गरीब विधवाई दान
21
1 तोउं यीशु हेरु कि अमीर मेह्णु अपु अपु दान दानपात्र अन्तर छाण लगो असे। 2 तोउं तेन यक गरीब विधवा बि तेस अन्तर दुई टामे मेलकीa छान्ति काई। 3 त तेन बोलु, “अउं तुसी जे बोता कि देहरे दानपात्र अन्तर छाणे बाड़ी बुच इन विधवाई सोबी केआं ज्यादु छउ। 4 किस कि सोबी अपु अपु सुआ धन अन्तरा दान दुतो असा, पर एन अपु गरीबी अन्तरा बि अपु पूरी कमाई दान अन्तर दी छइ।”
विधवा जिल्हाणु दान
देहेर उजुड़णे भविष्य वाणि
5 फि जिखेईं कुछ मेह्णु देहेर बारे बोलु लगो थिए कि से कीं बधिआ बधिआ घोड़ी बइ त मेह्णु दुतो अब्बल अब्बल कीमति चीजी बइ बणो असा।b त यीशु बोलु, 6 “से रोज बि एन्ते, जेस अन्तर ए जे सोब तुस हेरण लगो असे ए सोब उपीड़ घेन्तु त एठि घोड़ पुठ घोड़ बि ना रेहन्ते।”
बुखता एण बारे निशाण
7 त तेन्हि यीशु केआं पुछु, “ए गुरु, ए सोब कपल भुन्तु त ए सोब बोक पूरी भुणे निशाण की की भुन्ते?” 8 तेन बोलु, “खबरदार बिशे कि तुसी कोई ना ठगयाल। किस कि में नओं नी कइ सुआ जेईं एन्ते त बोते, ‘अउं सेईंए भो’ त ईं बि बोते कि, ‘से टेम एई गो असा’। तुस तेन्के बोक ना माने। 9 जिखेईं तुस लड़ाई त बगावती बारे शुणते त न डरुं, किस कि एन्के पेहले भुण जरूरी असु; पर से टेम झट ना मुकता।”
10 यीशु तेन्हि जे हउ बि बोलु, “जाति जाति बुच त राज्य राज्य बुच लड़ाई भुन्ति। 11 बोडे बोडे भुंजल एन्ते। जगाई जगाई अकाल एन्ते त महामारी एन्ती। अम्बर पुठ भयंकर घटना भुन्ति त डरौणी डरौणी अवाजे शुणती। 12 पर इन्हि सोब बोकी केआं पेहले से में नओं बझई जुए तुसी टान्ते, त भुंजान्ते, त टजेc हवाले कइ छते। त अफसर त राजी के सम्हाणि पेश कर कइ तुसी पुठ दोष लान्ते, त से तुसी जेहेल अन्तर छते। 13 पर ए तुसी जे में बारे उगाह देणे मौका बणता। 14 dतोउं त अपु अपु मन अन्तर सोच रखे, कि तुसी पेहला ईं केआं कुछ बोलुणे चिन्ता ना करीण। 15 किस की अउं तुं धे ईं बोक त बुद्धि देन्ता कि जेस कोई दुश्माण काट ना सकते होर ना केसेरी पुग बटते। 16 में चेला भुणे बझई जुए तुं अविश्वासी ई बोउ, भाई भेण, होरे रिश्तेदार त मितर बि तुसी भुंजान्ते त सपाही केआं टोवाई छते; बल्कि केसे केसे त मार बि छते। 17 में चेला भुणे बझई जुए सोबी जाति मेह्णु तुसी जोई बैर कते। 18 पर से तुं अमर जीवन जुए कुछ बि ना कइ बटते। 19 तुस ई सोब सेही कइ अपु जीवन बचान्ते।”
यरुशलेम शेहर उजुड़णे बारे भविष्य वाणि
20 “जपल परदेशी सेना यरुशलेम शेहर बटेरती, त ईं समझे की इसे उजुड़णे टेम भोई गो असा। 21 तिखेईं जे यहूदिया राज्य अन्तर भोल से पहाड़ी इलाके जे नश घिए; त जे यरुशलेम शेहर अन्तर भोल से तठिआ बाहर घेई गे; होर जे बाहर कमाण लगो असे, से तेस अन्तर ना घिए। 22 किस कि ए बदला नेणे रोज असा जिखेईं परमेश्वर बदला नेन्ता। जे जे बि नियम अन्तर त भविष्य वक्ते लिखो असु से एन्हि रोज अन्तर पूरा भोई घेन्तु। 23 तेन्हि रोजी अन्तर जे जिल्हाणु गभुरवाल असी, त जे गभुर दुध पिआन्ती, तस सुआ दुख भुन्ता, किस कि देश अन्तर सुआ कष्ट भुन्ता त सोबी मेह्णु पुठ परमेश्वरे लेहेर एन्ती। 24 से तलवारी बइ मर घेन्ते त कुछ कैद भुई कइ सोब देशे मेह्णु बुच पूज घेन्ते। त जपल तकर गैर यहूदी राज करणे टेम खतम ना भुन्ता, तोउं तकर यहूदिया राज्यe अन्तर गैर यहूदी राज कते।”
मनखे कोईये दुबारी एण
25 “दिस, जोसुण त तारे पुठ डरौणे निशाण केते त धरती पुठ हर देशी मेह्णु समन्दरे अवाजे बेलि त बोडे बोडे छल्हारे बेलिए डरी कइ बुरे हाल भुन्ते। 26 सुआ डरे बझई जुए त धरती पुठ एणे बाड़े कष्ट हेरते हेरते मेह्णु कांया अन्तर कांया ना रेहन्ती, किस कि अम्बरे सम्हाई शक्ति खतम भोई घेन्ति। 27 तोउं से मनखे कुआ बोडी ताकत जुए त पूरे महिमा जुए बदेए पुठ एन्ता हेरते।f 28 जिखेईं ए सोब बोक भुण लगियेल त विश्वास पुठ सुसुर खड़ भुई कइ इ सोब कष्ट सेहण जे तेयार बिशे; किस कि तुं बचुण नीड़ु असु।”
अंजीरे बुटे कथा
29 फि यीशु तेन्हि जे यक कथा लाई। “अंजीरे त होरे बुटी कें धे हेरिण दिए। 30 जिखेईं तेन्हि पुठ डुन एन्ते त तुसी पता लगता कि बरशाड़ एई गा। 31 तिहांणि जिखेईं तुस ई सोब निशाण हेरियेल त बिझ घिए कि परमेश्वरे राज्य पूरी ताकत जुए एण बाड़ी भोई गो असी। 32 अउं तुसी जे बोता कि जपल तकर ई सोब पूरी न भोल, इस पीढ़ी अन्त न भुन्ता। g 33 अम्बर त धरती खतम भोई घेन्ति, पर में बोक कदी ना मुकती।”
खबरदार बिशे
34 “तोउं त, खबरदार बिशे! ईं ना भोल कि तें मन मौज मस्ती, खाण पीण त जीवन होरी चिन्ताई जुओई सुस्त भोई घियेल। त से रोज तोउ पुठ अचानक एई घियेल। 35 किस कि से रोज इस धरती सोबी मेह्णु पुठ इहांणि एन्ता। 36 तोउं त खबरदार बिशे त हर वकत प्रार्थना कते रिहे कि तुस एणे बाड़ा कष्ट त दुख केआं बच सकियेल त मनखे कोईये अगर खड़ भुणे लेएक भोई सकियेल।”