यीशु टोवाण
18
1 परमेश्वर जे ई सोब बोल कइ यीशु अपु चेली जुए किद्रोन नओएं यक नाह पार घेई गा। तठि यक बग थिआ, जेस अन्तर यीशु त तसे चेले घेई गे। 2 यहूदा, जे तस धोखा देण बाड़ा थिआ, तस बि अस जगाई बारे पता थिआ, किस कि सुआ लिंग यीशु अपु चेली जुए अस जगाह अओ थिआ। 3 तपल यहूदा मुख्य पुजारे त फरीसी के लंघो रोमी सपाही के यक पलटन, त देहरे कुछ सपाही, दल्हुण त लालटेन जाई-जुई त हथियार घिन तठि आए। 4 तपल यीशु बाहर आ, किस कि तस पता थिआ कि तस पुठ की की भुणे बाड़ु असु, त तेन तेन्हि सम्हाई जे बोलु, “केस तोपुण लगो असे?” 5 तेन्हि तस जे बोलु, “नासरत ग्रांए यीशु।” त यीशु तेन्हि जे बोलु, “अउं सेईंए भो।” (तस धोखा देण बाड़ा यहूदा तेन्हि जुए खड़ खड़ थिआ), 6 जपल यीशु तेन्हि जे ईं बोलु कि “अउं सेईंए भो”, त से सम्हाई पतूं जे खिरक कइ भीं डूल गे। 7 तोउं यीशु तेन्हि केआं दुबारी पुछु, “तुस केस तोपुण लगो असे?” त तेन्हि बोलु, “नासरत ग्रांए यीशु।” 8 त यीशु तेन्हि जे जवाब दुतु “मेल, अउं सेईंए भो।a अगर तुस मोउं तोपुण लगो असे, त इन्हि घेण दिए।” 9 ए तोउं भु कि तसे से वचन पूरा भुओल जे तेन बोलो थिआ कि“जे तुसी मेन्धे दुतो असे,
तेन्हि बुचा मेईं यक बि ना गड़ा।”b
10 तपल शमौन पतरसे अपु छूरि किढ़ कइ बोडा पुजारे नौखर, जे तसे भेएड़ थिआ, तसे देहणा कन छोलि फटा। तेस नौखरे नओं मलखुस थिउ। 11 तपल यीशु बोलु, “पतरसा, पतरसा! अपु छूरि अन्तर रख: परमपिता परमेश्वर जे दुख सेहण जे मेन्धे दुतो असा, तस कि अउं सेहन्ता नउ ना?”c
12 तपल रोमी सपाही त तेन्के सेनापति त देहरे सपाही से टाइ कइ बन्ह छड़ा 13 त पेहले तस हन्ना केईं घिन गे, जे तेस साले बोडा पुजारा काइफे शहुर थिआ। 14 ए सेईंए काइफा थिआ, जेन यहूदी नेते जे सलाह दुतो थी कि, अपु मेह्णु लिए यक मेह्णु मरण सही असा।d
शमौन पतरस यीशु पिछाणुण केआं पेहली बार मुकीर घेण
15 शमौन पतरस त होरा यक चेला बि यीशु पता घेण लगे। किस कि होरा चेला बोडा पुजारे बाकम थिआ, त से होरे मेह्णु त यीशु जुए बोडा पुजारे अन्तर घेई गा। 16 पर पतरस दुआरे भेएड़ खड़ खड़ बिशा त होरा चेला जे बोडा पुजारे बाकम थिआ, एई कइ दुआर पुठ बिशो नौखराणि जे बोल कइ से अन्तर नीआ। 17 तेन नौखराणि पतरस जे बोलु, “तु बि अस मेह्णु चेली बुच यक भो ना?” त तेन बोलु, “ना! अउं ना भो।”
18 किस कि सुआ ठन्नु थिउ दे नौखर त देहेर अन्तर पेहरा देण बाड़े सपाही अंगार जाई कइ निघिण लगो थिए। त पतरस बि तेन्हि जुए निघिण लगा।
बोडा पुजारा हन्ने यीशु पंची करीण
19 तपल पेहलकण बोडा पुजारा हन्नेe यीशु चेली त तसे शिक्षाई बारे पूछताछ की। 20 यीशु तस जे जवाब अन्तर बोलु “मेईं सोबी के अगर शिक्षा दुतो असी; मेईं अराधनालय अन्तर त देहेर अन्तर जेठि सम्हाई यहूदी किठे भुन्ते, तठि शिक्षा दुतो असी त नियोख कइ कुछ नेईं बोलो। 21 त तुस मोउं किस पुछुण लगो असा? मोउं शुणणे बाड़ी पुछुण दिए, किस कि तेन्हि सोबी पता असा कि मेईं की की बोलो असु।”
22 जीं तेन ईं बोलु त देहरे सपाही, जे तस भेएड़ खड़ खड़ थिआ, तस पुठ यक चटाका दिता त बोलु, “तु बोडे पुजारे जोई ईं बोक कता ना?” 23 यीशु तस जे बोलु, “अगर मेईं कोई गलत बोलु त तसे उगाह कर; पर अगर मेईं ठीक बोलो असु त तेईं अउं किस मडा?” 24 हन्ने बन्होरा से बोडे पुजारे काइफा केईं जे लंघा।
शमौन पतरस यीशु पिछाणुण केआं फि मुकीर घेण
25 शमौन पतरस खड़ खड़ निघिण लगो थिआ दे किछ मेह्णु तस जे बोलुण लगे, “तु बि एसे चेला भो ना?” त तेन मुकीर कइ बोलु, “अउं ना भो।”
26 तोउं बोडा पुजारे नौखरी बुच यक तसे रिश्तेदार थिआ, जेसे कन पतरसे छल फटओ थिआ। तेन पतरस जे बोलु, “कि तु मेईं यीशु जुए बग अन्तर ना का ना?” 27 पतरस, फिर मुकीर गा त तिखेईं कुकड़े बांग छइ।
राज्यपाल पिलातुस यीशु पंची करीण
28 तोउं पथवारी तेन्हि यीशु काइफे गीहा रोमी राज्यपाल पिलातुसे मेहेल जे नीआ। पर से अपफ अन्तर ना गे, किस कि से अपफ जुठे भुणf ना चहन्तेथ, ताकि बचणे त्योहारे रौठि खाई सकियेल। 29 त पिलातुस तेन्हि जे बाहर निसा त बोलु, “तुस इस मेह्णु पुठ की दोष लान्ते?” 30 तेन्हि तस जे बोलु, “अगर ए दोषी ना भुन्ताथ त अस तुं हवाले ना कतेथ।” 31 पिलातुसे तेन्हि जे बोलु, “एस नी कइ तुस अपफ अपु नियमे मुताविक एसे पंची किस ना कते?” पर यहूदी नेती तस जे बोलु, “केसे मारणे सज्जा शुणाणे हक असी नेईं मेओ।g” 32 ए तोउं भुआ ताकि यीशु अपु मरणे बारे जे बोक बोलो थीh, से सच्ची भुओल।i
33 तोउं पिलातुस मेहेल अन्तर घेई कइ यीशु भिआ त तस केईआं पुछु, “तु कि यहूदी मेह्णु के राजा भो ना?” 34 यीशु बोलु, “ए बोक कि तुस अपफ पुछुण लगो असे ना? ना होरी मेह्णु में बारे तुसी जे बोलो असु?” 35 पिलातुस तस जे जवाब दिता, “अउं कि यहूदी भो ना? तें मुख्य पुजारे त तें जाति मेह्णु ईं तु में हवाले किओ असे। बोल तेईं की किओ असु?” 36 यीशु तस जे बोलु, “में राज्य इस धरती नेईं। अगर भुन्ताथ त में सेवक लड़तेथ त जीं तीं कइ यहूदी नेते मोउं टाण केआं बचान्तेथ। पर सच्चु त इ असु कि में राज्य इस धरती नेईं।” 37 त पिलातुसे बोलु, “त तु यक राजा असा ना?” यीशु तस जे बोलु, “तुस त बोते कि अउं राजा भो। अउं इस बझई जोई ईं इस धरती पुठ जमो असा, ताकि सच्चाई की असी तसे उगाही देन्ता। जे बि सच्चाई अन्तर जीन्ते, से में बोक जाणते कि अउं सच्चु बोता।” 38 त पिलातुसे तस केईआं पुछु, “त सच्चाई कि भो?” ई बोल कइ से दुबारी यहूदी नेती केईं जे बाहर गा त तेन्हि जे बोलु, “मोउं तेस अन्तर कोई दोष ना मेता। 39 बचणे त्योहार बुच मोउं तुसी जे यक कैदी छड़ देणे तुं रिवाज असा। त कि ई यहूदी के राजा तुसी जे छड़ देण ना?” 40 त तेन्हि सम्हाई लियार दी कइ बोलु, “ना, एस ना छड़े, पर असी जे बरअब्बा छड़ दे।” बरअब्बा यक डाकु थिआ।