6
1 परमेश्वर जुए साते कम करणे बझई जुए अस तुं छने कते कि परमेश्वरे जे कृपादृष्टि तुसी पुठ किओ असी, तस बेकार न भुण दिए। 2 किस कि धरमे कताब अन्तर लिखो असु,“मेईं अपु ठीक किओ टेम पुठ तें शुणी,
त बचणे रोज अउं तें साथ देण जे आ।”a
त हेरे, तसे “ठीक किओ टेम” त ई असा। त से “बचणे रोज” बि एईएं असा।
3 अस ईं कशि बिश्ते कि हें जीण त लियागते बेलि केसे जेईं बि कोई उछुट ना लगे त हें कम अन्तर कोई कमी ना रिहे। 4 बल्कि कष्ट अन्तर, भुंजुण अन्तर, गरीबी अन्तर, दुख त शोक अन्तर अस ईं हरालणे कोशिश कते कि अस परमेश्वरे सेवक भो। 5 ई हरालण जे कि अस तसे सेवक भिन्थ, असी चाबुके मार खओ असी, जेहेल अन्तर कैद भो असे, हुसुड़े सामणा किओ असा, मजूरी के ईं कष्ट किओ असा, रात भइ खड़ खड़ बिशो असे, त ढुके रेहो असे। 6-8 तोउं बि असी अपफ शुचे त शान्त रखो असे। असी हर बोकी पुठ समझ, परेम त दाह हरालो असी। चहे मेह्णु हें इज्जत करियेल या ना, चहे मेह्णु असी जे खरु बोलियेल या ना, शुची आत्माई वरदान, परमेश्वरे शक्ति, सच्चाई त धर्मी जीवने बेलि अस हर बेधर्मी कम रोकते। बेशक मेह्णु असी झुठी शिक्षा देणे बाड़े समझते, तोउं बि अस सच्चाई बोते। 9 बेशक मेह्णु असी अणजाण समझते, तोउं बि अस सोबी के बाकम असे। बेशक मेह्णु समझते कि जीणे हें कोई उम्मीद नेईं, तोउं बि अस जीन्ते असे। मेह्णु अस कुटो असे, तोउं बि अस मरो नेईं। 10 असी पुठ सुआ दुख अओ असे, तोउं बि अस हमेशा खुश रेहन्ते। अस गरीब असे, तोउं बि असी सुआ जेईं अमीर बणओ असे। असी केईं कुछ नेईं, तोउं बि असी केईं सोब कुछ असु।
11 ए कुरिन्थुस शेहरे मेह्णुओ, असी तुसी जुए खुल कइ बोक किओ असी त हें मन तुसी जे साफ असा। 12 असी तुस कदी बखरे नेईं किओ, बल्कि तुसी अपफ अस बखरे किओ असे त असी जुए परेम ना कते। 13 त में अपु गभुर समझ कइ, अउं तुसी जे बोता कि “हें ईं, तुस बि असी जे अपु मन खुला रखे।”
14 ए ट्यारेओ, जीं मेह्णु चूर जूंण पड्डे लान्ते, तीं तुस बि अविश्वासी मेह्णु जुए साते ना जुड़े। किस कि धरम त पाप बुछ कि कुछ बराबरी असी ना? टगड़ियार त अन्हारे बुछ की मेल मिलाप असा ना? 15 मसीह त बालजेबुलb बुछ कि कोई समझौता असा ना? ना! तिहांणि यक विश्वासी त अविश्वासी बुछ कोई बराबरी नेईं। 16 परमेश्वरे देहरे अन्तर मुर्ति के कोई कम नेईं। अस जीन्ता परमेश्वरे देहेर भो, किस कि परमेश्वरे बोलो असु कि
“अउं तेन्के बुछ बिश्ता त तेन्हि जोई साते हंटता,
अउं तेन्के परमेश्वर भुन्ता त से में प्रजा भुन्ते।”c
17 तोउं त, प्रभु बोता, “तेन्हि पापी मेह्णु बिचा तुस इएर आईए,
तेन्हि केआं बखरी घिए!
त कोई बि जुठी चीज ना छुए, तोउं अउं तुसी धरान्ता।”d
18 “त अउं तुं बोउ भुन्ता, होर तुस में गभुर भुन्ते।”e
प्रभु परमेश्वर ई बोता।