लूके
लिखो खुश खबरी
सोचे कि पांगेई घाटी अन्तर कोई यक बोडी घटना भुई। शिमला केआं अगर राज्य सरकार एस घटनाई बारे खबर नेण चहाल त से की कते? से कि बेह्ले मेह्णु के चुगिल शुणते ना? होर ना अपु कोई खास बंदा लंघाई कइ तेस घटनाई जाएजा नेन्ते? से बेशक कोई खास बंदा लंघान्ते, जे कि हर बोकी के सच्चाई त झूठे पता लाई कइ रिर्पोट लंघान्ते। ए तरीका सद सरकारे ना भो बल्कि हर यक शिक्षित मेह्णु भो जे बगैर जांच पड़ताले कोई बि बोक ना मानता। से होरे मेह्णु बोक शुण कइ त हुसुड़े बोकी बेलि ना, बल्कि अपु मने शुण कइ कम कते। कोई बि मेह्णु तस जुए जब्बरदस्ती ना कइ सकता।
ई खुश खबरी तेसे ईं यक रिर्पोट असी जे लूका नोउएं यक डाक्टरे थियुफिलुस नोउएं यक बोडा रोमी अधिकारी जे लिखो असी। तेन यीशु मसीह जीवने बारे, तसे कमे त शिक्षाई बारे, होर मर कइ दुबारी जीणे बारे सुसुर जांच पड़ताल कर कइ ई रिर्पोट बड़ोउ असी।
किस कि अस सम्हाई यीशु मसीह बारे शुणो असु, होर शयद यीशु मसीह केआं ज्यादा इसाई मेह्णु बारे शुणो असु, त हें मन अन्तर जरूर कुछ ना कुछ विचार असे। पर हें विचार सही या गलत असे, तस बारे कोई पता नेईं। त किस ना ई खुश खबरी पढ़ कइ पता कते कि मसीह यीशु बारे हें समझ कति सुसुर असी।
विषय सूची
शुरुवाती बोके (1:1-4)
यीशु जमुण त तसे मठड़ियारी बोके (1:5—4:13)
यीशु मसीह अपु कम शुरु करण त चेले बणाण (4:14—6:49)
गलील राज्य अन्तर यीशु मसीहे कम (7:1—9:50)
यरुशलेम शेहर घेन्त पेंत यीशु मसीहे कम (9:51—19:27)
यरुशलेम शेहर अन्तर यीशु मसीहे कम (19:28—21:38)
यीशु मसीहे खिलाफ मेझर त यीशु मारण (22:1—23:56)
यीशु दुबारी जीण त स्वर्ग जे घेण (24:1-53)