2
1 အိုယ် ဂွန် ကာညူမ် အိုယ်၊ တဲး မဲ ထူမ် ခဲ့ ပီ မာနုဝ် အုဝ် ဒီ မဲ။ ပီ စ်ု အုဝ် မဲ ဘူင်၊ တဲး မဲ ဂဲပ် အုန် ဆီချာ ခဲင် နဝ်း မဲ။2 တဲး မဲ ထူမ် အာငျာန် နီ။ တဲး မဲ ဂျုဝ်ဂျာ ဒီ နပ် ဆီဖဝ် အန်။
3 ဆေ မဲ မှာန့် ဒီ နပ် ပီ ပါယ် ဘဲန် မျုဝ် ဘဲန် မျုဝ်၊ ဆေ မဲ မှာန့် ဒီ မိုဝ်း အာငျာန်၊
4 ဆေ မဲ ဟြေတ့် အာငျာန် တီ၊ တဲး န့ ပီ မဲ ဟြေတ့် ရွိုန်။ ဆေ မဲ ဟြေတ့် အာငျာန် တီ၊ တဲး န့ ပီ မဲ ဟြေတ့် ကြုဝ် ပီ ဒိပ် အုန် အီ။
5 ဆေ မဲ ဘူင် ပါယ် တီ၊ မဲ ဒီ ဘော နပ် ပီ ဒီ ပါယ် ဒီ ရုဝ်ဆေ ဇဝ်ဖြာ။ မဲ ဒီ ဘော နပ် ဆီချာ လွင် ဇဝ်ဖြာ။
6 ခုဝ်၊ န့ မုး ဇဝ်ဖြာ အီ နပ် ဒီ ဒွါ အာငျာန် ဒီ အီ။ အန် ဇဝ် အီ ဒီ တဲး န့ ကာလှုး ဆီချာ ဒီ နဝ်း အီ။
7 န့ ဘော မုး အန် ဇဝ် အီ စွယ် ဂေ ဒူအီ အီ မိုဝ်း နဝ်း ဆိူဝ် နဝ်း မှာန်။ အန် ဘော ဂွင့် ရဲ ဂေ အီ တူ ဘူင် နာ တူ မွှိုမ်။
8 အန် ဇဝ် ဘ်ု ဒီ ယွတ် ဂေ အီ ဒူပ် ဒါရာ အန်။ အန် ဇဝ် ဘော ဂွင့် ရဲ ဂေ အီ ဆီငါ ဘွတ်၊ အီ မုး ဒူအီ အန်။
9 ဆေ မဲ မှာန့် ဒီ အုဝ်၊ မဲ ဒီ နပ် ပီ ဒီ ပါယ် ဒီ ဘူင် ဆိူဝ် ဆိူဝ် မှာန် မှာန်။ မဲ ဒီ ဘော နပ် အီ ဒူပ် ဒါရာ။ မဲ ဒီ ဘော နပ် ဒီ ဘူင် နာ မုး နာ မှာန်။
10 မဲ ဒီ ဘော ဘဲန် ဒူအီ အီ မိုဝ်း အာငျာန်။ ပီ နပ် မဲ တီ၊ န့ ဒီ တဲး မဲ ဘျုဝ် ဒါခိုယ်။
11 ကူပ် နပ် မဲ ဒီ ကာယဝ်း အီ မွှိုမ် အီ တူ မွှိုမ်၊ န့ ဒီ ဂွင့် ဒီ ရဲ မဲ။ ကူပ် ဟဲ့ ကာလှုး ဒီ နဝ်း မဲ ဘဲန် မျုဝ် ဘဲန် မျုဝ်၊ န့ တဲး မဲ နပ် ဒီ ဆာဒိက်။
12 န့ မုး အာငျာန် အီ ဒီ ခြဲ မဲ၊ ကွဲ့ တဲး မဲ ဒူပ် ဒူအီ တူ မွှိုမ်။ န့ ဒီ တဲး မဲ လွတ် ဒီ ဂေ အီ ကာလာင် ဂြုဝ်း ဂုဝ့် ဂဲ့၊
13 တဲး မဲ လွတ် ဒီ ဂေ အီ ဝး နာ ဆိူဝ် နာ မှာန်၊ ဂေ အီ ကွယ် ခဲင် အပ် ဝွင့်။
14 ဂေ ဘော ဝုဝ် ဒီ ဘူင် မှာပ်၊ ဘော ခူယ် ဒီ ဒူပ် နာ စီစိဝ် အီ ဂုဝ့် ဂဲ့။
15 ဂေ မိူဝ် တူ မိုဝ်း နဝ်း ဆိူဝ်၊ ဘဲန် ဒူအီ တူ မွှိုမ် ညှိုမ်။
16 န့ မုး အာငျာန် တီ၊ အန် တဲး မဲ နပ် ဒီ ဝး အီဘိုန့် အီ မိုဝ်း နဝ်း ကိူန်၊ အီဘိုန့် အီ မှုဝ် ဒီ ကဝ် အီ။
17 န့ မုး အီဘိုန့် အီ နပ် ဒီ ဝဲန် အီမာယ် ဘြိမ် အန်၊ ဘော ပိဝ် ဂြုဝ်း ပီ ဒွိုမ် ဒိူင် ဒွိုမ် ကာဆဲန့် အုန် အန် ဒီ ဇဝ်ဖြာ။
18 ဆေ မဲ ဟာဝ် ဒီ ကာင် အန်၊ န့ တဲး မဲ စေဝ် ယမ်။ ဆေ မဲ ဒူပ် န့တေန့် အန်၊ န့ တဲး မဲ စေဝ် ဇမ် မိူင် မာရာန။
19 ဂေ အီ ဟာဝ် လဲ ဟာဝ် စ်ု အီဘိုန့် ဇိုဝ် တီ၊ အာဝ် မိုဝ်း အီ လွတ် ယမ်၊ အာဝ် မိုဝ်း အီ ဝီ တး ခေါ အူ ဝီ။
20 န့ မုး အာငျာန် တီ အီ တဲး မဲ ပွိုန် ဒီ ဒူပ် န့တေန့် ပီ ဒူပ် ဒူအီ မွှိုမ်၊ န့တေန့် အီ ဒူပ် နာ မုး နာ မှာန်။
21 ခုဝ်၊ ဂေ အီ မိုဝ်း နဝ်း ဘွတ် နဝ်း မွှိုမ်၊ ဂေ ဒီ ဘော ကွယ် ခဲင် မိူင် ပီ ဒွါ ဇဝ်ဖြာ ဒီ ဂေ။ ဂေ အီ တူ ဘူင် နာ တူ မွှိုမ်၊ ဂေ ဒီ ဘော ကွယ် ဆီချာ ခဲင် မိူင် တီ။
22 န့ ယီ မုး ဂေ ဒူအီ အီ တူ မွှိုမ်၊ ဇဝ်ဖြာ ဒီ ဒိုဝ်း လေး ဂေ ခဲင် မိူင် တီ။ ဂေ အီ တူ ဒူပ် ဆီချာ ဇဝ်ဖြာ၊ ဇဝ်ဖြာ ဒီ ဝဲန် ဂေ၊ တဲး န့ ပီ အီ ရိုတ့် ဝဲန် ပေတ့် ဒီ ကာဒါယ်။