မ်ထ 5

လွင် ဂေ ဒူအီ အီ မိုဝ်း နဝ်း ဒါခိုယ်

1 ဒေါ ယိုဝ် ဇဝ် ယေဆူ ဂေ ဒူအီ အီ ဟဲ့ ကိူန် ကာဆဝ်၊ အန် ဝီ ဟုဝ့် ဒဲင် နွန်၊ ဝီ တုတ့် အူ ပ့လုဝ့်။ ဘော ဒီဘဲ အန် ဟဲ့ တး ဇမ် ဒူင် ကွယ် အန် တီ။ 2 အန် ဝီ မာနုဝ် ဂေ၊ ဝီ တဝ်း၊

3 “ဆေ ဒူအီ တူ ပီစာ နဝ်း ဂေ ဒီ ဇဝ်ဖြာ၊ န့ တဲး နဝ်း ဂေ ဒါခိုယ်။ ခုဝ်၊ ဂေ ဒီ ပွိုန် ဒီ ကွယ် ခဲင် မိူင် ပီ အိုပ် ဇဝ်ဖြာ။

4 ဆေ ဒူအီ မိုဝ်း နဝ်း က့လိုဝ် ကူပ် ကိူန် မှာပ် ဂေ၊ န့ ဒီ တဲး ဂေ ဝီ ဒါခိုယ်။ ခုဝ်၊ ဇဝ်ဖြာ ဒီ ဒိုဝ်း ဝဲန် နဝ်း က့လိုဝ် တီ။

5 ဆေ ဒူအီ တူ ငှိုယ် ရူ၊ န့ ဒီ တဲး နဝ်း ဂေ ဒါခိုယ်။ ခုဝ်၊ ဂေ ဒီ ပွိုန် တူတ့် ဒွန် မျုဝ် ပီ ဒီ လုဝ် ဂေ၊ ပီ တဝ်း ဇဝ်ဖြာ ဒီ ဒွါ။

6 ဆေ ဒူအီ မိုဝ်း နဝ်း ဆီ ပွိုန် နဝ်း ဆိူဝ် နဝ်း မှာန်၊ န့ ဒီ တဲး နဝ်း ဂေ ဒါခိုယ်။ ခုဝ်၊ ဂေ ဒီ ပွိုန် ပီ ဆီ ပွိုန် ဂေ။

7 ဆေ ဒူအီ ကာဝေ အီ ဟဝ်၊ န့ ဒီ တဲး နဝ်း ဂေ ဒါခိုယ်။ ခုဝ်၊ ဇဝ်ဖြာ ဒီ ကာဝေ ဘော ဂေ။

8 ဆေ ဒူအီ မိုဝ်း နဝ်း လုယ်၊ န့ ဒီ တဲး နဝ်း ဂေ ဒါခိုယ်။ ခုဝ်၊ ဂေ ဒီ ယိုဝ် ဇဝ်ဖြာ။

9 ဆေ ဒူအီ ဘူင် တဲး ဂေ လာယ် ကာလဝ့် လာယ် ဖြူမ်၊ န့ ဒီ တဲး နဝ်း ဂေ ဒါခိုယ်။ ခုဝ်၊ ဇဝ်ဖြာ ဒီ တဲး ဂေ ဘဲန် ဂွန် အန်။

10 ဆေ ဒူအီ ခမ် ဒုက် ဘဲန် မျုဝ် ဘဲန် မျုဝ် ကူပ် ဘူင် ဂေ ခဲ့ ပီ အိုင် ဇဝ်ဖြာ၊ န့ ဒီ တဲး နဝ်း ဂေ ဒါခိုယ်။ ခုဝ်၊ ဂေ ဒီ ပွိုန် ဒီ ကွယ် ခဲင် မိူင် ပီ အိုပ် ဇဝ်ဖြာ။

11 ဆေ အီ ဟဝ် ကာလာင် နာ တူ မွှိုမ် ဒီ ဘေ၊ ဆေ ဂေ ဘော ဘူင် တဲး န့ ဒုက် ဒီ ဘေ၊ ဆေ ဂေ ဘော ကာလုဝ် ဒီ တဝ်း၊ ဘေ အာဝ် အး၊ ဆေ ဂေ ဘူင် ဇိုဝ် တီ ကူပ် ညှိုမ် ဘေ ဒီ အုဝ်၊ န့ ဒီ တဲး ဘေ မိုဝ်း နဝ်း ဒါခိုယ်။ 12 တဲး ဘေ ဒါခိုယ် ဘော ခူယ်။ ကွဲ့ တဲး ဘေ က့လိုဝ်။ ခုဝ်၊ ဘေ ဒီ ပွိုန် ရုး ကိူန် ခဲင် မိူင် ဂါင်ဟြာဝ်။ နာ တူ မွှိုမ် ပီ ဘူင် အီ ဟဝ် ဒီ ဘေ၊ ဂေ ဟဲ့ ဒွိုမ် ဘူင် ပါယ် တီ ဘော ဒီ ဒူအီ အီ ဘျာန် ဂြုဝ်း ဇဝ်ဖြာ အီ ကွယ် ဒီ အာတ့် ဘေ နီ။”

လွင် ဇဝ် ယေဆူ ကာလာင် အူဖာမာ

13 ဇဝ် ယေဆူ ဝီ တဝ်း၊ “ဒေါ ကွယ် ဘေ ဒဲင် ကာဒါယ် နီ ကာတဲ ဂေ ဒူအီ ဟဝ်၊ တဲး ဘေ ပီ ဆယ့် အီ ဟပ် ခဲင် ဟာပ်။ ဆေ ဆွင့် ဆယ့် တီ ယီ ဟြာယ်၊ အာဝ် ပွိုန် ဟပ် မာဆေ အီ ပဲ ဒီ တဲး ဆယ့် ဝီ ဆွင့်။ ဆယ့် တီ အာဝ် မိုဝ်း ဒီခုဝ် မာဆေ။ လုဝ် ဝဲန် တူတ့်၊ တဲး အီ ညဲတ့်။

14 ဒေါ ကွယ် ဘေ ဒဲင် ကာဒါယ် နီ၊ ဘေ ပီ ငဝ် အွမ်^a အီ တဲး န့ ဘ့လာင်။ ဆေ န့ မုး မိူင် အီ ကွယ် ဒဲင် နွန်၊ ဒွန် အီ ဟဲ့ ပွိုန် ယိုဝ်။ 15 ဘော ငဝ် အွမ် မိူဝ် ပါယ် တီ။ ဆေ ဒူအီ ဟဲ့ ဟွတ့် ပီဒဝ့် ငဝ် အွမ်၊ ဂေ တူ ဝီ ဘ့လေး ငဝ် တီ ခြိုမ် ဆီလာတ့်။ ဂေ တဲး အန် ကွယ် ဒူင် စာ၊ တဲး ဒွန် အီ အီ ကွယ် ခဲင် ကာင် ပွိုန် ယိုဝ်။ 16 ပါယ် တီ ဘော ဘေ ပီ ဘ့လာင် ငဝ်။ ဘေ လုဝ် ဘူင် နာ မွှိုမ် ဒွန် မျုဝ်၊ တဲး အီ ဟဝ် ပွိုန် ဒီ ယိုဝ်၊ တဲး ဂေ ဝီ လှုဝ်း ဇဝ်ဖြာ အီ မုး ဂုန့် ဘေ အီ ကွယ် ဂါင်ဟြာဝ်၊ တဲး ဘော ဂေ ဝီ အိူပ် အန်။”

လွင် ပီ မာနုဝ် ဇဝ် ယေဆူ ဘော ပီ မာနုဝ် ဒါ ဆာရာ ယူဒါ

17 ဇဝ် ယေဆူ ဘော မာနုဝ် တဝ်း၊ “အာဝ် မုး၊ အုဝ် တး ပျာတ့် ဝဲန် ဒါရာ ပီ ဒွါ အာမုဝ်ဆဲ ဒီ ဘေ။ အာဝ် မုး၊ အုဝ် တး ပျာတ့် ဝဲန် ပီ မာနုဝ် ဂေ ဒူအီ အီ ဘျာန် ဂြုဝ်း ဇဝ်ဖြာ။ ဆေ ဘေ ထာင် ပါယ် တီ၊ န့ တူ မှာန်။ အာဝ် မုး၊ အုဝ် တး ဘူင် ဇိုဝ် တီ။ အုဝ် ဟဲ့ တး တဲး အုဝ် ဘူင် တူတ့် ဒွန် မျုဝ် ပဲ့ ဟဲ့ ကာလာင် ဇဝ်ဖြာ၊ တဲး န့ လဝ့် နဝ်း အန်။ 18 အုဝ် တဝ်း အာခ်ု ဒီ ဘေ။ ဆိန့် ဒေါ တီ နီ၊ ကော ဇမ် အာခြာဝ် ဒီ ဟြာယ် ဘော ကာဒါယ် ဘော ဂါင်ဟြာဝ်၊ ဒါရာ ဇဝ်ဖြာ တူ ဟြာယ် ဒေါ မှဝ်။ ဂြုဝ်း ခဲင် ဘပ် ဒါရာ ဇဝ်ဖြာ အူ ဒုဝ် မိူဝ်၊ တူ ဟြာယ် ဒေါ မှဝ်။ န့ ဒီ ဘဲန် တူတ့် ဒွန် မျုဝ် ပီ ဒွိုမ် တဝ်း ဇဝ်ဖြာ။ 19 ဆေ န့ မိုဝ်း ဒူအီ၊ ဆေ အန် ဝဲန် ဒါရာ ဇဝ်ဖြာ အူ ညွင့်၊ တဝ်း အာရေ အန် အာဝ် တာင်၊ ဆေ အန် ဘော မာနုဝ် အီ ဟဝ် လွင် အန် တီ၊ ဒူအီ ဇိုဝ် တီ၊ အန် တူ မိုဝ်း ဒီခုဝ် မာဆေ ခဲင် မိူင် ပီ အိုပ် ဇဝ်ဖြာ။ အာဆေ ယီ ဒူပ် ဒါရာ ဇဝ်ဖြာ ဘော မာနုဝ် အီ ဟဝ် လွင် အန် တီ၊ အန် ဒီ ဘဲန် ဒူအီ အီ အာရေ တာင် ခဲင် မိူင် ပီ အိုပ် ဇဝ်ဖြာ။ 20 ခုဝ်၊ အုဝ် တဝ်း ဒီ ဘေ၊ ဆေ ဘေ တူ ဘူင် နာ မှာန် လွှိုမ် ပီ ဘူင် ဂေ ဒူအီ ခဲင် ဖိုင် ဖာရီဆဲ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဘေ တူ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။”

21 ဇဝ် ယေဆူ ဟဲ့ ဟွတ့် ကာလာင် လွင် အန် တီ၊ အန် ဝီ မာနုဝ် ပေါ အူ မျုဝ်။ အန် တဝ်း၊ “ဘေ ဟဲ့ ဒွိုမ် ယိုဝ် ဂြုဝ်း ဂေ ဒါ တာင် အီ ကွယ် ဒေါ မွိုန်။ ဂေ ဟဲ့ ဒွိုမ် တဝ်း၊ ‘ကွဲ့ ငဝ်း အာဆာက် အီ။ အာဆေ ငဝ်း အာဆာက် အီ၊ အန် လုဝ် ခမ် မှာပ် အန်။’ 22 အုဝ် ယီ တဝ်း ဒီ ဘေ၊ အာဆေ ဟဲ့ ရူ ဒီ ဘီနွင် အန်၊ အန် လုဝ် ခမ် မှာပ် အန်။ ဘော၊ ဆေ န့ မိုဝ်း ဒူအီ အီ တဝ်း၊ ‘မဲ အာဝ် အး၊’ အန် လုဝ် ခမ် ဂေ ဒါ တာင် ဆုင်ဖျာတ် အာမူ အန်။ အာဆေ ယီ တဝ်း ဒီ ဘီနွင် အန်၊ ‘မဲ ဟဲ့ ရိုဝ်၊’ အန် ဒီ စုဝ်း ကာလုဝ့် ငါရာယ်။

23 ဖာမာ အန်၊ ဆေ မဲ မိုဝ်း ပီ ဒီ လှူ၊ တဝ်း ဒီ ဘ့လေး ဒဲင် ကာစှူင့် လှူ၊ ဆေ မဲ ဟဲ့ ဟွတ့် ဇမ် ဒီ အာတ့် ကာစှူင့် လှူ၊ ယီ ဝီ လှုဝ်း၊ န့ မိုဝ်း ဘီနွင် အီ အုန် နဝ်း ဒီ မဲ၊ 24 မဲ လုဝ် ဘ့လေး ပီ ဒီ လှူ မဲ ဒီ တီ၊ ဝီ ဟာဝ် ဒူင် ကွယ် ဘီနွင် တွိုန် ဒီ အာတ့်၊ ဝီ မှာန့် တဲး ဘာယ် ဝီ လာယ် ဒါခိုယ်။ ဟဲ့ ဟွတ့် မဲ ပွိုန် ဒီ ဝီ ဟာဝ် လှူ ပီ ဒီ လှူ မဲ။

25 ဆေ န့ မုး ရန်ဆူ မဲ အီ တဝ်း ဒီ ဖျာက် မဲ၊ တဲး န့ ဘဲန် အာမူ၊ ဆေ အန် ဘော ဒဲ့ မဲ ဟာဝ် ဒူင် ကွယ် ဒါ တာင် အီ ဆုင်ဖျာတ် ဒါရာ၊ မဲ လုဝ် ဂျုဝ်ဂျာ ဒီ ဘူင်၊ တဲး ဘာယ် ဝီ လာယ် ဒါခိုယ် ဒေါ ဟာဝ် ဘာယ် ဒူပ် န့တေန့်။ ဆေ မဲ တူ ပဲ ဒီ ဘူင်၊ အန် ဒီ အာပ် မဲ ဒီ ဒါ အီ ဆုင်ဖျာတ် ဒါရာ။ ဟဲ့ ဟွတ့်၊ ဒါ အီ ဆုင်ဖျာတ် ဒါရာ တွိုန်၊ အန် ဒီ ဘော အာပ် မဲ ဒီ ဒါ ဆိုက်၊ တဲး ဒါ ဆိုက် ဝီ ခြွင့် မဲ ခဲင် ကာပိုမ်။ 26 ဆေ န့ ပါယ် တီ၊ အုဝ် တဝ်း အာခ်ု ဒီ မဲ၊ ဆေ မဲ တူ ဒွါ ဘြေ့ ရွိုန် ပီ မှာန့် ရန်ဆူ မဲ တွိုန်၊ မဲ တူ ပွိုန် ဝီ လေး ခဲင် ကာပိုမ် တွိုန်။

27 ဘေ မိူဝ် ဟဲ့ ဒွိုမ် ယိုဝ် ဂြုဝ်း ဂေ ဒါ တာင် အီ ကွယ် ဒေါ မွိုန်။ ဂေ ဟဲ့ တဝ်း၊ ‘ကွဲ့ လုတ့် အီဘိုန့် အီ ဟဝ်။’ 28 အုဝ် ယီ တဝ်း ဒီ ဘေ၊ ဆေ ဘေ ယွတ် အီဘိုန့်၊ ဝီ မိုဝ်း နဝ်း ဆီ ပွိုန် အန်၊ နဝ်း ဆီ လာယ် အန်၊ န့ ပီ ဘေ ဟဲ့ ဟွတ့် လုတ့် အီဘိုန့် တီ ခဲင် နဝ်း ဘေ။ 29 ဆေ န့ မုး ငါယ် ဘေ ဘ့လာက် အာအး အီ တဲး ဘေ ဘူင် မှာပ်၊ တဲး ဘေ ဂွဲ့ လေး ဘော ဝဲန် ငါယ် တီ။ ဆေ ဒုဝ် ဘေ ဟဲ့ စှေ လိုဝ် အူ ပ့လုဝ့်၊ န့ မွှိုမ် လွှိုမ် မိုဝ်း ဘေ ဒုဝ် ဘူင့် အီ ဇေ့ဇုင်၊ ယီ စုဝ်း ကာလုဝ့် ငါရာယ် ဘော စှိုမ် တူတ့်။ 30 ဘော ပါယ် တီ။ ဆေ န့ မုး ဒဲ ဘေ ဘ့လာက် အာအး အီ တဲး ဘေ ဘူင် မှာပ်၊ ဒဲပ် ဝဲန် ဒဲ တီ။ ဆေ ဘေ တူ မိုဝ်း ဒဲ တီ၊ န့ မွှိုမ် လွှိုမ် မိုဝ်း ဘေ ဒုဝ် ဘူင့် အီ ဇေ့ဇုင်၊ ယီ လုဝ် စုဝ်း ကာလုဝ့် ငါရာယ် ဘော စှိုမ် တူတ့်။

31 ဂေ ဒါ တာင် အီ ကွယ် ဒေါ မွိုန် မိူဝ် ဟဲ့ ဒွိုမ် တဝ်း၊ ‘ဆေ ဒူအီ အူ ဝီ ဆီ ဝဲန် အီဘိုန့် အန်၊ အန် လုဝ် ဒဲမ် ပဲ့ ဒွါ ဒီ အီဘိုန့် တဲး အီ နပ် လွင် ဟဲ့ ဝဲန် အန် အီဘိုန့် တီ။’ 32 အုဝ် ယီ တဝ်း ဒီ ဘေ၊ ဆေ န့ မုး အီဘိုန့် အီ တူ မိုဝ်း နဝ်း ကိူန်၊ ဆေ အီမာယ် အန် ယီ ဝဲန် အီဘိုန့် တီ၊ န့ ပီ အန် စ်ု အီဘိုန့် အန် ဒူပ် အီမာယ် အီ ဟဝ်၊ ဘူင် မှာပ်။ ဆေ န့ ဘော မိုဝ်း ဒူအီ အီ လာယ် အီဘိုန့် အီ ဟဲ့ ဒွိုမ် မိုဝ်း အီမာယ်၊ ယီ ဟဲ့ ဟွတ့် လာယ် ဝဲန်၊ ဒူအီ တီ ဘူင် မှာပ် အီ ပီ အန် လုတ့် အီဘိုန့် အီ။

33 ဘေ မိူဝ် ဟဲ့ ဒွိုမ် ယိုဝ် ဂြုဝ်း ဂေ ဒါ တာင် အီ ကွယ် ဒေါ မွိုန်။ ဂေ ဟဲ့ တဝ်း၊ ‘ကွဲ့ ကာလုဝ် ဒီ ခမ် ဂြုဝ်း ကာဆဲန့် ဘော ဂြုဝ်း ဒိူင်။ တဲး ဘေ ဘူင် ခဲ့ ပီ ကာဆဲန့် ဘေ ဒီ ဇဝ်ဖြာ။’ 34 အုဝ် ယီ တဝ်း ဒီ ဘေ၊ ကွဲ့ ခမ် ဂြုဝ်း ဒိူင် ဒေါ မှဝ်။ ကွဲ့ တဝ်း၊ ‘ဆေ အုဝ် ကာလုဝ်၊ တဲး ဘ့လေ ကာဆး ဒး အုဝ်။’ ခုဝ်၊ န့ မုး ဇဝ်ဖြာ၊ အီ အိုပ် အာရေ ဇိုဝ် တီ။ ကွဲ့ တဝ်း၊ ‘ဆေ အုဝ် ကာလုဝ်၊ တဲး ကာဒါယ် ညွှတ် အုဝ်။’ ခုဝ်၊ ကာဒါယ် မုး ဒူင် ညဲတ့် ဇဝ်ဖြာ။ 35 ကွဲ့ တဝ်း၊ ‘ဆေ အုဝ် ကာလုဝ်၊ တဲး မိူင် ယေရူဆာလဲမ် ကာပျာတ့်။’ ခုဝ်၊ ဇဝ်ဖြာ ဟဲ့ ရဝ်း မိူင် တီ ဘော ဘဲန် ခုန်ဒီခမ် တာင် အီ အိုပ် မိူင် တီ။ 36 ကွဲ့ တဝ်း၊ ‘ဆေ အုဝ် ကာလုဝ်၊ တဲး အုဝ် ယမ်။’ ခုဝ်၊ ဘေ တူ ပဲ ဒီ ဘူင် တဲး ဟိုက် ဂိန့် အီ ဝွင့် ဘျွင် ဘဲန် အီ လုယ်၊ တဲး ဟိုက် ဂိန့် အီ လုယ် ဝီ ဘဲန် အီ ဝွင့်။ 37 ခုဝ် အန် တီ ဆေ ဟဲ့ မုး၊ ဘေ လုဝ် တဝ်း၊ ‘ဟဲ့ မုး။’ ဆေ အာဝ် မုး၊ ဘေ လုဝ် တဝ်း၊ ‘အာဝ် မုး။’ ဆေ ဘေ လုဝ် ကာလာင် လွှိုမ် တီ၊ တဲး အီ ညှိုမ် ဂြုဝ်း ဘေ၊ န့ တူ မွှိုမ်။ ဘုဝ် ကာနမ် အီ ဟာယ် ကာဆဝ်၊ အန် နပ် ဒီ ဘူင် တဲး အီ ကာလုဝ်၊ ဝီ ခမ် ဂြုဝ်း ကာဆမ် ဒိူင်။

38 ဘေ မိူဝ် ဟဲ့ ဒွိုမ် ယိုဝ် ဂြုဝ်း ဂေ ဒါ တာင် အီ ကွယ် ဒေါ မွိုန်။ ဂေ ဟဲ့ တဝ်း၊ ‘အာဆေ ဘူင် တဲး ငါယ် အီ ဟဝ် အပ်၊ အီ ဟဝ် လုဝ် ဝီ ဘူင် တဲး ဘော ငါယ် အန် အပ်။ အာဆေ ဘူင် တဲး ဟြာင် အီ ဟဝ် ကာဘက်၊ အီ ဟဝ် လုဝ် ဝီ ဘူင် တဲး ဘော ဟြာင် အန် ကာဘက်။’ 39 အုဝ် ယီ တဝ်း ဒီ ဘေ၊ ကွဲ့ ဘူင် ဝျီ့ မာဆေ ဒီ ဒူအီ အီ တူ မွှိုမ်။ ဆေ ဒူအီ အူ ဝီ ကာထ ကာလာ ဘေ အူ ဘ့လာက်၊ တဲး ဘေ ဝီ တဲး အန် ကာထ ပေါ အူ ဘ့လာက်။ 40 ဆေ န့ မိုဝ်း ဒူအီ အီ ဖျာက် ဘေ ဒီ အာတ့် ဒါ တာင် ကူပ် ဆီ ပွိုန် အန် ဆီတုဝ် ဘေ၊ တဲး ဘေ ဝီ ဒွါ ဘော ဟိုပ် ဘေ ဒီ အန်။ 41 ဆေ အူ ဝီ စ်ု ဘေ တိုယ် အန် ဟာဝ် ဒူပ် န့တေန့် အာဒါ အူ လွှက့်၊ တဲး ဘေ ဝီ ဟာဝ် တိုယ် အန် အာဒါ အာ လွှက့်။ 42 ဆေ ဒူအီ မှာန့် ဒွန် မျုဝ် ဒီ ဘေ၊ တဲး ဘေ ဒွါ ဒီ အန်။ ဆေ ဒူအီ ဆီ ကာရဝ်း ကြုဝ် ဒီ ဘေ၊ ကွဲ့ တဝ်း၊ အာဝ် မိုဝ်း။

43 ဘေ မိူဝ် ဟဲ့ ဒွိုမ် ယိုဝ် ဂြုဝ်း ဂေ ဒါ တာင် အီ ကွယ် ဒေါ မွိုန်။ ဂေ ဟဲ့ တဝ်း၊ ‘ဘေ လုဝ် ရွက့် ဂိုက် ဘေ၊ ယီ ပွိုန် ဇွင့် ရန်ဆူ ဘေ။’ 44 အုဝ် ယီ တဝ်း ဒီ ဘေ၊ ဘေ လုဝ် ရွက့် ဘော ရန်ဆူ ဘေ၊ ဆာခိုဝ် ဒါင် ဂေ အီ ဘူင် နာ စီစိဝ် ဒီ ဘေ။ 45 ပီ ဘူင် ဘေ တီ၊ န့ ဘျ လွင် မုး ဘေ ဂွန် ဇဝ်ဖြာ။ ဘော ဇဝ်ဖြာ အီ ကွယ် ဂါင်ဟြာဝ်၊ အန် ဘူင် တဲး ဘော ဒူအီ မွှိုမ် ဘော ဒူအီ ဟာယ် ပွိုန် ဒီ ယိုဝ် ဘ့လာင် ဆီငဲ အီ လေး ဒွန် ဆီငဲ။ အန် ဘော တဲး ဂ့လာယ် စုဝ်း ဒူင် ကွယ် ဂေ ဒူအီ အီ မိုဝ်း နဝ်း ဆိူဝ် နဝ်း မှာန် ဘော ဒီ ဒူအီ အီ တူ မိုဝ်း နဝ်း ဆိူဝ် နဝ်း မှာန်။ 46 ဆေ ဘေ ရွက့် မီ ဂေ အီ ရွက့် ဘေ၊ အာဝ် မိုဝ်း အာဂျိုဝ် အန်။ ဘော ဂေ ဒူအီ အီ တူ မွှိုမ် ဘော ဂေ ဒူအီ အီ ပီ ဂေ ဒူအီ ဂဲပ် ရွိုန် စိုင်၊ ဂေ နပ် ဒီ ဘူင် ပါယ် တီ။ 47 ဆေ ဘေ မိူဝ် ရွုး မီ ဂေ ဒူအီ အီ မုး အာမျုဝ် ဘေ၊ ဂေ အီ ပီ ဘီနွင် ဘေ၊ ဘေ တူ ဘူင် နာ မွှိုမ် လွှိုမ် အီ ဟဝ်။ ဘော ဂေ ဒူအီ အီ တူ နပ် ဇဝ်ဖြာ၊ ဂေ နပ် ဒီ ဘူင် ဇိုဝ် တီ။ 48 ခုဝ် အန် တီ အုဝ် တဝ်း၊ တဲး ပီ ဘူင် ဘေ ဇေ့ဇုင် ပီ ဇဝ်ဖြာ အီ ကွယ် ဂါင်ဟြာဝ် ဟဲ့ ဇေ့ဇုင်။”