လွင် ဇဝ် ယေဆူ ဟဲ့ ဂွိုတ်
2
1 ဒေါ အန် တီ ခုန်ဒီခမ် အာကဲဆာ အောကူထူ ဒွါ အာမိင် ဒီ ဒူအီ ဒွန် အီ ခဲင် မိူင် ပီ အိုပ် အန်၊ တဲး ဂေ ဟပ် စိူဝ် ဂေ ခဲင် ဇာရာင်။ 2 ပီ လုဝ် ဘူင် ဂေ ဇိုဝ် တီ မုး ဒေါ ဂုဝ် ဒင် အန် ဒေါ မုး အာခူရေနေ ဒါ တာင် အီ အိုပ် မိူင် ဆူရီ။ 3 ဂေ ဒူအီ ဘောကာဂ့လျီတ် မိူဝ် ဟာဝ် ဟပ် ဇာရာင် ဂေ ခဲင် မိူင် ဘြိမ် ဂေ။4 ဒေါ အန် တီ ဘော အာယုဝ်ဆဲပ် လေး ခဲင် မိူင် နာဆာရေတ့် အီ ကွယ် ခဲင် အိူင် ဂါလီလေ ဝီ ဟာဝ် မိူင် ဘေတ်လဲမ် အီ ကွယ် ခဲင် အိူင် ယူဒါ။ မိူင် ဘေတ်လဲမ် တွိုန် မုး မိူင် ဘြိမ် ခုန်ဒီခမ် အာဒါဝိတ်။ အာယုဝ်ဆဲပ် လုဝ် ဟာဝ် ဒီ မိူင် ဘေတ်လဲမ် ကူပ် မုး အန် ခြိုဝ် ခုန်ဒီခမ် အာဒါဝိတ်။ 5 အန် မိူဝ် ဒိုဝ်း ဟာဝ် ဘော နာင် မာရီ အီ ဟဲ့ လာယ် ဘဲန် ပါဝ် ဒီ အန်။ နာင် မာရီ ယီ ဟဲ့ ဟွတ့် ဒဲ ဘာဒိက် ဆန်ထေ။ 6 ဒေါ ကွယ် အန် ဒီ မိူင် ဘေတ်လဲမ် တီ၊ ဟဲ့ ဇမ် အာခါန် ဒီ ဂွိုတ် ဂွန် အန်။ 7 အန် ဘော မိုဝ်း ဂွန် အီမာယ်၊ အီ မုး ဂွန် ဂိန့် အန်။ အန် ဘော ကာဘန် ဂွန် အန် ခဲင် ဒူန့် န့စမ်၊ ဝီ ဘ့လေး ခဲင် ကာလဲ့ ဟူမ် မက်၊ ကူပ် တူ မိုဝ်း ဒူင် ဒီ ပွိုန် တမ် ခဲင် ဇေရူပ် ဒူင် ကွယ် ဂေ တွိုန်။
လွင် ဒါ အီ ဟျီင် မာဘူ ဘော လွင် အာမူ အာမာတ် ဇဝ်ဖြာ
8 နာ ရေတ့် မိူင် ဘေတ်လဲမ် တွိုန်၊ န့ ယီ မိုဝ်း ဂေ ဒါ အီ ဟျီင် မာဘူ အီ ကွယ် ခဲင် မာန်။ ဂေ ဘော ကွယ် ဘ်ု မာဘူ ဂေ ခဲင် မှိုဝ်။ 9 ဒေါ အန် တီ ဂေ ဘော ယိုဝ် အာမူ အာမာတ် ဇဝ်ဖြာ အူ ကာဒင် တး ကာပ့လုး ဒီ ဂေ။ အာရူင် ဘ့လာင် ဇဝ်ဖြာ မိူဝ် ဟဲ့ တး ရူပ် ဂေ။ ခုဝ်၊ ဂေ မိူဝ် ယုဝ် ကာဆဝ်။ 10 အာမူ အာမာတ် ဇဝ်ဖြာ တွိုန် တဝ်း၊ “ကွဲ့ ယုဝ်၊ အုဝ် ဟဲ့ တး ကာလာင် နာ မွှိုမ် ဒီ ဘေ။ န့ ဒီ တဲး ဘေ ဘောကာဂ့လျီတ် မိုဝ်း နဝ်း ဒါခိုယ်။ 11 ခဲင် မှိုဝ် နီ၊ အီ ဒီ ဂဝ်း ဝဲန် မှာပ် ပီ ဘူင် ဘေ ဒွန် အီ ဟဲ့ ဟွတ့် ဂွိုတ် ခဲင် မိူင် အာဒါဝိတ်။ အန် မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ အန် ဘော မုး အန် ဇဝ် အီ အိုပ် တူတ့်။ 12 ဘေ ဒီ ယိုဝ် ဂွန် အာင၊ အီ ဟဲ့ ကာဘန် ဒူန့် န့စမ် ဒီ အန်၊ အိတ် ခဲင် ကာလဲ့ ဟူမ် မက်။ အာတီ ဟဲ့ မုး လက်ဆာနာ တဲး ဘေ နပ်၊ ဟဲ့ မှာန် ပီ တဝ်း အုဝ် ဒီ ဘေ။”
13 အာမူ အာမာတ် ဇဝ်ဖြာ တွိုန် ဟဲ့ ဟွတ့် တဝ်း ပါယ် တီ၊ အူ ဇေန့် န့ မိုဝ်း အာမူ အာမာတ် ဇဝ်ဖြာ ဘော ဖိုင် ဝီ တး ကာပ့လုး ဒီ အာတ့် ဂေ။ အာမူ အာမာတ် ဇဝ်ဖြာ တီ ဘော ပါက် မှုဝ် ဒါခိုယ် ဘော အိူပ် ဇဝ်ဖြာ။ ဂေ ဘော တဝ်း၊
14 “ဇဝ်ဖြာ အီ ကွယ် ဂါင်ဟြာဝ် မိုဝ်း အာဖုင် ဒင် ခုဝ် အီ တာင် လွှိုမ် တူတ့်။ ဘော ဂေ ဒူအီ ဒဲင် ကာဒါယ်၊ တဲး ဂေ ဘောကာဂ့လျီတ် မိုဝ်း နဝ်း ဂျီတ်။ ဇဝ်ဖြာ ဟဲ့ လှုဝ်း ကာဝေ ဂေ။”
15 ဟဲ့ ဟွတ့် ပန် တီ ဂေ အာမူ အာမာတ် ဇဝ်ဖြာ ဝီ ဟုဝ့် ခဲင် မိူင် ဂါင်ဟြာဝ်။ ဂေ ဒူအီ ဟျီင် မာဘူ ယီ လာယ် ဆင်ချာင်။ ဂေ တဝ်း၊ “တဲး အေ ဟာဝ် မိူင် ဘေတ်လဲမ် တွိုန်၊ တဲး အေ ဟာဝ် ယွတ် ပီ ကာလာင် ဇဝ်ဖြာ ဒီ အေ တီ ဒွန် မျုဝ်။”
16 ဂေ ဟဲ့ ဟွတ့် တဝ်း ပါယ် တီ၊ ဂေ ဘော ဟာဝ် အူ ဇေန့်၊ ဟာ ဇမ် ဒူင် ကွယ် နာင် မာရီ ဂါယ် အာယုဝ်ဆဲပ်။ ဂေ ယိုဝ် ဘော ဂွန် အာင။ အန် အိတ် ခဲင် ကာလဲ့ ဟူမ် မက်။ 17 ဂေ ဒူအီ ဟျီင် မာဘူ၊ ဂေ ဟဲ့ ဟွတ့် ယိုဝ် တူတ့်၊ ဂေ ဝီ ကာလာင် တူတ့် ပဲ့ ဟဲ့ ယိုဝ် ဂေ ဒီ အီ ဟဝ်၊ တဲး ဘော အီ ဟဝ် နပ် လွင် အန် တီ။ 18 ဂေ အီ ဟဝ် ဟဲ့ ဟွတ့် ထူမ် ဂြုဝ်း ပီ ကာလာင် ဂေ ဒူအီ အီ ဟျီင် မာဘူ၊ ဂေ ဘော အာမ် ကာဆဝ်။ 19 နာင် မာရီ ယီ ဝီ နုဝ် အုန် တူတ့် ခဲင် နဝ်း အန်၊ ဝီ ဇေန့်ဇာ လွင် အန် တီ ဒွန် မျုဝ်။ 20 ဂေ ဒူအီ ဟျီင် မာဘူ တွိုန် ဘော ဝေန့်။ ဂေ အိူပ် ဇဝ်ဖြာ ဘော ဒါင် ဂုင် ဂေဇူ ဒီ ဇဝ်ဖြာ လွင် ဒွန် မျုဝ် ပဲ့ ဟဲ့ ယိုဝ် ပဲ့ ဟဲ့ ထူမ် ဂေ။ န့ ဟဲ့ ဘဲန် တူတ့် ပီ ပီ ဒွိုမ် ကာလာင် အာမူ အာမာတ် ဇဝ်ဖြာ ဒီ ဂေ။
လွင် ဂုန့် မာ ဇဝ် ယေဆူ တိုယ် ဇဝ် ယေဆူ ခဲင် ဟုဝ် ဇဝ်ဖြာ
21 ဂွန် အာင တွိုန်၊ ဒေါ နုဝ့် အာဆာက် အန် ဒါ ဆီငဲ၊ ဟဲ့ ဇမ် အာခြာဝ် ဒီ လုဝ် ဆွာ့ ဝဲန် ဟုန် လခါနာ အန်။ ဒေါ အန် တီ ဂေ ဒါင် စိူဝ် အန်၊ တဝ်း အာယေဆူ။ န့ မုး စိူဝ် ပီ ဒွိုမ် တဝ်း အာမူ အာမာတ် ဇဝ်ဖြာ ဒီ မာ အန် အာတ့် ဒဲ အန် ဘာဒိက် ဆန်ထေ။
22 ဝါယ် အန် တီ ဟဲ့ ဇမ် အာခြာဝ် အန်၊ အာယုဝ်ဆဲပ် ဂါယ် နာင် မာရီ ဝီ ဒူပ် ဟိတ် ဂေ၊ ဘူင် တဲး နာင် မာရီ ဝီ ဆီငါ၊ တဲး န့ ဒူပ် ဒါရာ ပီ ဒမ် အုန် အာမုဝ်ဆဲ ဒီ ဂေ။ ဂါယ် ဘော ဒိုဝ်း ဟာဝ် ဂွန် အာင တီ ဒီ မိူင် ယေရူဆာလဲမ်၊ လှူ ဒီ ဇဝ်ဖြာ။ 23 ဒါရာ ဇဝ်ဖြာ တဝ်း၊ “ဂွန် အီမာယ် အီ မုး ဂွန် ဂိန့် ဒွန် အီ လုဝ် လှူ ဒီ ဇဝ်ဖြာ။” 24 ဂါယ် ဘော ဘူင် ပီ စ်ု ဒါရာ ဇဝ်ဖြာ။ န့ ဘော တဝ်း၊ “လုဝ် လှူ မာဘ့လူယ် ပြဲ အူ ဂူ။ ဆေ အာဝ် မိုဝ်း၊ လုဝ် လှူ မာဘ့လူယ် ဒီတဲတ် အာ ဒုဝ်။”
25 န့ ယီ မိုဝ်း ဒူအီ အူ ဝီ အီ ကွယ် ခဲင် မိူင် ယေရူဆာလဲမ်။ အန် စိူဝ် အာဆီမေအူန်။ အန် မုး ဒူအီ မွှိုမ်၊ အီ ရုဝ်ဆေ ဇဝ်ဖြာ။ အန် မိူဝ် နှဝ့် န့ဒဝ့်၊ ဘ်ု ဒီ ယွတ် ပန် မှဝ် ဇဝ်ဖြာ ဒီ တး စွယ် ဂေ ဒူအီ အီဆာရေလ။ နဝ်း ဖွိုမ် ဇဝ်ဖြာ မိူဝ် ကွယ် ရိုမ် ဒူပ် အန်။ 26 နဝ်း ဖွိုမ် ဇဝ်ဖြာ တွိုန် ဟဲ့ တဲး အန် နပ်၊ အာတ့် ယမ် အန်၊ အန် ဒီ ပွိုန် ဒီ ယိုဝ် အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ 27 နဝ်း ဖွိုမ် ဇဝ်ဖြာ ဟဲ့ ကာလာင် ဒီ အာဆီမေအူန် တဲး အန် ဟာဝ် လိုပ် ခဲင် ဟုဝ် ဇဝ်ဖြာ။ ဒေါ အန် တီ ဘော နာင် မာရီ ဂါယ် အာယုဝ်ဆဲပ် ဟဲ့ ငျီ့ ဘော ဂွန် ဂါယ် တး လိုပ် ခဲင် ဟုဝ် ဇဝ်ဖြာ၊ တဲး ဂါယ် ဘူင် ပီ ဒမ် ဒါရာ ဇဝ်ဖြာ ဂေ ဘူင်။ 28 အာဆီမေအူန် တွိုန် ဒိုဝ်း ငျီ့ ဂွန် အာင တွိုန်၊ ဒါင် ဂုင် ဂေဇူ ဒီ ဇဝ်ဖြာ။ အန် တဝ်း၊
29 “ဒေါ တီ နီ၊ မဲ ဇဝ်ဖြာ ဟဲ့ ဘူင် ပီ ဒွါ မဲ ကာဒိက် ဆတ်ဇာ ဒီ အုဝ်၊ တဲး အုဝ် ဟာဝ် ဒါခိုယ် ဒူင် ကွယ် မဲ၊ တဲး အီ မုး ဒဲစေန့် မဲ ဘျုဝ် ဒီ ယမ်။
30 ခုဝ်၊ အုဝ် ဟဲ့ ဟွတ့် ပွိုန် ယိုဝ် ဒီ ငါယ် အုဝ် ဒူအီ ပီ တိုယ် မဲ၊ တဲး အန် ချွတ် ဒူအီ။
31 အာတီ မဲ ဟဲ့ ဘူင် တဲး န့ ဘဲန် အာဂျိုဝ် အာဒါ ဒူအီ ဒွန် မျုဝ် ဒဲင် ကာဒါယ်။
32 ပီ ဘူင် မဲ တီ၊ န့ ပီ ဘ့လာင် ဒီ တဲး ဂေ ဒူအီ အာမျုဝ် ဟဝ် ယိုဝ် န့တေန့် ပီ မ့ပြာယ် မဲ။ န့ ဘော တဲး အာဖုင် ဒင်ခုဝ် ဒီ ဂေ ဒူအီ အီဆာရေလ အီ မုး ဒူအီ ပီ ရဝ်း မဲ။”
33 ဒေါ တဝ်း အာဆီမေအူန် ပါယ် တီ၊ ဂုန့် မာ ဂွန် အာင မိူဝ် အာမ် ဂြုဝ်း ပီ ကာလာင် အာဆီမေအူန် တီ။ 34 အာဆီမေအူန် ဟဲ့ ဟွတ့် မွင့်ကာရာ တဲး ဒီ ဂေ၊ အန် ဘော ကာလာင် ဒီ နာင် မာရီ၊ အီ မုး မာ ဂွန် တီ။ အန် တဝ်း၊ “ဂွန် အာင နီ၊ အန် မုး ဒူအီ ပီ ရဝ်း ဇဝ်ဖြာ။ အန် ဒီ တဲး ဂေ ဒူအီ အီဆာရေလ စှိုမ် အာဆာက် ဂေ ဘဲန် ဝီ ဘဲန် ဝီ။ အန် ပီ ဒီ ဝီ ချွတ် ဂေ ဘဲန် ဝီ ဘဲန် ဝီ။ ဂေ အီ ဟဝ် ဒီ ဝီ ကာခဲန့် ဒီ အန်။ 35 ပီ ဒီ ဘူင် ဂေ တီ၊ န့ ဒီ တဲး အီ ဟဝ် နပ် လွင် နဝ်း ဒူအီ။ မဲ ယီ ဒီ လုဝ် ခမ် တဲး န့ ပီ ဒူအီ ဒီ ဆတ် မာ ပွါ့ လာင် လမ် ခဲင် နဝ်း မဲ။”
36 အာဆီမေအူန် ဟဲ့ ဟွတ့် ကာလာင် ပါယ် တီ၊ န့ ဘော မိုဝ်း အီဘိုန့် အူ ဝီ အီ ဘျာန် ဂြုဝ်း ဇဝ်ဖြာ။ အန် စိူဝ် နာင် ဟာနာ။ အန် မုး ဂွန် အာဖာနူအေန်၊ အီ မုး ခြိုဝ် အာဆေန်။ အန် ဟဲ့ ဟွတ့် ကတ်။ 37 အန် ဟဲ့ ကွယ် ရိုမ် ဒူပ် အီမာယ် အန် အာဒါ ဘူ ဆီနမ် ဝါယ် ခတ် အန်။ ဟဲ့ ဟွတ့်၊ အန် ဝီ ဘဲန် ယာ ဆီပြး တဲး အာဆာက် အန် ကော နုဝ့် ဒါ ဂိုဝ် ဒီ ဖွုန် ဆီနမ်။ အန် မိူဝ် တူ လေး ခဲင် ဟုဝ် ဇဝ်ဖြာ ဒေါ မှဝ်။ အန် ဘော ယိူန် ပီ ဒီ ဟူမ် ဘော ဆာခိုဝ် ဇဝ်ဖြာ ဒွင် ဝန် ဒွင် ခိူန်။ 38 ဒေါ အန် တီ နာင် ဟာနာ တွိုန်၊ အန် ဘော တး ဇမ် ဒူင် ကွယ် အာဆီမေအူန် တွိုန်။ အန် မိူဝ် ကာလာင် ဂုင် ဂေဇူ ဒီ ဇဝ်ဖြာ။ အန် ဘော ကာလာင် လွင် ဂွန် အာင တီ ဒီ ဂေ ဒူအီ အီ နှဝ့် န့ဒဝ့် အန် ဇဝ် အီ ဒီ တး ချွတ် ဂေ ခဲင် မိူင် ယေရူဆာလဲမ်။
39 အာယုဝ်ဆဲပ် ဂါယ် နာင် မာရီ ဟဲ့ ဟွတ့် ဘူင် ဒွန် မျုဝ် ပီ ဒမ် ဒါရာ ဇဝ်ဖြာ၊ ဘော ဂါယ် ဘော အာယေဆူ ဝီ ဝေန့် ဒီ ကာင် ဂေ ခဲင် မိူင် နာဆာရေတ့် ခဲင် အိူင် ဂါလီလေ။ 40 ဂွန် တွိုန် ကြဲ ဒီ တာင်၊ ကြဲ ဒီ မိုဝ်း ပ့လူမ်။ အန် မိူဝ် ဘဲန် ဒူအီ အီ မိုဝ်း အာငျာန် မွှိုမ်၊ အာငျာန် ဘွတ်။ ဇဝ်ဖြာ ဘော ဂေဇူ အန်။
လွင် ဇဝ် ယေဆူ ကွယ် ခဲင် ဟုဝ် ဇဝ်ဖြာ
41 ဒွန် ဆီနမ်၊ ဒေါ မိုဝ်း ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ၊ ဂုန့် မာ ဇဝ် ယေဆူ ဘော ဟုဝ့် ဒီ မိူင် ယေရူဆာလဲမ်။ 42 ဒေါ နုဝ့် အာဆာက် ဇဝ် ယေဆူ ဂိုဝ် ဒီ အာ ဆီနမ်၊ ဂုန့် မာ အန် ဝီ ဟာဝ် လိုပ် ဘ့လွယ် ဒူပ် ဟိတ် ဂေ။ ဒေါ အန် တီ ဇဝ် ယေဆူ မိူဝ် ဟာဝ် ရိုမ် ဒူပ် ဂါယ်။ 43 ဘ့လွယ် တီ ဟဲ့ ဟွတ့်၊ ဂုန့် မာ အန် ဝီ ဝိဝ် ဒူပ် န့တေန့် ဘြိမ်၊ ဝေန့် မိူင် ဂေ။ ဇဝ် ယေဆူ ယီ တူ ဝိဝ် ဒူပ် ဂါယ်။ အန် ကွယ် ဒီ ပန် ခဲင် မိူင် ယေရူဆာလဲမ်။ 44 ဂုန့် မာ အန် ယီ တူ နပ် လွင် အန် တီ။ ဂါယ် ထာင် အန် ဟဲ့ ဝိဝ် ရိုမ် ဒူပ် ဂိုက် အန်။ ဂါယ် ဟဲ့ ဟွတ့် ဟာဝ် ဒူပ် န့တေန့် အာဒါ အူ ဆီငဲ၊ ဂါယ် ဝီ ဟြေတ့် အန် ခဲင် ဖိုင် ဝေါဝဲ ဂေ ဘော ဂိုက် ဂေ။ 45 ဂါယ် ယီ တူ ယိုဝ် အန်။ ခုဝ်၊ ဂါယ် ဝီ ဟာဝ် ဟြေတ့် အန် ခဲင် မိူင် ယေရူဆာလဲမ် ပေါ အူ ဇေန့်။ 46 ဂါယ် ဟဲ့ ဟြေတ့် အန် အာဒါ အူယ် ဆီငဲ၊ ဂါယ် ဝီ ယိုဝ် အန် ကွယ် ခဲင် ဟုဝ် ဇဝ်ဖြာ။ အန် ကွယ် ရိုမ် ကာလာင် ဂြုဝ်း ဒူပ် ဂေ ဒါ ဆာရာ အီ မာနုဝ် ဒါရာ ဇဝ်ဖြာ။ အန် ဘော ဒီမွှတ် ဂေ ဘဲန် မျုဝ် ဘဲန် မျုဝ် ဘော ထူမ် ပီ တဝ်း ဂေ။ 47 ဂေ အီ ထူမ် လွင် အန် တီ၊ ဂေ အာမ် ကာဆဝ် ဂွန် တီ၊ ပီ ပါယ် အန် ဒီ ဝီ ဝျီ့ ဂြုဝ်း ဂေ ဒါ တာင်၊ ဘော ခဲ့ ဘွတ် အာငျာန် အန်။ 48 ဂုန့် မာ အန် ဟဲ့ ဝီ ယိုဝ် အန်၊ ဂါယ် ဘော အာမ် အန်။ မာ အန် တဝ်း ဒီ အန်၊ “အိုယ် ဂွန် အုဝ်၊ မှဝ် န့ ပါယ် ပီ ဘူင် မဲ ပါယ် တီ ဒီ ယာယ်။း နဝ်း ယာယ် ဟဲ့ မှဲ ကာဆဝ်။ ယာယ် ဂုန့် မဲ ဟဲ့ ဝိန် ဒီ ဟြေတ့် မဲ ဒွန် နာ ဒွန် ပ့လုဝ့်။”
49 အန် ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း ဒီ မာ အန်၊ “မှဝ် န့ ပါယ် ပီ ဟြေတ့် မဲ ဒီ အုဝ်။း မဲ တူ နပ်၊ အုဝ် လုဝ် ကွယ် ခဲင် ကာင် ဂုန့် အုဝ်။း” 50 ဂုန့် မာ အန် ယီ တူ နပ် ဆီဖဝ် ဂြုဝ်း ပီ ကာလာင် အန် တီ။