 8 मोउं पता असा कि में चिट्ठि बेलि तुसी दुख जरूर भुओ असा। मोउं बि धिक भो थिआ। तोउं बि मोउं कोई दुख नेईं, किस कि में चिट्ठि बेलि जे दुख तुसी भुआ, से घड़ी पले लिए थिआ। 9 त अउं खुश असा। इस बझई जुए नेईं कि मेईं तुसी दुख दिता, बल्कि इस बझई जुए कि तेस दुखे बेलि तुसी अपु मन बदला। किस कि जे दुख तुसी भुआ, से परमेश्वरे कनारा थिआ, ताकि हें बोकी के बेलिए केसे जेईं बि बुरु ना लगियेल। 10 किस कि जेस दुख अस परमेश्वरे इच्छा मान कइ मानते, तसे बेलि असी पछतावा भुन्ता त से असी बचाणे कम कता। पर मतोके दुख मार छता। 11 अब हेरे! परमेश्वरे इच्छाई बेलि जे दुख तुसी भो असा, तसे बझई जुए तुसी की भुओ असु। तुस अपफ हरालण चहन्ते कि तुस बजन दोषे असे। तुस अपफ पुठ नाराज असे। तुस हैरान भोई गो असे त पंची कर कइ असी मनाण जे बि भाड़ बिशो असे। इसे बेलि तुसी हरालो असु कि एस बोक पुठ तुस सही असे। 12 त मेईं जे लिखो थिउ, से ना तेन्हि जे जेन्हि गलती किओ असी, होर ना तेन्हि जे जेन्हि दुख भुओ असा। मेईं त लिखो थिउ, ताकि परमेश्वर सामणि तुसी पता लगियाल कि तुस हें कत ख्याल रखते। 13 त इस बझई जुए तुसी हें हिम्मत बधाओ असी।
तीतुसे खुशी हेर कइ बि अस सुआ खुश असे, किस कि तुं बारे तसे सम्हाई परेशानी खतम भोई गो असी। 14 तेसे सामणि तुं बारे मेईं रोभ लाओ थिआ, त तुसी अउं नराश ना किआ। पर तुं बारे हें हर यक बोक जीं सच्ची थी, तीं तुं बारे तीतुसे अगर हें रोभ लाण बि सही साबित भुआ। 15 त तुं बारे तसे परेम हउ बि बधो असा, किस कि से याद कता कि तुसी कीं हें बोक मान कइ, त पूरे इज्जत जुए से धरा। 16 अउं सुआ खुश असा कि अउं तुसी पुठ पूरा यकीन कइ सकता।