မ်ထ 6

လွင် စွယ် အီ ဟဝ်

1 ပန် တီ ဇဝ် ယေဆူ ဝီ မာနုဝ် တဝ်း၊ “ဆေ ဘေ စွယ် အီ ဟဝ်၊ ဘေ လုဝ် ဆာဒိက် နဝ်း ဘေ။ ဆေ ဘေ ဘူင် နာ မွှိုမ် ပီ အိုင် ဇဝ်ဖြာ၊ ကွဲ့ ဘူင် တဲး အီ ဟဝ် ယိုဝ်။ ဆေ ဘေ တူ ဆာဒိက် ပါယ် တီ၊ ဇဝ်ဖြာ အီ ကွယ် ဂါင်ဟြာဝ်၊ အန် တူ ဝီ တဲး န့ ဘဲန် အာဂျိုဝ် ဒီ ဘေ။

2 ခုဝ် အန် တီ ဆေ ဘေ တဝ်း ဒီ ဒွါ ကြုဝ် ဘေ ဒီ ဒူအီ ဂိန်၊ ကွဲ့ ဘူင် ပီ ဂေ ဒူအီ ညိုင်ရာင် ဘွတ် ခဲင် ဇူင် ဂေ ဘော ဒီ ဂ့လ ဒူင် ပွိုန် ယိုဝ် ဒူအီ ကိူန်။ ကွဲ့ ဒဲ့ အီ တး ယွတ် ပီ ဘူင် ဘေ။ ဂေ ဒူအီ ညိုင်ရာင် ဘွတ်၊ ဂေ နပ် ဒီ ဘူင် ပါယ် တီ၊ တဲး အီ ဟဝ် အိူပ် ဂေ။ အုဝ် ယီ တဝ်း အာခ်ု ဒီ ဘေ။ အာဆေ ဘူင် ပါယ် တီ၊ န့ ပီ အန် ဟဲ့ ဟွတ့် ပွိုန် ခဲ့ ပီ ဆီ ပွိုန် အန်။ ပီ ဘူင် အန် အာဝ် မိုဝ်း အာဂျိုဝ် ဒီ အာတ့် ဇဝ်ဖြာ။ 3 ဆေ ဘေ ဒွါ ကြုဝ် ဘေ ဒီ ဒူအီ ဂိန်၊ ကွဲ့ တဲး အာဆေ နပ် ပီ ဘူင် ဘေ။ 4 တဲး မီ ဘေ နပ် လွင် အန် တီ။ ဆေ န့ ပါယ် တီ၊ ဇဝ်ဖြာ အီ ပီ ဂုန့် ဘေ၊ အန် ဒီ ဝီ ယွတ် ပဲ့ ဟဲ့ ဘူင် ဘေ။ အန် ဒီ ဝီ ဘူင်၊ တဲး န့ ဘဲန် အာဂျိုဝ် ဒီ ဘေ။”

လွင် ဒူအီ ဆာခိုဝ် ဒီ ဇဝ်ဖြာ

5 ဇဝ် ယေဆူ ဝီ တဝ်း၊ “န့ ဘော ပါယ် တီ၊ ဆေ ဘေ ဆာခိုဝ် ဒီ ဇဝ်ဖြာ၊ ကွဲ့ ဘူင် ပီ ဂေ ဒူအီ အီ ညိုင်ရာင် ဘွတ်။ ဂေ အိုင် ဒီ ကွယ် ခဲင် ဇူင် ဘေ၊ ဘော ကွယ် ဒီ ခူပ် န့တေန့်၊ တဲး အီ ဟဝ် ယိုဝ် ဂေ။ အုဝ် တဝ်း အာခ်ု ဒီ ဘေ။ ဂေ ဒူအီ ဇိုဝ် တီ ဟဲ့ ပွိုန် ခဲ့ ပီ ဆီ ပွိုန် ဂေ။ ပီ ဆာခိုဝ် ဂေ အာဝ် မိုဝ်း ဒီခုဝ် ဒီ အာတ့် ဇဝ်ဖြာ။ 6 ခုဝ် အန် တီ ဆေ ဘေ ဆာခိုဝ်၊ ဘေ လုဝ် ဟာဝ် လိုပ် ခဲင် ဟူင်၊ ဝီ ကာဘိတ် မာလုဝ်း၊ ဝီ ဆာခိုဝ် ဒီ ဇဝ်ဖြာ အီ ပီ ဂုန့် ဘေ ပီ တူ ပွိုန် ယိုဝ် ဘေ။ ပန် တီ ဇဝ်ဖြာ အီ နပ် ဒီ ယိုဝ် ပီ တူ ပွိုန် ယိုဝ် အီ ဟဝ်၊ အန် ဒီ ထူမ် ဂြုဝ်း ဘေ၊ တဲး န့ ဘဲန် အာဂျိုဝ် ဒီ ဘေ။ 7 ပေါ အူ မျုဝ် ဘေ လုဝ် ဆာဒိက်။ ဆေ ဘေ ဆာခိုဝ်၊ ကွဲ့ ကာလာင် ဂြုဝ်း ဆမ်ဆတ် ပီ ဂေ ဒူအီ အီ တူ နပ် ဇဝ်ဖြာ။ ဂေ ထာင်၊ ဆေ ဂေ ဆာခိုဝ် လှေန့် ဘော ဆာခိုဝ် တူင့်၊ ဂေ ဒီ ပွိုန် ခဲ့ ပီ မှာန့် ဂေ။ 8 ကွဲ့ တဲး ဘေ ဘူင် ပီ ဂေ။ ခုဝ်၊ ဇဝ်ဖြာ အီ ပီ ဂုန့် ဘေ၊ အန် ဟဲ့ နပ် တူတ့် ဒွန် မျုဝ် ပီ လုဝ် ဘေ အာတ့် မှာန့် ဘေ ဒီ အန်။

9 ခုဝ် အန် တီ ဘေ လုဝ် ဆာခိုဝ် ပါယ် နီ။ ဘေ လုဝ် တဝ်း၊

‘အိုယ်၊ ဂုန့် ယေ အီ ကွယ် ဂါင်ဟြာဝ်၊ မှာန့် တဲး ယေ ဒူအီ မိုဝ်း နဝ်း ရုဝ်ဆေ ရီမာတ် မဲ ဇဝ်။

10 အာခြာဝ် ဒီ အိုပ် မဲ ဇဝ် ဒူအီ ဒဲင် ကာဒါယ်၊ တဲး မဲ တဲး န့ တး၊ တဲး န့ ဇမ်။ ခဲင် မိူင် ဒဲင် မဲ အိုပ် ပါယ် မှဝ်၊ တဲး မဲ အိုပ် ဘော ဒဲင် ကာဒါယ် ပါယ် တီ။

11 ဒွန် ဆီငဲ ဒွန် ဆီငဲ တဲး မဲ ဇဝ် ဒွါ ပီ ဒီ ဟူမ် ဒီ ယေ။

12 တဲး မဲ ဇဝ် ဘ့လွာ့ ဝဲန် မှာပ် ယေ။ တဲး န့ ပီ၊ ဘော ယေ ဘ့လွာ့ ဝဲန် မှာပ် အီ ဟဝ်။

13 ကွဲ့ တဲး ယေ ဒူပ် အီ ကာဆုး ယေ ဘူင် မှာပ်။ တဲး မဲ ချွတ် ယေ၊ တဲး ယေ လွတ် နာ တူ မွှိုမ်။ ကူပ် မုး မဲ အန် ဇဝ် အီ အိုပ် ကာဒါယ် ဘော မိုဝ်း ပွုန် တာင် ဘော အာဖုင် ဒင်ခုဝ် တာင် အီ ကွယ် ဒွန် စုဝ် ဒွန် ဘာန်၊ ယေ ဆာခိုဝ် ပါယ် တီ။’

14 ဆေ ဘေ ဘ့လွာ့ ဝဲန် မှာပ် အီ၊ ဘော ဇဝ်ဖြာ အီ ပီ ဂုန့် ဘေ၊ အီ ကွယ် ဂါင်ဟြာဝ်၊ အန် ဒီ ဘ့လွာ့ ဝဲန် ဘော မှာပ် ဘေ။ 15 ဆေ ဘေ ယီ အုန် မှာပ် အီ ဟဝ်၊ ဘော ဇဝ်ဖြာ ဒီ အုန် မှာပ် ဘေ။”

လွင် ဒူအီ ယိူန် ပီ ဒီ ဟူမ်

16 ပန် တီ ဇဝ် ယေဆူ ဝီ မာနုဝ် ပေါ အူ မျုဝ်။ အန် တဝ်း၊ “ဆေ ဘေ ယိူန် ပီ ဒီ ဟူမ်၊ ကွဲ့ တဲး ဘေ မိုဝ်း နာ အီ တူ ဒါခိုယ် ပီ ဂေ ဒူအီ ညိုင်ရာင် ဘွတ်။ ဂေ နပ် ဒီ ဘူင် တဲး နာ ဂေ အာဝ် စှိတ်၊ တဲး န့ ဘျ ဒီ အီ လွင် ယိူန် ဂေ ပီ ဒီ ဟူမ်။ အုဝ် တဝ်း အာခ်ု ဒီ ဘေ၊ ဂေ အီ ဘူင် ဇိုဝ် တီ၊ ဂေ ဟဲ့ ပွိုန် ခဲ့ ဆီ ပွိုန် ဂေ။ 17 ဆေ ဘေ ယိူန် ပီ ဒီ ဟူမ်၊ တဲး ဘေ ဖဝ်း နာမန် ဒီ ဂိန့် ဘေ၊ ဒီလှဝ်း ဘေ။ 18 ကွဲ့ တဲး န့ လိုဝ်း ဒီ အီ လွင် ယိူန် ဘေ ပီ ဒီ ဟူမ်။ တဲး မီ ဇဝ်ဖြာ နပ် လွင် အန် တီ။ ဇဝ်ဖြာ တူ တဲး အီ ယိုဝ် အန်။ အန် ယီ နပ် ဒီ ယိုဝ် ပီ တူ ပွိုန် ယိုဝ် အီ ဟဝ်။ အန် ဒီ ဘော တဲး ပီ ယိူန် ဘေ ပီ ဒီ ဟူမ် ဝီ ဘဲန် အာဂျိုဝ် ဒီ ဘေ။”

လွင် နဝ်း ဆီ ပွိုန် ဘဲန် မျုဝ် ဘဲန် မျုဝ်

19 ဟဲ့ ဟွတ့် ကာလာင် ဂြုဝ်း တီ၊ ဇဝ် ယေဆူ ဝီ တဝ်း၊ “ကွဲ့ ကာဇု အုန် ကြုဝ်ကြာမ် ဘဲန် မျုဝ် ဘဲန် မျုဝ် ပီ ပွိုန် ဟူမ် မာဝ၊ ပီ ပွိုန် ဟူမ် အျီင်ရျီး။ ကွဲ့ အုန် ကြုဝ် ပီ ပွိုန် အီ ဒီ ပြာ။ 20 ဘေ ယီ လုဝ် ဘူင် တဲး န့ ပီ ဘေ အုန် ကြုဝ်ကြာမ် ခဲင် မိူင် ဂါင်ဟြာဝ်။ ကြုဝ်ကြာမ် ဇိုဝ် တီ အာဝ် မုး မျုဝ် ပီ ပွိုန် ဟူမ် မာဝ ဂေ အျီင်ရျီး။ ဒူင် ပီ ဘ့လေး အုန် ဘေ ဇိုဝ် တီ၊ ဒါ ပြာ အာဝ် ပွိုန် တး လိုပ်၊ အာဝ် ပွိုန် ပြာ။ 21 ခုဝ်၊ ဒူင် အုန် ဘေ ကြုဝ်ကြာမ် ဘေ၊ ဘော နဝ်း ဘေ ဒီ ဘော နမ်လှုဝ်း ဒီ တီ ဆေဆေ။

22 ငါယ် ဘေ ဒူအီ၊ န့ ပီ ငဝ် အီ တဲး ဘ့လာင် ဒီ ဒုဝ် ဘူင့် ဘော ဒုဝ်။ ဆေ ငါယ် ဘေ ဟဲ့ လိုဝ်း ဆီချာ၊ န့ ပီ၊ ဘ့လာင် ဟဲ့ နုဝ့် ခဲင် ဒုဝ် ဘေ ဘော ဒုဝ်။ 23 ဆေ ငါယ် ဘေ ယီ လိုဝ်၊ န့ ပီ၊ အီ အပ် ဝွင့် ဟဲ့ နုဝ့် ခဲင် ဒုဝ် ဘေ ဘော ဒုဝ်။ ခုဝ်၊ န့ ပါယ် နီ။ ဆေ ဇဝ်ဖြာ ဆီ တဲး ဘ့လာင် အန် လိုပ် ခဲင် ဒုဝ် ဘေ၊ ဆေ ဘေ ယီ တူ ခမ်၊ အာဝ် ဟူ မိုဝ်း မာဆေ အီ ပဲ ဒီ တဲး ဘ့လာင် အန် လိုဝ်း ဒီ ဘေ။

24 အာဝ် မိုဝ်း ဒူအီ အီ ပွိုန် ဘဲန် မှာယ် ဒါ ကာညာ အာ ဝီ။ ဆေ အန် ရွက့် အူ ဝီ၊ အန် ဒီ ဝီ ဇွင့် ပေါ အူ ဝီ။ ဆေ အန် ဘော ထူမ် ဂြုဝ်း အူ ဝီ၊ အန် ဒီ ဝဲန် ဂြုဝ်း ပေါ ဝီ။ ပါယ် တီ ဘော ဘေ တူ ပွိုန် ဒူပ် ဆီချာ ဇဝ်ဖြာ ဘော ဘူင် ဘဲန် မျုဝ် ဘဲန် မျုဝ် တဲး ဘေ ပွိုန် ကိူန် ရွိုန်။

25 ခုဝ် အန် တီ အုဝ် ဝီ တဝ်း ဒီ ဘေ၊ ကွဲ့ တဲး ဘေ မိုဝ်း နဝ်း ကာဟွာ့ လွင် အာဆာက် ဘေ။ ကွဲ့ တဲး နဝ်း ဘေ ကာဟွာ့ လွင် ပီ ဒီ ဟူမ် ပီ ဒီ တာ ဘေ။ ခုဝ်၊ အာဆာက် ဘေ၊ အာရေ အန် ဟဲ့ တာင် လွှိုမ် ပီ ဒီ ဟူမ် ဘေ။ ဘော ဒုဝ် ဘူင့် ဘေ၊ အာရေ အန် ဟဲ့ တာင် လွှိုမ် ခြိုင် ပီ ဒီ တာ ဘေ။ 26 တဲး ဘေ ယွတ် မာဆိမ် အီ ကွယ် ခဲင် ဘ့လေန့်။ ဂေ တူ ဆမ် မာဆေ။ ဟဲ့ ဟွတ့်၊ ဂေ တူ ဝီ ဆုဝ့် မာဆေ။ ဂေ မိူဝ် တူ အုန် ပီ ဒီ ဟူမ် ဂေ ခဲင် ဘု ငှုဝ်။ ဇဝ်ဖြာ အီ ပီ ဂုန့် ဂေ၊ အီ ကွယ် ဂါင်ဟြာဝ်၊ အန် ယီ ဟျီင် ဂေ ဟူမ်။ န့ ယီ မုး ဘေ၊ ငဝ်း ဘေ ဟဲ့ တာင် လွှိုမ် ငဝ်း မာဆိမ်။ 27 အာဝ် မိုဝ်း ဒူအီ အီ ပွိုန် ဘူင် တဲး အာဆာက် အန် ဝီ တူင့် ပေါ န့ ပွါ ကူပ် မိုဝ်း အန် နဝ်း ကာဟွာ့။ အာဒါ အူ နာရီ မိူဝ် အန် တူ ပဲ ဒီ ပီတူင့် အာဆာက် အန်။

28 ဆေ န့ ပါယ် တီ၊ မှဝ် န့ ပါယ် ပီ မိုဝ်း ဘေ နဝ်း ကာဟွာ့ လွင် ခြိုင် ပီ ဒီ တာ ဘေ။း တဲး ဘေ ယွတ် ဘုဝ်း ခမ်ဆွန် အီ လတ့် ခဲင် ပြဲ။ ဂေ တူ ရန့်၊ တူ ဘတ် ဆေန့် ဂေ။ 29 အုဝ် တဝ်း ဒီ ဘေ၊ ခုန်ဒီခမ် အာဆာလုဝ်မုဝ် တွိုန်၊ အန် မိုဝ်း အာဖုင် ဒင်ခုဝ် တာင်။ ခြိုင် ပီ တာ အန် ဟဲ့ စှိတ် ကာဆဝ်၊ ယီ တူ စှိတ် ပီ ဘုဝ်း အူ ဘူင့် တီ။ 30 ပေတ့် ဟဲ့ ကွယ် အာတိုဝ်။ ခဲညှာ ငဝ် ဝီ ကာဆိုမ် ပေတ့် တီ။ ဆေ ဇဝ်ဖြာ တဲး ဘုဝ်း ဂေ ပေတ့် စှိတ် ခဲ့ တီ၊ တဲး ဘေ နပ် ဆီချာ၊ အန် ဒီ ဘော ဒွါ ခြိုင် ပီ ဒီ တာ ဒီ ဘေ၊ တဲး န့ လွှိုမ် တီ။ အိုယ် ဘေ ဒူအီ၊ မှဝ် န့ ပါယ် ပီ ညှိုမ် ဘေ အီ စဲက် ခဲင် နဝ်း ဘေ။း 31 ခုဝ်၊ ကွဲ့ တဲး ဘေ မိုဝ်း နဝ်း မှဲ တဝ်း၊ ‘မာဆေ ပီ ဒီ ဟူမ် ယေ။း’ ဘော ‘မာဆေ ပီ ဒီ တာ ယေ။း’ 32 န့ မုး ဂေ ဒူအီ အီ တူ နပ် ဇဝ်ဖြာ၊ ဂေ မိုဝ်း နဝ်း ဆီ ပွိုန် ဇိုဝ် တီ ဒွန် မျုဝ်။ န့ ယီ မုး ဇဝ်ဖြာ၊ အီ ပီ ဂုန့် ဘေ၊ အီ ကွယ် ဂါင်ဟြာဝ်၊ အန် ဟဲ့ နပ် ဆီချာ၊ ဘေ လုဝ် ကြုဝ် ဇိုဝ် တီ။ 33 အာတ့် ဘူင် ဘေ ဘဲန် မျုဝ် ဘဲန် မျုဝ်၊ ဘေ လုဝ် ဂျုဝ်ဂျာ ဒီ ဘူင် အီ ဒူပ် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ။ ဘေ ဘော လုဝ် ဂျုဝ်ဂျာ ဒီ ဘူင် ဒွန် မျုဝ် အီ ဒီ တဲး ဇဝ်ဖြာ အိုပ် ကာဒါယ်။ ဆေ ဘေ ဘူင် ပါယ် တီ၊ ပီ ဒီ လုဝ် ဘေ ဒွန် မျုဝ်၊ ဘေ ဒီ ဘော ပွိုန် တူတ့် ဒွန် မျုဝ်။ 34 ခုဝ် အန် တီ ကွဲ့ တဲး ဘေ မိုဝ်း နဝ်း ကာဟွာ့ လွင် ပီ ဒီ လုဝ် ဘေ ခဲညှာ။ ဆေ ဘေ ကာဒုး ဒုက် အာတိုဝ်၊ ဇဝ်ဖြာ နပ် ဒီ စွယ်၊ တဲး ဘေ ကာခဲန့် မီ အာတိုဝ်။ ပါ ခဲညှာ န့ ဘော ပါယ် တီ။”