လွင် ဖျာက် အီ
7
1 ဝါယ် အန် တီ ဇဝ် ယေဆူ ဝီ မာနုဝ် တဝ်း၊ “ဆေ ဘေ တူ နပ် ဆီချာ၊ ကွဲ့ ဆုင်ဖျာတ် လွင် တူ မွှိုမ် အီ ဟဝ်။ ဆေ ဘေ တူ ဒူပ် ဂြုဝ်း တီ၊ ဇဝ်ဖြာ ဒီ ဘော ဆုင်ဖျာတ် လွင် အီ တူ မွှိုမ် ဘေ။ 2 ခုဝ်၊ ဆေ ဘေ ဆုင်ဖျာတ် စန် ဒီ အီ ဟဝ်၊ ဇဝ်ဖြာ ဒီ ဝီ ဆုင်ဖျာတ် စန် ဒီ ဘေ။ ဆေ ဘေ ဆုင်ဖျာတ် န့စိုဝ် ဒီ အီ ဟဝ်၊ ဇဝ်ဖြာ ဒီ ဝီ ဆုင်ဖျာတ် ဒီ ဘေ ပါယ် တီ။ န့ ပီ၊ ဘေ ဒီ ဘူင် ဒီ အီ မျုဝ် မှဝ်၊ ဘေ ဒီ ဝီ ပွိုန် မျုဝ် တီ။3-5 ဘေ မုး ဒူအီ ညိုင်ရာင် ဘွတ်။ ဘေ ဘော ပီ ဒူအီ အီ မိုဝ်း န့ဂူင့် ခဲင် ငါယ် ဘေ။ ဘေ ယီ တူ နပ် လွင် အန် တီ။ ဟဲ့ ဟွတ့်၊ မှဝ် ဘေ ဒီ ပါယ် ဒီ ပွိုန် ယိုဝ် ကာအး ဒီတဲတ် အီ ကွယ် ခဲင် ငါယ် ဘီနွင် ဘေ။း ဘေ လုဝ် ဒိုဝ်း လေး န့ဂူင့် တီ ခဲင် ငါယ် ဘေ ဒီ အာတ့်။ ဟဲ့ ဟွတ့်၊ ဘေ ဒီ ဘော ပွိုန် ယိုဝ် တဲး န့ ကော လိုဝ်း ကာအး ဒီတဲတ် အီ ကွယ် ခဲင် ငါယ် ဘီနွင် ဘေ၊ တဲး ဘေ ပဲ ဒီ ဒိုဝ်း ဝဲန်၊ တဲး န့ လေး။
6 ကွဲ့ ကာလာင် လွင် ဇဝ်ဖြာ ဒီ ဒူအီ အီ တူ ရုဝ်ဆေ အန်။ န့ ပီ ဘေ ဒီ ဝဲန် နာ ဘွတ်၊ တဲး မာဆုဝ် ဟူမ်။ ဟဲ့ ဟွတ့် မာဆုဝ် နပ် ဒီ ဝီ ကဝ့် ဘေ။ န့ ဘော ပီ၊ ဘေ ဒီ ဒိုဝ်း ပွိုန် မာဟွယ် အီ ငဝ်း ကာဆဝ်၊ ဝီ ဒွါ တဲး မာလေတ့် ညဲတ့်။”
လွင် ဆာခိုဝ် ဒီ ဇဝ်ဖြာ
7 ဇဝ် ယေဆူ ဟဲ့ ဟွတ့် မာနုဝ် ဇိုဝ် တီ၊ အန် ဝီ တဝ်း၊ “ဆေ ဘေ မှာန့်၊ ဘေ ဒီ ပွိုန်။ ဆေ ဘေ ဟြေတ့်၊ ဘေ ဒီ ယိုဝ်။ ဆေ ဘေ ဒွယ် မာလုဝ်း၊ ဘေ ဒီ ပွိုန် ဒီ လိုပ်။ 8 ခုဝ်၊ ဒွန် အီ အီ မှာန့်၊ အန် ဒီ ပွိုန်။ ဒွန် အီ အီ ဟြေတ့်၊ အန် ဒီ ယိုဝ် ပီ ဟြေတ့် အန်။ ဘော ဒွန် အီ အီ ဒွယ် မာလုဝ်း၊ အန် ဒီ ပွိုန် ဒီ လိုပ် ခဲင် မာလုဝ်း တီ။
9 ဆေ န့ မုး ဘေ၊ ဆေ ဂွန် ဘေ မှာန့် ခါမုန်၊ ဘေ တူ ဝီ ဒွါ မာဝ် ဒီ အန်။ 10 ဘော၊ ဆေ ဂွန် ဝီ မှာန့် မာဂါ၊ ဘေ တူ ဝီ ဒွါ မာဟန့် ဒီ အန်။ 11 န့ ဘော ပါယ် တီ။ ဘေ မုး ဒူအီ ဟာယ်။ ဘေ ယီ နပ် ဒီ ဒွါ နာ မွှိုမ် ဒီ ဂွန် ဘေ။ ပါယ် တီ ဘော ဂုန့် ဘေ အီ ကွယ် ဂါင်ဟြာဝ်၊ အန် မိုဝ်း နဝ်း ဆီ ဒွါ မီ နာ မွှိုမ် ဒီ ဂေ ဒူအီ အီ မှာန့် ဒီ အန်။ ပီ ဒွါ အန်၊ န့ မွှိုမ် လွှိုမ် ပီ ဒွါ ဒူအီ။ 12 ဘေ ဆီ တဲး အီ ဟဝ် ဘူင် မျုဝ် မှဝ် ဒီ ဘေ၊ ဘေ လုဝ် ဝီ ဘူင် မျုဝ် တီ ဒီ အီ ဟဝ်။ ဘေ ဘော ဘူင် မာဆေ ဒီ အီ၊ တဲး န့ ပါယ် တီ။ ပီ မာနုဝ် ဒါရာ ဇဝ်ဖြာ ဘော ပီ မာနုဝ် ဂေ ဒူအီ အီ ဘျာန် ဂြုဝ်း ဇဝ်ဖြာ ဒွန် မျုဝ်၊ န့ လေး တူတ့် ပါယ် တီ။”
လွင် န့တေန့် အာ ညွင့်
13-14 ဝါယ် အန် တီ ဇဝ် ယေဆူ ဝီ ကာလာင် အူဖာမာ။ အန် တဝ်း၊ “အာဆာက် ဘေ၊ န့ ပီ ဘေ လုဝ် လိုပ် ခဲင် မာလုဝ်း ဘော ဟာဝ် ဒူပ် န့တေန့်။ ဆေ ဘေ လိုပ် ခဲင် မာလုဝ်း တာင်၊ ဝီ ပွိုန် ဒူပ် န့တေန့် ကာဝဝ်း။ န့တေန့် တီ ယီ ဇမ် ဒူင် ဒီ စှိုမ် အာဆာက် ဘေ။ ဒူအီ ယီ ကိူန် ဒူပ် န့တေန့် တီ။ န့ ဝီ မိုဝ်း ဘော မာလုဝ်း တျီ့၊ ဝီ တဲး အီ ဇမ် န့တေန့် ကာချီ့။ န့တေန့် တီ ယီ ဇမ် ဒူင် ဒီ ပွိုန် ကွယ် ရိုမ် ဒူပ် ဇဝ်ဖြာ ဆေဆေ။ ယီ မိုဝ်း ဒူအီ ပြေတ့် အီ ဇမ် ဒီ တီ။ ခုဝ်၊ တဲး ဘေ လိုပ် ခဲင် မာလုဝ်း တျီ့။”
လွင် အာ မျုဝ် ပီ မာနုဝ် ဒါ ဆာရာ
15 ဇဝ် ယေဆူ ဘော တဝ်း၊ “ဘေ လုဝ် ဆာဒိက်၊ န့ ဒီ မိုဝ်း ဒူအီ အီ ညိုင်ရာင် ဒီ ဘျာန် ဂြုဝ်း ဇဝ်ဖြာ။ ဆေ ဘေ ယိုဝ် ဂေ၊ ဘေ ထာင် ဂေ ဟဲ့ မွှိုမ် ဟဲ့ ဘွတ်။ ခဲင် နဝ်း ဂေ၊ ဂေ ယီ ပီ မာဆုဝ် ပြဲ အီ ဟာယ် ကာဆဝ်။ 16 ဆေ ဘေ ယိုဝ် အာဂျိုဝ် ပီ ဘူင် ဂေ၊ ဘေ ဒီ နပ် ယုဝ် ဂေ မွှိုမ် တူ မွှိုမ်။ အာဝ် ပွိုန် ဘေတ့် ဘ့လေ ဆာဘျိတ်a ဒီ ယွုန် မာအာတ့်။ အာဝ် ပွိုန် ဘေတ့် ဘ့လေ ဒီပူ ဒီ ဟေ ကြေန့်။ 17 န့ ဘော ပါယ် တီ၊ ဆေ န့ မုး ဟေ မွှိုမ်၊ အန် ဒီ မိုဝ်း ဘ့လေ မွှိုမ်။ ဆေ န့ ယီ မုး ဟေ တူ မွှိုမ်၊ အန် ဒီ မိုဝ်း ဘ့လေ တူ မွှိုမ်။ 18 ဟေ အီ မွှိုမ် တူ မိုဝ်း ဘ့လေ တူ မွှိုမ်။ ဘော၊ ဟေ အီ တူ မွှိုမ် အာဝ် မိုဝ်း ဘ့လေ အီ မွှိုမ်။ 19 ဆေ န့ ယီ မုး ဟေ အီ တူ မိုဝ်း ဘ့လေ မွှိုမ်၊ လုဝ် ဂ်ု ဝဲန်၊ ဝီ ဒုဝ့် ခဲင် ငဝ်၊ တဲး ငဝ် ကာဆိုမ်။ 20 ခုဝ်၊ အုဝ် ဟဲ့ တဝ်း၊ ဆေ ဘေ ယိုဝ် အာဂျိုဝ် ပီ ဘူင် ဂေ ဒူအီ အီ ဘျာန် ဂြုဝ်း ဇဝ်ဖြာ၊ ဘေ ဒီ နပ် ယုဝ် ဂေ မွှိုမ် တူ မွှိုမ်။
21 ဂေ ဒူအီ ကိူန် နပ် ဒီ တဝ်း ဒီ အုဝ် ‘မဲ ဇဝ်။’ အာဝ် မုး ဒွန် အီ အီ ကာလာင် ဂြုဝ်း တီ ဒီ ပွိုန် ဟာဝ် လိုပ် ခဲင် မိူင် ပီ အိုပ် ဇဝ်ဖြာ။ န့ မုး မီ ဒူအီ အီ ဘူင် ခဲ့ ပီ လုဝ် ဇဝ်ဖြာ အေ ဘူင်၊ ဂေ ဒီ ပွိုန် ဟုဝ့် ဂါင်ဟြာဝ် ဒူင် ကွယ် ဇဝ်ဖြာ၊ အီ မုး ဂုန့် အုဝ်။ 22 န့ ဒီ မိုဝ်း ဆီငဲ ပီ ဆုင်ဖျာတ် ဇဝ်ဖြာ၊ အာဆေ ဒီ ပွိုန် ဒီ ဟုဝ့် ဂါင်ဟြာဝ်။ ဆီငဲ အန် တီ န့ ဒီ မိုဝ်း ဒူအီ ကိူန်၊ ဂေ ဒီ တဝ်း၊ ‘မဲ ဇဝ်၊ ယေ ဟဲ့ ဒွိုမ် ဘျာန် ဂြုဝ်း ဇဝ်ဖြာ၊ တဝ်း န့ မုး ပွုန် မဲ။ ယေ မိူဝ် ဟဲ့ ဒွိုမ် စ်ု ဂေ ကာနမ် ဟာယ် လေး ခဲင် ဒုဝ် အီ ကူပ် ဂါဝ် ယေ ပွုန် မဲ။ ဘော နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ် ယေ ဟဲ့ ဒွိုမ် ဘူင်၊ တဲး န့ ဘျ ပွုန် မဲ။’ 23 အုဝ် ယီ ဒီ ဝီ ဝျီ့ ဂြုဝ်း ဂေ တီ၊ ကာလာင် ဂြုဝ်း ဆိူဝ် ဒီ ဂေ တဝ်း၊ ‘အုဝ် တူ ဒွိုမ် နပ် ဘေ။ ဘေ မုး ဒူအီ တူ ဘူင် နာ မွှိုမ်။ တဲး ဘေ လေး ဟာဝ် ဒူင် ကွယ် အုဝ်။’”
လွင် ဒူအီ အီ ဆမ် ကာင်
24 ဇဝ် ယေဆူ ဟဲ့ ဟွတ့် ကာလာင် လွင် အန် တီ ဒွန် မျုဝ်၊ အန် ဝီ ကာလာင် အူဖာမာ ပေါ အူ မျုဝ်။ အန် တဝ်း၊ “ခုဝ် အန် တီ အုဝ် တဝ်း ဒီ ဘေ၊ အာဆေ ထူမ် ဂြုဝ်း အုဝ်၊ ဝီ ဘူင် ပီ တဝ်း အုဝ်၊ အန် ပီ ဒူအီ အီ မိုဝ်း အာငျာန်၊ အီ ဆမ် ကာင်၊ တဲး န့ ကွယ် ဒဲင် မာဝ်။ 25 ဟဲ့ ဟွတ့် ပန် တီ ဂ့လာယ် တာင် ဝီ တး။ ဘော အိုမ် ပြဲ့ ဝီ တး၊ ဘော ခုန် ဝီ ဘုတ်၊ ဝီ ဒီယုး ရွင့် ကာင် တီ။ န့ ယီ တူ ကေး ကူပ် ပ့လူမ် စေန့် ရွင့်။ 26 ဆေ န့ ယီ မိုဝ်း ဒူအီ အီ ထူမ် ဂြုဝ်း အုဝ်၊ ယီ တူ ဘူင် ဒူပ် ပီ တဝ်း အုဝ်၊ အန် ပီ ဒူအီ တူ မိုဝ်း အာငျာန်၊ အီ ဆမ် ကာင် အန် ဒူင် မိုဝ်း ကာဟာတ့်၊ တူ မိုဝ်း ပ့လူမ် မာဆေ။ 27 ဟဲ့ ဟွတ့် ပန် တီ ဘော ဂ့လာယ် ဝီ တး၊ ဘော အိုမ် ဒီ တာင်။ ခုန် ဝီ ဘုတ် ကာဆဝ်၊ ဝီ ဒီယုး ကာဆဝ် ကာင် တွိုန်၊ တဲး န့ ကာပျာတ့် ကေး၊ ဝီ လိုဝ် တူတ့်။”