မ်က် 15

လွင် ဇဝ် ယေဆူ ကွယ် ဒီ အာတ့် အာဖီလာတ်

1 ပါ ခဲညှာ ဆိန့်ဝး စေဝ်၊ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် မိူင်၊ ဘော ဂေ ဒါ ဆာရာ အီ မာနုဝ် ဒါရာ ယူဒါ ဘော ဂေ ဒူအီ အီ ဆုင်ဖျာတ် အာမူ အီ၊ ဂေ ဘောကာဂ့လျီတ် ဟဲ့ လာယ် ဖြူမ်။ ဂေ ဝီ ပက် ဒဲ ဇဝ် ယေဆူ၊ ဝီ တိုယ် အန်၊ အာပ် အန် ဒီ ဒါ ကာညာ အီ စိူဝ် အာဖီလာတ်၊ တဲး အန် ဆုင်ဖျာတ်။

2 အာဖီလာတ် ဒီမွှတ် ဇဝ် ယေဆူ။ အန် တဝ်း၊ “ဟဲ့ မှာန် မုး မဲ ခုန်ဒီခမ် အီ အိုပ် ဂေ ဒူအီ ယူဒါ။း”

ဇဝ် ယေဆူ ဝီ တဝ်း၊ “ဟဲ့ မှာန် ပီ တဝ်း မဲ။”

3 ပန် တီ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဂေ ဝီ ဖျာက် ဇဝ် ယေဆူ တဝ်း၊ “အန် ဘူင် မှာပ် ဘဲန် မျုဝ် ဘဲန် မျုဝ်။” 4 ပန် တီ အာဖီလာတ် ဝီ ဒီမွှတ် အန် ပေါ အူ ဇေန့် တဝ်း၊ “မဲ တူ မိုဝ်း ဒီ တဝ်း မာဆေ။း မဲ ယွတ်၊ ဂေ ဖျာက် မဲ ဘဲန် မျုဝ် ဘဲန် မျုဝ်။”

5 ဇဝ် ယေဆူ ယီ တူ တဝ်း မာဆေ။ အာဖီလာတ် မိူဝ် အာမ်။

6 ဒေါ ဘူင် ဂေ ဘ့လွယ် တီ၊ အာဖီလာတ် မိုဝ်း ဟိတ် အူ မျုဝ်။ အန် ခ့ဝါင် တဲး ဂေ ဒူအီ ကိူန် ရဝ်း ဒူအီ အူ ဝီ အီ ကွယ် ခဲင် ကာပိုမ်။ ဟဲ့ ဟွတ့်၊ အန် ဝီ ဘ့လေး ဒူအီ ပီ ရဝ်း ဂေ တီ။ 7 ဒေါ အန် တီ န့ မိုဝ်း ဒူအီ အူ ဝီ အီ ကွယ် ခဲင် ကာပိုမ်။ အန် စိူဝ် အာဘာရာဘ။ အန် ဟဲ့ ဒွိုမ် ကွယ် ရိုမ် ဒူပ် ဒူအီ အီ ဟဲ့ ငဝ်း အာဆာက် အီ ဟဝ် ဒေါ ဘူင် ဂေ ဆီနန် ဆီနိူင်။ 8 ဂေ ဒူအီ ကိူန် ဝီ မှာန့်၊ တဲး အာဖီလာတ် ဒူပ် ဟိတ် တီ။

9 အာဖီလာတ် ဝီ တဝ်း၊ “ဘေ ဆီ တဲး အုဝ် ဘ့လေး အီ မုး ခုန်ဒီခမ် ဘေ ဒူအီ ယူဒါ နီ။း” 10 အန် တဝ်း ပါယ် တီ၊ ကူပ် ဟဲ့ နပ် အန်၊ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဂေ တူ အိုင် ဇဝ် ယေဆူ။ ခုဝ်၊ ဂေ ဟဲ့ အာပ် အန် ဒီ အာဖီလာတ်။ 11 ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဂေ ယီ ကာဆုး ဒူအီ ကိူန် တဲး ဂေ မှာန့်၊ တဲး အာဖီလာတ် ဘ့လေး အာဘာရာဘ။

12 ပန် တီ အာဖီလာတ် ဝီ တဝ်း၊ “ဆေ န့ ပါယ် တီ၊ မာဆေ ပီ ဒီ လုဝ် ဘူင် အုဝ် ဒီ ဒူအီ ဝီ တီ၊ အီ မုး ခုန်ဒီခမ် ဒူအီ ယူဒါ။း”

13 အူ ဇေန့် ဂေ ဝီ ဒတ် တာင် တဝ်း၊ “ငဝ်း ဝဲန် အန် ဒဲင် ရွင့် ကာဝဲ့။”

14 အာဖီလာတ် ဝီ တဝ်း၊ “မာဆေ ပီ ဘူင် အန် နာ တူ မွှိုမ်၊ အီ ကာအာပ် ယမ်။း” ဂေ ယီ ဒတ် တာင် လွှိုမ် ခါ အာတ့် “ငဝ်း ယမ် အန် ဒဲင် ရွင့် ကာဝဲ့။”

15 အာဖီလာတ် မိူဝ် ဆီ ဘူင် ပီ အိုင် ဂေ ဒူအီ ကိူန်။ ခုဝ်၊ အန် ဘ့လေး အာဘာရာဘ။ အန် ဝီ စ်ု ဂေ ဆီဘျြီ့ ဇဝ် ယေဆူ။ ဟဲ့ ဟွတ့်၊ အန် ခ့ဝါင် ဂေ ငဝ်း ယမ် အန် ဒဲင် ရွင့် ကာဝဲ့။

လွင် ဂေ ဒါ ဆိုက် ကာညး ဇဝ် ယေဆူ

16 ပန် တီ ဂေ ဒါ ဆိုက် ဝီ ဒိုဝ်း ဟာဝ် ဇဝ် ယေဆူ ခဲင် ဟုဝ် အာဖီလာတ် ဒူင် စိူဝ် ဖေထုဝ်ရီ။ ဂေ ဝီ ဒဲ့ ကာဇု ဂေ ဒါ ဆိုက် ဘော ဖိုင်။ 17 ဂေ ဝီ တဲး ဇဝ် ယေဆူ စှိုပ် ခြိုင် ရေန့် ဂဲ၊ အီ မုး ခြိုင် ပီ ဒီ တာ ခုန်ဒီခမ်။ ဂေ ဒိုဝ်း ယွုန် မာအာတ့်၊ ဘူင် မင်ဂိုမ်၊ ဝီ စှိုပ် ဒီ ဂိန့် ဇဝ် ယေဆူ။ 18 ဂေ မိူဝ် စုး ဒီ ညိုင်ရာင် ဒီ ရွုး အန် တဝ်း၊ “အိုယ် မဲ ခုန်ဒီခမ် အီ အိုပ် ဒူအီ ယူဒါ၊ တဲး မဲ ဂျာမ်ဆာ။” 19 ဂေ ဒိုဝ်း န့ကြွုန်၊ ဂ့လွက် ဂိန့် အန် ဘဲန် ဇေန့် ဘဲန် ဇေန့်။ ဂေ ဘော ပတ့် နာ အန်၊ ခြိုပ်ခြဝ် ဒီ အာတ့် အန်၊ ညိုင်ရာင် ဒီ ကြိုပ် အန်။ 20 ဂေ ဟဲ့ ဟွတ့် ဘူင် ဇိုဝ် တီ ဒွန် မျုဝ်၊ ဂေ ဝီ ဘုတ့် ခြိုင် ရေန့် ဂဲ တွိုန်၊ ဝီ တဲး အန် စှိုပ် ခြိုင် ဘြိမ် အန်။ ဟဲ့ ဟွတ့်၊ ဂေ ဝီ တိုယ် အန် လေး ခဲင် မိူင်၊ ဟာဝ် ငဝ်း ယမ် အန် ဒဲင် ရွင့် ကာဝဲ့။

လွင် ဇဝ် ယေဆူ ယမ်

21 ဒေါ အန် တီ န့ မိုဝ်း ဒူအီ အူ ဝီ အီ တး ခဲင် မိူင် ကူရေန့်၊ အန် စိူဝ် အာဆီမူန်။ အန် မုး ဂုန့် အာလေဆန်ဒါ ဂါယ် အာရူဖူ။ အန် တး ဒီ မာန်၊ ဟာဝ် ဒူပ် န့တေန့် တွိုန်၊ တဝ်း ဒီ ဝီ လိုပ် ခဲင် မိူင်။ ဂေ စ်ု အန် ဂွတ် ရွင့် ကာဝဲ့ ဒါင် ဇဝ် ယေဆူ။ 22 ဂေ တိုယ် ဇဝ် ယေဆူ တဲး အန် ဇမ် ဒူင် စိူဝ် ဂေါလဂုဝ်ထာ။ လွင် ဒါင် စိူဝ် တီ မုး၊ “ဒူင် ကွယ် ကာအာင် ဂိန့် ဒူအီ ယမ်။” 23 ဂေ ဟဲ့ ဟွတ့် ဇမ် ဒူင် တီ၊ ဂေ ဝီ တဲး ဇဝ် ယေဆူ ဒျီင် အိုမ် ဆာဘျိတ်^a ပီ ဟပ် ဂေ ဒဝ် မောရာ။ အန် ယီ တူ ဒျီင်။ 24 ဂေ ဝီ ဒွက် ဒိုက် အန် ဒီ ရွင့် ကာဝဲ့။ ဂေ မိူဝ် လာယ် ကာဒုဝ်၊ အာဆေ ဒီ ပွိုန် ခြိုင် အန်။

25 ဒေါ ဒိုက် ဂေ ဇဝ် ယေဆူ ဒီ ရွင့်၊ ဝီ ဆမ် ရွင့် တီ၊ ဟဲ့ နုဝ့် ဒိမ် နာရီ စေဝ် ညှာ။ 26 ဂေ ဝီ ဒဲမ် အုန် လွင် ပီ လုတ့် အန် ဒီ ဘဲန်၊ ဒိုက် ဒဲင် ဂိန့် အန်။ န့ တဝ်း၊ “အန် မုး ခုန်ဒီခမ် အီ အိုပ် ဒူအီ ယူဒါ။” 27 န့ ဘော မိုဝ်း ဒါ ဇူန် အာ ဝီ။ ဂေ ဟဲ့ ဒိုက် ဘော ဂါယ် ဒီ ရွင့် ဂါယ်၊ အူ ဝီ ဘ့လာက် အာအး၊ ပေါ အူ ဝီ ဘ့လာက် အာဂ ဇဝ် ယေဆူ၊ တဲး ဘော ဂါယ် ယမ် ရိုမ် ဒူပ် အန်။ 28 ပါယ် တီ န့ ဟဲ့ ဘဲန် ပီ ဒဲမ် ခဲင် ဘပ် ဇဝ်ဖြာ အီ တဝ်း၊ “ဂေ ဒူအီ ဟဲ့ တဝ်း၊ အန် ကွယ် ခဲင် ဖိုင် ဂေ ဒူအီ အီ ဘူင် မှာပ်။”^b 29 န့ ယီ မိုဝ်း ဂေ ဒူအီ အီ တး ကာလုဝ်း ဒူင် တီ။ ဂေ ဘော ယိုဝ် ဇဝ် ယေဆူ ဒိုက် ဒီ ရွင့် ကာဝဲ့၊ ဂေ ဝီ တဝ်း ဂြုဝ်း တူ မွှိုမ် ဒီ အန်။ ဂေ မာဝတ် ဂိန့် ဂေ၊ ဝီ တဝ်း၊ “မဲ ဟဲ့ တဝ်း ဒီ ဘူင် တဲး ဟုဝ် ဇဝ်ဖြာ ကာပျာတ့် လိုဝ်။ အာဒါ အူယ် ဆီငဲ မဲ ပီ ဒီ ဝီ ဆမ် တဲး န့ ဟွတ့်။ 30 ဒေါ တီ နီ၊ လေး လူင် ဒဲင် ရွင့် တီ၊ ဝီ ချွတ် အဲ အာဆာက် မဲ။”

31 ပါယ် တီ၊ ဘော ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဂေ ဝီ ကာညး အန်။ ဂေ ဝီ လာယ် ကာလာင် ကာတဲ ဂေ၊ “အန် ဟဲ့ ချွတ် အီ ဟဝ်။ အန် ယီ တူ ပဲ ဒီ ချွတ် ဒုဝ် ဘြိမ် အန်။ 32 ဆေ အန် မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ ဘော ဆေ အန် မုး ခုန်ဒီခမ် ဒူအီ အီဆာရေလ၊ တဲး အန် လူင် ဒဲင် ရွင့် နီ၊ တဲး အေ ယိုဝ် ပွုန် အန်၊ တဲး အေ ညှိုမ် အန်။” ဘော ဂါယ် အာ ဝီ အီ ဒိုက် ဒီ ရွင့် ဒီ ခူပ် အန်၊ ဂါယ် မိူဝ် တဝ်း ဂြုဝ်း တူ မွှိုမ် ဒီ အန်။

33 ဘော ဇမ် ကာတဲ ဆီငဲ၊ န့ ဘော အပ် ဝွင့် ခဲင် မိူင် ဘော မိူင် အာဒါ အူယ် နာရီ။ 34 ဘော ဇမ် ဝါယ် ဆီငဲ ကာတဲ အူယ် နာရီ၊ ဇဝ် ယေဆူ ဒတ် တာင်။ အန် တဝ်း၊ “အေလီ အေလီ လာမာ ဆာဘာထာနီ။” လွင် ဒါင် အန် တီ လေး၊ “မဲ ဇဝ်ဖြာ အုဝ်၊ မဲ ဇဝ်ဖြာ အုဝ်၊ မှဝ် န့ ပါယ် ပီ ဝဲန် မဲ ဒီ အုဝ်။း”

35 န့ ယီ မိုဝ်း ဒူအီ မင် အီ၊ ဂေ ကွယ် ကာတတ် အန်။ ဒေါ ယိုဝ် ဂေ ဂြုဝ်း အန် တီ၊ ဂေ တဝ်း၊ “ဘေ ထူမ်၊ အန် ဒဲ့ အာအေလီယ တွိုန်။”

36 ဒူအီ အူ ဝီ ဝီ ကာဘ့လဲပ်၊ စိုပ် ဒိး အိုမ် ခဲင် အိုမ် ပြာင်၊ ဘ့လေး ဒဲင် န့ကြွုန်၊ စုဝ့် တဲး ဇဝ် ယေဆူ ပွိုန် ဒီ ညွှတ် ဒျီင်။ အန် ဘော တဝ်း၊ “တဲး အန် ကွယ် ပါယ် တီ၊ တဲး အေ ယွတ်၊ ယုဝ် အာအေလီယ တွိုန် ဒီ တး၊ စွယ် အန် လူင်။”

37 ဇဝ် ယေဆူ မိူဝ် ဟဲ့ ဟွတ့် ဒတ် တာင်၊ ဖွိုမ် အန် ဘော တူတ့်။

38 ဒေါ အန် တီ န့ မုး ဘိက် ဂွင့် အီ ဘဲန် ရဲင်၊ အီ ကွယ် ခဲင် ဟုဝ် ဇဝ်ဖြာ၊ န့ ဘော ကာယာတ့် ရာင် အန်၊ စုး နာ ဒဲင်၊ လူင် ဇမ် အီ ခြိုမ်။ 39 ဒါ ဘုဝ် အီ အိုပ် ဒါ ဆိုက် အူ မာယဝ်း တွိုန် ယီ ကွယ် ဒီ အာတ့် ရွင့် ကာဝဲ့ ဇဝ် ယေဆူ။ အန် ယိုဝ် ဒေါ ယမ် ဇဝ် ယေဆူ၊ အန် ဝီ တဝ်း၊ “ဟဲ့ မှာန်၊ ဟဲ့ မုး၊ ဒူအီ နီ မုး ဂွန် ဇဝ်ဖြာ။”

40 န့ ဘော မိုဝ်း အီဘိုန့် မင် အီ၊ ဂေ ဟဲ့ ကွယ် နာ ကာတူင့်၊ ယွတ် တူတ့် ဒွန် မျုဝ်။ န့ မုး ဘော နာင် မာရီ အီ တး မိူင် မာက်ဒါလာ ဘော နာင် ဆာလုဝ်မေ၊ ဘော နာင် မာရီ အီ မုး မာ အာယာကူပ် ဝီ တျီ့ ဂါယ် အာယုဝ်ဆေ။ 41 ဂေ အီဘိုန့် တီ၊ ဂေ ဟဲ့ ဒူပ် ဇဝ် ယေဆူ ခဲင် အိူင် ဂါလီလေ။ ဂေ ဟဲ့ လိုမ်လာ အန်။ ဘော အီဘိုန့် ကိူန်၊ ဂေ အီ ဟဲ့ တး ဒူပ် ဇဝ် ယေဆူ ဒေါ ဟာဝ် အန် မိူင် ယေရူဆာလဲမ်၊ ဂေ ဟဲ့ ကွယ် ယွတ် ဒေါ ယမ် အန်။

လွင် ဂေ အုန် ဒုဝ် ဘူင့် ဇဝ် ယေဆူ ခဲင် ကာဒဝ် ဘာရေဝ်

42 ဒေါ ယမ် ဇဝ် ယေဆူ မုး ဆီငဲ အာတ့် ဆီငဲ ဒီလှဝ်။ န့ မုး ဆီငဲ ရဲန် ဂေ ဘ့လွယ်။^c 43 ဆီငဲ အန် တီ ဘာ ဒီ အပ်၊ ဒူအီ အူ ဝီ အီ စိူဝ် အာယုဝ်ဆဲပ် ဟာဝ် ဒူင် ကွယ် အာဖီလာတ်။ အာယုဝ်ဆဲပ် တီ တး မိူင် အေရီမာထီ။ အန် မုး ဒါ တာင် ခဲင် ဖိုင် ဂေ ဒူအီ အီ ဆုင်ဖျာတ် အာမူ အီ။ အန် ဟဲ့ နှဝ့် အာခြာဝ် ဒီ တး ဇဝ်ဖြာ အိုပ် ကာဒါယ်။ ဒူအီ ဝီ တီ တူ ယုဝ် မာဆေ။ အန် ဟာဝ် ဒူင် ကွယ် အာဖီလာတ်၊ မှာန့် ဒီ ဒိုဝ်း လူင် ဒုဝ် ဘူင့် ဇဝ် ယေဆူ ဒဲင် ရွင့်။ 44 ဒေါ ယိုဝ် အာဖီလာတ် လွင် ဇဝ် ယေဆူ ဟဲ့ စေဝ် ယမ်၊ အန် မိူဝ် အာမ်။ အန် ဝီ ဒဲ့ ဒါ ဘုဝ် အီ အိုပ် ဒါ ဆိုက် အူ မာယဝ်း၊ ဒီမွှတ် အန်၊ တဲး အန် နပ် ဆီချာ လွင် ဇဝ် ယေဆူ ဟဲ့ ဟွတ့် ယမ်။ 45 ဒါ ဘုဝ် တီ ဝီ တဝ်း၊ “ဟဲ့ မှာန်၊ ဟဲ့ မုး၊ အန် ဟဲ့ ဟွတ့် ယမ်။” ပန် တီ အာဖီလာတ် ဝီ ခ့ဝါင် အာယုဝ်ဆဲပ် ဒိုဝ်း လူင် ဒုဝ် ဘူင့် ဇဝ် ယေဆူ။ 46 ဝါယ် အန် တီ အာယုဝ်ဆဲပ် ဝီ စိုဝ်း ဘိက် ကာတမ် လုယ်၊ ဝီ ဒိုဝ်း ဒုဝ် ဘူင့် ဇဝ် ယေဆူ လေး ဒဲင် ရွင့်။ အန် ဝီ ကာဘန် ဘိက် ကာတမ် လုယ် ဒီ ဒုဝ် ဘူင့် ဇဝ် ယေဆူ။ ဟဲ့ ဟွတ့်၊ အန် ဝီ ဘ့လေး ခဲင် ကာဒဝ် ဘာရေဝ်။ ကာဒဝ် ဘာရေဝ် တီ မုး ပီ ဂိုဝ်း ဒူအီ ခဲင် ဒါအာင် မာဝ်။ ဟဲ့ ဟွတ့်၊ အန် ဝီ ဒိုဝ်း မာဝ် တာင် ဘ့လေး နာ အာတ့် မာလုဝ်း ကာဒဝ် ဘာရေဝ်၊ တဲး န့ ကာဘိတ်။ 47 နာင် မာရီ အီ တး မိူင် မာက်ဒါလာ ဘော နာင် မာရီ အီ မုး မာ အာယုဝ်ဆေ၊ ဂါယ် ယွတ် ဆီချာ ဒူင် ပီ ဘ့လေး ဂေ ဒုဝ် ဘူင့် ဇဝ် ယေဆူ။