အင် 3

1 အိုယ် ဂွန် ကာညူမ် အုဝ်၊ ကွဲ့ တဲး မဲ ပိဝ် ဂြုဝ်း ပီ မာနုဝ် အုဝ်။ တဲး မဲ လှုဝ်း ဆေဆေ ပီ စ်ု အုဝ် မဲ ဘူင်။

2 ဂြုဝ်း အုဝ် တီ ဒီ တဲး အာဆာက် မဲ တူင့်၊ တဲး မဲ ပွိုန် ဘော နာ မွှိုမ် ဒွန် မျုဝ်။

3 ခဲ့ မိုဝ်း အီ မွှိုမ် အီ မှာန်၊ ကွဲ့ တဲး မဲ ဘ့လေး ဝဲန် ဒေါ မှဝ်။ တဲး မဲ နုဝ် ဆီချာ အီ မွှိုမ် အီ မှာန် တီ၊ တဲး န့ ဒိုက် ဒီ နဝ်း မဲ၊ တဲး န့ ဘော ပီ မဲ ဟွယ် အုန် မာကာဝဲ့ ဒီ မဲင် မဲ။

4 ဆေ မဲ ဘူင် ပါယ် တီ၊ ဘော ဇဝ်ဖြာ ဘော ဒူအီ ကိူန် ဒီ ဘော အိုင် မဲ။

5 တဲး ဘော နဝ်း ဘော ဖွိုမ် မဲ ညှိုမ် ဘိုင် ဇဝ်ဖြာ။ ကွဲ့ တဲး မဲ ဘိုင် အာငျာန် ဒုဝ် ဘြိမ် မဲ။

6 ခဲ့ ပီ ဘူင် မဲ ဒွန် မျုဝ်၊ တဲး မဲ တဲး ဇဝ်ဖြာ အိုပ်။ ဆေ မဲ ဘူင် ပါယ် တီ၊ အန် ဇဝ် ဒီ ဘော တဲး မဲ နပ် ပီ ဒီ လုဝ် ဘူင် မဲ။

7 ကွဲ့ တဲး မဲ နဝ်း တာင် ကူပ် မိုဝ်း မဲ အာငျာန်။ တဲး မဲ ရုဝ်ဆေ ဇဝ်ဖြာ ဘော ဝး အီ တူ မွှိုမ်။

8 ဆေ မဲ ဘူင် ပါယ် တီ၊ န့ ပီ ဆီနမ် ဘွတ်၊ အီ တဲး ဒူင် ဒိမ် ဒူင် ဆဝ် မဲ ဟြာယ်၊ တဲး ဘော မာဘ့လူမ် မဲ ဟြာယ်။

9 တဲး မဲ ရုဝ်ဆေ ဇဝ်ဖြာ ဘော လှူ ပီ ဆမ် ပီ ပိတ် မဲ၊ လှူ ဘ့လေ ဒင် အီ မွှိုမ် အီ လေး ခဲင် မာန် မဲ။

10 ဆေ မဲ ဘူင် ပါယ် တီ၊ ငှုဝ် ဒီဂါဝ် ဒီ ဘော နုဝ့် လုတ့် ခဲင် ဘု ခဲင် ဂြွာ မဲ။ ဘော အိုမ် ဆာဘျိတ် ဒီ ဘော နုဝ့် လုတ့် ခဲင် ပြဲန့် မဲ။

11 အိုယ် ဂွန် ကာညူမ် အုဝ်၊ ဆေ ဇဝ်ဖြာ မာနုဝ် မဲ၊ ကွဲ့ ဝဲန် ပီ မာနုဝ် အန်။ ဆေ ဇဝ်ဖြာ ခြဲ မဲ၊ ကွဲ့ တဲး မဲ ပိုဝ်။

12 ခုဝ်၊ ဇဝ်ဖြာ နပ် ဒီ တဲး ဒမ် ဒီ ဒူအီ ပီ ရွက့် အန်၊ ပီ ဂုန့် နပ် ဒီ မာနုဝ် ဂွန် ပီ အိုင် အန်။

13 ဆေ ဒူအီ မိုဝ်း အာငျာန် ဘော ကာလှုး ဒီ နဝ်း အန်၊ ဒူအီ တီ ဟဲ့ ဒါခိုယ် ကာဆဝ်။

14 ခုဝ်၊ အာငျာန် တီ မိုဝ်း အာဂျိုဝ် မွှိုမ် လွှိုမ် ရွိုန် ဂေ ခြိဝ်။

15 အာငျာန် ဘော ငဝ်း တာင် လွှိုမ် ဆဲန့် ရေန့်။ ခဲ့ ဘော မိုဝ်း ကြုဝ်ကြာမ်၊ အာဝ် မိုဝ်း အီ ပွိုန် ကာဂဝ် ဒီ အာငျာန် တီ။

16 အာငျာန် တီ၊ န့ ဒီ တဲး အာဆာက် မဲ တူင့်၊ တဲး မဲ ခြမ်၊ တဲး မဲ မိုဝ်း ဘော ဆာရေ။

17 န့ ဒီ တဲး မဲ ဘဲန် နဝ်း ဒါခိုယ်၊ တဲး မဲ ပွိုန် ဒီ ကွယ် ဆီချာ။

18 အာဆေ ပွိုန် အာငျာန် တီ၊ န့ ပီ အန် ဟဲ့ ပွိုန် ဟေ အီ တဲး အာဆာက် ဒီ အန်။ အာဆေ ဟဲ့ မိုဝ်း အာငျာန် တီ၊ အန် ဒီ ဘျုဝ် ဒါခိုယ်။

19 အာငျာန် တီ ဟဲ့ တဲး ဇဝ်ဖြာ ဘူင် ကာဒါယ်။ အီ ကာလှုး ဒီ နဝ်း အန် ဇဝ် ဒွန် မျုဝ် ဟဲ့ တဲး အန် ဘူင် ဘ့လေး ဂါင်ဟြာဝ်။

20 ကူပ် ပီ နပ် အန် ဒွန် မျုဝ်၊ အန် ဇဝ် ဟဲ့ တဲး ဒူင် လိုက် ကာဆဝ် ဒး တဲး အိုမ် ပွိုန် ဒီ လေး။ အန် ဇဝ် မိူဝ် ဟဲ့ တဲး အိုမ် ဒီငါန် ဘော ဂ့လာယ် လေး ခဲင် န့အု။

21 အိုယ် ဂွန် ကာညူမ် အုဝ်၊ တဲး မဲ ဘော ပါ ရိတ် အာငျာန် အီ နပ် ဒီ ကာယဝ်း အီ မွှိုမ် အီ တူ မွှိုမ်။ ကွဲ့ တဲး မဲ ဝဲန် ဒေါ မှဝ်၊ တဲး မဲ လှုဝ်း ဆေဆေ။

22 အာငျာန် တီ ဒီ တဲး မဲ မိုဝ်း အာဆာက်၊ တူ တဲး မဲ ယမ်။ န့ ဟဲ့ ပီ မဲ ဟဲ့ ဟွယ် မာကာဝဲ့ ဒီ မဲင် မဲ။

23 မဲ ဒီ ဘော ပွိုန် ဒီ ဟာဝ် ဒူပ် န့တေန့် ပီ လုဝ် ဟာဝ် မဲ၊ တူ တဲး ပ့လဝ် မဲ တာ ဒုး ဒီ မာဆေ။

24 ဒေါ အိတ် မဲ၊ မဲ မိူဝ် တူ လုဝ် ယုဝ် မာဆေ။ မဲ ဒီ ဘော ပွိုန် ဒီ အိတ် ဆီချာ ဒွင် ခိူန်။

25 မဲ မိူဝ် တူ လုဝ် ယုဝ် အာဖေ အာရေ အီ တး ဒီ ဂေ ဒူအီ ဟာယ်၊ အီ တး အူ ဇေန့် ပီ ခုန် တာင်။

26 ဇဝ်ဖြာ ဒီ ဘော ယွတ် မဲန် မဲ၊ တဲး မဲ ကွယ် ဒါခိုယ်။ အန် ဇဝ် မိူဝ် တူ တဲး မဲ ခမ် ဒုက်။

27 ဆေ န့ မိုဝ်း ဒူအီ ဂိန်၊ တဲး မဲ စွယ် ခဲ့ ပီ ပွိုန် မဲ စွယ်။

28 ဆေ မဲ ဟဲ့ မိုဝ်း ပီ ဒီ စွယ် ဒီ ဂိုက် မဲ အာတိုဝ်၊ မဲ ကွဲ့ တဝ်း၊ “တဲး မဲ ဘ်ု။ ခဲညှာ အုဝ် ဒီ တဲး။”

29 မဲ ကွဲ့ ခြာမ် ဒီ ဘူင် နာ စီစိဝ် တဲး န့ ဒိုဝ် ဂိုက် မဲ အီ ကွယ် ကာတတ် မဲ၊ အီ ဟဲ့ ညှိုမ် နဝ်း မဲ။

30 ဆေ ဒူအီ အူ ဝီ တူ ဒွိုမ် ကာအေး ကာထဲန့် ဒီ မဲ၊ တူ ဒွိုမ် ဘူင် နာ စာဝ် ဒီ မဲ၊ ကွဲ့ တဲး မဲ ကာလုတ့် ကာထဲန့် ဒီ အန်။

31 မဲ ကွဲ့ လှယ် ဂေ အီ ဘူင် နာ တူ စီစိဝ် ဒီ အီ။ ကွဲ့ တဲး မဲ မိုဝ်း နဝ်း ဆီ ဘူင် ပီ ဂေ ဒေါ မှဝ်။

32 ခုဝ်၊ ဇဝ်ဖြာ ဇွင့် ဂေ ဒူအီ နဝ်း ဂုဝ့်။ ဂေ အီ နဝ်း ဆိူဝ် နဝ်း မှာန်၊ အန် ဇဝ် ယီ တဲး ဂေ နပ် ပီ ခြာမ် အန်။

33 ဇဝ်ဖြာ ဘော ဒိူင် ကာင် ဂေ ဒူအီ တူ မွှိုမ်၊ ဝီ မွင့်ကာရာ တဲး ဒီ ကာင် ဂေ ဒူအီ အီ မိုဝ်း နဝ်း ဆိူဝ် နဝ်း မှာန်။

34 အန် ဇဝ် ဘော နဲန ဂေ အီ နပ် ဒီ နဲန အီ ဟဝ်၊ ဝီ ဂေဇူ ဂေ အီ မိုဝ်း နဝ်း တျီမ်။

35 ဂေ အီ မိုဝ်း အာငျာန်၊ ဂေ ဒီ မိုဝ်း ဆာရေ။ ဂေ ဒူအီ ရိုဝ်၊ ဂေ ယီ လုဝ် ဆာယ် အီ။