မ်ထ 4

လွင် ဘုဝ် ကာနမ် ကာဆုး ဇဝ် ယေဆူ ဘူင် မှာပ်

1 ဝါယ် အန် တီ နဝ်း ဖွိုမ် ဇဝ်ဖြာ ဝီ စ်ု ဇဝ် ယေဆူ ဟာဝ် ခဲင် ပြဲ ကာဟဝ်း၊ တဲး ဘုဝ် ကာနမ် ပွိုန် ဒီ ကာဆုး အန် ဘူင် မှာပ်။ 2 ဇဝ် ယေဆူ ယီ ကွယ် ဒီ တီ အာဒါ ဖွုန် ဂိုဝ် ဆီငဲ ဒီ ဖွုန် ဂိုဝ် မှိုဝ်၊ တူ ဟူမ် မာဆေ။ ပန် တီ အန် ကာပြာန့် ကာဆဝ် ပီ ဒီ ဟူမ်။ 3 အီ ဒီ ကာဆုး ဇဝ် ယေဆူ ဘူင် မှာပ် တွိုန်၊ အန် ယီ တး ဒူင် ကွယ် ဇဝ် ယေဆူ၊ ဝီ တဝ်း၊ “ဆေ န့ မှာန် မုး မဲ ဂွန် ဇဝ်ဖြာ၊ တဲး မဲ ကာလာင် တဲး မာဝ် ဂေ နီ ဘဲန် ပီ ဒီ ဟူမ် မဲ။”

4 ဇဝ် ယေဆူ ဝီ ဝျီ့ ဂြုဝ်း တီ။ အန် တဝ်း၊ “ခဲင် ဘပ် ဇဝ်ဖြာ န့ တဝ်း၊ ‘ဆေ ဒူအီ မိုဝ်း မီ ပီ ဒီ ဟူမ် အူ မျုဝ် အာဝ် ဂ့လိုမ်။ န့ ဆီ လုဝ် ဘော ဂြုဝ်း ဇဝ်ဖြာ ဒွန် ဒုဝ် အီ လေး ခဲင် မူတ့် အန်၊ တဲး န့ ဟျီင် ဘော နဝ်း ဖွိုမ် ဒူအီ။’”

5 ဝါယ် အန် တီ ဘုဝ် ကာနမ် ဝီ တဲး ဇဝ် ယေဆူ ဟာဝ် ဇမ် ခဲင် မိူင် ယေရူဆာလဲမ်၊ အီ မုး မိူင် ဘွတ်။ အန် တဲး ဇဝ် ယေဆူ ကွယ် နာ ဒဲင် ကာတု ဟုဝ် ဇဝ်ဖြာ။ 6 အန် ဝီ တဝ်း၊ “ဆေ ဟဲ့ မှာန် မုး မဲ ဂွန် ဇဝ်ဖြာ၊ တဲး မဲ ဘုင်ဘ့လုး ဘျွာ ဒူင် ကွယ် မဲ တီ။ ခုဝ်၊ ခဲင် ဘပ် ဇဝ်ဖြာ န့ ဟဲ့ ဒဲမ် အုန် တဝ်း၊ ‘ဇဝ်ဖြာ ဒီ စ်ု ဂေ အာမူ အာမာတ် အန်၊ တဲး ဂေ ယွတ် လိုမ်လာ မဲ၊ တဲး ဂေ ဘ်ု မဲ တာ ဒဲ ဂေ၊ ကွဲ့ တဲး ပ့လဝ် မဲ တာ ဒုး ဒီ မာဝ်။’”

7 ဇဝ် ယေဆူ ဝီ တဝ်း၊ “ခဲင် ဘပ် ဇဝ်ဖြာ န့ ဘော ဒဲမ် အုန် ပေါ အူ မျုဝ်။ န့ တဝ်း၊ ‘ကွဲ့ ထေဝ် နဝ်း ဇဝ်ဖြာ၊ အီ မုး အန် ဇဝ် ပီ ကြိုပ် မဲ။’”

8 ပေါ အူ ဇေန့် ဘုဝ် ကာနမ် ဝီ တဲး ဇဝ် ယေဆူ ကွယ် ဒဲင် နွန် စာ ကာဆဝ်၊ ဝီ ဘျ ဒီ အန် မာန် မိူင် ဒွန် ပ့လုဝ့် ဒဲင် ကာဒါယ် နီ၊ တဲး အန် ဘော ယွတ် အာဖုင် ဒင်ခုဝ် ခဲင် မိူင် ဂေ တီ။ 9 အန် ဝီ တဝ်း၊ “အုဝ် ဒီ ဒွါ တူတ့် ဇိုဝ် တီ ဒီ မဲ၊ ဆေ မဲ ဂူမ် ဒီ အာတ့် အုဝ်၊ ကြိုပ် အုဝ်။”

10 ဇဝ် ယေဆူ ဝီ တဝ်း၊ “မဲ ဘုဝ် ကာနမ် အီ စိူဝ် ဆာတာန်၊ မဲ လေး တဝ် ဒူင် ကွယ် အုဝ်။ ခဲင် ဘပ် ဇဝ်ဖြာ န့ ဟဲ့ ဒဲမ် အုန် တဝ်း၊ ‘မဲ လုဝ် ကြိုပ် မီ ဇဝ်ဖြာ အီ မုး ဇဝ်ဖြာ ပီ ကြိုပ် မဲ။ မဲ လုဝ် ဘူင် မီ ဂါန် ဇဝ်ဖြာ အူ ကာဒင် တီ၊ ကွဲ့ ကြိုပ် ပေါ ကာဒင်။’”

11 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဘုဝ် ကာနမ် ဝီ လေး တ ဒူင် ကွယ် အန်။ ဂေ အာမူ အာမာတ် ဇဝ်ဖြာ ဘော တး လိုမ်လာ အန်။

လွင် ဇဝ် ယေဆူ စုး ဒီ ကာလာင် ဒီ အီ လွင် ဇဝ်ဖြာ

12 ဇဝ် ယေဆူ ဘော ယိုဝ် ဆာဒါင် လွင် အာယောဟာန် တွိုန်။ ဂေ ဟဲ့ ဟွတ့် မှေတ့် ခြွင့် အန် ခဲင် ကာပိုမ်။ ဝါယ် ဝီ နပ် အန် လွင် အန် တီ၊ အန် ဝီ ဟာဝ် ဝေန့် ခဲင် အိူင် ဂါလီလေ။ 13 အန် လေး ခဲင် မိူင် နာဆာရေတ့်၊ ဝီ ဟာဝ် ကွယ် ခဲင် မိူင် ကာပေနာရိုမ်။ မိူင် တီ ကွယ် ဒီ ခူပ် အိုမ် ဒိုင် ကာတတ် ဒူင် ကွယ် ဂေ ခြိုဝ် အာဇေဘူလူန် ဂါယ် ခြိုဝ် အာနာပ်ထာလီ။ 14 ပါယ် တီ၊ န့ ဘော ဘဲန် ပီ ပီ ဒွိုမ် တဝ်း ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ။ အန် ဟဲ့ ဒွိုမ် တဝ်း၊

15 “ဒူင် ကွယ် ဂေ ဒူအီ ခြိုဝ် အာဇေဘူလူန် ဂေ ဒူအီ ခြိုဝ် အာနာပ်ထာလီ၊ န့ ကွယ် ဒူပ် န့တေန့် အီ ဟာဝ် ဒူင် ကွယ် အိုမ် တာင် နာ ဂေတ့် ဆီငဲ ဘော ဒီ ခူပ် ဘ့လဲင် ယောဒါန်။ န့ ဘော မိုဝ်း အိူင် ဂါလီလေ အီ မုး ဒူင် ကွယ် ဂေ ဒူအီ အာမျုဝ် ဟဝ်။

16 ဂေ ဒူအီ အီ ကွယ် ဒီ တီ၊ န့ ပီ၊ ဂေ ကွယ် ခဲင် အပ် ဝွင့်။ န့ ပီ၊ ဂေ ဟဲ့ ယိုဝ် ဘ့လာင် တာင်။ ဘော ဂေ ဒူအီ အီ တူ နပ် လွင် အာဆာက် ပီ ဒွါ ဇဝ်ဖြာ၊ ဂေ ပီ ဒူအီ အီ ဟဲ့ ရိန် ဒီ ယမ်၊ ဂေ မိူဝ် ဟဲ့ ယိုဝ် ဘ့လာင် အီ ပီ န့တေန့် အီ တဲး ဂေ လွတ် ယမ်။”

17 အူ ဆိန့် ဒေါ ကွယ် ဇဝ် ယေဆူ ခဲင် မိူင် နာဆာရေတ့် တွိုန်၊ အန် စုး ဒီ ကာလာင် ဒီ ဒူအီ ကိူန်။ အန် တဝ်း၊ “တဲး ဘေ လှုဝ်း ဘော ဝဲန် မှာပ် ဘေ။ ခုဝ်၊ အာခြာဝ် ဒီ အိုပ် ဇဝ်ဖြာ ကာဒါယ် နီ ဟဲ့ ကာတတ် ဒီ တး။”

လွင် ဇဝ် ယေဆူ ဒဲ့ ဒီဘဲ အန်

18 အူ ဆီငဲ ဇဝ် ယေဆူ ဟာဝ် ခူပ် ဘာင် အိုမ် ဂါလီလေ တွိုန်။ ဒေါ အန် တီ အန် ဘော ယိုဝ် ဂါယ် အူကတ် အူဝါ အာ ဝီ။ ဂါယ် မုး ဒူအီ မှေတ့် ဂါ၊ ဂူင့် န့ရပ်၊ ဘျွာ ခဲင် အိုမ်။ န့ မုး အာဆီမူန်၊ အီ စိူဝ် ဘော အာပေတာရူ ဘော ဝါ အန် အီ စိူဝ် အာအန်ဒါရူ။ 19 ဇဝ် ယေဆူ တဝ်း ဒီ ဂါယ်၊ “ဘာယ် တး ဒူပ် အုဝ်။ အုဝ် ဒီ တဲး ဘာယ် ဒဲ့ ဒူအီ ဟဝ် တး ဒူပ် အုဝ်။” 20 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဂါယ် ဝီ ဘ့လေး ဝဲန် န့ရပ် ဂါယ် အူ ဇေန့်၊ ဝီ ဟာဝ် ဒူပ် အန်။

21 အန် ဝီ ဟာဝ် ပေါ အီ စဲက်၊ ဝီ ယိုဝ် ဂါယ် အူကတ် အူဝါ ပေါ အာ ဝီ။ န့ မုး အာယာကူပ် အီ မုး ဂွန် အာဇေဘေဒေ၊ ဘော ဝါ အန်၊ အီ စိူဝ် အာယောဟာန်။ ဘော ဂါယ် ဘော ဂုန့် ဂါယ် အီ စိူဝ် အာဇေဘေဒေ၊ ဂေ ကွယ် ရိုမ် ခဲင် ရိုဝ်၊ မ့ပြာယ် န့ရပ် ဂေ။ ဇဝ် ယေဆူ ဝီ ဒဲ့ ဂါယ်။ 22 ဟဲ့ ဟွတ့်၊ ဂါယ် ဝီ လေး ခဲင် ရိုဝ်၊ ဝီ တဲး ဂုန့် ဂါယ် ကွယ် နာ ပန်။ ဂါယ် ဝီ ဟာဝ် ဒူပ် ဇဝ် ယေဆူ အူ ဇေန့်။

လွင် ဇဝ် ယေဆူ တဲး ဒူအီ ဆဝ် ဝီ ကဲန်

23 ဇဝ် ယေဆူ ဘော ဟာဝ် ဘဲန် ပ့လုဝ့် ဘဲန် ပ့လုဝ့် ခဲင် အိူင် ဂါလီလေ၊ ဝီ မာနုဝ် ဂေ ဒူအီ အီ ကွယ် ခဲင် ဇူင် ကြိုပ် ဂေ ဒူအီ ယူဒါ ဇဝ်ဖြာ။ အန် ကာလာင် ဒီ ဂေ လွင် ဇဝ်ဖြာ ဒီ အိုပ် ကာဒါယ်၊ တဲး ဒူအီ ဘဲန် နဝ်း ဒါခိုယ်။ ခဲ့ မိုဝ်း ဂေ ဒူအီ ဆဝ် ဘဲန် မျုဝ် ဘဲန် မျုဝ်၊ ခဲ့ မိုဝ်း ဂေ ဒူအီ အီ တူ ခ၊ ဇဝ် ယေဆူ မိူဝ် တဲး န့ ဟြာယ် တူတ့် ဒွန် မျုဝ်။ 24 ဂေ ဒူအီ အီ ကွယ် ခဲင် မိူင် ဆူရီ ဘော မိူင်၊ ဂေ ဘော နပ် လွင် အန် တီ။ ဟဲ့ ဟွတ့်၊ ဂေ ဝီ တိုယ် ဒူအီ မိုဝ်း ဆဝ် ဘဲန် မျုဝ် ဘဲန် မျုဝ်၊ တဲး ဂေ ဟာဝ် ဇမ် ဒူင် ကွယ် ဇဝ် ယေဆူ။ န့ ဘော မုး ဒူအီ မိုဝ်း ဆဝ် ကာဆဝ်၊ ဒူအီ မိုဝ်း ကာနမ် ခဲင် ဒုဝ် ဘူင့်၊ ဒူအီ မိုဝ်း ငါန်၊ ဘော ဂေ ဒူအီ ဒဲ ဂေ ပ့လဝ် ယမ် ဘ့လာက်၊ အန် ပီကဲန် တူတ့် ဂေ။ 25 န့ မိုဝ်း ဒူအီ ကိူန် ကာဆဝ်၊ အီ ဒူပ် အန်။ ဂေ ဒူအီ တး အိူင် ဂါလီလေ၊ ဂေ အီ တး ခဲင် အိူင် မိူင် ဂိုဝ် မိူင်၊ ဂေ အီ တး မိူင် ယေရူဆာလဲမ်၊ အိူင် ယူဒါ ဘော ဂေ အီ တး နာ တ ဘ့လဲင် ယောဒါန်၊ ဂေ ဘောကာဂ့လျီတ် ဒူပ် အန်။