မ်က် 16

လွင် ဇဝ် ယေဆူ ဝီ ယိတ့် ဝီ အိမ်

1 ဆီငဲ ဒီလှဝ် ဟဲ့ ဟွတ့် ပွုန်၊ နာင် မာရီ အီ တး မိူင် မာက်ဒါလာ ဘော နာင် မာရီ အီ မုး မာ အာယာကူပ် ဘော နာင် ဆာလုဝ်မေ၊ ဂေ ဟာဝ် စိုဝ်း ဆီနမ် အုး ငှုန်၊ တဲး ဂေ ပွိုန် ဒီ ဟာဝ် ဖဝ်း ဒီ ဒုဝ် ဘူင့် ဇဝ် ယေဆူ။ 2 ဘော ဇမ် ဆီငဲ ဝါယ် ဆီငဲ ဒီလှဝ်၊ ဂေ ဟဲ့ စေဝ် ယိတ့်၊ ဟာဝ် ဒူင် ကွယ် ကာဒဝ် ဘာရေဝ်။ 3 ဒေါ ဟာဝ် ဂေ၊ ဂေ ဝီ လာယ် ကာလာင် တဝ်း၊ “အာဆေ ဒီ ဇုန် ဝဲန် မာဝ် တာင် အီ ကွယ် ဒီ အာတ့် မာလုဝ်း ကာဒဝ် ဘာရေဝ်။း”

4 ဂေ ဘော ယွတ် ဟာဝ် ဒီ ကာဒဝ် ဘာရေဝ်၊ ဂေ ဘော ယိုဝ် မာဝ် တာင် တွိုန် ဟဲ့ ဝီ ကွယ် ဒီ ခူပ် မာလုဝ်း။ 5 ဂေ ဘော လိုပ် ခဲင် ကာဒဝ် ဘာရေဝ်၊ ဂေ ဝီ ယိုဝ် ကာညူမ် အီ ဟဲ့ စှိုပ် ခြိုင် လုယ်။ အန် ကွယ် ဘ့လာက် အာအး။ ဂေ ဝီ ကာစွာ အန်။

6 ဒူအီ တီ တဝ်း၊ “ကွဲ့ ကာစွာ၊ အာယေဆူ အီ တး မိူင် နာဆာရေတ့် ပီ တး ဟြေတ့် ဘေ တီ၊ အန် ဟဲ့ ယမ် ဒဲင် ရွင့် ကာဝဲ့။ အန် ဟဲ့ ဝီ ယိတ့် ဝီ အိမ်။ အန် တူ ကွယ် ဒီ နီ။ တဲး ဘေ ယွတ် ဒူင် ပီ ဒွိုမ် ဘ့လေး အုန် ဂေ ဒုဝ် ဘူင့် အန်။ 7 ဘေ ယီ လုဝ် ဟာဝ်၊ ကာလာင် ဒီ ဒီဘဲ အန်၊ တဲး ဘော အာပေတာရူ နပ်။ ဘေ လုဝ် တဝ်း၊ ‘ဇဝ် ယေဆူ ဒီ ယဲတ့် ဒီ အာတ့် ဘေ ခဲင် အိူင် ဂါလီလေ။ ဆေ ဘေ ဟာဝ် ဒီ အိူင် ဂါလီလေ၊ ဘေ ဒီ ဘော ယိုဝ် အန်၊ တဲး န့ ပီ ပီ ဒွိုမ် ကာလာင် အန် ဒီ ဘေ။’”

8 ပန် တီ အီဘိုန့် ဂေ တီ မိူဝ် ဒီယုး ဒီယေန့်၊ ဝီ လေး တဝ် ခဲင် ကာဒဝ် ဘာရေဝ်။ ဂေ ယီ တူ တဝ်း မာဆေ ဒီ အီ ဟဝ်။ ခုဝ်၊ ဂေ ယုဝ် ကာဆဝ်။

9 ဒေါ ဇမ် ဆီငဲ ဝါယ် ဆီငဲ ဒီလှဝ်၊ ဇဝ် ယေဆူ ဟဲ့ ဝီ ယိတ့် ဝီ အိမ်။ ဝါယ် အန် တီ အူ ဆိန့် ဒေါ ဂုဝ် အန်၊ အန် ကာပ့လုး ဒီ နာင် မာရီ အီ တး မိူင် မာက်ဒါလာ။ ဇဝ် ယေဆူ ဟဲ့ ဒွိုမ် ဆုတ့် ကာနမ် ဘူ ဒုဝ် လေး ခဲင် ဒုဝ် အန်။ 10 နာင် မာရီ တီ ဟဲ့ ဟွတ့် ယိုဝ် ဇဝ် ယေဆူ၊ အန် ဝီ လေး ဒူင် ကွယ် အန်၊ ဝီ ဟာဝ် ကာလာင် ဒီ ဒူအီ ဟဝ်၊ အီ ဟဲ့ ဒွိုမ် ဒူပ် ဇဝ် ယေဆူ။ ဂေ ဟဲ့ က့လိုဝ် ဘော ယာမ်။ 11 ဂေ ဟဲ့ ဟွတ့် ယိုဝ် လွင် ဇဝ် ယေဆူ ဟဲ့ ဝီ ယိတ့် ဝီ အိမ်၊ ဂေ ဟဲ့ နပ် ဘော လွင် နာင် မာရီ ဟဲ့ ယိုဝ် အန်၊ ဂေ ယီ တူ ညှိုမ် ဂြုဝ်း နာင် မာရီ တီ။

12 ဝါယ် အန် တီ ဇဝ် ယေဆူ ဝီ ကာပ့လုး ဒီ ဒီဘဲ အာ ဝီ ဒေါ ဟာဝ် ဂါယ် ဒူပ် န့တေန့် နာ ရေတ့် မိူင်။ အာရိုပ် အန် ယီ တူ ပီ ဘြိမ်။ 13 ဂါယ် အာ ဝီ ဟဲ့ ဟွတ့် ယိုဝ် အန်၊ ဂါယ် ဝီ ဝေန့် အူ ဇေန့် ကာလာင် ဒီ ဂေ အီ ကွယ် နာ ပန်။ ဘော ဂြုဝ်း ဂါယ် အာ ဝီ တီ၊ ဂေ တူ ညှိုမ်။

14 ဟဲ့ ဟွတ့် ပန် တီ ဇဝ် ယေဆူ ဝီ ကာပ့လုး ဒီ ဒီဘဲ အန် ဂိုဝ် ဒီ အူ ဝီ တွိုန်။ အန် ဝီ အေး ဂေ ကူပ် တူ ညှိုမ် ဂေ၊ ကူပ် တဝ်း ဂေ၊ ဂြုဝ်း ဒူအီ ဟဝ် အီ ဟဲ့ ယိုဝ် အန်၊ န့ တူ မှာန်။

15 အန် ဝီ တဝ်း ဒီ ဂေ၊ “ဘေ လုဝ် ဟာဝ် ဒွန် နာ ဒွန် ပ့လုဝ့် ဒဲင် ကာဒါယ်။ ဘေ လုဝ် ကာလာင် ဂြုဝ်း တဲး နဝ်း ဒူအီ ဒါခိုယ်၊ တဲး ဒွန် အီ နပ် ဒီ ထူမ်။ 16 အာဆေ ညှိုမ် ဂြုဝ်း တီ ဘော ခမ် ဒီ စိုပ် ခဲင် အိုမ်၊ ဇဝ်ဖြာ ဒီ ချွတ် ဂေ ဒွန် အီ။ ဂေ အီ တူ ညှိုမ်၊ ဂေ ယီ လုဝ် ခမ် မှာပ် ဂေ။ 17 ဂေ အီ ညှိုမ် အုဝ်၊ ဂေ ဒီ ပွိုန် ဒီ ဘျ ပွုန် အုဝ်။ ဂေ ဒီ ဒိုဝ်း ပွုန် အုဝ် ဝီ ဆုတ့် ကာနမ် လေး ခဲင် ဒုဝ် ဘူင့် ဒူအီ။ ဂေ ဒီ ကာလာင် ဂြုဝ်း ပီ တူ ဒွိုမ် နပ် ဂေ။ 18 ဆေ ဂေ ဘော တာ ပါ မာဟန့် ဘော တာ ဒျီင် ဆီနမ် ကာပူ၊ န့ တူ ပါယ် မှဝ် ဒီ ဂေ။ ဂေ ဒီ ဘော ဒါင် ဒဲ ဂေ ဒဲင် ဒုဝ် ဒူအီ ဆဝ်၊ တဲး ဂေ ဝီ ကဲန်။”

19 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ ဒီ ဂေ ဒီဘဲ အန်၊ အန် ဝီ ဟုဝ့် ဂါင်ဟြာဝ်၊ ဝီ ကွယ် ဘ့လာက် အာအး ဇဝ်ဖြာ။ 20 ဝါယ် အန် တီ ဂေ ဒီဘဲ ဇဝ် ယေဆူ ဝီ ဟာဝ် ကာလာင် ဒွန် နာ ဒွန် ပ့လုဝ့် လွင် ဇဝ် ယေဆူ။ ဇဝ်ဖြာ မိူဝ် ကွယ် ရိုမ် ဒူပ် ဂေ၊ ဝီ တဲး ဂေ ဘျ ပွုန် ဇဝ်ဖြာ၊ ဘူင် နာ မွှိုမ် အာမ် ကာဆဝ်၊ တဲး အီ နပ်၊ ဂြုဝ်း ပီ ကာလာင် ဂေ ဟဲ့ မှာန် ဟဲ့ မုး။