မ်က် 4

လွင် ဒူအီ ဘြတ် ဆီမာ ငှုဝ်

1 ဇဝ် ယေဆူ ကွယ် ဒီ ခူပ် အိုမ် ဒိုင်၊ ဝီ စုး ဒီ မာနုဝ် ဒူအီ။ ဂေ ဒူအီ အီ ဟဲ့ တး ကာဇု ဒူင် ကွယ် အန်၊ ဂေ ဟဲ့ ကိူန် ကာဆဝ်။ ခုဝ်၊ ဇဝ် ယေဆူ ဝီ လိုပ် ခဲင် ရိုဝ် အူ လှာင်၊ ဟာဝ် ဂြာ့ တ အီ စဲက်၊ တဲး ဂေ ဒူအီ ကိူန် ပွိုန် ဒီ ကွယ် ဒဲင် ကာဒါယ် ဒီ ခူပ် အိုမ်။ 2 ဒေါ ကွယ် အန် ပါယ် တီ၊ အန် ဝီ မာနုဝ် ဒီ ဂေ ဘဲန် မျုဝ် ဘဲန် မျုဝ်၊ တဲး န့ ဘဲန် အူဖာမာ။ အန် ဝီ တဝ်း၊ 3 “ဘေ ထူမ်။ န့ ဒွိုမ် မိုဝ်း ဒူအီ အူ ဝီ၊ အန် ဟာဝ် ဘြတ် ဆီမာ ငှုဝ်။ 4 ဒေါ ဘြတ် အန် ဆီမာ ငှုဝ်၊ မင် ဘူင့် စုဝ်း ခူပ် န့တေန့်။ မာဆိမ် ဘော တး ဇုဝ့် ဟူမ် ဆီမာ ငှုဝ် တီ။ 5 ဆီမာ ငှုဝ် မင် ဘူင့် ဝီ စုဝ်း ဒဲင် ကာဒါယ် အီ မိုဝ်း မာဝ် နာ ခြိုမ်။ နာ ဒဲင် မာဝ် တီ ကာဒါယ် ဒီဟြေဝ်။ ကူပ် တူ မိုဝ်း ကာဒါယ် ဟေတ့်၊ ဆီမာ ငှုဝ် တီ၊ န့ ဘော ခြန် ဒီ လတ့်။ 6 ဆီငဲ ဟီ ဆောဒါတ်၊ လှာ အန် ဘော ကြဲ ဒီ ဟျီ့ ကူပ် ရျီး အန် တူ ပွိုန် ဒီ ဟာဝ် လိုက် ခဲင် ကာဒါယ်၊ ကာဘာင် အန် ဒီလှး ယမ်။ 7 ဆီမာ ငှုဝ် မင် ဘူင့်၊ ဘော စုဝ်း ဒဲင် ကာဒါယ် အီ မိုဝ်း ဒဝ် မာအာတ့်။ ဒဝ် မာအာတ့် ယီ ကြဲ ဒီ တာင်၊ ဝီ ယာပ် ငှုဝ်၊ တူ တဲး န့ မိုဝ်း ကာယူင့် အန်။ 8 ဘော ဆီမာ ငှုဝ် မင် ဘူင့်၊ ဂေ စုဝ်း ဒဲင် ကာဒါယ် ဘွတ်။ အူ ဆိန့် ဒေါ လေး ကာဘာင် အန်၊ န့ မွှိုမ်။ ကာယူင့် အန် ဒီ တာင်။ အူ ဂဝ်၊ ဝီ ပွိုန် အူယ် ဂိုဝ်၊ ဒဝ် ဂိုဝ် ဂေ အူ မာယဝ်း ဂဝ်။”

9 ဇဝ် ယေဆူ ဟဲ့ ဟွတ့် ကာလာင် လွင် အန် တီ၊ အန် ဝီ တဝ်း၊ “အာဆေ မိုဝ်း ဟျုဝ့် အီ နပ် ဒီ ထူမ်၊ တဲး အန် ထူမ် ဂြုဝ်း အုဝ် တီ။”

10 ပန် တီ ဒေါ တူ မိုဝ်း ဒူအီ ကိူန်၊ ဂေ ဒီဘဲ ဇဝ် ယေဆူ ဘော ဂေ ဒူအီ အီ ဒူပ် အန်၊ ဂေ ဝီ ဒီမွှတ် အန် လွင် အူဖာမာ ပဲ့ ဟဲ့ ခဲ အန်။ 11 အန် ဝီ တဝ်း ဒီ ဂေ၊ “ဆေ န့ မုး ဘေ၊ အုဝ် တဲး ဘေ နပ် ပီ တဝ်း အုဝ် လွင် မိူင် ပီ အိုပ် ဇဝ်ဖြာ အီ ညှာပ် ကာလှုး ဒီ နဝ်း။ ဆေ န့ ယီ မုး ဒူအီ ဟဝ်၊ အုဝ် လုဝ် ကာလာင် ဒီ ဂေ၊ တဲး န့ ဘဲန် အူဖာမာ။

12 ပါယ် တီ န့ ဒီ ဘဲန် ပီ ဒွိုမ် တဝ်း ဇဝ်ဖြာ ခဲင် ဘပ် အန်။ တဲး ဂေ ပွိုန် ဒီ ယိုဝ်၊ ယီ တူ တဲး န့ လိုဝ်း ဆီချာ ဒီ ဂေ။ တဲး ဂေ ပွိုန် ဒီ ထူမ် ဂြုဝ်း၊ ယီ တူ တဲး န့ လိုဝ်း လွင် ဒါင် အန်။ ဆေ ဂေ ယီ ဘျွင် နဝ်း၊ ဇဝ်ဖြာ ဒီ ဘ့လွာ့ ဝဲန် မှာပ် ဂေ။” 13 အန် ဟဲ့ ဟွတ့် ကာလာင် ဂြုဝ်း တီ၊ အန် ဝီ တဝ်း ဒီ ဂေ အီ ဒီမွှတ် အန်၊ “ဆေ ဘေ တူ နပ် လွင် ဒါင် အူဖာမာ ပဲ့ ဟဲ့ ခဲ အုဝ် နီ၊ န့ မိူဝ် တူ လိုဝ်း လွင် ဒါင် အူဖာမာ မျုဝ် ဟဝ် ပီ ဒီ တဝ်း အုဝ်။ 14 န့ ဘော ပါယ် နီ။ ဒူအီ ဘြတ် ဆီမာ ငှုဝ် ပီ ဒူအီ ကာလာင် ဂြုဝ်း ဇဝ်ဖြာ ဒီ ဒူအီ။ 15 ပီ ထူမ် ဒူအီ မင် အီ၊ န့ ပီ ငှုဝ် အီ စုဝ်း ဘာင် န့တေန့်။ ဂေ ဟဲ့ ဟွတ့် ထူမ် ဂြုဝ်း ဇဝ်ဖြာ၊ န့ ဝီ မိုဝ်း ဘုဝ် ကာနမ် အီ စိူဝ် ဆာတာန်၊ အန် ဒီ တး အူ ဇေန့်၊ ဝီ ဒိုဝ်း ဝဲန် ဂြုဝ်း ဇဝ်ဖြာ အီ ဟဲ့ လိုပ် ခဲင် နဝ်း ဂေ။ 16 န့ ဘော မိုဝ်း မင် အီ၊ ခဲင် နဝ်း ဂေ န့ ပီ ဆီမာ ငှုဝ် အီ စုဝ်း ဒဲင် ကာဒါယ် အီ မိုဝ်း မာဝ် နာ ခြိုမ်။ ဂေ ဟဲ့ ဟွတ့် ထူမ် ဂြုဝ်း ဇဝ်ဖြာ၊ ဂေ ဝီ ဒါခိုယ်၊ ဝီ တဲး ဂြုဝ်း တီ လိုပ် ခဲင် နဝ်း။ 17 ကူပ် တူ မိုဝ်း ရျီး၊ ယီ တူ ပွိုန် ကွယ် လှေန့်။ ဆေ ဒူအီ တီ ဘော ကာဒုး ဒုက်၊ ဆေ အီ ဟဝ် ဘော ရူ ဒီ ဂေ ကူပ် ညှိုမ် ဂေ ဂြုဝ်း ဇဝ်ဖြာ၊ ဂေ ဝီ ခြန် ဒီ ဝဲန် ဂြုဝ်း ဇဝ်ဖြာ တီ၊ ကွဲ့ ဟူ တဲး န့ ကွယ် ခဲင် နဝ်း။ 18 န့ ဝီ မိုဝ်း ဒူအီ မင် အီ၊ ခဲင် နဝ်း ဂေ န့ ပီ ဆီမာ ငှုဝ် အီ စုဝ်း ဒဲင် ကာဒါယ် အီ မိုဝ်း ဒဝ် မာအာတ့်။ ဘော ဂေ ဟဲ့ ထူမ် ဂြုဝ်း ဇဝ်ဖြာ။ 19 ဟဲ့ ဟွတ့်၊ ဂေ ယီ ဘဲန် နဝ်း ကာဟွာ့ လွင် ပီ ဒီ လုဝ် ဂေ၊ ပီ ဒီ ဟူမ် ပီ ဒီ တာ ဂေ။ ဂေ ဘော ကာလိုပ် ဒီ ဂျုဝ်ဂျာ တဲး ဂေ ခြမ်။ ဂေ ထာင်၊ ကြုဝ် တီ တဲး န့ ဘဲန် နဝ်း ဂျီတ် ဒီ ဂေ။ ပါယ် တီ ဂေ ကြဲ ဒီ ပိဝ် ဂြုဝ်း ဇဝ်ဖြာ၊ တူ တဲး န့ ဘဲန် အာဂျိုဝ် ဒီ ဂေ။ 20 န့ ဘော မိုဝ်း ဒူအီ ပေါ အူ မျုဝ်။ ခဲင် နဝ်း ဂေ၊ န့ ပီ ဆီမာ ငှုဝ် အီ စုဝ်း ဒဲင် ကာဒါယ် ဘွတ်။ ဂေ ထူမ် ဂြုဝ်း ဇဝ်ဖြာ၊ ဝီ တဲး န့ လိုပ် ကွယ် ခဲင် နဝ်း၊ တဲး န့ ဝီ ဘဲန် အာဂျိုဝ် ဒီ ဂေ။ အာဂျိုဝ် တီ၊ န့ ပီ ကာယူင့် ငှုဝ် အူ ဂဝ်။ န့ ဝီ ပွိုန် အူယ် ဂိုဝ်၊ ဒဝ် ဂိုဝ် ဂေ အူ မာယဝ်း ဂဝ်။” ခဲ့ တီ ဇဝ် ယေဆူ တဝ်း ဒီ ဂေ။

လွင် ငဝ် အွမ်

21 ဝါယ် အန် တီ ဇဝ် ယေဆူ ဝီ တဝ်း၊ “ဘေ တူ ပီဒဝ့် ငဝ် အွမ်၊ဝီ ဒိုဝ်း ဆီလာတ့် ဆီဘ့လိုက်။ ဘေ မိူဝ် တူ ဘ့လေး အန် နာ ခြိုမ် ကာစှူင့် အိတ်။ ဘေ ဒွန် အီ ဘ့လေး ငဝ် အွမ် ဒဲင် ဒူင် စာ။ 22 ခုဝ် အန်၊ ခဲ့ မိုဝ်း ပီ ဆီ ကာဘိတ် အီ၊ န့ ဒီ ဝီ ကာလှုး။ ခဲ့ မိုဝ်း ပီ ချြီင် ဒူအီ၊ န့ ဒီ ဝီ လိုဝ်း၊ တဲး အီ ပွိုန် ဒီ ယိုဝ်။ 23 အာဆေ နပ် ဒီ ထူမ်၊ တဲး အန် ထူမ် ဂြုဝ်း အုဝ် နီ။”

24 ဇဝ် ယေဆူ ဟဲ့ ဟွတ့် တဝ်း ပါယ် တီ၊ အန် ဝီ တဝ်း၊ “တဲး ဘေ ထူမ် ဆီချာ ဂြုဝ်း အုဝ်။ ဘေ ဘူင် ဒီ အီ မျုဝ် မှဝ်၊ ဘေ ဒီ ဝီ ပွိုန် မျုဝ် တီ။ ဘေ ဒီ ဘော ပွိုန် လွှိုမ် တီ။ 25 အာဆေ ဟဲ့ နပ် ဒီ ထူမ်၊ အန် ဒီ ဝီ နပ် ကာပွါ၊ အာဆေ ယီ တူ ထူမ် ဆီချာ၊ အန် ဒီ ဝီ ပိဝ် ခဲ့ ပီ ဒွိုမ် ထူမ် အန်၊ ကွဲ့ ဟူ တဲး အန် နပ် မာဆေ။”

လွင် ဆီမာ ငှုဝ် အီ လတ့်

26 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ တဝ်း၊ “မိူင် ပီ အိုပ် ဇဝ်ဖြာ၊ န့ ပီ ဒူအီ အူ ဝီ၊ အီ ဘြတ် ဆီမာ ငှုဝ် ဒဲင် ကာဒါယ်။ 27 ဟဲ့ ဟွတ့်၊ အန် ဝီ အိတ် ဝီ န့ဆိုဝ်း။ ဒွန် ဆီငဲ ဒွန် ညှာ၊ ငှုဝ် တီ ဝီ လတ့်။ ကာဘာင် အန် ကြဲ ဒီ တာင်။ အန် ယီ တူ နပ် ပီ ပါယ် အန်။ 28 ငှုဝ် တီ ဝီ လတ့် ရာင် အန်။ ဒေါ ဂုဝ် န့ မိုဝ်း ကာဘာင် အန်။ ပန် တီ ကာယူင့် အန် ဝီ လေး။ ဟဲ့ ဟွတ့်၊ န့ ဝီ ဘဲန် ဂဝ် ခဲင် ကာယူင့် အန်။ 29 ဟီ ဇမ် အာခြာဝ် အန်၊ ဂဝ် အန် ဘော ဆိန်၊ ဒူအီ ရန့် ငှုဝ် တွိုန် ဝီ ဒိုဝ်း န့ဝါတ့် တး ဆုဝ့် ငှုဝ် တီ။”

30 ဇဝ် ယေဆူ ဟဲ့ ဟွတ့် ကာလာင် လွင် အန် တီ၊ အန် ဝီ တဝ်း၊ “မာဆေ ပီ လုဝ် တဝ်း အုဝ်။း မိူင် ပီ အိုပ် ဇဝ်ဖြာ၊ န့ ပီ မာဆေ။း အူဖာမာ မာဆေ ပီ လုဝ် ကာလာင် အုဝ်၊ တဲး န့ လိုဝ်း ဒီ ဘေ။း 31 န့ ပါယ် နီ။ မိူင် ပီ အိုပ် ဇဝ်ဖြာ၊ န့ ပီ ကာအာင် ဒဝ် ဆျီမ်။ ခဲ့ ပီ ဆမ် ဒူအီ ကာအာင်၊ ဆီမာ ကာအာင် ဒဝ် ဆျီမ် တီ ဟဲ့ ဒီတဲတ် လွှိုမ် ဒွန် မျုဝ်။ 32 ဟီ ဟွတ့် ဆမ် အန်၊ န့ ဝီ လတ့် ဟြေး၊ တဲး န့ ဝီ တာင် လွှိုမ် ဒဝ် ဒွန် မျုဝ်။ ရာ အန် ဝီ တာင်၊ တဲး မာဆိမ် ဘော ပွိုန် ဒီ တး ကွယ် နာ ဒဲင်၊ ဘူင် ကာဟုန် အန် ခဲင် ယာပ် လှာ အန်။”

33 ပါယ် တီ ဇဝ် ယေဆူ ကာလာင် အူဖာမာ ဘဲန် မျုဝ် ဘဲန် မျုဝ် ဒီ ဂေ ဒူအီ ကိူန်၊ တဲး ဂေ ကော နပ် ခဲ့ လိုဝ်း ဒီ နဝ်း ဂေ။ 34 အန် တူ ကာလာင် ဆိူဝ် ဒီ ဂေ။ အန် ကာလာင် အူဖာမာ အန် ဆေဆေ။ ဒေါ ကွယ် ရိုမ် အန် ဒူပ် ဂေ ဒီဘဲ အန်၊ အန် ယီ ကာလာင် ဆိူဝ်၊ တဲး ဂေ နပ် ဆီချာ ဆီဖဝ် ဂြုဝ်း အန်။

လွင် ဇဝ် ယေဆူ တဲး ခုန် ဝီ ယေန်

35 ဆီငဲ တီ၊ ဘာ ဒီ အပ်၊ ဇဝ် ယေဆူ ဝီ တဝ်း ဒီ ဒီဘဲ အန်၊ “တဲး အေ ကာလုဝ်း အိုမ် ဒိုင်၊ တဲး အေ ဟာဝ် ဇမ် ဘ့လာက် နာ တ ဒွယ်။” 36 ဂေ ဟဲ့ ဟွတ့် ဝး ဒူအီ ကိူန်၊ တဲး ဂေ ကွယ် ဒီ ပန်၊ ဂေ ဒီဘဲ အန် ဝီ တဲး ဇဝ် ယေဆူ ကွယ် ခဲင် ရိုဝ်၊ ဝါယ် ဟာဝ် အူ ဇေန့်။ န့ ဘော မိုဝ်း ရိုဝ် အီ ဟဝ် ဒူပ် ဂေ။ 37 ပန် တီ ခုန် တာင် တး။ မာ အိုမ် ဘော တာင်၊ ဆီလွယ် လိုပ် ခဲင် ရိုဝ်၊ တဲး အိုမ် ကြဲ ဒီ နုဝ့် ခဲင် ရိုဝ်။ 38 ဇဝ် ယေဆူ ယီ အိတ် နာ ဆီပူင့် ရိုဝ်၊ မာကွိုမ် မွှန်။ ဂေ ဒီဘဲ အန် ဝီ ဘျေတ့် အန်၊ တဝ်း ဒီ အန်၊ “ဆာရာ၊ မဲ တူ ကာဝေ ယေ။း ယေ ဒီ စေတ့် ယမ် ခဲင် အိုမ်။”

39 ပန် တီ အန် ယိတ့်၊ ဝီ စ်ု ခုန် ဂေ မာ အိုမ်၊ တဲး ဂေ ယေန်။ အန် တဝ်း၊ “စူ ခဲ့ တီ၊ တဲး န့ ယေန်။” အန် ဟဲ့ ဟွတ့် တဝ်း ပါယ် တီ၊ ခုန် ဘော ဟြာယ်။ အိုမ် ဘော ယေန် ဒါခိုယ်။

40 အန် ဝီ တဝ်း ဒီ ဒီဘဲ အန်၊ “မှဝ် န့ ပါယ် ပီ ယုဝ် ဘေ။း မှဝ် န့ ပါယ် ပီ တူ ညှိုမ် ဘေ ဒီ အုဝ်။း”

41 ဂေ ယီ အာမ် ကာဆဝ်၊ ဝီ ကာမွုန် ကာတဲ ဂေ။ ဂေ တဝ်း၊ “အန် မုး အာဆေ။း ဘော ခုန် ဘော မာ အိုမ် နပ် ဒီ ထူမ် ဂြုဝ်း အန်။”