मनखे बुच यीशु मसीहे सेवाई कम
(2:1—12:50)
यीशु पेहला चमत्कारे कम करण
2
1 तोउं टेके रोज, गलील राज्ये, काना नओएं शेहर अन्तर केसे ब्याहे धाम थी। त यीशु ई तठि थी। 2 ब्याह जे यीशु त तसे चेले बि धामो थिए। 3 त जपल धामी बाड़ी के अराख मुक गा त यीशु ईये तस केईं एई कइ बोलु, “कोईया, अन्के अराख मुक गो असा।” 4 त यीशु तस जे बोलु, “ईया, ई बोक तुस मोउं जे किस बोलुण लगो असे। में शक्ति हरालणे टेम अभेईं तकर नेईं ओ।” 5 त तसे ईये नौखरी जे बोलु, “जे बि ए बोलाल, तीं करे”। 6 तठि छेआ बोडे बोडे घाड़ुa थिए, जेन्हि अन्तर घट से घट 80-115 सीस पुओणि भरीन्तुथ। यहूदी मेह्णु तेस अपु रीति रिवाज जुए अपफ शुचा भुणb जे बरततेथ।c 7 तोउं यीशु तेन्हि नौखरी जे बोलु, “घाड़ु अन्तर पुओणि भरीण दिए।” नौखरी सम्हाई घाड़ु पुओणि बइ भरीं किए जीं उधार भरो असु। 8 तोउं तेन तेन्हि जे बोलु, “अब इठिआ धिक किढ़ कइ सरबेंटु धे दिए।” तोउं तेन्हि नौखरी जीं तेन बोलु, तीं किउ। 9-10 त घाड़ु पुओणि अराख बण गा। पर सरबेंट पता नेओथ कि ए कोठिआ अण्हो असा। सद तेन्हि नौखरी पता थिआ कि ए कोठिआ अण्हतो असा। त जपल सरबेंटु से पुओणि चखु जे अराख बणि गो थिआ त नोउआं लाड़ा भिआई कइ बोलु, “सोब पेहले तेज अराख देन्ते त जपल मेहमानी धिक धिक लग चढ़ती त पुओणि ईं पिआन्ते। पर तेईं त अभेईं तकर तेज अराख रखो असा”।11 यीशु गलील राज्ये, काना शेहर अन्तर पेहले ए चमत्कारे कम कर कइ अपु शक्ति हराली त तसे चेली तेस पुठ विश्वास किआ। 12 तढ़िया पता, यीशु अपु ई, भाई, त अपु चेली जुओई कफरनहुम शेहरd जे गा त तठि किछ रोज बिशा।e
यीशु यरुशलेम शेहरे देहेर घेण।
13 जपल यहूदी के बचणे त्योहारेf टेम भुआ त यीशु यरुशलेम शेहर जे गा। 14 तठि यहूदी के देहरे औत-कोत बइ तेन हेरु कि मेह्णु गौड़े, ढडुड़ त अलिण भकत देण जे बेचण लगो असे त दलाल मेज पुठ बिश कइ रुपेई बटाण लगो असे। 15 तेन लेहरी कइ रेजुड़ दुणेर कइ, सोब जेईं तठिआ दौड़ाई छड़े, दलाली के रुपेई छिंगेई छड़े त तेन्के मेज सम्हाई इएर-ओवर फटाई छड़े। 16 जे अलिण बेचण लगो थिए तेन्हि जे बोलु, “इन्हि इठिआ घिन घिए; ए देहेर में बोउए गी भो; अस बाजार ना बणाए!” 17 (पता तसे चेली याद आई कि धरमे कताब अन्तर लिखो असु कि
“तुं गी मोउं अतु ट्यारु असु कि एस बझई जुए अउं मर घेन्ता।”g)
18 पर यहूदी के कुछ नेती यीशु जे बोलु, “तु असी ईं की निशाणी हराल सकता, जेसे बेलि असी पता लगियेल कि ए सोब करण जे तें हक असा?” 19 यीशु जवाब दिता, “ठीक असु! तुस इस देहेर ढाई छड़े, त टाई रोज अन्तर अउं इस दुबारी बणाई छता।”h 20 त तेन्हि बोलु, “की! इस देहेर बणाण जे छेताड़ी साल लग गो थिए, त तु इस टाई रोज अन्तर बणान्ता ना?” 21 पर यीशु अपु बोकी बोकी अन्तर जेस देहरे बारे बोलो थी, से अपु शरीर थिआ। 22 (पता, जपल यीशु मर कर दुबारी जीआ, त तसे चेली तसे ई बोक याद आई त तेन्हि धरमे कताब त तसे बोक पुठ विश्वास किआ।)