यीशु मारण जे यहूदी नेती के मेझर
26
1 ई सोब बोके बोलुण केआं पता, यीशु अपु चेली जे बोलु। 2 “तुसी त पता असा कि दुई रोज बाद बचणे त्योहारa एणे बाड़ा असा, तिखेईं कोउं जेईं मनखे कुआ क्रूस पुठ मारण जे टोवान्ता।”3 होर कना, यहूदी मेह्णु के मुख्य पुजारे त टजे स्याणे, “काइफा” नओएं बोडे पुजारे मेहेल अन्तर किठिए। 4 त से अपफ बुच मेझर करण लगे कि यीशु ठगाई कइ कीं टाण त मार छाण। 5 पर तेन्हि ई बि बोलु कि “त्योहारे टेम ना करण। ईं न भो कि मेह्णु अन्तर बबाल मच घियाल।”
मुश्कदार तेल लाई कइ यक जिल्हाणु यीशु इज्जत देण
6 जपल यीशु बैतनिया ग्रां अन्तर शमौन नओएं यक मेह्णु गी थिआ, जेस पेहले कोढ़ भुओ थिआ, 7 त यक जिल्हाणु संगमरमरे यक बोतल अन्तर सुआ कीमति इत्र घिन कइ तसे भेएड़ आई त से सोब तसे मगिर पुठ डोल छड़ा। तपल यीशु रौठि खाण जे बिशो थिआ।b 8 ईं हेर कइ तसे चेले लेहरी गे त बोलुण लगे, “ए बरबाद किस किआ? 9 एस त खरे कीमति बेच कइ कंगाली अन्तर बांटतेथ।” 10 ईं शुण कइ यीशु तेन्हि जे बोलु, “तुस एस जिल्हाणु किस तंग करण लगो असे? एन मोउं जोई भलाई किओ असी। 11 कंगाल त तुसी जोई हमेशा बिश्ते, पर अउं तुसी जोई हमेशा न रेहन्ता। 12 एन जे इत्र में शरीर पुठ डोलो असा, से मोउं पथणे लिए किओ असु। 13 अउं तुसी जे बोता, पूरे धरती अन्तर जेठि कोठि इस खुश खबरी प्रचार भोल, तठि एसे इस कमे चर्चा बि हमेशा भुन्ति रेहती।”
यीशु टोवाणे लिए यहूदा इस्कारियती चाल
14 तोउं यहूदा इस्कारियती, जे यीशु बाराह चेली अन्तरा यक थिआ, तेन मुख्य पुजारी केईं घेई कइ बोलु, 15 “अगर अउं यीशु तुं हथ टोवाई छउं त तुस मेन्धे की देन्ते?” तेन्हि तसे धे तिह चन्नी मेलकी गिण कइ दी छड़े। 16 तोउं से यीशु टोवाणे मौका तोपुण लगा।
यीशु चेली जुए बचणे त्योहार मनाण
17 रौठि त्योहारे पेहले रोज, चेले यीशु भेएड़ एई कइ पुछुण लगे, “बचणे त्योहारे रौठि तुस कोठि तेयार करण चहन्ते?” 18 तेन बोलु, “यरुशलेम शेहर अन्तर फुलाणे मेह्णु केईं घिए त तेस जे बोले, ‘गुरु बोता कि में टेम भेएड़ एई गो असा। तें गी अउं अपु चेली जोई साते त्योहार मनान्ता।’” 19 त जीं यीशु बोलो थिउ तिहांणि चेली किउ। त बचणे त्योहारे रौठि बणाई।
20 पता, जपल ब्यादि भुई त यीशु बाराह चेली जोई साते रौठि खाण बिशा। 21 होर जपल से खाण लगो थिए, तेन बोलु, “अउं तुसी जे बोता कि तुसी अन्तरा यक जेईं मोउं में दुश्माणी के हथ टोवान्ता।” 22 ई शुण कइ चेले ती उदास भोई गे, त हर यक जेईं तेस केआं पुछुण लगे, “प्रभु, से अउं त ना भो?” 23 तेन जवाब दुतु, “जेन मोउं जोई साते मंगाई अन्तर हथ छो थिउ, सेईंए मोउं टोवान्ता। 24 मनखे कुआ त जीं तसे बारे धरमे कताब अन्तर लिखो असु, घेण असु। पर तेस मेह्णु खेया खाट भोई घेन्ति, जे मनखे कुआ धोखा दी कइ टोवान्ता। तेस मेह्णु लिए खरु भुन्तुथ अगर से जमोरा ना भुन्ताथ।” 25 तोउं तेस टोवाणे बाड़ा इस्कारियती यहूदे बोलु, “ए गुरु, से अउं त ना भो?” तेन तेस जे बोलु, “तेईं सही बोलु।”
प्रभु बेह्लु रीति बणाण
26 जपल से रौठि खाण लगो थिए, यीशु यक रौठि टाती, परमेश्वरे धन्यवाद दी कइ टुकड़ेरी, त चेली कें धे दी कइ बोलु, “ए नीए त खाण दिए; ए में जिसम भो।” 27 फिर तेन दाखरसे कटोरा टाई कइ परमेश्वरे धन्यवाद किआ, त तेन्के धे दी कइ बोलु, “तुस सोब इस अन्तरा पिए। 28 किस कि ए परमेश्वरे जुबाने में से लहु भो,c जे अउं सुआ मेह्णु के पाप माफ करण जे बोहान्ता। 29 अउं तुसी जे बोता कि तपल तकर अउं फिर कदी दाखरस न पीन्ता, जपल तकर अउं अपु बोउए राज्य अन्तर तुसी जोई साते ना पीन्ता।” 30 तोउं से छुआंरी लाई कइ जैतुन बुटे फाट पुठ जे गे।
पतरसे मुकरणे बारे यीशु भविष्य वाणि
31 तोउं यीशु तेन्हि जे बोलु, “आज रात तुस सोब मोउं छड़ देन्ते, किस कि धरमे कताब अन्तर लिखो असु:
‘अउं पुहाल मार छता,
त ढडुड़ इएर-ओवर बिडिड़ घेन्ते।’d
32 पर दुबारी जीण केआं पता अउं तुसी केआं पेहलाई गलील राज्य जे घेई घेन्ता।” e 33 त पतरसे तेस जे बोलु, “ए गुरु, ए सोब तोउ छड़ दी कइ नश बि घियेल त अउं कदी तोउ छड़ न देन्ता।” 34 यीशु तेस जे बोलु, “पतरसा! अउं तोउ जे बोता, आजे रात कुकड़े बांग देण केआं पेहलाई तु मोउं पिछाणणे केआं टाई लिंगि मुकीर घेन्ता।” 35 पतरसे बोलु, “तें लिए मोउं अगर मरुण बि एईयेल ना, तोउं बि अउं तुसी पिछाणणे केआं न मुकरीन्ता।” तिहांणि सोबी चेली बि बोलु।
गतसमनी अन्तर यीशु प्रार्थना करण
36 तोउं यीशु अपु चेली जोई जैतुने फाटे गतसमनी नओएं यक जगाई गा त अपु चेली जे बोलुण लगा, “अउं ओठि घेई कइ प्रार्थना कता, तोउं तकर तुस इठि बिशे।” 37 से पतरस त जबदी दुहि कुआ याकूब त यूहन्ना साते घिन गा। तोउं से ती उदास त परेशान भुण लगा। 38 तोउं तेन तेन्हि जे बोलु, “मोउं सुआ अवज ईं भुण लगो असु। ईं लगतु जीं में कांया उचेईंण लगो असी। तुस इठि मोउं जोई खड़ खड़ बिशे।” 39 तोउं से तठिआ थोड़ा अगर घेई कइ उटेऊ बिश गा, त प्रार्थना करण लगा, “ए में बोउआ! अगर भोई सकतु त एस दुखे घड़ी केआं मोउं बचा। तोउं बि जीं अउं चहन्ता तीं ना, पर जीं तु चहन्ता तीं लौतु भो।” 40 तोउं से चेली के भेएड़ एई गा त से उंघोरे मेईंए त तेन पतरस जे बोलु, “तुस मोउं जोई यक घड़ी बि खड़ खड़ न बिश बटे ना? 41 खड़ खड़ बिश कइ प्रार्थना कते रिहे, ताकि तुस परीक्षा अन्तर न पड़ेल: तुं मन त तेयार असा, पर जिसम कमजोर असा।” 42 तोउं तेन दुबारी घेई कइ प्रार्थना की, “ए में बोउआ, अगर ए दुख मोउं सेहणे ईं असा त तें इच्छा पूरी भो।” 43 पता फिर आ त से सोब उंघोरे थिए, किस कि तेन्के टीर लग गो थी। 44 त से फिर तेन्हि छड़ दी कइ घेई गा, त टेके लिंगि तिहांणि प्रार्थना की। 45 तोउं चेली के भेएड़ एई कइ तेन चेली जे बोलु, “खरी, खरी! की तुस अपल तकर उंघोरे त अराम करणे बिशो असे ना? हेरे, से घड़ी एई गई जपल मनखे कुआ दुष्ट मेह्णु हथे टोवेईन्ता। 46 बसे बे, खड़ भुए त हंटे। हेरे! मोउं टोवाणे बाड़ा पुजी गो असा।”
यहूदा इस्कारियतीए धोखे जोई यीशु टोवाण
47 यीशु ईं बोलुण लगो थिआ दे यहूदा, जे बाराह चेली बुचा यक थिआ तठि पुजा। तेस जोई मुख्य पुजारे, त टजे स्याणी लंघो सुआ हुसुड़ा तलवार त लठि घिन कइ अओ थिए। 48 त तस टोवाणे बाड़ा यहूदा तेन्हि जे निशाणी बारे बोल रखो थिउ कि “जेस अउं गड़ामेड़ा कर कइ फोकड़िआंउ; सेईंए यीशु भो; से टाण।” 49 त तेन झठ यीशु भेएड़ एई कइ बोलु, “गुरुजी, नमस्ते!” त गड़ामेड़ा कर कइ फोकड़िआ। 50 यीशु तेस जे बोलु, “ए दोस्ता, जेस कम जे तु अओ असा, तेस कइ छड़।” तोउं तेन्हि भेएड़ एई कइ यीशु टाइ कइ बन्ह छड़ा। 51 अचानक, यीशु चेली अन्तरा यक जेईं अपु छूरि टाती त बोडे पुजारे यक नौखरे कन छोलि फटा। 52 त यीशु तेस जे बोलु, “अपु छूरि अन्तर रख, किस कि जे छूरि चलान्ते, से सोब छूरि बइ खतम भोई घेन्ते। 53 तु न जाणता ना कि अगर अउं अपु बोउ केईं प्रार्थना करुं त से यकदम ईं बाराह पलटन केआं बि ज्यादा स्वर्गेदूत इठि लंघान्ता? 54 पर अगर तीं करुं त धरमे कताब अन्तर लिखो बोक कीं कइ पूरी भुन्ति, जे बोती कि ईं भुण जरूरी असु?” 55 त तेस टेम यीशु हुसुड़े जे बोलु, “तुस तलवार त लठि घिन कइ मोउं ईं टाण जे अओ असे, जीं कोई अउं यक डाकु भो। अउं रोज के रोज देहेर अन्तर एई कइ शिचालताथ। तिखेईं तुसी अउं न टाता।f 56 पर ई सोब तोउं भु ताकि भविष्य वक्ती बोलो वचन पूरा भोल।” तोउं सोब चेले तेस छड़ दी कइ तठिआ नश गे।
यहूदी मेह्णु के टजोट अन्तर यीशु पेशी
57 तोउं तेन्हि यीशु टाइ कइ बोडा पुजारा काइफा केईं नीआ। तठि धर्मशास्त्री त टजे स्याणे किठे भो थिए। 58 पर पतरसे दुरारी तसे पता पता बोडा पुजारे आंगण तकर गा त सपाही जुए बिशा ताकि यीशु जुए की भुन्तु से पता लगियेल। 59 मुख्य पुजारे त टजोटे मेह्णु यीशु खिलाफ झूठे उगाह तोपुण लगो थिए ताकि तस मार सकियेल। 60 सुआ झूठे उगाह देण जे आए, पर कोई बि तेन्हि सही ना लगु। तढ़िया पता दुई मेह्णु आए। 61 तेन्हि बोलु, “एन बोलो असु कि ‘अउं परमेश्वरे देहेर ढेई बटता त तेस टाई रोज अन्तर दुबारी बणाई बटता।’”g 62 तपल बोडा पुजारे खड़ भोई कइ यीशु जे बोलु, “तु कि कोई जवाब न देन्ता ना? ए मेह्णु तें खिलाफ ईं की उगाही देण लगो असे?” 63 यीशु नरदोष थिआ, तोउं बि से चुप बिशा। तोउं बोडा पुजारा तेस जे बोलु, “अउं तोउ जीन्ते परमेश्वरे सोह देन्ता कि अगर तु परमेश्वरे कुआ ‘मसीह’ भो त असी जे बोल।” 64 यीशु तेस जे बोलु, “तेईं अपफ बोल छउ। तोउं बि अउं तोउ जे बोता कि अभेईं केआं खड़ तुस मनखे कुआ सर्व शक्तिमान परमेश्वरे देहणा कना बिशो त अम्बरे बदेए पुठ एन्ते हेरते।” 65 तोउं बोडा पुजारा अपु झिणे चीरे त बोलु, “एन परमेश्वरे बेज्जती की! अब असी उगाही के की जरूरत असी? तुसी त अभेईं शुणु ना! 66 तुं पंची की असी?” तेन्हि जवाब दुतु, “ए त मारणे लेएक असा।” 67 तोउं तेन्हि तसे मुंह पुठ थुकु, मुकेया दिती त तेस मडण लगे, 68 तोउं फूल बणाई कइ बोलु, “ए मसीह! असी जे भविष्य वाणि कर कइ बोल कि तु केन मडा?”
पतरसे यीशु पिछाणुण केआं मुकरुण
69 पतरस बाहर आंगण अन्तर बिशो थिआ। त यक नौखराणि तसे भेएड़ आई त बोलु, “तु बि त गलील राज्ये तेस यीशु जोई साते थिआ।” 70 तेन सोबी के सामणि ई बोल कइ ना कइ छड़ा कि “तु की बोलुण लगो असी, मोउं त कुछ पता नेईं।” 71 जपल से बाहर दुआर केईं गा त होरी नौखराणि तस हेर कइ तठि बिशो मेह्णु जे बोलु, “ए त नासरत ग्रांए यीशु जोई साते थिआ।” 72 से फिर सोह कर कइ मुकीर गा कि “अउं तेस मेह्णु न जाणता।” 73 तोउं कुछ देर पता, जे मेह्णु तठि खड़ खड़ थिए पतरसे भेएड़ एई कइ बोलु, “सच्चे, तु बि तेन्हि बुचा यक भो, किस कि तें बोकी केआं पता लग घेन्ता।” 74 तोउं तेन अपफ पुठ सोह कर कइ बोलु, “अउं तेस मेह्णु न जाणता।” तिखेईंए कुकड़े बांग दी छइ। 75 त पतरस यीशु बोलो बोक याद एई गई: तेन बोलो थिउ “पतरसा! अउं तोउ जे बोता, आजे रात कुकड़े बांग देण केआं पेहलाई तु मोउं पिछाणणे केआं टाई लिंगि मुकीर घेन्ता।” तोउं से तठिआ बाहर घेई कइ जोरी जोरी रोलुण लगा।