ဘပ် ပီ ဒဲမ် အာမာကူ လွင် ဇဝ် ယေဆူ
ခါန်
1
1 ဘပ် နီ စုး ဒီ ခဲ လွင် ဇဝ် ယေဆူ အီ မုး ဂွန် ဇဝ်ဖြာ။ အန် ဘော မုး ဒူအီ ပီ ရဝ်း ပီ တိုယ် ဇဝ်ဖြာ။ ဂြုဝ်း ပီ ဒဲမ် နီ တဲး ဒူအီ ဘဲန် နဝ်း ဒါခိုယ်။လွင် ဒါ ဆာရာ အာယောဟာန်
2 ခါ အာတ့် န့ မိုဝ်း ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ။ အန် ဟဲ့ ဒဲမ် အုန် ဂြုဝ်း ဇဝ်ဖြာ ခဲင် ဘပ် အန်။ န့ မုး ဂြုဝ်း ပီ ကာလာင် ဇဝ်ဖြာ ဒီ ဇဝ် ယေဆူ။ ပီ ဒဲမ် အန် န့ ပါယ် နီ။ အန် တဝ်း၊ “အုဝ် ဒီ တိုယ် အာမူ အာမာတ် အုဝ် အူ ဝီ၊ တဲး အန် ယဲတ့် ဒီ အာတ့် မဲ။ အန် ဒီ မ့ပြာယ် န့တေန့် မဲ။”
3 ဒူအီ ဝီ တီ၊ အန် ဒီ ဒတ် ခဲင် ဒူင် ကာဟဝ်း၊ “တဲး ဘေ မ့ပြာယ် န့တေန့် ပီ လုဝ် ဝဝ့် အန် ဇဝ်။ ဘူင်၊ တဲး န့ ဆိူဝ်။”
4 ဝါယ် အန် တီ အာယောဟာန် တး ကွယ် ခဲင် ဒူင် ကာဟဝ်း၊ အန် မိူဝ် စိုပ် ဒူအီ ခဲင် အိုမ်။ အန် မာနုဝ် ဒူအီ တဲး ဂေ လှုဝ်း ဝဲန် မှာပ် ဂေ၊ ခမ် ဒီ စိုပ် ခဲင် အိုမ်၊ တဲး ဇဝ်ဖြာ ပဲ ဒီ ဂဝ်း ဝဲန် မှာပ် ဂေ။ 5 ဂေ ဒူအီ ဒွန် အီ၊ အီ ကွယ် ခဲင် အိူင် ယူဒါ၊ ဘော ဂေ ဒူအီ အီ ကွယ် ခဲင် မိူင် ယေရူဆာလဲမ်၊ ဂေ ဘောကာဂ့လျီတ် လေး ဒူင် ကွယ် ဂေ၊ ဟာဝ် ဒူင် ကွယ် ဒါ ဆာရာ အာယောဟာန် တွိုန်။ ဂေ ဝီ ကာလာင် မှာပ် ဂေ၊ တဲး အာယောဟာန် စိုပ် ဂေ ခဲင် အိုမ် ဘ့လဲင် ယောဒါန်။ 6 ဒါ ဆာရာ အာယောဟာန် တွိုန်၊ အန် တာ ခြိုင် ဟိုက် မင်ပြွင့် ကာဟာတ့်၊ တာ ဆဲ့ ဟုန်၊ ပက် ဒီ ညွယ် အန်။ အန် မိူဝ် ဟူမ် မာ အာဇူင့် ဘော ငါမ် မာဖျီန်။a 7 ပီ ခဲ အာယောဟာန် ဒီ ဒူအီ၊ န့ ပါယ် နီ။ အန် တဝ်း၊ “န့ ဒီ မိုဝ်း ဒူအီ အူ ဝီ၊ အန် ဒီ တး ဝါယ် အုဝ်။ ပွုန် အန် ဆီ တာင် လွှိုမ် ပွုန် အုဝ်။ ဝန် ခူဒိန့် အန် မိူဝ်၊ အုဝ် ညှမ် ကာအာပ် ဂိုပ် ဂဝ်း။ 8 အုဝ် နီ၊ အုဝ် စိုပ် ဘေ ခဲင် အိုမ်။ ဒူအီ အီ ဒီ တး၊ အန် ဒီ ဘော တဲး နဝ်း ဖွိုမ် ဇဝ်ဖြာ အိုပ် ဘေ။”
လွင် ဇဝ် ယေဆူ ခမ် ဒီ စိုပ် ခဲင် အိုမ်
9 ဝါယ် အန် တီ ဇဝ် ယေဆူ လေး ခဲင် မိူင် နာဆာရေတ့်။ မိူင် နာဆာရေတ့် တီ ကွယ် ခဲင် အိူင် ဂါလီလေ။ အန် ဘော ဟာဝ် ဇမ် ဒူင် ကွယ် အာယောဟာန်။ ဘော အန် တဲး အာယောဟာန် စိုပ် အန် ခဲင် အိုမ် ဘ့လဲင် ယောဒါန် တွိုန်။ 10 ဒေါ လေး အန် ခဲင် အိုမ်၊ အန် ဘော ယိုဝ် ဂါင်ဟြာဝ် န့ဝိုဝ်း။ နဝ်း ဖွိုမ် ဇဝ်ဖြာ အီ ပီ မာဘ့လူယ် လူင် တး စုး ဒီ အန်။ 11 ဘော ဂြုဝ်း ဇဝ်ဖြာ လေး ဂါင်ဟြာဝ်။ အန် တဝ်း၊ “မဲ မုး ဂွန် ပီ ရွက့် အုဝ်။ ပီ ဘူင် မဲ ဟဲ့ လဝ့် နဝ်း အုဝ်။”
12 ပန် တီ နဝ်း ဖွိုမ် ဇဝ်ဖြာ ဆုတ့် ဇဝ် ယေဆူ လေး ဒူင် ကွယ် အန်၊ ဟာဝ် ကွယ် ခဲင် ပြဲ ကာဟဝ်း အူ ဇေန့်။ 13 အာဒါ ဖွုန် ဂိုဝ် ဆီငဲ အန် ကွယ် ခဲင် ပြဲ ကာဟဝ်း တီ။ ဘုဝ် ကာနမ် အီ စိူဝ် ဆာတာန် ဘော ကာဆုး အန် ဘူင် မှာပ်။ ဒူင် တီ၊ န့ ဘော မိုဝ်း ဒုဝ် ပြဲ အီ ကွယ် ကာတတ် အန်။ ဂေ အာမူ အာမာတ် ဇဝ်ဖြာ ဘော တး လိုမ်လာ အန်။
လွင် ဇဝ် ယေဆူ ဒဲ့ ဒီဘဲ အန် မင် အီ
14 ဝါယ် ဟဲ့ မှေတ့် ခြွင့် ဂေ ဒါ ဆာရာ အာယောဟာန် ခဲင် ကာပိုမ်၊ ဇဝ် ယေဆူ ဝီ ဟာဝ် ဇမ် ခဲင် အိူင် ဂါလီလေ၊ ဝီ ကာလာင် လွင် ဇဝ်ဖြာ တဲး ဒူအီ ဘဲန် နဝ်း ဒါခိုယ်။ 15 ဇဝ် ယေဆူ တဝ်း၊ “အာခြာဝ် ဒီ တး အိုပ် ဇဝ်ဖြာ ကာဒါယ် ဟဲ့ ကာတတ် ဒီ တး။ တဲး ဘေ လှုဝ်း ဝဲန် မှာပ် ဘေ၊ တဲး ဘေ ညှိုမ် ဂြုဝ်း အီ တဲး ဒူအီ ဘဲန် နဝ်း ဒါခိုယ်။”
16 ဒေါ ဝီ ဟာဝ် ဇဝ် ယေဆူ ခူပ် အိုမ် ဒိုင် အီ စိူဝ် အိုမ် ဂါလီလေ၊ အန် ဝီ ယိုဝ် အာဆီမူန် ဂါယ် ဝါ အန် အီ စိူဝ် အာအန်ဒါရူ။ ဂါယ် မိူဝ် ဘျွာ န့ရပ် ဂါယ် ခဲင် အိုမ်။ ခုဝ်၊ ဂါယ် မုး ဒူအီ မှေတ့် ဂါ။ 17 ဇဝ် ယေဆူ တဝ်း ဒီ ဂါယ်၊ “ဘာယ် တး ဒူပ် အုဝ်။ အုဝ် ဒီ တဲး ဘာယ် ဝီ ဒဲ့ ဒူအီ ဟဝ် တး ဒူပ် အုဝ်။” 18 အန် ဟဲ့ ဟွတ့် ကာလာင် ဂြုဝ်း တီ၊ ဂါယ် ဝီ ဘ့လေး ဝဲန် န့ရပ် ဂါယ် အူ ဇေန့်၊ ဝီ ဟာဝ် ဒူပ် ဇဝ် ယေဆူ။
19 ဇဝ် ယေဆူ ဟဲ့ ဝီ ဟာဝ် နာ အာတ့် အီ စဲက်၊ အန် ဝီ ဟာ ယိုဝ် အာယာကူပ် အီ မုး ဂွန် အာဇေဘေဒေ ဘော ဝါ အန်၊ အီ စိူဝ် အာယောဟာန်။ ဂါယ် ကွယ် ခဲင် ရိုဝ် ဂါယ်၊ ဝီ မ့ပြာယ် န့ရပ် ဂါယ်။ 20 ဇဝ် ယေဆူ ဝီ ဒဲ့ ဘော ဂါယ် အာ ဝီ တီ၊ တဲး ဂါယ် ဒူပ် အန်။ ဟဲ့ ဟွတ့်၊ ဂါယ် ဘော လေး ခဲင် ရိုဝ် တွိုန်၊ တဲး ဘော ဂုန့် ဂါယ် ဘော ဂေ ပီ ဇာင် အန် ဝီ ကွယ် ဒီ ပန် ခဲင် ရိုဝ် တွိုန်။ ဂါယ် ယီ ဟာဝ် ဒူပ် ဇဝ် ယေဆူ အူ ဇေန့်။
လွင် ဇဝ် ယေဆူ ဆုတ့် ကာနမ် လေး ခဲင် ဒုဝ် ဘူင့် အီ
21 ဝါယ် အန် တီ ဂေ ဘော ဖိုင် ဝီ ဟာဝ် ဇမ် ခဲင် မိူင် ကာပေနာရိုမ်။ ဒေါ မုး ဆီငဲ ဒီလှဝ်၊ ဇဝ် ယေဆူ ဟာဝ် လိုပ် ခဲင် ဇူင် ဂေ၊ ဝီ စုး ဒီ မာနုဝ် ဒူအီ။ 22 ဂေ အီ ထူမ် ပီ မာနုဝ် အန်၊ ဂေ အာမ် ကာဆဝ်။ ပီ မာနုဝ် အန် တီ၊ န့ ပီ၊ အန် မိုဝ်း ပွုန် တာင်။ န့ တူ ပီ ပီ မာနုဝ် ဒါ ဆာရာ ဂေ။ 23 ဒေါ အန် တီ န့ မိုဝ်း ဒူအီ အူ ဝီ ခဲင် ဇူင် တွိုန်။ အန် မိုဝ်း ကာနမ် ကွယ် ခဲင် ဒုဝ် ဘူင့် အန်။ အန် ဒတ် တာင် တဝ်း၊ 24 “အိုယ် မဲ အာယေဆူ အီ တး မိူင် နာဆာရေတ့်၊ မာဆေ ပီ လုဝ် မဲ ဒီ ယေ။း ယုဝ် မိူဝ် မဲ ဒီ တး ပျာတ့် ယေ။း အုဝ် ဟဲ့ နပ်၊ မဲ မုး အာဆေ။ မဲ မုး ဒူအီ ဘွတ် ပီ ရဝ်း ပီ တိုယ် ဇဝ်ဖြာ။”
25 ဇဝ် ယေဆူ ဝီ စ်ု အန်။ အန် တဝ်း၊ “ကွဲ့ ဂြုဝ်း၊ လေး တ ခဲင် ဒုဝ် ဘူင့် ဒူအီ တီ။” 26 အန် ဟဲ့ ဟွတ့် တဝ်း ပါယ် တီ၊ ကာနမ် ဒီယုး ဒီယေန့် ဒုဝ် ဘူင့် ဒူအီ တွိုန်၊ ဝီ ဒတ် တာင်၊ လေး ခဲင် ဒုဝ် ဘူင့် အန်။
27 ဂေ ဒူအီ အီ ကွယ် ယိုဝ် လွင် အန် တီ၊ ဂေ ဝီ အာမ် ကာဆဝ်။ ဂေ ဝီ လာယ် ကာလာင် တဝ်း၊ “မာဆေ န့ မုး၊ ပီ ဘူင် အန်။း န့ နှဲန် ဒီ မုး ဒါရာ ကာမာယ်။ ဒါရာ တီ ဟဲ့ မိုဝ်း ပွုန်။ ဆာရာ နီ၊ အန် စ်ု ဂေ ကာနမ် လေး။ ဟဲ့ ဟွတ့်၊ ကာနမ် ထူမ် ဒူပ် ပီ တဝ်း အန်။” 28 ပါယ် တီ၊ ဂေ ဒူအီ ခဲင် အိူင် ဂါလီလေ ဘော အိူင် ကော နပ် လွင် ပဲ့ ဟဲ့ ဘူင် ဇဝ် ယေဆူ ဇိုဝ် တီ။
လွင် ဇဝ် ယေဆူ ဘူင် တဲး ဆဝ် ဒူအီ ကိူန် ဝီ ကဲန်
29 ဘော ဇဝ် ယေဆူ ဘော ဂေ ဒူအီ အီ ဒူပ် အန်၊ ဂေ ဝီ လေး ခဲင် ဇူင် တွိုန်။ ဟဲ့ ဟွတ့်၊ ဂေ ဝီ ဟာဝ် ဆိူဝ် လိုပ် ခဲင် ကာင် အာဆီမူန် ဂါယ် အာအန်ဒါရူ။ ဘော အာယာကူပ် ဂါယ် အာယောဟာန် ဟဲ့ ဒူပ် လိုပ် ခဲင် ကာင် တွိုန်။ 30 ဒေါ အန် တီ န့ ယီ မိုဝ်း ဂိုန့် အာဆီမူန်၊ အန် အိတ် ဒူင် အိတ် အန်။ ဒုဝ် အန် ဒါတ် ကာဆဝ်။ ဂေ ဝီ ကာလာင် ဒီ ဇဝ် ယေဆူ လွင် အန် တီ။ 31 ပန် တီ ဇဝ် ယေဆူ ဝီ ဟာဝ် ဒူင် ကွယ် အန်၊ ပါ ဒဲ အန်၊ စွယ် အန် ယိတ့်။ ဒေါ အန် တီ ဆဝ် အန် ဘော ဟြာယ်။ အန် ဝီ စုး ဒီ လိုမ်လာ ယွတ် မဲန် ဂေ။
32 ဆီငဲ တီ၊ ဘာ ဒီ အပ် ဒေါ ဂေတ့် ဆီငဲ၊ ဂေ တး တိုယ် ဒူအီ ကိူန် တး ဇမ် ဒူင် ကွယ် ဇဝ် ယေဆူ တွိုန်။ ဂေ တိုယ် ဒူအီ ဆဝ် ဘော ဒူအီ အီ မိုဝ်း ကာနမ် ခဲင် ဒုဝ် ဂေ၊ တဲး အန် ပီကဲန် ဂေ။ 33 ပါယ် တီ၊ န့ မိုဝ်း ဒူအီ ခဲင် မိူင် ဘော မိူင် တး ကာဇု ဒီ အာတ့် မာလုဝ်း ကာင် ဒူင် ကွယ် အန်။ 34 ဇဝ် ယေဆူ ဝီ ဘူင် တဲး ဒူအီ ဆဝ် ကိူန် ကော ကဲန်။ အန် ဘော ဆုတ့် ဂေ ကာနမ် ကိူန် လေး ခဲင် ဒုဝ် ဘူင့် ဒူအီ။ ကာနမ် ဂေ တီ၊ ဂေ ဟဲ့ နပ် လွင် ဇဝ် ယေဆူ၊ အန် မုး အာဆေ။ ခုဝ်၊ အန် တူ ခ့ဝါင် ဂေ ကာလာင် ဂြုဝ်း။
လွင် ဇဝ် ယေဆူ ဟာဝ် ဆာခိုဝ် ပေါ အူ ပ့လုဝ့်
35 ပါ ခဲညှာ ဆိန့်ဝး၊ ပြဲ ညှမ် ဘ့လာင်၊ ဇဝ် ယေဆူ န့ဆိုဝ်း၊ ဝီ လေး ခဲင် ကာင်၊ ဟာဝ် ဒူင် တူ မိုဝ်း ဒူအီ။ ဟဲ့ ဟွတ့်၊ အန် ဆာခိုဝ် ဒီ ဇဝ်ဖြာ။ 36 အာဆီမူန် ဂေ ဂိုက် အန် ယီ ဟာဝ် ဟြေတ့် အန်။ 37 ဂေ ဟဲ့ ဟွတ့် ကာတုန့် အန်၊ ဂေ တဝ်း၊ “အိုယ် ဆာရာ၊ ဒွန် အီ ဟဲ့ ဟြေတ့် မဲ။”
38 ဇဝ် ယေဆူ ဝီ တဝ်း၊ “တဲး အေ ဟာဝ် ပေါ အူ ပ့လုဝ့်။ တဲး အေ ဟာဝ် ခဲင် ရဝ် အီ ကွယ် ကာတတ် ဒူင် ကွယ် အေ နီ။ ခုဝ်၊ အုဝ် ဟဲ့ တး ဒဲင် ကာဒါယ် နီ၊ တဲး အုဝ် ပွိုန် ဒီ မာနုဝ် ဂေ ဒူအီ ဇိုဝ် တီ။” 39 ပါယ် တီ အန် ဘော ဟာဝ် ဘဲန် ပ့လုဝ့် ဘဲန် ပ့လုဝ့် ခဲင် အိူင် ဂါလီလေ၊ မာနုဝ် ခဲင် ဇူင် ကြိုပ် ဂေ ဒူအီ ယူဒါ ဇဝ်ဖြာ ဘော ဆုတ့် ကာနမ် လေး ခဲင် ဒုဝ် ဘူင့် အီ။
လွင် ဒူအီ အူ ဝီ အီ မိုဝ်း ဆဝ် ဒုတ်
40 န့ ယီ မိုဝ်း ဒူအီ အူ ဝီ၊ အန် မိုဝ်း ဆဝ် ဒုတ်။b အန် တး ဇမ် ဒူင် ကွယ် ဇဝ် ယေဆူ၊ ခြိုပ်ခြဝ် ဒီ အာတ့် အန်။ အန် တဝ်း၊ “ဆေ မဲ မိုဝ်း နဝ်း ဆီ ဘူင်၊ မဲ ဘော ပဲ ပီကဲန် အုဝ်၊ တဲး အုဝ် ဆီငါ ဒူပ် ပီ ဒမ် ဒါရာ။”
41 ဇဝ် ယေဆူ ဘော ဘဲန် နဝ်း ကာဝေ အန်၊ အန် ဝီ ပါ ဒူအီ တီ၊ ဝီ တဝ်း၊ “အုဝ် ဟဲ့ ဆီ ဘူင်။ တဲး မဲ ကဲန်။” 42 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဆဝ် ဒုတ် ဝီ တီ ဘော ဟြာယ် အူ ဇေန့်။ အန် ဘော ကဲန်။
43-44 ပန် တီ ဇဝ် ယေဆူ ဝီ စ်ု ဒူအီ တီ၊ တဝ်း “ကွဲ့ ကာလာင် ဒီ အီ လွင် ပဲ့ ဟဲ့ ဘူင် အုဝ်။ မဲ ယီ လုဝ် ဟာဝ် ဒူင် ကွယ် ဒါ အီ လှူ ဒီ ဇဝ်ဖြာ၊ တဲး အန် ယွတ် ဒုဝ် မဲ။ ဟဲ့ ဟွတ့်၊ တဲး မဲ ဝီ လှူ ခဲ့ ပီ စ်ု ဒါ ဆာရာ အာမုဝ်ဆဲ ဘေ လှူ၊ တဲး ဒွန် အီ နပ်၊ မဲ ဟဲ့ ကဲန်။” ဇဝ် ယေဆူ ဟဲ့ ဟွတ့် တဝ်း ပါယ် တီ၊ အန် ဝီ စ်ု ဒူအီ တီ လေး ဒူင် ကွယ် အန်။ 45 ဒူအီ တွိုန် ယီ တူ ဘူင် ပီ တဝ်း ဇဝ် ယေဆူ။ အန် ဟဲ့ ဟွတ့် လေး ဒူင် ကွယ် ဇဝ် ယေဆူ၊ အန် ဝီ စုး ဒီ ကာလာင် ဒွန် နာ ဒွန် ပ့လုဝ့်၊ တဲး ဒွန် အီ ကော နပ် လွင် အန် တီ။ ခုဝ် အန် တီ ဇဝ် ယေဆူ အာဝ် ဟူ ပွိုန် တဲး အီ ယိုဝ် အန် ခဲင် မိူင် ဂေ။ အန် ဟာဝ် ဒူင် တူ မိုဝ်း ဒူအီ။ ဂေ ယီ လေး ဒွန် နာ ဒွန် ပ့လုဝ့် ဟာဝ် ဇမ် ဒူင် ကွယ် အန်။