यीशु हक पुठ सवाल
20
1 यक रोज ईं भु कि जिखेईं यीशु देहेर अन्तर मेह्णु शिचालण लगो थिआ त खुश खबरी शुणाण लगो थिआ तिखेईं मुख्य पुजारे, धर्मशास्त्री त टजे स्याणे जुएई सातेa तसे भेएड़ एई कइ खड़ी गे,b 2 त बोलुण लगे, “असी जे बोल, तु एन्हि सोब कमी कोस हक जुए कता त से कोउं भो जेन तेन्धे ए हक दुतो असा?” 3 तेन तेन्हि जे बोलु, “अउं बि तुसी केईआं यक सवाल पुछता। मोउं बताए। 4 यूहन्ने मेह्णु चुसुणे हक स्वर्गे कनारा थिआ या मेह्णु के कनारा थिआ?” 5 तिखेईं से अपफ बुच बोलुण लगे, “अगर अस बोलुण ‘स्वर्गे कनारा थिआ’ त से असी जे बोता, ‘त फिर तुसी तेसे बोकी पुठ विश्वास किस ना किआ?’ 6 होर अगर अस बोलियेल ‘मेह्णु के कनारा’ त सोब मेह्णु असी पुठ मरण तकर घोड़िआ देन्ते।c किस कि ए सोब मानते कि यूहन्ना यक भविष्य वक्ता थिआ।” 7 पता, तेन्हि बोलु, “असी नेईं पता, से केसे कनारा थिआ।” 8 त यीशु तेन्हि जे बोलु, “तोउं अउं बि ना बोता कि अउं इन्हि सोब कम केस हक जुए कता।”
यीशु हके बारे सवाल करण
दुष्ट आधिबाड़े कथा
9 तोउं यीशु मेह्णु जे ई कथा शुणाण लगा : “केनि मेह्णु दछि बगिंचा ला त कुछ मेह्णु कें धे आधी दी कइ सुआ रोजी लिए परदेश घेई गा। 10 जिखेईं दछि पक्की गई त तेन यक नौखर तठि आधिबाड़े केईं लंघा कि से कुछ दछि तसे धे दी छड़ियेल। पर आधिबाड़े से मडी कइ खाली हतेउ वापस लंघाई छड़ा। 11 तोउं तेन यक होरा नौखर लंघा। तेन्हि से बि मडी कइ त तसे बेज्जती कर कइ खाली हतेउ वापस लंघाई छड़ा। 12 तोउं बि तेन टेका नौखर लंघा। तेन्हि से बि घायल कर कइ बाहर किढ़ छड़ा। 13 तोउं तेस बगिंचे मालिके बोलु, ‘मोउं की करुं? अउं अपु इकलौता ट्यारे कुआ लंघान्ता। शयद से एस हेर डरियेल।’ ईं सोच कइ तेन अपु कुआ लंघाई छड़ा। 14 जिखेईं आधिबाड़े से का त से अपफ बुच मेझर करण लगे, ‘एईएं त हकदार भो; चले अस एस मार छते, तोउं ए धन दौलत हें भोई घेन्ति।’ 15 तोउं तेन्हि से बगिंचे केआं बाहर किढ़ कइ मार छड़ा। त इए शुणे! तोउं दछि बगिंचे मालिक तेन्हि जुए की कता? 16 से एई कइ तेन्हि आधिबाड़ी मुकाई छता त दछि बगिंचा केसे होरी कें धे दी छता।”
एस शुण कइ कथा शुणणे बाड़ी बोलु, “परमेश्वर करियेल, इ ना लौतु भुओ।” 17 त तेन तेन्के धे हेर कइ बोलु, “तोउं ई किस परमेश्वरे नियम अन्तर लिखो असु? एसे मतलब की असु?
‘जे घोड़ मिस्त्री रेज समझ कइ फटओ थिआ,
सेईंए कुणे खास घोड़ बण गा।’de
18 ‘जे एस घोड़ पुठ झड़ता, से चूर चूर भोई घेन्ता;
होर जेस पुठ ए घोड़ झड़ता, से ढची घेन्ता।’”
कैसरे धे मामला देण
19 तिखेईंए मुख्य पुजारे त धर्मशास्त्री यीशु टाणे कोशिश की, किस कि से समझ गो थिए कि तेन तेन्के खिलाफ ए कथा शुणाई। पर से मेह्णु हेर डर गे।
दाखे बग त आधीबाड़े कथा
20 होर से तसे गैशि अन्तर बिश गे, त सपाही तसे पतूं लंघाई छड़े ताकि से तसे कोई गलत बोक टाइ कइ तस रोमी अधिकारी हक अन्तर दी छड़ियेल कि से तस दोषी करे। 21 त तेन्हि तस केआं पुछु, “ए गुरु, असी पता असा कि तु जीं बि बोता यकदम ठीक बोता त मेह्णु बि शिचालता। होर बजन केहर-बेहरी परमेश्वरे बत हंटणे बोके सच्चाई जोई शिचालता। 22 त छने असी बताण दिए कि रोमी मेह्णु के राजा कैसरे धे मामला देण ठीक असु कि नेईं?” 23 पर तेन तेन्के चलाकी हेर कइ तेन्हि जे बोलु, 24 “यक मेलकी मोउं हराले। इस पुठ केसे छाप त नओं असु?” तेन्हि बोलु, “कैसरे” 25 त तेन तेन्हि जे बोलु, “त जे कैसरे भो तस कैसरे धे दिए; त जे परमेश्वरे भो, तस परमेश्वरे धे दिए।” 26 तेन मेह्णु के साम्हाणि जे किछ बि बोलु, तेन्हि तेस अन्तर कोई गलती किढ़ न बटी। पर तसे बोकी बइ हैरान भोई कइ चुप रेही गे।
महाराज जे मामला देण
दुबारी जीण त ब्याह
27 तोउं सदूकीf नओएं यक होरे दले मेह्णु, जे बोते कि मुओ मेह्णु कदी दुबारी ना जीं सकते, यीशु भेएड़ एई कइ पुछु, 28 “ए गुरु, मूसा असी जे ई लिखो असु कि अगर बगैर गभुर कोई भाई मर घेन्ता त तसे भाई तसे जुएली टोप दी कइ अपु भाई जे गभुर जमाणण। 29 अब बोक इ असी कि सत भाई थिए। तेन्हि बुचा पेहला भाई ब्याह कर कइ बगैर औलाद मर गा। 30-31 तोउं दोका, त टेका बि बजन गभुर मरी गे। इहांणि सतो भाई बजन गभुर मर गे। 32 पता से जिल्हाणु बि मर गई। 33 तोउं त, दुबारी जी कइ से केसे जुएली बणती? किस कि तेन सतोही जुए ब्याह किओ थिआ?” 34 यीशु तेन्हि जे बोलु, “इस जुगे मेह्णु के ब्याह त भुन्ता 35 पर जे मेह्णु एणे बाड़े जुग अन्तर जीणे लेएक भुन्ते, से ना त ब्याह कते, होर ना करेईन्ते। 36 से दुबारी मरते बि नोउ; किस कि से स्वर्गेदूते ईं भुन्ते त मरण केआं दुबारी जी कइ हरालते कि से परमेश्वरे गभुर भो। 37 पर ए बोक कि मरो मेह्णु बि जी घेन्ते मूसे जाओ किय्हामिलि कथाई बेलि बोलो असी कि से प्रभु जे ‘अब्राहमे परमेश्वर, त इसहाके परमेश्वर होर याकूबे परमेश्वर’ बोता।g 38 परमेश्वर मुड़दी के ना, बल्कि जीन्ते मेह्णु के परमेश्वर भो। किस कि तसे भेएड़ सोब जीन्ते असे।” 39 तपल ईं शुण कइ धर्मशास्त्री बुचा केहि बोलु, “ए गुरु, तुसी खरु बोलु।h” 40 त तेन्हि तस केआं कुछ पुछणे हिम्मत ना भुई।
मसीह केसे कुआ भो?
41 तोउं यीशु तेन्हि केआं पुछु, “मसीह जे राजा दाऊदे गभुर कीं बोते? 42 किस की दाऊदे अपफ छुआरि के कताब अन्तर लिखो असु”,
प्रभु परमेश्वरे में प्रभु जे बोलु,
43 जोउं तकर अउं तें दुश्माणी तें खुर पड्डे ना छइ छउं,
तोउं तकर तु में सुमले कनाi बिश।j
44 “दाऊद त तस जे प्रभु बोता त फि से तसे कुआ कीं भुआ?”
कपटी के शिक्षाई केआं खबरदार
45 जिखेईं सोब मेह्णु शुणुण लगो थिए त यीशु अपु चेली जे बोलु, 46 “तेन्हि धर्मशास्त्री केआं समोझि बिशे, जे लम्मे लम्मे झिणे लाई कइk डालण बिश्ते। बाजार अन्तर सोबी केआं ‘नमस्ते जी’ शुणुण चहन्ते। से अराधनालय अन्तर त धामी बुछ बिशुण जे अब्बल अब्बल जगाह तोपते। 47 से विधवाई के गी उजाड़ते, त मेह्णु हरालण जे चेरे तकर प्रार्थना कते। अन्हि सुआ डन मेता।”