यीशु खिलाफ मेझर त यीशु मारण
(22:1—23:56)
यीशु खिलाफ मेझर
22
1 रौठि त्योहार जेसे “बचणे त्योहार”a बि बोते एणे बाड़ा थिआ; 2 त मुख्य पुजारे त धर्मशास्त्री यीशु मारुण जे मौका तोपुण लगोरे थिए। पर से जे मेह्णु तस शुणुण जे किठिए थिए तेन्हि हेर डरतेथ।3 तिखेईं शैतान यहूदे जेसे जे इस्कारियती बि बोतेथ, तस अन्तर घेई गा। से बाराह चेली अन्तरा यक थिआ। 4 तेन घेई कइ मुख्य पुजारे त देहरे पेहरा देण बाड़ी के सरदार जुए बोक की कि यीशु तेन्हि केआं कीं टोवाण। 5 त से सोब खुश भुए त तसे धे रुपेई देणे जुबान दिती। 6 से मान गा त ईं मौका तोपुण लगा जपल यीशु हुसुड़े केईआं अकेला भुन्ता, तिखेईं तेन्हि केआं तस टोवाई छता।
अखिर फेरि चेली जुए बचणे त्योहारे रौठि खाण
7 तोउं, रौठि त्योहारे रोज एई गा, जपल बचणे त्योहारे छिएड़ु भकत देण जरूरी थी। 8 त यीशु पतरस त यूहन्ना जे ई बोल कइ लंघा, “घेई कइ हें खाण जे बचणे त्योहारे रौठि बणाण दिए।” 9 त तेन्हि तस केआं पुछु, “ए गुरु, तुस कि चहन्ता ए असी कोठि बणाए?” 10 तेन तेन्हि जे बोलु, “हेरे, ग्रां अन्तर घेन्ते ईं तुसी यक मेह्णु मेता जे पाणि घाड़ु नेण लगो भुन्ता, से जेस बि गी अन्तर घियेल तुस बि तसे पतोती घेई घिए। 11 त तेस गीहे मालिक जे बोलुण, ‘गुरु तोउ जे ईं बोता कि से भखेरी कोठि असी, जेठि अउं अपु चेली जुए बचणे त्योहारे रौठि खांता?’ 12 से तुसी यक आटी हरालता; तठि तुसी त्योहारे रौठि बणाणि।” 13 तेन्हि घेई कइ जीं यीशु बोलो थी तिहांणि मेउ त से तठि रौठि बणाई।
प्रभु अखिर बेह्लु
14 त जिखेईं बचणे त्योहारे रौठि खाणे टेम भुआ त से अपु प्रतिनिधि जुए रौठि खाण जे बिशा। 15 त तेन तेन्हि जे बोलु, “मोउं बोडी चह थी कि दुख सेहणे केआं पेहले इस बचणे त्योहारे रौठि तुसी जुए खाउं। 16 किस कि अउं तुसी जे बोता कि जपल तकर में बारे परमेश्वरे योजना पूरी ना भोल, तोउं तकर अउं एस ना खांता।” 17 तोउं तेन कटोरा टा त परमेश्वरे धन्यवाद दी कइ बोलु, “इस नीए त अपफ बुच बांटिण दिए। 18 किस कि अउं तुसी जे बोता जपल तकर परमेश्वरे राज्य पूरी ताकत त शान जुए ना एईयाल, तपल तकर अउं दाखरस कदी ना पीन्ता।” 19 तोउं तेन रौठि टाती त परमेश्वर धन्यवाद कइ कइ तसे टुकुड़ किए। होर तेन्के धे ई बोते बोते दिते कि “ए में जिसम भोb, जे तुसी लिए भकत चढ़ो असा : में याद अन्तर इहांणि कते रिहे।” c 20 इहांणि तेन रौठि खाण केआं पता होरा कटोरा बि ईं बोते बोते दिता कि “ए कटोरा बि में तेस लहुए ईं असा, जे में बेलि तुसी जे बहिन्तु। ए परमेश्वरे नोई जुबान असी, जेसे बेलि सम्हाई विश्वासी परमेश्वरे जुए रिश्ता जोड़ते।d 21 पर हेरे, जे मोउं में दुश्माणी केआं टोवान्ता से इठि मोउं जुए रौठि खाण लगो असा। 22 किस कि मनखे कुआ जुए जीं ठीक किओ असु, तीं भुण असु। पर जे तस तसे दुश्माणी केआं टोवान्ता तसे खेया खाट भोई घेन्तु।” 23 त से अपफ बुच बोक विचार करण लगे कि तेन्हि बुचा कोउं असा जे तस टोवान्ता।
अखिरी बेहलु खाण
सोबी केआं बोडा कोउं?
24 पता तेन्हि चेली बुच ई झगड़ा भुण लगा कि तेन्हि अन्तर कोउं सोबी केआं बोडा असा।e 25 त तेन तेन्हि जे बोलु, “होर जाति मेह्णु के राजे, तेन्हि पुठ राज कते त तेन्हि केआं अपफ सुआ बोडे बणान्ते। फि बि से मेह्णु के मितर बोलिन्ते। 26 पर तुस तेन्केरी ईं ना बणे, बल्कि जे तुसी बुच बोडा बणुण चहन्ता, से मठड़ी त जे खास बणुण चहन्ता, से तुं सोबी के सेवा करे।f 27 किस कि बोडा कोउं असा जे खाण जे बिश्ता या से जे सेवा कता? कि से नेईं ना, जे रौठि खाण जे बिशो असा? पर अउं तुसी बुच यक नौखरे ईं असा। त तुस बि में ईं बणे।”g
28 तोउं तेन तेन्हि जे बोलु, “तुस से भीन्थ, जे में परीक्षा अन्तर हमेशा मोउं जुए साते थिए। 29 त जीं में बोउए मेन्धे यक राज्य पुठ हक दुतो असा, तीं अउं बि तुं धे यक राज्य पुठ हक देण लगो असा। 30 ताकि तुस में राज्य अन्तर मोउं जुए खाल पियेल, होर सिंहासन पुठ बिश कइ इस्राएले बाराह ऊड़ी के न्याय करियेल।”hi
पतरसे मुकरणे भविष्य वाणि
31 फिर तेन बोलु, “शमौना, ओ शमौना, हेर! जीं गिहुं पुण कइ साफ कते तिहांणि शैताने तुस मोउं केआं अलग करुं जे परमेश्वर केआं पुछो असु। 32 पर मेईं तोउ जे प्रार्थना की कि तें विश्वास कमजोर ना लौता भुओ। होर जिखेईं तु अपु मन बदलाई कइ मोउं जे वापिस एईयाल त अपु साथी के सुआ कमजोर विश्वास ताकतवर करुं।” 33 त तेन तस जे बोलु, “ए प्रभु, अउं तोउ जुए जेहेल अन्तर एण जे त मरण जे बि तेयार असा।” 34 तेन बोलु, “पतरसा, अउं तोउं जे बोता कि जोउं तकर तुं टाई फेरि मोउं पिछाणण केईआं ना मुकरियाल, तोउं तकर आज कुकड़े बांग ना देन्ता।”
बटुआ, झोड़ा त तलवार
35 तोउं तेन तेन्हि जे बोलु, “जिखेईं मेईं तुस बटुए, झोड़ा त होरे यक जोड़े बूटे बगैर लंघो थिआj त की तुसी केसे चीजे कमी भुओ थी ना?” त तेन्हि बोलु, “केसे चीजे ना”। 36 तेन तेन्हि जे बोलु, “पर अब जेस केईं बटुआ असा, से तस नेण दिए, त तिहांणि झोड़ा बि घिन घिए, त जेस केईं तलवार नेईं से अपु झिणे बेच कइ यक खरीदिण दिए।k 37 किस कि अउं तुसी जे बोता कि ए जे बि में बारे लिखो असु कि ‘मेह्णु तस अपराधी मानते’,m तस मोउं अन्तर पूरु भुण जरूरी असु।l किस कि में बारे लिखो बोके पूरी भुणे बाड़ी असी।” 38 तेन्हि यीशु जे बोलु, “ए प्रभु, हेर इठि दुई तलवार असी।” त तेन तेन्हि जे बोलु, “बस! सुआ भोई गोउ। कपल तकर तुस में बारे परमेश्वरे योजना ना समझते?”
बेहिं भखेरी शिचालण
जैतुने फाट पुठ यीशु प्रार्थना करीण
39 तोउं यीशु बाहर निस कइ रोजेरीं ब्यादि टेम जैतुन फाट पुठ गा। त चेले बि तस जुए गे। 40 तेस जगाई पूज कइ तेन तेन्हि जे बोलु, “प्रार्थना करे कि तुस परीक्षा अन्तर ना पड़ेल त मोउं छड़ दियेल।” 41 त से अपफ तेन्हि केईआं बखरे धिखुभई दूर गा त जिआणु के बल बिश कइ प्रार्थना करण लगा, 42 “बोउआ! अगर तें इच्छा असी त छने इस कटोरा मोउं केआं दूर कइ छड़। तोउं बि में ना बल्कि तें इच्छा पूरी भुओ लौती।” 43 तपल परमेश्वरे यक स्वर्गेदूत तस केईं लंघा जेन तसे धे ताकत त हिम्मत दिती। 44 पर से अपफ पुठ एणे बाड़े कष्टे बारे सोच कइ तसे गण बाहर निसुण लगो थिआ। तोउं त से हउ बि जोरी जोई प्रार्थना करण लगा, त तसे धुप निचणण लगी त लहुए तोफु बण कइ भीं झड़ण लगे। 45 तोउं से प्रार्थना केआं खड़ भुआ त अपु चेली केईं गा। पर से उदास भोई कइ उंघो मिएn। 46 त तेन तेन्हि जे बोलु, “किस उंघो असे, खड़ भुए त प्रार्थना करे कि परीक्षा अन्तर ना पड़ेल।”
यीशु धोखे जुए टोवाण
47 से ईं बोलुण लगो थिआ कि यक हुसुड़ा तठि पुजा, त तेन्हि बारोही बिचा यक जेस नओं यहूदा थिउ, तेन्के अगर अगर एण लगो थिआ। से यीशु भेएड़ आ त गड़ामेड़ा कर कइ फोकड़िआ। 48 त यीशु तस जे बोलु, “ए यहूदा, कि तु फोकड़ियाई कइ मनखे कुआ टोवान्ता ना?”o 49 तसे साथी जिखेईं हेरु कि की भुणे बाड़ु असु त बोलु “ए प्रभु, कि असी मडीण ना?” 50 यीशु कुछ बोलुण केआं पेहले ईं चेली बिचा यक जेईं छूरि चलाई कइ बोडा पुजारे नौखरे देहणा कन छोलि फटा। 51 त यीशु बोलु, “अब बस करे” त तसे कन नी कइ वापस जोड़ छड़ा। 52 तपल यीशु मुख्य पुजारे, देहरे पेहरा देण बाड़े के सरदारे त टजे स्याणे जे, जे हुसुड़ा जुए थिए बोलु, “कि तुस मोउं डाकु समझ कइ लठि त तलवार घिन ओ असे ना? 53 जिखेईं अउं देहेर अन्तर हर रोज तुसी जुए साते थिआ त तुसी मोउं पुठ हथ बि ना लाई बटा। पर, चले! अभेईं तुं टेम असा, त शैताने राज असु।”p
यीशु धोखे जोई टाण त कैद करण
पतरसे मुकरुण
54 तोउं तेन्हि यीशु टाइ कइ नी छड़ा, त बोडा पुजारे गी आणता। पतरस दूर केआं तेन्के पता पता अओ थिआ; 55 त जपल से बराने अन्तर आग जाई कइ साते बिशे त पतरस बि तेन्हि मेह्णु जुए तठि बिश गा कि यीशु जोई कि भुणे बाड़ु असु तस हेरण जे बिशो थिए। 56 त यक नौखराणि तस आगी भेएड़ बिशो हेर कइ तस जे बोलुण लगी, “ए बि त तस जुए साते थिआ।” 57 पर पतरसे ई बोल कइ ना कइ छड़ा “ओ भिलिआ, अउं तस ना जाणता।” 58 धिक ठेहर कइ केनि तसे धे हेर कइ बोलु, “तु बि त तेन्हि बुचा यक असा।” पतरसे बोलु, “ओ यारा, अउं ना भो।” 59 कोई यक घंटे पता यक मेह्णु जोर दी कइ बोलु, “पक्का, ए बि त तस जुए साते थिआ, किस कि ए बि गलीले भो!” 60 पतरसे तस जे बोलु, “ए मनखा, मोउं नेईं पता तु की बोलुण लगो असा।” से ई बोलुण लगो थिआ कि यकदम कुकड़े बांग दी छइ। 61 तोउं प्रभु मुड़ कइ पतरसे धे हेरु। तिखेईं पतरस से बोक याद आई जे तेन बोलो थी कि आज कुकड़े बांग देण केईआं पेहला तु मोउं पिछाणणे केआं टाई लिंगि मुकीर घेन्ता। 62 त से बाहर निस कइ जोरी जोरी रोलुण लगा।
पतरस यीशु पिछाणण केआं मुकुरुण
यीशु बेज्जती भुण
63 जेन्हि मेह्णु यीशु टातो थिआ से तसे मखोल बणाई कइ मडण लगे; 64 त तसे टीर बन्हि कइ तस केआं पुछुण लगे, “भविष्य वाणि कर कइ बोल कि तु केन मडा!” 65 त तेन्हि हउ बि सुआ बेज्जती बेज्जती बोके तस जे बोली।
यहूदी मेह्णु के टजोटे सम्हाणि यीशु
66 जिखेईं भ्यागे भुई त टजे स्याणे, मुख्य पुजारे त धर्मशास्त्री किठा भुए, त यीशु अपु टजोटq अन्तर अण्ह कइ तस केआं पुछुण लगे, 67 “अगर तु समझता की तु मसीह भो त असी जे बोल छड़!” त तेन तेन्हि जे बोलु, “अगर अउं तुसी जे बोता कि ‘अउं भो’, त तुस विश्वास ना कते; 68 होर अगर अउं पुछुण कि तुस कि समझते ‘मसीह’ कोउं भो त तुस कुछ जवाब ना देन्ते। 69 पर अब मनखे कुआ सर्व शक्तिमान परमेश्वरे सुमले कना बिश कइ राज कता।” 70 एस पुठ सोबी बोलु, “त कि तु परमेश्वरे कुआ भो ना?” 71 तेन तेन्हि जे बोलु, “कि तुस ए तोउं बोते ना, किस कि तुसी पता असा कि अउं भो।” त तेन्हि बोलु, “अब असी होर कोई उगाही के जरूरत नेईं, किस कि असी अपु कनि बइ तसे मुंह केआं शुणो असु।”
यीशु फूल बणाण त गणपुछ करीण