ဘပ် အီ မာနုဝ် အာငျာန် ဘွတ်
ခါန်
လွင် ပီ မာနုဝ် ခဲင် ဘပ် နီ
1
1 ပီ ဒဲမ် အုန် ခဲင် ဘပ် နီ မုး ဂြုဝ်း အာငျာန် ဘွတ် ပဲ့ ဟဲ့ ဒဲမ် အုန် ခုန်ဒီခမ် အာဆာလုဝ်မုဝ် အီ မုး ဂွန် အာဒါဝိတ်။ အန် ဘော မုး ခုန်ဒီခမ် အီ အိုပ် ဂေ ဒူအီ အီဆာရေလ။2 ဂြုဝ်း နီ မုး ဂြုဝ်း အီ စွယ် တဲး အီ မိုဝ်း အာငျာန် ဘွတ် ဘော နပ် ဒီ မာနုဝ် နာ ဘွတ် နာ မွှိုမ်။ န့ မိူဝ် မာနုဝ် အီ တဲး ဂေ နပ် ပီ ပါယ် ဘဲန် မျုဝ် ဘဲန် မျုဝ်။
3 ဂြုဝ်း နီ ဒီ စွယ် တဲး မဲ နပ် ဘဲန် မျုဝ် ဘဲန် မျုဝ်၊ နပ် ဒီ ဘူင် ဆိူဝ် ဆိူဝ် မှာန် မှာန်။ န့ မိူဝ် တဲး မဲ နပ် ဒီ ဆုင်ဖျာတ် အီ ဒူပ် ဒါရာ ဘော ဘူင် နာ မုး နာ မှာန်။
4 ဂြုဝ်း နီ ဒီ စွယ် ဒူအီ ရိုဝ်၊ တဲး ဂေ ဝီ လွှက့်။ န့ ဒီ မာနုဝ် ဒူအီ နှိုမ်၊ တဲး ဂေ မိုဝ်း အာငျာန် ဘော နပ် ဒီ ကာယဝ်း အီ မွှိုမ် အီ တူ မွှိုမ်။
5 ဂေ အီ မိုဝ်း အာငျာန် မွှိုမ်၊ တဲး ဂေ ထူမ် ဂြုဝ်း နီ၊ တဲး ဂေ ဝဲ နပ် ကာပွါ။ ဘော ဂေ အီ နပ် ဒီ ကာယဝ်း အီ မွှိုမ် အီ တူ မွှိုမ်၊ တဲး ဂေ ဘော နပ် ပီ လုဝ် ဘူင် ဂေ။
6 တဲး ဂေ နပ် ဆီချာ ပီ ပါယ် ဆီဖဝ် ဂြုဝ်း မာကာထ ဘော ဂြုဝ်း အူဖာမာ။ တဲး ဂေ နပ် ဂြုဝ်း လာယ် တ ပီ ဒီမွှတ် ဂေ အီ မိုဝ်း အာငျာန်။
လွင် အာငျာန် ဘွတ်
7 အာဆေ ဆီ ပွိုန် အာငျာန် ဘွတ်၊ အန် လုဝ် ရုဝ်ဆေ ဇဝ်ဖြာ ဒီ အာတ့်။ ဂေ ဒူအီ ရိုဝ် ယီ ဝဲန် အာငျာန် ဘွတ် ဘော တူ ဆီ ဟေန် နာ ဘွတ် နာ မွှိုမ် ဒေါ မှဝ်။
8 အိုယ် ဂွန် ကာညူမ် အိုယ်၊ တဲး မဲ ထူမ် ဂြုဝ်း ပီ မာနုဝ် အုဝ်၊ ထူမ် ပီ ကာလာင် ဂုန့် မဲ။ ကွဲ့ တဲး မဲ ဝဲန် ပီ မာနုဝ် မာ မဲ။
9 ဂြုဝ်း ပီ မာနုဝ် တီ ဒီ စွယ် မဲ တဲး မဲ မိုဝ်း ဆာရေ၊ တဲး န့ ပီ မဲ ဘြဝ့် ကာမဲ့ ကာမာယ် ဒီ ဂိန့် မဲ။ န့ ဘော ပီ မဲ ဟဲ့ ဟွယ် မာကာဝဲ့ ဒီ မဲင် မဲ၊ တဲး မဲ မိုဝ်း ဆာရေ။
10 အိုယ် ဂွန် ကာညူမ် အိုယ်၊ ဆေ ဒူအီ တူ မွှိုမ် ဒဲ့ မဲ၊ ကွဲ့ တဲး မဲ ထေဝ် ဒီ ဟာဝ်၊ ထေဝ် ဒီ ဒူပ်။
11 ဂေ နပ် ဒီ တဝ်း၊ “တး၊ တဲး အေ ဟာဝ် ဟြေတ့် ဒီ ငဝ်း ဒူအီ မင် အီ၊ တဲး အေ ဟာဝ် ကာစွှာ့၊ ဟာဝ် ကာဂုဝ်း ဒီ ဂေ အီ တူ နှဝ့် န့ဒဝ့် နှဝ့် န့ရွယ်။
12 တဲး အေ မဲင် ဘ့လွိုပ် ဂေ ဘော အိမ်၊ တဲး ဂေ စုဝ်း ခဲင် မိူင် မာရာန ဘော ဒုဝ်။”
13 ဂေ ဘော တဝ်း၊ “ကြုဝ်ကြာမ် ဂေ ဒွန် မျုဝ်၊ တဲး အေ ပွိုန် ဒီ ဒိုဝ်း တး အုန်၊ တဲး န့ ကော နုဝ့် ခဲင် ကာင် အေ။
14 ဟာဝ် မဲ ဟာဝ် ဒူပ် ယေ၊ ခဲ့ ပီ ဇူန် အေ ဒီ အီ၊ အေ ဒီ လာယ် ကာဆာင် ဒီ အေ။” ဆေ ဂေ တဝ်း ပါယ် တီ၊ ကွဲ့ တဲး မဲ ဒူပ်။
15 အိုယ် ဂွန် ကာညူမ် အိုယ်၊ ကွဲ့ တဲး မဲ ဟာဝ် ဒူပ် ဂေ။ တဲး မဲ ကာဂဝ်း ဒီ ဂေ။
16 ခုဝ်၊ ဂေ တူ ပွိုန် ယိူန် ဒီ ဘူင် နာ စီစိဝ်။ ဂေ ဘော ခြန် ဒီ ငဝ်း ယမ် အီ။
17 ဆေ မဲ ဒိန့် န့ရပ် ဒေါ ယိုဝ် မာဆိမ်၊ အာဝ် မိုဝ်း အာဂျိုဝ် မာဆေ။
18 ပါယ် တီ ဒူအီ ဇိုဝ် တီ၊ ဂေ ဒီ ဝီ ခြေ ယွတ့် ပီ ဒိန့် ဂေ။ ပီ ခြာမ် ဂေ ဒီ ဘူင် ပီ ဝီ တဲး ဒုဝ် ဘြိမ် ဂေ ယမ်။
19 ဂေ အီ ဇူန် အီ၊ ဂေ ဒီ ဘော ယမ် ပါယ် တီ။ ဂေ အီ ဘူင် မှာပ်၊ ဂေ ဒီ ဝီ ခမ် အာဂျိုဝ် မှာပ် ပီ ဘူင် ဂေ တီ။
20 အာငျာန် ဘွတ် ပီ အီဘိုန့် အီ ကာလာင် ဂြုဝ်း ဒေါ ဟာဝ် အန် ဒူပ် န့တေန့်၊ ဘော ဒေါ ကွယ် အန် ခဲင် ကာလး။ တဲး ဘေ ထူမ် အာငျာန် တီ။
21 အန် ဒတ် တာင် တာင် ဒူင် ကာဇု ကိူန် ဒူအီ။ အန် ဘော မာနုဝ် အီ ဘာင် မာလုဝ်း မိူင်။
22 အန် တဝ်း၊ “အိုယ် ဘေ ဒူအီ ရိုဝ်၊ ဟဲ့ လှေန့် ဘေ ဟဲ့ ဘူင် အီ တူ မိုဝ်း ဒီခုဝ်။ ဘေ ဒူအီ ပီခိုက်၊ ဟဲ့ လှေန့် ဘေ လုက်တာယ် အီ ဘွတ်။ ဟဲ့ လှေန့် ဘေ ဘောကာဂ့လျီတ် ဟဲ့ ဝဲန် အာငျာန်။
23 ဆေ ဘေ ထူမ် ဂြုဝ်း ပီ မာနုဝ် အုဝ်၊ အုဝ် ဒီ ဘော ဟုး နဝ်း ဖွိုမ် အုဝ် ဒီ ဘေ၊ တဲး ဘေ နပ် ပီ ပါယ် အာငျာန် အုဝ်။
24 အုဝ် ဟဲ့ ဟွတ့် ဒဲ့ ဘေ၊ ဘေ ယီ တူ ယဝ်း။ အုဝ် ဟဲ့ ဟွတ့် ဘာင် ဘေ တး။ မာလဲ၊ ဘေ တူ ထူမ် ဂြုဝ်း အုဝ်။
25 ဘေ ဟဲ့ ဝဲန် အာကျာမ် အာငျာန် အုဝ်။ ဘေ တူ ခမ် တူ လုဝ် ပီ မာနုဝ် အုဝ် ဒီ ဘေ။
26 ခုဝ် အန် တီ ဒေါ ခမ် ဘေ ဒုက် တာင်၊ အုဝ် ဒီ ဘော ကာညး ဘေ။ ဒေါ ယုဝ် ကာဆဝ် ဘေ၊ အုဝ် ဒီ ပီဝါညာက် ဒီ ဘေ။
27 ဆေ နဝ်း ဘေ ဘ့လိူင် ပီ ခုန် တာင် တး ဘုတ် ဘေ၊ ဆေ အာဖေ အာရေ ဟဲ့ တး ဇမ် ဘေ ပီ ခုန် လာင် တး၊ ဆေ န့ ဟီ ဒုက် ညှာပ် ကာဆဝ် ဒီ နဝ်း ဘေ၊
28 ပန် တီ ဘေ ပီ ဘော ဝီ ဒဲ့ အုဝ် မိူဝ်၊ အုဝ် တူ ဝျီ့ ဂြုဝ်း ဘေ။ ဘေ ပီ ဘော ဝီ ဟြေတ့် အုဝ် ဒွန် နာ ဒွန် ပ့လုဝ့် မိူဝ်၊ ဘေ ဟူ ယိုဝ် အုဝ်။
29 ကူပ် ဟဲ့ ဇွင့် ဘေ အာငျာန်၊ ကူပ် တူ မိုဝ်း ဘေ နဝ်း ဆီ ရုဝ်ဆေ ဇဝ်ဖြာ၊
30 ကူပ် တူ မိုဝ်း ဘေ နဝ်း ဆီ ဟေန် အာကျာမ် အာငျာန် အုဝ် ဘော ဝဲန် ပီ မာနုဝ် အုဝ်၊
31 ဘေ ဒီ လုဝ် ခမ် ပီ ကာအာပ် ဘေ ခမ်။ ရုး ပီ ဘူင် ဘေ ဒီ ဝီ ဘဲန် ဒုက် ညှာပ် ကာဆဝ် ဒီ နဝ်း ဘေ။
32 ခုဝ်၊ ဂေ ဒူအီ ရိုဝ် ဒီ ဘော ယမ် ကူပ် ဝဲန် ဂေ အာငျာန် ဘွတ်။ ဂေ ဒူအီ ဟာယ် ဒီ ဘော လိုဝ် စှိုမ် ကူပ် ကွယ် ဒီရိုဝ် ဒီဒေတ့် ဂေ။
33 ဂေ အီ ထူမ် ဂြုဝ်း အုဝ်၊ ဂေ ယီ ပွိုန် ကွယ် ဒါခိုယ်၊ ကွယ် ဆီချာ။ အာဝ် မိုဝ်း ဒီ လုဝ် ယုဝ် အာဖေ အာရေ မာဆေ။”