11
1 त जीं अउं मसीहे नकल कता, तीं तुस बि में नकल करे।aसतसंग करणे बारे सलाह
(11:2—14:40)
मगिर घटण बारे शिक्षा
2 त ए ट्यारेओ! अउं तुं शबाशि कता कि तुस हर चीजी अन्तर मोउं याद कते त जे शिक्षा मेईं दुतो थी तस मानते। 3 पर तुसी अउं यक होरी बोक बि समझाण चहन्ता। से ई असी कि जीं जिसम पुठ मगिर अधिकारी असी, तीं जुएली पुठ अपु धाणि अधिकारी असा, त धाणि पुठ मसीह अधिकारी असा। त तेन्हि सम्हाई पुठ परमेश्वर अधिकारी असा। 4 जे कोउं मड़द अपु मगिरि घट कइ सतसंग अन्तर दुआ कता या भविष्य वाणि कता, से अपु मगिर जे मसीह भो, तसे बेज्जती कता। 5 होर जे कोउं जिल्हाणु नगे रोटे सतसंग अन्तर दुआ या भविष्य वाणि कती, से अपु मगिर जे तसे धाणि भो, तसे बेज्जती कती। से तेस जिल्हाणु ईं असी, जेन अपु मगिर पछण लाओ असा। 6 अगर कोई जिल्हाणु अपु नगे रोटे बिशण चहन्ती त से अपु मगिर पछण किस ना लान्ती? पर अगर जिल्हाणु पछण लाण लजे बोक असी त तस अपु मगिर घट कइ रखण लौती। 7 पर सतसंग अन्तर केस बि मड़द अपु मगिर घटण ठीक नेईं, किस कि से परमेश्वरे स्वरूप त महिमा असी। होर जिल्हाणु अपु धाणि शान असी। 8 किस कि परमेश्वरे जिल्हाणु केईआं मड़द न बणा, बल्कि मड़द केईआं जिल्हाणु बणाई। 9 होर परमेश्वरे मड़द जिल्हाणु लिए नेईं बड़ो, बल्कि जिल्हाणु मड़दे लिए बड़ो असी। 10 स्वर्गेदूत बि असी हेरण लगो असे। तोउं त तेन्हि स्वर्गेदूती के बझई जोई जिल्हाणु अपु मगिर घट कइ रखे, किस कि तीं करणे बेलि से हरालती कि तस पुठ तसे धाणि हक असा। 11 फि बि प्रभु नजर अन्तर जिल्हाणु त मड़द दुहे यके असे। जिल्हाणु मड़द बजन त मड़द जिल्हाणु बजन किछ नेईं। 12 किस कि जीं जिल्हाणु मड़द केआं बणाओ असी, तिहांणि मड़द बि जिल्हाणु केआं जमता। पर ए सोब परमेश्वरे बड़ाओ असु।
13 तुस अपफ सोचे, कि सतसंग अन्तर जिल्हाणु नगे रोटे परमेश्वरे दुआ करण ठीक असु ना? 14 कि सृष्टि अपफ असी हरालती नउ ना कि लम्मी छते मड़द जचति नउ? 15 पर अगर जिल्हाणु लम्मु झशुड़ रखियेल, त तसे बेलिए तसे शो भुन्ति, किस कि झशुड़ तसे धे घटण जे दुतो असु। 16 पर अगर कोउं एस बारे बेहेस करण चहन्ता, त अउं तेन्हि जे बोता कि हें इठि त परमेश्वरे होरे सतसंग अन्तर अस इहांणि कते।
प्रभु बेह्लु बारे शिक्षा
17 पर यक बोकी बारे अउं तुसी शबाशि ना देन्ता। से बोक ई असी कि जपल बि तुस यक जगाई किठिन्ते, त तुं भलाई न भुन्ति, बल्कि नुकसान भुन्ता। 18 पेहले त अउं सद शुणताथ, पर अब धिक धिक विश्वास बि भुण लगो असा कि जपल बि तुस सतसंग अन्तर किठिन्ते त तुं बुच हमेशा पंगे भुन्ते। 19 वाह जी वाह! पंगे कते रेहिए। ना त कीं पता लगता की तुं बुछ कोउं कोउं खरे विश्वासी असे? 20 तोउं त अउं बोता कि जपल तुस यक जगाई किठिन्ते त यक होरी गेशैर कइ प्रभु बेह्लु खाण जे ना किठिन्ते। 21 किस कि प्रभु बेह्लु खाणे टेम तुस यक होरी न भाड़ते। तोउं त केहि जेईं पेहलाई खाई पी कइ मस्त भोई घेन्ते त केहि बिचारे ढुके रेही घेन्ते। 22 की बारा, खाण पीण जे तुसी केईं अपु गी नेईं ना? या फि तुस परमेश्वरे सतसंगे किछ परवाह नेईं ना? तुस कि गरीब लजेरण चहते ना? मोउं समझ नेईं एण लगो कि तुसी जे की बोलुण? एस बोक पुठ कि मोउं तुस शबाशि देण ना? ना, ना, कदी ना।
23 किस कि मेईं तुसी सेईंया शिक्षा दिती, जे मोउं प्रभु केआं मेओ थी। से ई थी कि, जेस रोज ब्यादि प्रभु यीशु दुश्माणी के हतेउ टोवेई गा, तेस रोज तेन रौठि टाती। 24 त परमेश्वरे धन्यवाद दी कइ टुकड़ेरी त ई बोते बोते चेली कें धे दिती “ए में जिसम भो, जे तुं लिए भकत चढ़ो असा: में याद अन्तर इहांणि कते रिहे।” 25 तिहांणि, बेह्लु खाण केआं पता, तेन दाखरसे कटोरा टाइ कइ ई बोते बोते दिता “ए कटोरा बि में तेस लहुए ईं असा, जे में बेलि तुसी जे बहिन्तु। ए परमेश्वरे नोई जुबान असी जेसे बेलि सम्हाई विश्वासी परमेश्वरे जुए रिश्ता जोड़ते। जपल बि तुस अस पियेल, त में याद अन्तर इहांणि कते रिहे।”
26 त ए में ट्यारेओ! जोउं तकर तुस एस रौठि खांते त एस कटोरे केआं पीन्ते, प्रभु यीशु दुबारी एणे तकर तुस तसे मरणे बारे प्रचार कते। 27 तोउं त, जे कोई बि लापरवाह भोई कइ ए रौठि खआल त प्रभु कटोरा केआं पियाल, से प्रभु जिसम त लहुए बेज्जती करणे दोषी बणता। 28 इस बझई जुए पेहले मेह्णु अपफ परखुण जरूरी असु कि से सुसुर धराण लगो असा कि नेईं। तोउं से इस रौठि खाआल त कटोरे केआं पियाल। 29 किस कि जे बि प्रभु जिसम बेज्जती कर कइ एस रौठि खांता त कटोरा केआं पीन्ता, से अपफ पुठ सज्जा आणता। 30 तोउं त, तुं बुछ सुआ जेईं कमजोर, बीमार भोई गो असे त सुआ जेईं मर मुख गे। 31 पर अगर अस अपफ सुसुर परखिये भुन्तेथ त असी परमेश्वर केआं सज्जा ना मेतीथ। 32 प्रभु असी शिचालुण जे सज्जा देन्ता ताकि असी मतोक जुए सज्जा ना मेईंए।