3
1 ပေါ အူ ဇေန့်၊ ဒေါ ဝီ ဇမ် ဆီငဲ ဒီလှဝ် ဇဝ် ယေဆူ ဟာဝ် လိုပ် ခဲင် ဇူင် ကြိုပ် ဂေ ဒူအီ ယူဒါ ဇဝ်ဖြာ။ ဒေါ အန် တီ န့ မိုဝ်း ဒူအီ အူ ဝီ၊ ဒဲ အန် ဟဲ့ ယမ် ဘ့လာက်။ 2 ဂေ ဒူအီ ဟဝ် အီ ကွယ် ခဲင် ဇူင်၊ ဂေ ဆီ ဖျာက် ဇဝ် ယေဆူ။ ခုဝ်၊ ဂေ နှဝ့် ဒီ ယွတ်၊ ယုဝ် အန် ဒီ ပီကဲန် ဒူအီ တီ ဒေါ မုး ဆီငဲ ဒီလှဝ်။ 3 ဇဝ် ယေဆူ ယီ တဝ်း ဒီ ဒူအီ ဆဝ် တွိုန်၊ “မဲ ယိတ့်၊ တး ကွယ် ဒီ အာတ့် နီ။”4 ဟဲ့ ဟွတ့်၊ အန် ဝီ ဒီမွှတ် အီ ဟဝ်၊ အန် တဝ်း၊ “မာဆေ ပီ လုဝ် ဘူင် ဘေ ဆီငဲ ဒီလှဝ်။း လုဝ် ဘူင် အီ မွှိုမ်၊ လုဝ် ဘူင် အီ တူ မွှိုမ်။း လုဝ် ချွတ် အီ၊ လုဝ် ငဝ်း အီ။း” ဂေ ယီ တူ ဝျီ့ ဂြုဝ်း တီ။
5 အန် ဝီ ယွတ် အီ ပါယ် အာရိုပ် ဂေ ဒူအီ ခဲင် ဇူင်၊ နဝ်း အန် ကော ရူ ဘော က့လိုဝ် ကူပ် တူ မိုဝ်း ဂေ နဝ်း ရွက့် ကာဝေ ဒူအီ။ အန် ဝီ တဝ်း ဒီ ဒူအီ ဆဝ် တွိုန်၊ “မဲ စုဝ့် ဒဲ မဲ။” ဟဲ့ ဟွတ့်၊ အန် ဝီ စုဝ့် ဒဲ အန်။ ဟဲ့ ဝီ ကဲန် တူတ့်။ 6 ဝါယ် အန် တီ ဂေ ဒူအီ ဖိုင် ဖာရီဆဲ လေး ခဲင် ဇူင် တွိုန်။ ဂေ ဝီ ဟာဝ် ဒူင် ကွယ် ဂေ ဒူအီ ဖိုင် ခုန်ဒီခမ် အာဟေရူတ်၊ လာယ် ဆင်ချာင်၊ မှဝ် ဂေ ဒီ ပါယ် ဒီ ဘူင်၊ တဲး ဂေ ပွိုန် ဒီ ငဝ်း ဝဲန် ဇဝ် ယေဆူ။
လွင် ဒူအီ ကိူန် ဒူပ် ဇဝ် ယေဆူ
7 ဇဝ် ယေဆူ ဂေ ဒီဘဲ အန်၊ ဂေ ဝီ လေး ဒူင် တီ၊ ဝီ ဟာဝ် ဇမ် ဘာင် အိုမ် ဂါလီလေ။ ဂေ ဒူအီ ကွယ် အိူင် ဂါလီလေ တွိုန်၊ ဂေ ကိူန် ကာဆဝ် တး ဒူပ် အန်။ 8 ဘော ဂေ ဒူအီ အီ ကွယ် ခဲင် အိူင် ယူဒါ၊ ဘော ဒူအီ အီ ကွယ် ခဲင် မိူင် ယေရူဆာလဲမ်၊ ဂေ ဒူအီ အီ တး အိူင် အဲဒူမဲ၊ ဘော ဂေ ဒူအီ အီ တး ဘ့လာက် နာ တ ဘ့လဲင် ယောဒါန်၊ ဘော ဂေ ဒူအီ ကွယ် မိူင် ထူရုဝ် ဂါယ် မိူင် ဆီဒူန်၊ ဂေ ဒူအီ ဇိုဝ် တီ၊ ဂေ ဟဲ့ ယိုဝ် ဆာဒါင် လွင် ဇဝ် ယေဆူ၊ ဂေ ဘောကာဂ့လျီတ် ဝီ တး ဒူင် ကွယ် အန်။ 9-10 ခါ အာတ့် ဇဝ် ယေဆူ ဟဲ့ ဒွိုမ် ပီကဲန် ဆဝ် ဂေ ကိူန်။ ခုဝ်၊ ဂေ ဒူအီ မိုဝ်း ဆဝ် ဝီ ထေဝ် ဒီ ဟာဝ် ကာတတ် အန်၊ တဲး ဂေ ပွိုန် ဒီ ပါ အန်။ ကူပ် ကိူန် ဂေ ဒူအီ ဇိုဝ် တီ၊ အန် ယီ ကာလာင် ဒီ ဒီဘဲ အန်၊ တဲး ဂေ မ့ပြာယ် ရိုဝ် ဒီတဲတ် အူ လှာင်၊ တဲး အန် ပွိုန် ဒီ လိုပ် နာ ခဲင်၊ ကွဲ့ တဲး ဂေ ဒူအီ ကိူန် ကွယ် ရူပ် ကာဆျီ့ ဒီ အန်။ 11 ဒေါ အန် တီ န့ ယီ မိုဝ်း ကာနမ် အီ ကွယ် ခဲင် ဒုဝ် အီ။ ဂေ ယိုဝ် ဇဝ် ယေဆူ၊ ဂေ ဝီ ကေး ဒီ အာတ့် အန်၊ ဝီ ဒတ် တဝ်း၊ “မဲ မုး ဂွန် ဇဝ်ဖြာ။” 12 အန် ယီ စ်ု ဂေ၊ ကွဲ့ တဲး ဂေ ကာလာင် ဒီ အီ ဟဝ် လွင် အာဆေ အန် မုး။
လွင် ဇဝ် ယေဆူ ဒဲ့ ဒူအီ ဂိုဝ် ဒီ အာ ဝီ ဘဲန် ဒီဘဲ အန်
13 ဝါယ် အန် တီ ဇဝ် ယေဆူ ဝီ ဟုဝ့် ဒဲင် နွန်။ အန် ဝီ ဒဲ့ ဂေ ဒူအီ ပီ ဒီ ရဝ်း အန်။ ဂေ မိူဝ် တး ဇမ် ဒူင် ကွယ် အန်။ 14 အန် ဝီ ဒဲ့ ဂိုဝ် ဒီ အာ ဝီ၊ တဲး ဂေ ကွယ် ရိုမ် ဒူပ် အန် ဆေဆေ။ ဟဲ့ ဟွတ့်၊ တဲး အန် ဝီ တိုယ် ဂေ ကာလာင် ဒီ အီ ဟဝ် လွင် ဇဝ်ဖြာ။ 15 အန် ဘော တဲး ဂေ မိုဝ်း ပွုန် ဒီ ဆုတ့် ကာနမ် လေး ခဲင် ဒုဝ် အီ။ 16 ဒူအီ ဂေ တီ၊ ဂေ ဘော စိူဝ် ပါယ် နီ။ အာဆီမူန်၊ ဇဝ် ယေဆူ ဘော ဝီ တဲး အန် စိူဝ် အာပေတာရူ။ 17 ဘော အာယာကူပ် ဘော အာယောဟာန်၊ အီ မုး ဝါ အာယာကူပ်။ ဂါယ် အာ ဝီ မုး ဂွန် အာဇေဘေဒေ။ ဇဝ် ယေဆူ ဘော တဲး ဂါယ် စိူဝ် ဘုဝ်နေရာဂေ။ ခဲင် ဂြုဝ်း ဂေ လွင် ဒါင် စိူဝ် တီ လေး၊ “ဂါယ် နပ် ဒီ ရူ ပီ ဟမ် ကာနမ်။” 18 န့ မုး ဘော အာအန်ဒါရူ၊ အာဖီလိပ်၊ အာဘာထုဝ်လုဝ်မုဝ်၊ အာမာထဲ၊ အာထုဝ်မာတ်၊ အာယာကူပ် အီ မုး ဂွန် အာလာဖဲ ဘော အာထာဒေ ဘော အာဆီမူန် အီ ဟဲ့ ဒွိုမ် ဘဲန် ဒါ ဇူန် 19 ဘော အာယူဒတ် အီ စိူဝ် ဘော အာဆာခါရီအူတ်၊ အီ ဒီ အာပ် ဇဝ် ယေဆူ ဒီ ရန်ဆူ အန်။ ဂေ ဒူအီ တီ ဟဲ့ ဘဲန် ဖိုင် ဒီဘဲ ဇဝ် ယေဆူ ဂိုဝ် ဒီ အာ ဝီ။
လွင် ကာနမ် အီ စိူဝ် ဘေဆေဘူ
20 ပန် တီ ဇဝ် ယေဆူ ဘော ဒီဘဲ အန် ဝီ ဟာဝ် လိုပ် ခဲင် ကာင် အူ ကာင်။ ဘော ဂေ ဒူအီ ကိူန် ဝီ တး ကာဇု ဒူင် ကွယ် အန်၊ တူ တဲး ဂေ ပွိုန် ဒီ ဟူမ် ဘူမ် ဂေ။ 21 ဝေါဝဲ ဇဝ် ယေဆူ မင် အီ ဘော နပ် လွင် အန် တီ၊ ဂေ တဝ်း၊ “အန် ဟဲ့ ဟွတ့် ဘဲန် ဒူအီ ရိုဝ်၊ တူ နပ် ပီ ဘူင် အန်။” ခုဝ်၊ ဂေ ဝီ ဟာဝ် တဝ်း ဒီ မှေတ့် အန်။
22 န့ ယီ မိုဝ်း ဂေ ဒါ ဆာရာ အီ မာနုဝ် ဒါရာ ယူဒါ။ ဂေ ဟဲ့ လူင် တး မိူင် ယေရူဆာလဲမ်။ ဂေ တဝ်း၊ ဇဝ် ယေဆူ မိုဝ်း ဘုဝ် ကာနမ် အီ စိူဝ် ဘေဆေဘူa ကွယ် ခဲင် ဒုဝ် ဘူင့် အန်။ ဂေ မိူဝ် တဝ်း၊ န့ မုး ဘုဝ် ကာနမ် တီ၊ အီ တဲး အန် မိုဝ်း ပွုန်၊ တဲး အန် ပဲ ဒီ ဆုတ့် ကာနမ် လေး ခဲင် ဒုဝ် အီ။
23 ပန် တီ ဇဝ် ယေဆူ ဝီ ဒဲ့ ဂေ ဒူအီ၊ ဝီ ကာလာင် ဒီ ဂေ၊ တဲး န့ ဘဲန် အူဖာမာ။ အန် တဝ်း၊ “ဆေ န့ မုး ဘုဝ် ကာနမ် အီ စိူဝ် ဆာတာန်၊ အန် တူ ဝီ ဆုတ့် အာမျုဝ် အန် လေး ခဲင် ဒုဝ် အီ။ 24 န့ ပီ ဒူအီ ကွယ် ခဲင် မိူင် အူ မိူင်။ ဆေ ဒူအီ လာယ် ကာဂုဝ်း ကာတဲ ဂေ၊ မိူင် ဂေ အာဝ် ဟူ ပွိုန် ဘဲန် အူ မိူင်။ န့ ဒီ လိုဝ်။
25 ဆေ န့ ဘော မိုဝ်း ဒူအီ ကွယ် ခဲင် ကာင် အူ ကာင်၊ ဆေ ဂေ တူ လာယ် ဖြူမ်၊ အာဝ် ပွိုန် ကွယ် ရိုမ်၊ လုဝ် ကာယဝ်း။ 26 န့ ဘော ပါယ် တီ၊ ဆေ ဘုဝ် ကာနမ် ဝီ ကာဂုဝ်း ဒီ ကာနမ် အာမျုဝ် အန်၊ ဂေ ဒီ ဘော လာယ် ကာယဝ်း။ အန် ဒီ ဘော စှိုမ်။ အာဝ် ဟူ မိုဝ်း ပွုန်။
27 ဆေ န့ ဘော မိုဝ်း ဒူအီ၊ အန် ဆီ လိုပ် ခဲင် ကာင် ဒါ အီ မိုဝ်း ပ့လူမ် တာင်၊ အန် တူ ပွိုန် ဟာဝ် ဆိူဝ် လိုပ် ဒိုဝ်း ကြုဝ်ကြာမ် ဒူအီ တီ။ အန် လုဝ် မှေတ့် ဒါ ကာညာ ကာင် တွိုန်၊ ပက် ရိတ် အန် ဒီ အာတ့်။ ဟဲ့ ဟွတ့်၊ အန် ကော ပွိုန် လိုပ်၊ ဒိုဝ်း ကြုဝ်ကြာမ် ခဲင် ကာင် တီ။ 28 အုဝ် မိူဝ် တဝ်း အာခ်ု ဒီ ဘေ။ ခဲ့ မိုဝ်း ဒူအီ မှာပ် ဘဲန် မျုဝ် ဘဲန် မျုဝ်၊ ဘော ကာလာင် နာ စီစိဝ် ဒွန် မျုဝ် လွင် ဇဝ်ဖြာ၊ ဇဝ်ဖြာ ဒီ ဘ့လွာ့ ဝဲန် မှာပ် တီ။ 29 ဆေ န့ ယီ မိုဝ်း ဒူအီ၊ ဆေ အန် ကာလာင် နာ စီစိဝ် လွင် နဝ်း ဖွိုမ် ဇဝ်ဖြာ၊ မှာပ် ဇိုဝ် တီ၊ ဇဝ်ဖြာ တူ ဘ့လွာ့ ဝဲန် ဒေါ မှဝ်။ အာဆေ ဘူင် မှာပ် ဇိုဝ် တီ၊ အန် လုဝ် ခမ် ဆေဆေ မှာပ် အန် တီ။”
30 ဇဝ် ယေဆူ ဟဲ့ ကာလာင် အူဖာမာ တီ ဒီ ဂေ ကူပ် ဟဲ့ ဒွိုမ် တဝ်း ဂေ၊ အန် မိုဝ်း ကာနမ် အီ ပ့လိုက် အန်။
31 ဝါယ် အန် တီ န့ ဘော မိုဝ်း မာ ဇဝ် ယေဆူ ဂေ ဝါ အန်၊ ဂေ ဝီ တး ဇမ် ဒူင် ကွယ် အန်။ ဂေ ဟဲ့ တး ဇမ် နာ ရေတ့် ကာင် ဒူင် ကွယ် အန်၊ ဂေ ဝီ တိုယ် ဒူအီ အူ ဝီ၊ တဲး အန် ဟာဝ် လိုပ် ခဲင် ကာင်၊ ဒဲ့ လေး ဇဝ် ယေဆူ။ 32 န့ ဝီ မိုဝ်း ဒူအီ ကိူန်၊ ကွယ် ရူပ် အန်၊ ဂေ ဝီ တဝ်း ဒီ အန်၊ “မာ မဲ ဂေ ဝါ မဲ၊ ဂေ ကွယ် နာ ရေတ့်၊ ဂေ ဒဲ့ မဲ။”
33 ဇဝ် ယေဆူ ဝီ တဝ်း၊ “အာဆေ အီ မုး မာ အုဝ် ဂေ ဝါ အုဝ်။း”