လွင် ဇဝ် ယေဆူ တဲး ဒူအီ မိုဝ်း ပ့လဝ် ယမ် ဝီ ကဲန်
2
1 ဝါယ် အန် တီ ဖွုန် ဖန် ဆီငဲ၊ ဇဝ် ယေဆူ ဝီ ဝေန့် မိူင် ကာပေနာရိုမ်။ ဂေ ဒူအီ ဘော နပ်၊ အန် ဟဲ့ တး ဇမ် ခဲင် မိူင်၊ ကွယ် ခဲင် ကာင် အန်။ 2 ဂေ ကိူန် ဝီ တး ကာဇု ခဲင် ကာင် တွိုန်။ ဘော နာ ရေတ့် ကာင် ဒူအီ ဟဲ့ နုဝ့်။ အာဝ် ဟူ ပွိုန် လိုပ် ဒီ မာလုဝ်း။ ဇဝ် ယေဆူ ယီ ကာလာင် ဂြုဝ်း ဇဝ်ဖြာ ဒီ ဂေ၊ တဲး ဂေ ထူမ်။ 3 န့ ယီ မိုဝ်း ဒူအီ မင် အီ တး တိုယ် ဒူအီ ဆဝ် အူ ဝီ။ ဒဲ ဂေ ပ့လဝ် အန် ဟဲ့ ဟွတ့် ယမ်။ ဂေ ဖွုန် ဝီ ကာဂွတ် အန် တး။ 4 ကူပ် ကိူန် ဒူအီ၊ ဂေ တူ ပွိုန် ဟာဝ် ဇမ် ဒူင် ကွယ် ဇဝ် ယေဆူ။ ပန် တီ ဂေ ဝီ ဟုဝ့် ဒဲင် ကာတု ကာင်၊ ဝီ ပျာတ့်၊ တဲး န့ ဘဲန် ကာဒဝ် နာ ဒဲင် ဒူင် ကွယ် ဇဝ် ယေဆူ။a ဟဲ့ ဟွတ့်၊ ဂေ ဝီ ဘျွာ လူင် ဒူအီ ဆဝ် တွိုန် ဒဲင် ကာဘဲး အန်၊ တဲး အန် ဇမ် ဒီ အာတ့် ဇဝ် ယေဆူ။5 ဇဝ် ယေဆူ ယီ ယိုဝ် ဂေ ညှိုမ် အန်၊ အန် ဝီ ကာလာင် ဒီ ဒူအီ ဆဝ် တီ။ အန် တဝ်း၊ “အိုယ် ဝါ အုဝ်၊ အုဝ် ဟဲ့ ဟွတ့် ဘ့လွာ့ ဝဲန် မှာပ် မဲ။”
6 န့ ယီ မိုဝ်း ဂေ ဒါ ဆာရာ အီ မာနုဝ် ဒါရာ ယူဒါ မင် အီ၊ ဂေ ကာဖာ ခဲင် နဝ်း ဂေ တဝ်း၊ 7 “မှဝ် န့ ပါယ် ပီ ကာလာင် အန် ဂြုဝ်း တီ။း န့ မုး ဂြုဝ်း အီ ကာခဲန့် ဒီ ဇဝ်ဖြာ။ အာဝ် မိုဝ်း အာဆေ ပဲ ဒီ ဂဝ်း ဝဲန် မှာပ် အီ။ န့ မိုဝ်း မီ ဇဝ်ဖြာ အီ ပွိုန် ဂဝ်း ဝဲန် မှာပ် အီ။”
8 ဇဝ် ယေဆူ မိူဝ် နပ် အူ ဇေန့် ခဲင် နဝ်း အန် ပီ ဇေန့်ဇာ ဂေ ခဲင် နဝ်း ဂေ။ အန် ဝီ တဝ်း ဒီ ဂေ၊ “မှဝ် န့ ပါယ် ပီ ထာင် ဘေ ပါယ် တီ။း 9 ဆေ အုဝ် တဝ်း ဒီ ဒူအီ တီ၊ ‘အုဝ် ဂဝ်း ဝဲန် မှာပ် မဲ၊’ ဘေ ထာင် န့ ဟဲ့ ငှိုယ် ကာလာင် ကူပ် တူ ပွိုန် ယိုဝ် ဘေ၊ ယုဝ် မှာပ် ဆီ မိုဝ်း၊ တူ မိုဝ်း။ ဆေ အုဝ် ယီ တဝ်း၊ ‘တဲး မဲ ယိတ့်၊ ဂူင့် ကာဘဲး မဲ၊ ဝေန့်၊’ ဘေ ထာင် န့ ညှာပ် ကာလာင် ကူပ် ပွိုန် ယိုဝ် ဘေ၊ ယုဝ် အန် ယိတ့်၊ တူ ယိတ့်။ 10 အုဝ် ယီ တဲး ဘေ နပ်၊ အုဝ် အီ ဟဲ့ ဘဲန် ဂွန် ဒူအီ၊ အုဝ် ဟဲ့ မိုဝ်း ပွုန် ဒဲင် ကာဒါယ်၊ တဲး အုဝ် ပဲ ဒီ ဘ့လွာ့ ဝဲန် မှာပ် အီ။” အန် ဟဲ့ ဟွတ့် ကာလာင် ပါယ် တီ၊ အန် ဝီ တဝ်း ဒီ ဒူအီ ဆဝ် တွိုန်၊ 11 “အုဝ် တဝ်း ဒီ မဲ၊ ယိတ့်၊ တဲး မဲ ဒိုဝ်း ဂူင့် ကာဘဲး မဲ၊ ဝေန့် ခဲင် ကာင် မဲ။” 12 ပန် တီ အန် ဘော ယိတ့် အူ ဇေန့်၊ ဒိုဝ်း ဂူင့် ကာဘဲး အန်၊ ဟာဝ် လေး ဒူင် ကွယ် ဇဝ် ယေဆူ၊ တဲး ဒွန် အီ ပွိုန် ဒီ ယိုဝ်။ ဂေ ဒွန် အီ ကော အာမ် ကာဆဝ်။ ဂေ ဘော အိူပ် ဇဝ်ဖြာ တဝ်း၊ “အေ တူ ဒွိုမ် ယိုဝ် ဇိုဝ် တီ ဒေါ မှဝ်။”
လွင် ဇဝ် ယေဆူ ဒဲ့ အာလေဝီ ဒူပ် အန်
13 ပေါ အူ ဇေန့် ဇဝ် ယေဆူ ဟာဝ် ဇမ် ဘာင် အိုမ် ဒိုင်။ ဘော ဂေ ဒူအီ ကိူန် ဝီ တး ဒူပ် အန်။ အန် ဝီ စုး ဒီ မာနုဝ် ဂေ။ 14 ဒေါ ဟာဝ် အန် ဒူပ် န့တေန့်၊ အန် ယိုဝ် အာလေဝီ၊ အီ မုး ဂွန် အာလာဖဲ။ အန် ကွယ် ဒူင် ဂဲပ် ရွိုန် စိုင်။ ဇဝ် ယေဆူ တဝ်း ဒီ အာလေဝီ တွိုန်၊ “မဲ တး ဒူပ် အုဝ်။” ဟဲ့ ဟွတ့် အန် ဝီ ယိတ့်၊ ဟာဝ် ဒူပ် ဇဝ် ယေဆူ။
15 ဝါယ် အန် တီ ဇဝ် ယေဆူ ဂေ ဒီဘဲ အန် ဝီ ဟာဝ် ဟူမ် ဘူမ် ခဲင် ကာင် အာလေဝီ။ န့ မိုဝ်း ဘော ဂေ ဒူအီ ဂဲပ် ရွိုန် စိုင် ဘော ဂေ ဒူအီ အီ ဘူင် မှာပ် ဘဲန် မျုဝ် ဘဲန် မျုဝ်၊ ဂေ ကိူန် ကွယ် ရိုမ်၊ ဟူမ် ရိုမ်။ န့ မိုဝ်း ဒူအီ ဇိုဝ် တီ၊ ဂေ ကိူန် ဒူပ် ဇဝ် ယေဆူ။ 16 န့ မိုဝ်း ဂေ ဒါ ဆာရာ အီ မာနုဝ် ဒါရာ ယူဒါ မင် အီ။ ဂေ မုး ဒူအီ ဖိုင် ဖာရီဆဲ၊ ဂေ ဘော ယိုဝ် ဇဝ် ယေဆူ ဘော ဂေ ဒူအီ အီ ဘူင် မှာပ် ဘဲန် မျုဝ် ဘဲန် မျုဝ် ဘော ဂေ ဒူအီ ဂဲပ် ရွိုန် စိုင်၊b ကွယ် ရိုမ်၊ ဟူမ် ရိုမ်။ ဂေ ဝီ တး ဒီမွှတ် ဒီ ဒီဘဲ ဇဝ် ယေဆူ။ ဂေ တဝ်း၊ “မှဝ် န့ ပါယ် ပီ ကွယ် ဒါ ဆာရာ ဘေ၊ ဟူမ် ရိုမ် ဒူပ် ဂေ ဒူအီ အီ ဂဲပ် ရွိုန် စိုင် ဘော ဂေ ဒူအီ အီ ဘူင် မှာပ် ဒွန် မျုဝ်။း”
17 ဘော ဇဝ် ယေဆူ ဟဲ့ ယိုဝ် ဂြုဝ်း ဂေ။ အန် ဝီ တဝ်း ဒီ ဂေ၊ “အာဆေ ဟဲ့ ပ့လူမ် ခ၊ အာဝ် လုဝ် ဆာရာဝူန်။ အာဆေ မိုဝ်း ဆဝ် ရောဂါ၊ အန် ဟဲ့ လုဝ် ဆာရာဝူန်။ ခုဝ်၊ အုဝ် မိူဝ် တူ တး တဲး အုဝ် ဒဲ့ ဒူအီ မွှိုမ် တး ဒူပ် အုဝ်။ အုဝ် ဟဲ့ တး တဲး အုဝ် ဒဲ့ ဂေ ဒူအီ မိုဝ်း မှာပ် တး ဒူပ် အုဝ်။”
လွင် ဂေ ဒူအီ ယိူန် ပီ ဒီ ဟူမ်
18 န့ မိုဝ်း ဂေ ဒီဘဲ ဒါ ဆာရာ အာယောဟာန် တွိုန်၊ ဘော ဂေ ဒူအီ ဖိုင် ဖာရီဆဲ၊ ဂေ ဘောကာဂ့လျီတ် ခမ် ဒီ ယိူန် ပီ ဒီ ဟူမ်။ န့ ယီ မိုဝ်း မင် အီ၊ ဂေ တး ဇမ် ဒူင် ကွယ် ဇဝ် ယေဆူ၊ ဝီ ဒီမွှတ် အန်။ ဂေ တဝ်း၊ “ဂေ ဒီဘဲ အာယောဟာန် ဘော ဂေ ဒီဘဲ ခဲင် ဖိုင် ဖာရီဆဲ၊ ဂေ ယိူန် ပီ ဒီ ဟူမ် ဂေ။ မှဝ် န့ ပါယ် ပီ တူ ယိူန် ဒီဘဲ မဲ ပီ ဒီ ဟူမ် ဂေ။း”c
19 ဇဝ် ယေဆူ ဝီ တဝ်း၊ “ဆေ န့ မိုဝ်း ဘ့လွယ် ခတ်၊ ဂေ ခဲတ့် အီ တး လိုပ် ဘ့လွယ် တီ၊ ဂေ တူ ပွိုန် ယိူန် ပီ ဒီ ဟူမ် ဒေါ ကွယ် ရိုမ် ကာညူမ် ဒူပ် ဂေ။ ဂေ လုဝ် ဟူမ် ဘ့လွယ် ခတ်၊ ဒေါ ကွယ် ရိုမ် ကာညူမ် ဒူပ် ဂေ။ 20 န့ ယီ ဒီ ဇမ် အူ ဆီငဲ၊ ဂေ ဒီ ဒိုဝ်း ဝဲန် ကာညူမ် တွိုန်။ ဒေါ အန် တီ ဂေ ဒူအီ အီ လိုပ် ဘ့လွယ် တီ၊ ဂေ ဒီ ယိူန် ပီ ဒီ ဟူမ် ဂေ။
21 န့ မိူဝ် တူ မိုဝ်း ဒူအီ၊ အီ ဒိုဝ်း ဒူန့် ကာမာယ် ဝီ ကာပါင် ဆီတုဝ် ဘြိမ်။ ဆေ အန် ဘော ဘူင် ပါယ် တီ၊ ဒူန့် ကာမာယ် တဲး ဆီတုဝ် ဘြိမ် ဝီ ကာပျာတ့် ကာပွါ၊ တဲး လှုး အန် ဝီ တာင် လွှိုမ် ခါ အာတ့်။ 22 န့ မိူဝ် တူ မိုဝ်း အာဆေ အီ ဟပ် အိုမ် ဆာဘျိတ်d ကာမာယ် ခဲင် ကာပဝ် ဘ့လေ အီ ဘြိမ်။ ဆေ အန် ဘူင် ပါယ် တီ၊ အိုမ် ဆာဘျိတ် ကာမာယ် ဒီ ဆီနမ် ခဲင် ကာပဝ် ဘြိမ် တွိုန်၊ တဲး ကာပဝ် ကာလာတ့်၊ တဲး ဘော ကာပဝ် ဘော အိုမ် ဆာဘျိတ် ကော စှိုမ်။ ခုဝ်၊ ဒူအီ ဒီ ဟပ် အိုမ် ဆာဘျိတ် ကာမာယ် ခဲင် ကာပဝ် ကာမာယ်၊ ကွဲ့ တဲး န့ လိုဝ်။”
ပီ မာနုဝ် ဇဝ် ယေဆူ လွင် ဆီငဲ ဒီလှဝ်
23 န့ ဝီ ဇမ် အူ ဆီငဲ အီ မုး ဆီငဲ ဒီလှဝ်။ ဆီငဲ အန် တီ၊ ဇဝ် ယေဆူ ဂေ ဒီဘဲ အန် ဝီ ဟာဝ် ဒူပ် ဂြဲင် ခဲင် မာန် ခဝ်ချုင်။ ဂေ ဒီဘဲ အန်၊ ဒေါ ဟာဝ် ဂေ ဒူပ် ဂြဲင် တီ၊ ဂေ ဝီ စုး ဒီ ဆီကတ် ကာယူင့် အန်။ 24 ဂေ ဒူအီ ဖိုင် ဖာရီဆဲ မင် အီ၊ ဂေ ဝီ တဝ်း ဒီ ဇဝ် ယေဆူ၊ “မဲ ယွတ် ဒီဘဲ မဲ၊ မှဝ် န့ ပါယ် ပီ ဘူင် ဂေ ပီ တူ တဲး ဒါရာ အေ ဘူင် ဒေါ မုး ဆီငဲ ဒီလှဝ်။း”
25 ဇဝ် ယေဆူ ဝီ တဝ်း ဒီ ဂေ၊ “ဘေ တူ ဒွိုမ် တိး ခဲင် ဘပ် ဇဝ်ဖြာ လွင် ပဲ့ ဟဲ့ ဘူင် အာဒါဝိတ် တွိုန်။း ဘော အန် ဘော ဒူအီ အီ ဒူပ် အန် တူ မိုဝ်း ပီ ဒီ ဟူမ်၊ ယီ ကာပြာန့် ကာဆဝ် ပီ ဒီ ဟူမ်။ ဒေါ အန် တီ အန် လိုပ် ခဲင် ကာင် ဒူင် ကြိုပ် ဂေ ဇဝ်ဖြာ၊ ဒိုဝ်း ဟူမ် ခါမုန် ပီ ဘ့လေး အီ ဒီ အာတ့် ဇဝ်ဖြာ။ အန် ဟဲ့ ဟွတ့် ဒိုဝ်း ဟူမ်၊ အန် ဘော ဒွါ တဲး ဘော ဂေ ဒူအီ အီ ဒူပ် အန် ဟူမ်။ 26 အန် ဘူင် ပါယ် တီ၊ ဒေါ ကွယ် အာဘာထာ တွိုန်၊ အီ မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ ဒါရာ တူ တဲး ဒွန် အီ ဟူမ် ခါမုန် တီ။ န့ မိုဝ်း မီ ဂေ ဒူအီ အီ လှူ ဒီ ဇဝ်ဖြာ၊ အီ ပွိုန် ဟူမ် အာတီ။”