လက် 1

ဘပ် ပီ ဒဲမ် အာလူကာ လွင် ဇဝ် ယေဆူ

ခါန်

1 ဘပ် နီ မုး ပီ ဒဲမ် အုဝ် အာလူကာ အာဒါ မဲ အာထေအုဝ်ဖီလုဝ် အီ မုး ပီ ရုဝ်ဆေ ဒူအီ ဒွန် အီ။ န့ ဟဲ့ မိုဝ်း ဘဲန် ဝီ ဘဲန် ဝီ၊ အီ ဟဲ့ ဂျုဝ်ဂျာ ဒီ ဒဲမ် အုန် ဒွန် မျုဝ် လွင် ပဲ့ ဟဲ့ ဘူင် ဇဝ် ယေဆူ ကာတဲ ယေ နီ။ 2 ဂေ ဒူအီ တီ ဟဲ့ ဒဲမ် ဟာဝ် လွင် ပဲ့ ဟဲ့ ထူမ် ယေ ဒီ ဂေ အီ ဟဝ် ဘော လွင် ပဲ့ ဟဲ့ ယိုဝ် ယေ ဒီ ငါယ် ယေ ဒွန် မျုဝ်။ ဂေ ဟဲ့ ဒဲမ် လွင် ပီ ယိုဝ် ဂေ တီ ဆိန့် ဒေါ ဂုဝ် အန်၊ တဲး အေ နပ်။ 3 ခုဝ် အန်၊ ဘော အုဝ် ဟဲ့ ဒီမွှတ် တူတ့် ဒွန် မျုဝ်၊ တဲး အုဝ် နပ် အီ ပါယ် အူ ဆိန့် ဒေါ ဂုဝ် အန် ကော ဇမ် ကာဒဲ့ အန်။ အုဝ် မိူဝ် ဟဲ့ ဒဲမ် အုန် တဲး န့ လာယ် ဒါမ်၊ တဲး ဘော မဲ နပ် ဆီချာ။ 4 အုဝ် ဟဲ့ ဒဲမ် ဘပ် နီ၊ တဲး မဲ နပ် အီ မှာန် လွင် ဒွန် မျုဝ် ပီ ဒွိုမ် ကာလာင် ဒူအီ ဒီ မဲ။

လွင် ဒါ အာဆာခါရာ ဂါယ် နာင် အေလီဆာဘေတ်

5 ဒေါ ကွယ် ခုန်ဒီခမ် အာဟေရူတ် ခဲင် အိူင် ယူဒါ၊ န့ မိုဝ်း ဒူအီ အီ လှူ ဒီ ဇဝ်ဖြာ အူ ဝီ။ အန် စိူဝ် အာဆာခါရာ။ အန် မုး ဒူအီ အီ ဘူင် ဂါန် ခဲင် ဟုဝ် ဇဝ်ဖြာ။ အန် ဘူင် ရိုမ် ဂါန် ဒူပ် ဖိုင် ဂေ ဒူအီ အီ လှူ ဒီ ဇဝ်ဖြာ ပီ အိုပ် အာဖီယ။ အီဘိုန့် အန် စိူဝ် နာင် အေလီဆာဘေတ်။ အန် ဘော မုး လှုက်လှာန် ဒါ အာရူန်။ 6 ဒူအီ ဂါယ် တီ မုး ဒူအီ မွှိုမ် ဒီ အာတ့် ဇဝ်ဖြာ။ ဂါယ် မိူဝ် ဘူင် ဒွန် မျုဝ် ပီ ဒမ် အုန် ဇဝ်ဖြာ။ ဂါယ် ဒူပ် ဆီချာ ဒါရာ ဇဝ်ဖြာ။ အာဝ် မိုဝ်း နာ တူ မွှိုမ် မာဆေ ပီ ပွိုန် ကာလာင် အီ ဟဝ် လွင် ဂါယ်။ 7 ဒူအီ ဂါယ် တီ ယီ တူ မိုဝ်း ဂွန်။ နာင် အေလီဆာဘေတ် မုး ဒူအီ မှန်။ ဂါယ် မိူဝ် ဟဲ့ ဟွတ့် ကတ်။

8 အူ ဆီငဲ ဟဲ့ ဇမ် အာခြာဝ် ဒီ လုဝ် ဘူင် ဖိုင် အာဆာခါရာ ဂါန် ခဲင် ဟုဝ် ဇဝ်ဖြာ။ 9 ဂေ ဟဲ့ ဒူပ် ဟိတ် ဂေ၊ ကာတာမ် ရဝ်း ဒူအီ အီ ဒီ လုဝ် လှူ ဆီနမ် အုး ငှုန် ဒီ ဇဝ်ဖြာ။ န့ မုး အာဆာခါရာ အီ ဟဲ့ ပွိုန်။ ခုဝ်၊ အန် မိူဝ် ဟဲ့ လိုပ် နာ ခဲင် ဟုဝ် ဇဝ်ဖြာ။ 10 ဒေါ ကွယ် အန် လှူ ဆီနမ် အုး ငှုန် ဒီ ဇဝ်ဖြာ၊ ဂေ ဒူအီ ဟဝ် ဂေ ဘော ဖိုင် ကွယ် နာ ရေတ့်၊ ဆာခိုဝ် နှဝ့် အန်။

11 ဒေါ အန် တီ အာဆာခါရာ ဝီ ယိုဝ် အာမူ အာမာတ် ဇဝ်ဖြာ ကာပ့လုး ဒီ အာတ့် အန်၊ ကွယ် ဘ့လာက် အာအး ကာစှူင့် လှူ ဆီနမ် အုး ငှုန် ဒီ ဇဝ်ဖြာ။ 12 ဒေါ ယိုဝ် အာဆာခါရာ အာမူ အာမာတ် ဇဝ်ဖြာ တီ၊ အန် မိူဝ် ကာစွာ။ အန် ဘော ယုဝ် ကာဆဝ်။ 13 အာမူ အာမာတ် ဇဝ်ဖြာ တဝ်း ဒီ အန်၊ “အိုယ် အာဆာခါရာ၊ ကွဲ့ ယုဝ်။ ဇဝ်ဖြာ ဟဲ့ ထူမ် ဂြုဝ်း ပီ ဆာခိုဝ် မဲ။ နာင် အေလီဆာဘေတ်၊ အီ မုး အီဘိုန့် မဲ၊ အန် ဒီ မိုဝ်း ဂွန် အီမာယ် ဒွါ ဒီ မဲ။ မဲ လုဝ် တဲး အန် စိူဝ် အာယောဟာန်။ 14 ပန် အန် တီ၊ မဲ ဒီ ဒါခိုယ် ကာဆဝ် ကူပ် အန်။ ဘော ဂေ အီ ဟဝ်၊ ဂေ ကိူန် ဒီ မိုဝ်း နဝ်း ဒါခိုယ် လွင် အန် တီ။ 15 ဂွန် မဲ တီ၊ အန် ဒီ ဘဲန် ဒါ တာင် ဒီ အာတ့် ဇဝ်ဖြာ။ အန် တူ ဒျီင် အိုမ် ဆာဘျိတ် ဘော အိုမ် ပဝ်း ဒွန် မျုဝ်။ အူ ဆိန့် ဒေါ ဒဲ အန် ဘာဒိက် ဆန်ထေ၊ နဝ်း ဖွိုမ် ဇဝ်ဖြာ ဒီ ကွယ် နုဝ့် ခဲင် နဝ်း အန်။ 16 အန် ဒီ တဲး ဂေ ဒူအီ အီဆာရေလ ကာပ့လုတ် နဝ်း၊ တဲး ဂေ ဝီ ဒူပ် ဇဝ်ဖြာ။ 17 အန် ဒီ လေး ဟာဝ် ဒီ အာတ့် ဇဝ် ယေဆူ။ အန် ဒီ မိုဝ်း ပွုန် ဇဝ်ဖြာ ဘော နဝ်း ဖွိုမ် ဇဝ်ဖြာ၊ တဲး န့ ပီ အာအေလီယ တွိုန်။ အန် ဒီ တဲး ဂုန့် ဂါယ် ဂွန် ဒူအီ ဝီ လာယ် ရွက့်၊ ဝီ လာယ် ကာလဝ့်။ အန် မိူဝ် ဒီ တဲး ဂေ ဒူအီ အီ တူ ထူမ် ဂြုဝ်း ဇဝ်ဖြာ ဝီ ကာပ့လုတ် နဝ်း၊ တဲး ဂေ ဝီ ဒူပ် အာငျာန် ဘွတ် ဘော ပွိုန် နဝ်း မှာန်၊ နဝ်း မွှိုမ်။ ပါယ် တီ အန် ဒီ တဲး ဒူအီ မ့ပြာယ် နဝ်း ဂေ၊ တဲး ဂေ ပွိုန် ဒီ ဒူပ် ဇဝ်ဖြာ။”

18 အာမူ အာမာတ် ဇဝ်ဖြာ တွိုန် ဟဲ့ ဟွတ့် တဝ်း ပါယ် တီ၊ အာဆာခါရာ ဝီ တဝ်း ဒီ အန်၊ “မှဝ် အုဝ် ဒီ ပါယ် ဒီ နပ် ဆီချာ၊ ယုဝ် ပီ တဝ်း မဲ ဟဲ့ မှာန်။း အုဝ် ဟဲ့ ကတ် ကာဆဝ်။ ဘော အီဘိုန့် အုဝ် ဟဲ့ ကတ်။”

19 အန် ဟဲ့ ဟွတ့် တဝ်း ပါယ် တီ၊ အာမူ အာမာတ် ဇဝ်ဖြာ ဝီ တဝ်း၊ “အုဝ် မုး အာကာပြီအေန်၊ အီ ဘူင် ဂါန် ဇဝ်ဖြာ။ ဇဝ်ဖြာ ဟဲ့ တိုယ် အုဝ် တဲး အုဝ် ကာလာင် ဒီ မဲ။ အန် ဟဲ့ တဲး အုဝ် ကာလာင် အာမျုဝ် အီ ဒွါ နဝ်း ဒါခိုယ် ဒီ မဲ။ 20 အူ ဆီငဲ၊ မဲ ဒီ မိုဝ်း ဂွန် ပီ ပီ ဒွိုမ် တဝ်း အုဝ် ဒီ မဲ။ ကူပ် တူ ညှိုမ် မဲ ဂြုဝ်း ပီ ကာလာင် အုဝ် ဒီ မဲ၊ အူ ဆိန့် ဒေါ တီ နီ ကော ဒီ ဝီ ဇမ် အာခြာဝ် တဝ်း အုဝ် ဒီ မဲ၊ မဲ တူ ဝီ ပွိုန် ကာလာင် ဂြုဝ်း။”

21 ဒေါ ကာလာင် အာမူ အာမာတ် ဇဝ်ဖြာ ပါယ် တီ၊ ဂေ အီ ဟဝ် ကွယ် နာ ရေတ့်၊ နှဝ့် အာဆာခါရာ။ ဂေ အာမ် လွင် ကွယ် လှေန့် ကာဆဝ် အန် ခဲင် ဟုဝ် ဇဝ်ဖြာ။ 22 ဒေါ ဝီ လေး အန်၊ အန် တူ ပွိုန် ကာလာင် ဂြုဝ်း။ ဂေ ဒူအီ ကိူန် နပ်၊ အန် ဟဲ့ ယိုဝ် အီ မွှိုမ် အာမ် ခဲင် ဟုဝ် ဇဝ်ဖြာ။ အာဆာခါရာ ဘော ထေဝ် ဒီ နှဲ ဒီ ဂေ တာ ဒဲ ဂါယ် ပ့လဝ် အန်၊ အန် ယီ တူ ပွိုန် ကာလာင် ဂြုဝ်း မာဆေ။

23 ဝါယ် ဟဲ့ ဟွတ့် ဘူင် အန် ဂါန် ခဲင် ဟုဝ် ဇဝ်ဖြာ၊ အန် ဝီ ဝေန့် ဒီ ကာင် အန်။ 24 ပန် တီ နာင် အေလီဆာဘေတ်၊ အီ မုး အီဘိုန့် အန်၊ အန် ဒဲ ဘာဒိက် ဆန်ထေ။ အာဒါ ဖန် မာဂျီန် အန် တူ လေး ဟာဝ် ခဲင် ကာင် အန် ဒေါ မှဝ်။ 25 အန် တဝ်း၊ “ဒေါ တီ နီ ဇဝ်ဖြာ ဟဲ့ စွယ် အုဝ်။ ပီ လုဝ် ဆာယ် အုဝ် ဒီ ဒူအီ ဟဲ့ ဟွတ့် တူတ့်။ ဇဝ်ဖြာ ဟဲ့ ဟွတ့် ဒိုဝ်း ဝဲန်။”

လွင် ဇဝ် ယေဆူ ဒီ တး ဂွိုတ် ဘဲန် ဒူအီ

26 ဝါယ် ဟဲ့ ဒဲ နာင် အေလီဆာဘေတ် ဘာဒိက် ဆန်ထေ အာဒါ ဒဝ် မာဂျီန်၊ ဇဝ်ဖြာ ဝီ တိုယ် အာမူ အာမာတ် အန် အီ စိူဝ် အာကာပြီအေန် ဟာဝ် ဇမ် မိူင် နာဆာရေတ့် ခဲင် အိူင် ဂါလီလေ။ 27 ခဲင် မိူင် တီ၊ န့ မိုဝ်း ဒီဘျာ အူ ဝီ။ အန် ဟဲ့ ဟွတ့် လာယ် ဘဲန် အူ ပါဝ် ဒီ ကာညူမ် အူ ဝီ၊ အီ မုး လှုက်လှာန် ခုန်ဒီခမ် အာဒါဝိတ်။ ကာညူမ် တီ၊ အန် စိူဝ် အာယုဝ်ဆဲပ်။ ဒီဘျာ တီ စိူဝ် နာင် မာရီ။ 28 အာမူ အာမာတ် ဇဝ်ဖြာ ဟဲ့ တး ကာပ့လုး ဒီ နာင် မာရီ တီ။ အန် တဝ်း၊ “အိုယ်၊ နာင် မာရီ၊ တဲး နဝ်း မဲ ဒါခိုယ်။ ဇဝ်ဖြာ ဟဲ့ ကွယ် ရိုမ် ဒူပ် မဲ။”

29 နာင် မာရီ ကာစွာ ကူပ် ပီ တဝ်း အာမူ အာမာတ် ဇဝ်ဖြာ တီ ဒီ အန်။ အန် မိူဝ် ဇေန့်ဇာ ခဲင် နဝ်း၊ တူ နပ် ပီ ဒီ မုး လွင် ဒါင် အန်။ 30 အာမူ အာမာတ် ဇဝ်ဖြာ ဝီ တဝ်း ဒီ အန်၊ “အိုယ် နာင် မာရီ၊ ကွဲ့ ယုဝ်။ ဇဝ်ဖြာ ဟဲ့ ဂေဇူ မဲ။ 31 မဲ ဒီ ဒဲ ဘာဒိက် ဆန်ထေ။ မဲ ဒီ မိုဝ်း ဂွန် အီမာယ် အူ ဝီ။ မဲ ဒီ တဲး အန် စိူဝ် အာယေဆူ။ 32 အန် ဒီ ဘဲန် ဒါ တာင်။ ဒူအီ ဟဝ် ဒီ တဝ်း၊ အန် မုး ဂွန် ဇဝ်ဖြာ၊ ဇဝ်ဖြာ အီ တာင် လွှိုမ် တူတ့်။ ဇဝ်ဖြာ၊ အီ မုး ဒါ ကာညာ အီ အိုပ် အေ၊ အန် ဒီ တဲး အန် ဘဲန် ခုန်ဒီခမ် အီ ပီ ခုန်ဒီခမ် အာဒါဝိတ် အီ မုး ဂုန့် ဒင် ဘေ ဒေါ မွိုန်။ 33 အန် ဒီ ဘဲန် ခုန်ဒီခမ် အီ အိုပ် ဂေ လှုက်လှာန် အာကူပ်။ မိူင် ပီ အိုပ် အန်၊ န့ ဒီ ကွယ် ဆေဆေ၊ တူ နပ် ဒီ တူတ့်။”

34 နာင် မာရီ ဝီ တဝ်း ဒီ အာမူ အာမာတ် ဇဝ်ဖြာ၊ “အုဝ် ဆီ မုး ဒီဘျာ။ ပီ တဝ်း မဲ ဒွန် မျုဝ် ဇိုဝ် တီ၊ မှဝ် န့ ဒီ ပါယ် ဒီ ဘဲန်။း”

35 အာမူ အာမာတ် ဇဝ်ဖြာ ဝီ တဝ်း၊ “နဝ်း ဖွိုမ် ဇဝ်ဖြာ ဒီ တး ကွယ် ဒီ မဲ။ ပွုန် ဇဝ်ဖြာ အီ တာင် လွှိုမ် တူတ့် ဒီ တး ပ့လိုက် မဲ။ ဂေ အီ ဟဝ် ဒီ ကာလာင် လွင် ဂွန် မဲ တီ၊ အန် မုး ဂွန် ဇဝ်ဖြာ။

36 ယွတ် ဝေါဝဲ မဲ၊ အီ စိူဝ် နာင် အေလီဆာဘေတ်။ ဂေ အီ ဟဝ် ဟဲ့ တဝ်း၊ အန် တူ နပ် ဒီ မိုဝ်း ဂွန်။ အန် မိူဝ် ဟဲ့ ကတ်။ ဒေါ တီ နီ အန် ယီ ဟဲ့ ဒဲ ဘာဒိက် ဆန်ထေ၊ ဟဲ့ နုဝ့် ဒဝ် မာဂျီန်။ 37 အာဝ် မိုဝ်း မာဆေ ပီ တူ ပွိုန် ဘူင် ဇဝ်ဖြာ။”

38 အာမူ အာမာတ် ဇဝ်ဖြာ ဟဲ့ ဟွတ့် ကာလာင် ပါယ် တီ၊ နာင် မာရီ ဝီ တဝ်း၊ “အုဝ် မုး ဒဲစေန့် ဇဝ်ဖြာ။ ခဲ့ ပီ တဝ်း မဲ ဒီ အုဝ်၊ တဲး န့ ဘဲန် ပါယ် တီ။” ဒေါ အန် တီ အာမူ အာမာတ် ဇဝ်ဖြာ ဝီ လေး ဒူင် ကွယ် အန်။

လွင် နာင် မာရီ ဟာဝ် လဲ ဒီ နာင် အေလီဆာဘေတ်

39 ဝါယ် အန် တီ အာဝ် လှေန့်၊ နာင် မာရီ ယိတ့်၊ ဟာဝ် ခဲင် အိူင် ယူဒါ ဒီ မိူင် အီ မိုဝ်း နွန်။ 40 အန် မိူဝ် ဟာဝ် လိုပ် ခဲင် ကာင် အာဆာခါရာ၊ ကာလာင် ဂြုဝ်း ဒီ နာင် အေလီဆာဘေတ်။ 41 ဒေါ ယိုဝ် နာင် အေလီဆာဘေတ် ဂြုဝ်း ပီ ကာလာင် နာင် မာရီ၊ ဂွန် အီ ကွယ် ခဲင် ဝတ့် အန် မိူဝ် ရ်ု အူ ဇေန့်။ နဝ်း ဖွိုမ် ဇဝ်ဖြာ ကော နုဝ့် ခဲင် နဝ်း နာင် အေလီဆာဘေတ်။ 42 အန် ဝီ ကာလာင် ဂြုဝ်း တာင် တဝ်း၊ “အိုယ် နာင် မာရီ၊ မဲ ဟဲ့ ဒါခိုယ် လွှိုမ် အီဘိုန့် အီ ဟဝ် ဘောကာဂ့လျီတ်။ ဂွန် ပီ ဒီ ပွိုန် မဲ တီ၊ တဲး ဘော အန် ဒီ မိုဝ်း နဝ်း ဒါခိုယ်။ 43 န့ ဟဲ့ မွှိုမ် အာမ် ကာဆဝ်။ န့ တူ ကာအာပ် မဲ၊ အီ မုး မာ အန် ဇဝ် ပီ ကြိုပ် အုဝ်၊ တး ဒူင် ကွယ် အုဝ်။ 44 ဒေါ ထူမ် အုဝ် ဂြုဝ်း ပီ ကာလာင် မဲ ဒီ အုဝ်၊ ဂွန် အာင အီ ကွယ် ခဲင် ဝတ့် အုဝ် နီ၊ အန် ဟဲ့ ရ်ု ဒါခိုယ်။ 45 ကူပ် ဟဲ့ ညှိုမ် မဲ၊ န့ ဒီ ဘဲန် တူတ့် ဒွန် မျုဝ်၊ ပီ တဝ်း ဇဝ်ဖြာ ဒီ မဲ။ န့ ဒီ တဲး နဝ်း မဲ ဒါခိုယ်။” နာင် အေလီဆာဘေတ် ဟဲ့ တဝ်း ဒီ နာင် မာရီ ပါယ် တီ။

လွင် နာင် မာရီ အိူပ် ဇဝ်ဖြာ

46 ဝါယ် အန် တီ နာင် မာရီ ဝီ တဝ်း၊ “အုဝ် အိူပ် ဇဝ်ဖြာ။

47 နဝ်း ဖွိုမ် အုဝ် ဟဲ့ ဒါခိုယ် လွင် ဇဝ်ဖြာ ပီ ကြိုပ် အေ။ အန် မုး အန် ဇဝ်၊ အီ ချွတ် အေ။

48 ယီ မုး အုဝ် ဒဲစေန့် အန် ဇဝ်၊ အန် ဇဝ် ဟဲ့ လှုဝ်း၊ တူ ပိဝ် အုဝ်။ အူ ဆိန့် ဒေါ တီ နီ၊ ဟာဝ် နာ အာတ့်၊ ဂေ ဒူအီ ဘောကာဂ့လျီတ် ဒီ တဝ်း၊ အုဝ် မုး အီ ဟဲ့ ပွိုန် နဝ်း ဒါခိုယ်။

49 ဇဝ်ဖြာ အီ မိုဝ်း ပွုန် တာင် လွှိုမ် တူတ့်၊ အန် ဟဲ့ ဘူင် နာ မွှိုမ် အာမ် ကာဆဝ် ဒီ အုဝ်။ အန် ဇဝ် မုး ဇဝ်ဖြာ အီ ဘွတ် အာခါခ်ု။

50 ဇဝ်ဖြာ မိုဝ်း နဝ်း ကာဝေ ဂေ ဒူအီ အီ ကြိုပ် ဆီချာ အန် ဒွန် ဇာတ် ဒွန် ဘာန်။

51 ဇဝ်ဖြာ မိူဝ် ဘျ ပွုန် တာင် အန်။ န့ ယီ မုး ဂေ အီ ပီခိုက် နဝ်း ဂေ၊ ဘော ဂေ အီ ထာင် ဂေ ဟဲ့ တာင် လွှိုမ် အီ၊ အန် ဒီ ဝဲန်၊ တဲး ဂေ ဟြာယ်။

52 န့ ဘော မုး ခုန်ဒီခမ် တာင် ဘော ဂေ အီ မိုဝ်း ပွုန် တာင်၊ အန် ဇဝ် ဟဲ့ ဘ့လွာ့ ဝဲန် ဂေ။ အန် ယီ ဘူင် တဲး ဒူအီ အီ တူ မိုဝ်း ပွုန် ဝီ ဘဲန် ဒူအီ တာင်။

53 ဂေ ဒူအီ တူ မိုဝ်း ပီ ဒီ ဟူမ်၊ အန် ဇဝ် ဟဲ့ တဲး ဂေ ဟူမ် ဖဲ၊ တဲး ဂေ ဒါခိုယ်။ ဂေ ဒူအီ ခြမ်၊ အန် ဇဝ် ယီ တဲး ဂေ ဝီ ဖ့လာန်၊ တူ မိုဝ်း မာဆေ။

54 အန် မိူဝ် လှုဝ်း ကာဒိက် ဆတ်ဇာ ပဲ့ ဟဲ့ ဒွါ အန် ဒီ ဂေ ဒူအီ အီ ကွယ် ဒေါ မွိုန်၊ တဲး အန် ကာဝေ ဂေ ဆေဆေ။ အန် ဇဝ် မိူဝ် ဟဲ့ တး စွယ် ဂေ ဒူအီ အီဆာရေလ အီ မုး ဒဲစေန့် အန်။

55 ဇဝ်ဖြာ မိူဝ် တူ ပိဝ် ဒါ အာဘြာဟမ် ဘော ဂေ လှုက်လှာန် အန် ဘောကာဂ့လျီတ်။ စုး ဆိန့် ဒေါ တီ နီ ဟာဝ် နာ အာတ့် ဒွန် စုဝ် ဒွန် ဘာန် အန် ဇဝ် ဒီ ဘော လှုဝ်း အေ ဆေဆေ။” နာင် မာရီ ဟဲ့ တဝ်း ပါယ် တီ။

56 နာင် မာရီ ဘော ကွယ် ဒူင် ကွယ် နာင် အေလီဆာဘေတ် အာဒါ အူယ် မာဂျီန်။ ဝါယ် အန် တီ အန် ဝီ ဝေန့် ခဲင် ကာင် အန်။

လွင် ဒေါ ဂွိုတ် အာယောဟာန်

57 ဒေါ ဟဲ့ ဇမ် အာခြာဝ် အန်၊ နာင် အေလီဆာဘေတ် ဘော မိုဝ်း ဂွန် အီ မုး ဂွန် အီမာယ်။ 58 ဘော ဂေ အီ ဟဝ် ဘော ဂေ ဝေါဝဲ အန် ဘောကာဂ့လျီတ်၊ ဒေါ ထူမ် ဂေ လွင် ပဲ့ ဟဲ့ ဘူင် ဇဝ်ဖြာ ဒီ နာင် အေလီဆာဘေတ်၊ န့ တဲး ဘော ဂေ မိုဝ်း နဝ်း ဒါခိုယ်။

59 ဒေါ ဟဲ့ နုဝ့် အာဆာက် အန် ဒါ ဆီငဲ၊ ဂေ အီ ဟဝ် တး၊ တဝ်း ဒီ ဆွာ့ ဝဲန် ဟုန် လခါနာ အန်။ ဂေ တဝ်း ဒီ တဲး အန် စိူဝ် အာဆာခါရာ ပီ ဂုန့် အန်။ 60 မာ အန် ယီ တူ တဲး ဂေ ဘူင်။ အန် တဝ်း၊ “ကွဲ့ တဝ်း ပါယ် တီ။ ယာယ် ဒီ တဲး အန် စိူဝ် အာယောဟာန်။”

61 ဂေ ဒူအီ တွိုန် ဝီ တဝ်း ဒီ အန်၊ “ခဲင် ဝေါဝဲ မဲ ဘောကာဂ့လျီတ် အာဝ် မိုဝ်း ခေါ အူ ဝီ အီ စိူဝ် ပါယ် တီ။”

62 ဒေါ အန် တီ ဂေ ဝီ ထေဝ် ဒီ ကာလာင် ဒီ ဂုန့် အန် တာ ဒဲ ဂေ ပ့လဝ်၊ ဒီမွှတ် အန်၊ အန် ဆီ တဲး ဂွန် အန် တီ စိူဝ် မာဆေ။ 63 အာဆာခါရာ ဝီ မှာန့် ဇေ ဒီ ဂေ၊ ဝီ ဒဲမ်၊ “အန် စိူဝ် အာယောဟာန်၊” ဟဲ့ ဟွတ့် ပန် တီ ဂေ အီ ဟဝ် မိူဝ် အာမ် ကာဆဝ် လွင် အန် တီ။ 64 ဝါယ် အန် တီ အာဆာခါရာ ဘော ဝီ ပွိုန် ကာလာင် ဂြုဝ်း အူ ဇေန့်။ ဂေ ဘော စုး ဒီ အိူပ် ဇဝ်ဖြာ။ 65 ကူပ် န့ ပါယ် တီ၊ ဂေ အီ ဟဝ် ကော ဝီ ယုဝ် ကာဆဝ်။ လွင် အန် တီ၊ န့ ဘော ဘြဲ ဟာဝ် ဒွန် ပ့လုဝ့်၊ တဲး ဒူအီ ခဲင် မိူင် ဒွန် မိူင် အီ ကွယ် ဒဲင် နွန် အိူင် ယူဒါ ပွိုန် ဒီ ထူမ်။ 66 ခုဝ်၊ ဂေ အီ ထူမ် လွင် အန် တီ၊ ဂေ ဇေန့်ဇာ ခဲင် နဝ်း ဂေ။ ဂေ ဝီ လာယ် ကာမွုန် လွင် အန် တီ။ ဂေ တဝ်း၊ “ဂွန် အာင တီ၊ အန် ဒီ ဘော ဘဲန် ဒါ တာင် နာ အာတ့် ဟာဝ်။” ဂေ မိူဝ် ဟဲ့ နပ်၊ ပွုန် ဇဝ်ဖြာ ဟဲ့ ကွယ် ရိုမ် ဒူပ် အန်။

လွင် အာဆာခါရာ ဝီ ကာလာင် အီ ဒီ ပါယ် နာ အာတ့်

67 ဒေါ အန် တီ နဝ်း ဖွိုမ် ဇဝ်ဖြာ ဟဲ့ နုဝ့် ခဲင် နဝ်း အာဆာခါရာ အီ မုး ဂုန့် ဂွန် အာင တွိုန်။ အန် နပ် ဒီ ကာလာင် လွင် အီ ဒီ ဘဲန် ဒီ ဂွန် အာင အာခြာဝ် အီ ဒီ တး နာ အာတ့်။ အန် တဝ်း၊

68 “တဲး အေ အိူပ် ဇဝ်ဖြာ ပီ ကြိုပ် အေ ဒူအီ အီဆာရေလ။ အန် ဇဝ် ဟဲ့ တး စွယ် ဒူအီ အာမျုဝ် အန်၊ တဲး အန် ချွတ် အေ၊ တဲး အေ လေး ခဲင် မှာပ်။

69 ဒေါ မွိုန် အာဒါဝိတ် ဟဲ့ ဘဲန် ဒဲစေန့် ဇဝ်ဖြာ။ ဒေါ တီ နီ အန် ဇဝ် ဟဲ့ တိုယ် အန် ဇဝ် အီ မိုဝ်း ပွုန် တာင် အီ မုး လှုက်လှာန် အာဒါဝိတ် တီ၊ တဲး အန် တး ချွတ် အေ။

70 (အန် ဟဲ့ ဒွါ ဂြုဝ်း အန် ဒီ ဂေ ဒူအီ ဘွတ် အီ ဘျာန် ဂြုဝ်း ဇဝ်ဖြာ ဒေါ မွိုန်၊ တဲး ဂေ ဝီ ကာလာင် ဒီ အေ။)

71 အန် ဟဲ့ ကာဆဲန့် ဒီ ဂုန့် ဒင် အေ၊ အန် ဒီ ချွတ် အေ လေး တ ရန်ဆူ အေ။ ဂေ ဒူအီ အီ တူ အိုင် အေ၊ အန် တူ တဲး ဂေ မိုဝ်း ပွုန်၊ တူ တဲး ဂေ အိုပ် အေ။

72 အန် ဟဲ့ ဘူင် ပါယ် တီ၊ တဲး အန် ကာဝေ အေ၊ တဲး အန် ဘော လှုဝ်း ဆေဆေ ကာဒိက် ဆတ်ဇာ ပီ ဒွါ အန် ဒီ ဒူအီ။

73 န့ မုး ကာဒိက် ဆတ်ဇာ ပီ ဒွါ အန် ဒီ အာဘြာဟမ် တွိုန်၊ အီ ကွယ် ခါ အာတ့်။

74 အန် ဟဲ့ ကာလာင် ဒီ တဲး အေ လေး ခဲင် ရန်ဆူ အေ၊ တဲး အေ ကြိုပ် အန် ဇဝ်၊ ကွဲ့ တဲး အေ ယုဝ် အီ ဟဝ်။

75 အန် ဆီ တဲး အေ ဘဲန် ဒူအီ ဘွတ် ဒူအီ မွှိုမ် ဆေဆေ။” ခဲ့ တီ အာဆာခါရာ ဟဲ့ အိူပ် ဇဝ်ဖြာ။

76 ဟဲ့ ဟွတ့်၊ အန် ဝီ ကာလာင် ဒီ ဂွန် အန်။ အန် တဝ်း၊ “ဂေ ဒူအီ ဒီ တဝ်း၊ မဲ မုး ဒူအီ အီ ဘျာန် ဂြုဝ်း ဇဝ်ဖြာ အီ တာင် လွှိုမ် တူတ့်။ မဲ ဒီ ဟာဝ် ဒီ အာတ့် အန် ဇဝ်၊ တဲး မဲ မ့ပြာယ် န့တေန့် အာတ့် တး အန် ဇဝ်။

77 မဲ ဒီ တဲး ဂေ ဒူအီ နပ်၊ မှဝ် ဂေ ဒီ ပါယ် ဒီ လေး ခဲင် မှာပ် ပီ ဘူင် ဂေ ပန် ဒီ ဂဝ်း ဝဲန် ဇဝ်ဖြာ မှာပ် ဂေ။

78 ဇဝ်ဖြာ ပီ ကြိုပ် အေ၊ အန် မိုဝ်း နဝ်း ကာဝေ အေ ဒူအီ။ အန် ဟဲ့ ဒွါ ဘ့လာင် အန် ဒီ အေ၊ တဲး န့ ပီ ဆီငဲ ဟဲ့ ထွင် ဒီ အေ။

79 အေ ဒူအီ ကွယ် ခဲင် အပ် ဝွင့်၊ အီ မုး ဒူင် ဒီ ယမ် ဒူအီ။ ဘ့လာင် တီ ဒီ တး ဂါင်ဟြာဝ်၊ တဲး န့ ဘ့လာင် ဒီ အေ။ န့ ဒီ ဝီ တိုယ် တဲး အေ ဒူပ် န့တေန့် အီ တဲး အေ မိုဝ်း နဝ်း ဂျီတ်။” အာဆာခါရာ ဟဲ့ ကာလာင် ပါယ် တီ။

80 ဂွန် အာင တွိုန် ဘော ကြဲ ဒီ တာင်၊ ကြဲ ဒီ မိုဝ်း ပွုန် ဇဝ်ဖြာ ခဲင် နဝ်း အန်။ အန် ကွယ် ခဲင် ပြဲ ကာဟဝ်း၊ တဲး န့ ကော ဇမ် အာခြာဝ် ဒီ စုး အန် ဒီ ဟုဝ် ဒါရာ ဇဝ်ဖြာ ဒီ ဂေ ဒူအီ အီဆာရေလ။