မ်ထ 28

လွင် ဇဝ် ယေဆူ ဝီ ယိတ့် ဝီ အိမ်

1 ပန် တီ န့ ကော ဇမ် ဆီငဲ ဝါယ် ဆီငဲ ဒီလှဝ်။ ဆိန့်ဝး စေဝ် ဒေါ ညှမ် ဘ့လာင် ပြဲ၊ န့ မုး နာင် မာရီ အီ တး မိူင် မာက်ဒါလာ ဘော နာင် မာရီ ပေါ အူ ဝီ၊ ဂါယ် တဝ်း ဒီ ဟာဝ် ယွတ် ကာဒဝ် ဘာရေဝ် တွိုန်။

2 ဒေါ အန် တီ န့ မိုဝ်း အာမူ အာမာတ် ဇဝ်ဖြာ အူ ကာဒင်၊ အန် တး လူင် ဒဲင် ကာဒါယ်၊ ဟာဝ် ဒူင် မိုဝ်း ကာဒဝ် ဘာရေဝ် တွိုန်၊ ဝီ ဇုန် ဝဲန် မာဝ် တာင် အီ ကွယ် ဒီ အာတ့် မာလုဝ်း ကာဒဝ် ဘာရေဝ် တွိုန်၊ ဝီ တုတ့် ကွယ် ဒဲင် မာဝ် တီ။ ပီ ဘူင် အန် တီ၊ န့ တဲး မာအိမ် ကော ယေန့် ကာဆဝ်။ 3 အာမူ အာမာတ် ဇဝ်ဖြာ တီ၊ အန် မိုဝ်း အာရိုပ် ပီ ပ့လ မ့ပ့လေတ့်။ ခြိုင် ပီ တာ အန် ဘော လုယ် ရာဝ်။ 4 ဂေ ဒူအီ ဘ်ု ကာဒဝ် ဘာရေဝ် တွိုန်၊ ဂေ ဘော ယုဝ် ကာဆဝ်။ ဂေ ဘော ကေး နှဲန် ဒူအီ ယမ်၊ အာဝ် ပွိုန် ဘူင် မာဆေ။

5 အာမူ အာမာတ် ဇဝ်ဖြာ တွိုန် ယီ ကာလာင် ဂြုဝ်း ဒီ အီဘိုန့် အာ ဝီ တွိုန်။ အန် တဝ်း၊ “ကွဲ့ ယုဝ်။ အုဝ် ဟဲ့ နပ်၊ ဘာယ် ဟဲ့ တး ယွတ် ဒုဝ် ဘူင့် ဇဝ် ယေဆူ အီ ဟဲ့ ဟွတ့် ယမ် ဒဲင် ရွင့် ကာဝဲ့။ 6 အန် တူ ကွယ် ဒီ နီ၊ အန် ဟဲ့ ဝီ ယိတ့် ဝီ အိမ်။ န့ ဟဲ့ ဘဲန် ပီ ဒွိုမ် ကာလာင် အန် ဒီ ဘေ။ တဲး ဘာယ် တး ယွတ် ဒူင် ပီ ဒွိုမ် ဘ့လေး အုန် ဂေ ဒုဝ် ဘူင့် အန်။ 7 ဘာယ် ဟဲ့ ဟွတ့် ယွတ် တူတ့်၊ ဘာယ် ဝီ ဟာဝ် ဟဲ ဟဲ ကာလာင် ဒီ ဒီဘဲ ဇဝ် ယေဆူ လွင် အန် တီ။ ဘာယ် လုဝ် တဝ်း၊ ‘ဇဝ် ယေဆူ ဟဲ့ ဟွတ့် ဝီ ယိတ့် ဝီ အိမ်။ အန် ဒီ ယဲတ့် ဒီ အာတ့် ဘေ၊ ဟာဝ် အိူင် ဂါလီလေ။ ဆေ ဘေ ဘော ဟာဝ် အိူင် ဂါလီလေ၊ ဘေ ဒီ ဘော ယိုဝ် အန်။’ ခဲ့ တီ အုဝ် စ်ု ဘာယ် ကာလာင် ဒီ ဂေ။”

8 အာမူ အာမာတ် ဇဝ်ဖြာ ဟဲ့ ဟွတ့် ကာလာင် ဂြုဝ်း တီ ဒီ အီဘိုန့် အာ ဝီ၊ ဂါယ် မိူဝ် ဟာဝ် ဟဲ ဟဲ၊ လေး ဒူင် ကွယ် ဘာရေဝ် တွိုန်။ နဝ်း ဂါယ် ဘော ယုဝ် ဘော ဒါခိုယ်။ ဂါယ် ဘော ကာဘ့လဲပ် ဟာဝ် တဝ်း ဒီ ကာလာင် လွင် အန် တီ ဒီ ဂေ ဒီဘဲ ဇဝ် ယေဆူ။ 9 ဒေါ ဟာဝ် ဂါယ် တီ အူ ဇေန့်၊ ဇဝ် ယေဆူ ကာပ့လုး ဒီ ဂါယ်။ အန် ဘော တဝ်း၊ “တဲး ဘာယ် ဒါခိုယ်။” ဂါယ် မိူဝ် ဟာဝ် ချြီ့ အန်၊ ဝီ ခြိုပ်ခြဝ် ဒီ အာတ့် အန်၊ ပါ ပ့လဝ် အန် ဘော ကြိုပ် အန်။ 10 အန် ဝီ တဝ်း ဒီ ဂါယ်၊ “ကွဲ့ ယုဝ်။ ဟာဝ် ကာလာင် ဒီ ဂေ ဘီနွင် အုဝ်၊ ဆေ ဂေ ဟာဝ် ဇမ် အိူင် ဂါလီလေ၊ ဂေ ဒီ ဘော ယိုဝ် အုဝ်။”

11 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ ဒီ အီဘိုန့် အာ ဝီ တွိုန်၊ ဂါယ် ဝီ ဟာဝ်။ ဒေါ အန် တီ ဂေ ဒူအီ ဘ်ု ကာဒဝ် ဘာရေဝ်၊ ဂေ ဝီ ဟာဝ် ခဲင် မိူင်၊ ဝီ ကာလာင် ဒီ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ လွင် ပီ ပါယ် ဒွန် မျုဝ်။ 12 ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဂေ ယီ ကာလာင် ဒီ ဂေ ဒါ တာင် အီ အိုပ် မိူင်။ ဟဲ့ ဟွတ့်၊ ဂေ ဝီ လာယ် ဖြူမ် ဒီ ကာလုဝ် ဒီ အီ။ ဂေ ဝီ ဒွါ ရွိုန် ကိူန် ဒီ ဒူအီ ဘ်ု ကာဒဝ် ဘာရေဝ် တွိုန်။ ဂေ ဝီ တဝ်း၊ 13 “ဘေ လုဝ် ကာလာင် ဒီ ဒွန် အီ၊ လွင် ဒီဘဲ ဒူအီ တွိုန်၊ ဂေ ဟဲ့ တး ခဲင် မှိုဝ် ဒေါ အိတ် ဘေ၊ ဝီ ပြာ ဒီ ဒိုဝ်း ဟာဝ် ဒုဝ် ဘူင့် အန်။ 14 ဆေ ဒါ ကာညာ ဘေ ဒီ ဘော နပ် လွင် အန် တီ၊ ယေ ဒီ ကာလာင် ဂြုဝ်း ဒီ အန်၊ ကွဲ့ တဲး န့ ဘဲန် မှာပ် ဘေ။” 15 ခုဝ်၊ ဂေ ဒါ ဆိုက် တွိုန် ဝီ ဒိုဝ်း ရွိုန် ဒီ ဒါ တာင် ဂေ၊ ဝီ ကာလာင် တူတ့် ဒွန် မျုဝ် ပီ ဒမ် ဂေ ဒါ တာင်။ ကော ဇမ် အာတိုဝ် နီ၊ ဂေ ဒူအီ ယူဒါ အီ ကွယ် ဒွန် နာ ဒွန် ပ့လုဝ့်၊ ဂေ ဘော နပ် ပီ ခဲ ဂေ လွင် ပြာ ဂေ ဒုဝ် ဇဝ် ယေဆူ။

16 ဝါယ် အန် တီ န့ မုး ဂေ ဒီဘဲ ဇဝ် ယေဆူ ဂိုဝ် ဒီ အူ ဝီ တွိုန်၊ ဂေ ဘော ဟာဝ် ဒူပ် န့တေန့် အီ ဇမ် အိူင် ဂါလီလေ။ ဂေ ဘော ဟာဝ် ဟုဝ့် ဒီ နွန် ပီ ဒွိုမ် ကာလာင် ဇဝ် ယေဆူ ဒီ ဂေ။ 17 ဂေ ဘော ယိုဝ် ဇဝ် ယေဆူ၊ ဂေ ဝီ ကြိုပ် အန်။ မင် အီ ဂေ တူ ဘော ညှိုမ်၊ ဝီ ဘဲန် နဝ်း ကာလိင် ကာလဲ။ 18 ပန် တီ ဇဝ် ယေဆူ ဝီ တး ဇမ် ကာတတ် ဂေ၊ ဝီ တဝ်း၊ “ခဲ့ ဘော မိုဝ်း ပွုန် တူတ့် ဒွန် မျုဝ် ဘော ဒဲင် ကာဒါယ် ဘော ခဲင် ဂါင်ဟြာဝ်၊ ဇဝ်ဖြာ ဟဲ့ အာပ် ဒွါ တူတ့် ဒီ အုဝ်။ 19 ခုဝ်၊ အုဝ် စ်ု ဘေ ဟာဝ် ဒွန် နာ ဒွန် ပ့လုဝ့်၊ ဒဲ့ ဒူအီ ဒွန် မျုဝ် ဘဲန် ဒီဘဲ အုဝ်။ ဘေ ဘော လုဝ် ဂါဝ် ဘော ပွုန် ဇဝ်ဖြာ၊ အီ မုး ဂုန့် အုဝ် ဘော ပွုန် အုဝ် ဘော ပွုန် နဝ်း ဖွိုမ် ဇဝ်ဖြာ၊ စိုပ် ဂေ ခဲင် အိုမ်။ 20 တဲး ဘေ ဘော မာနုဝ် ဂေ၊ တဲး ဂေ ဒူပ် ဆီချာ ပီ မာနုဝ် အုဝ် ဒွန် မျုဝ် ဒီ ဘေ။ အုဝ် မိူဝ် ဒီ ကွယ် ရိုမ် ဒူပ် ဘေ ဆေဆေ၊ တဲး ကော ဇမ် အာခြာဝ် ပန် ဒီ တူတ့် ဇာတ် နီ။”