Ŋnah mnlelnin ŋnsi NYEEK
23
NYEEK jak Moises: 2 Antom alado na bowk Israel, a jak boko: Ŋnah ni ka ilehe ŋolo infinohi, nde ka ptezan ŋa injaka uzoñnor unhimunbi; ŋho ŋnah nin nji zuŋi ilehe; nde pzuup ŋa injaka uzoñnor unhiimumbi; ŋho ŋnah NYEEK zuŋi ilehe.Onu osi phyoŋ
3 Nde hilun ptihun ŋnu 6, onu ojaandun o pho onu osi ksaaudu ksi phyoŋ, onu osi uzoñnor unhiimumbi; ndezo plemp un oloŋ zonu ominzun. Ze ŋnjir uzuuz ŋnsi nde onŋi, o pho ksaaudu ksi NYEEK.
Onah osi Paskwa
(Ipun 23:14-15; 34:18 Wojun 16:1-8)
4 Ŋnah ŋndaaŋi NYEEK zuŋun klehe, uzoñnor uminzun unhiimni usi ndei ptezan ze klehe ŋolo. 5 Paskwa psi NYEEK a ktep zomitro onu ze ŋnu 14 ze pli pseke. 6 Ze ŋnu 15 ze pli pminzpi psi onah NYEEK osi opoŋ onhani pka iferment; optep ze ŋnu 7, nde pde opoŋ onhani pka inferment. 7 Zonu oseke nde pka uzoñnor unhiimumbi; ndezo ptihun injaka mi nde hagzomi. 8 Ze ŋnu 7 nde psoond un onhaloi onturoi osi NYEEK. Zonu ojaandun nde pka uzoñnor unhiimni; ndezo ptihun injaka ze mi nde hagzomi.
Isepru iseke
9 NYEEK pot jak Moises: 10 Antom alado na bowk Israel, a jak boko: Zotoomr nde pneej zosaak njoi phul nde, nde kitun zosaak ominzun ol nde kurun nmpenen Uzi kñen kseke ksi ksepru nde kitki, 11 nmpenen Uzi ophind kñen ksi ksepru zurun NYEEK antom kdigzano. 12 Zonu osi ksaaudu nmpenen Uzi ophind ka. Zonu osi nde khindi ksepru nde phul owk ompalalu onhani pka kzeu, onkai olur 1, injaka un onhaloi onturoi osi NYEEK. 13 Pkoulan na ksepru kminzkun nde khya na un onhaloi osi un ode, ŋlitru 4 ŋnsi ifor indelŋlhi inagohi na minsitidos, injaka un onhaloi onturoi okñeeli un onliili zurun NYEEK, na un onhaloi uz osi olitru osi praan. 14 Ndezi ka pde opoŋ, ka ndezo pde trigu onhilari, ofulamul ampjau zonu osi ndei pbi na un onhaloi ominzun osi Uzi nde. Uni opho oiimna oi pzañ oloŋ ze iiñ nde ikmbihi zurun, ze ŋnjir uzuuz ŋnsi ndei phona.
Oyetro Oyek Uzi
Oiimna 16:9-12
15 Ptep zonu onekunk zonu osi ksaaudu, ptep zonu nde bilunk na utan injaka un onhoalohi phind; nde ka pfin imiŋu 7 uzindan. 16 Onu zozipr onu ojaandun osi ksaaudu oi pka ŋnu 50; zonu ominzun nde phya na un onhaloi osi kre kit khalu antom psoond NYEEK. 17 Zun nde oonzi, nde kbina kpoŋ 2 knlempoki na ŋlitru 4 ŋnsi ifor indelŋlhi, injuŋhi na iferment injaka un onhaloi antom ŋhindo ŋnsi NYEEK, osi ŋun ŋnseke ŋnsi ikit. 18 pkoulan na opoŋ, nde psoond ŋhwk ŋmpalalu 7, ŋani pka kzeu, nkaŋi olur 1, owai okal na ŋmpalalu ŋhiinz 2. Ŋo pho un onhaloi osi wojun unturowi usi NYEEK, na ŋun boko ŋhaloŋi ŋnsi ŋun ŋnde, na ŋun ŋhaloŋi ŋnsi praan. Un onhaloi ominzun opturo zuroo, opñeel un onliili zurun NYEEK. 19 Antom ol udolun wojun opi okal injaka un onhaloi osi pjwa, na ŋhwk ŋmpalaun 2 nkaŋi olur 1, injaka un onhaloi osi phyoŋ. 20 Nmpenen Uzi ophind ŋhwk ŋmpalalu ŋminzŋun injaka un onhaloi osi phind zurun NYEEK, na poŋ pseke psi ikit. opho un onhaloi osi NYEEK phul nempenen Uzi. 21 Zonu ominzun nde pzuup pja nde ka uzoñnor unhiimni; nde zo ptihun utihun nde hagzoi ptihun. Uni o pho oiimna onzañi ze nkil uzuuz ŋi kmbiŋi, ze ŋnjir uzuuz nde onŋi.
22 Zokil ominzun osi ikit zosaak nde, nde ika toom pkit ze ijok isaal nde, nin nde zo psinz isuŋru iknjetyunk. Nde phutun ya antom boñagin bi sinz na nhya aloŋ uz. Nji njoun NYEEK Uzi nde.
23 NYEEK pot jak Moises: 24 Antom a jak bowk Israel: zonu oseke osi pli pjaandun nde phyoŋ injaka mnlelnin, nde pka uzoñnor unhiimumbi. Ikornet opluul. 25 Nde zo ptihun utihun uloŋ nde hagzohi ptihun, ka nde psoond un onhaloi osi wojun unturowi usi NYEEK.
Onu osi pjour pjwa
26 NYEEK pot jak Moises: 27 Ze ŋnu 10 ze pli pjaadun pminzpun opho onu wojun zonkont pjwa. Nde pka uzoñnor unhiimni; nde pduko pham pde, nde psoond NYEEK un onhaloi osi wojun unturowi. 28 Zonu ominzun ndezo ptihun zonkont o onu wojun zonkont pjwa, pdo wojun nde zurun NYEEK, Uzi nde. 29 Ña ani pduko pham pde zonu ominzun a puno ze psoof bopugi lo. 30 Ña antihuni utihun uloŋ zonu ominzun njo ptoom na yaa ze psoof bopugi lo. 31 Nde zo ptihun utihun uloŋ. uni opho oiimn onzañi ze nkil uzuuz ŋikmbiŋi, ze ŋnjir uzuuz ndei phon. 32 O pho ksaaudu nde ksi phyoŋ; nde ka pduko pham pde. Ptep ze ŋnu 9 ze montna ŋnsi pli, ze montna minzmun ampjau ze montna mnsi onu oloŋo, nde pbaap onu nde osi phyoŋ.
Onah osi nku (Ofinu 29:12-40)
33 NYEEK jak Moises 34 antom a jak bowk Israel: Ze ŋnu 15 ze pli pjaandun, onah NYEEK optep, one onah osi nku; opka ŋnu 7. 35 Zonu oseke opka uzoñnor unhiimumbi, ndezo ptihun utihun uloŋ usi mhagzin. 36 Ze ŋnu 7 nde psoond ŋun ŋhaloŋi ŋnsi wojun unturowi usi NYEEK; zonu obakrin nde pka uzoñnor unhiimumbi, nde psoond un onhaloi osi NYEEK. Onu ominzi oko onu onhiimni; ndezo ptihun utihun uloŋ usi mhagzin.
37 Ŋndaŋi oko ŋnah ŋnsi NYEEK zuŋi, ŋnsi ndei pzuup injaka uzoñnor unhiimumbi, antom nde yana ŋun ŋhaloŋi ŋnsi wojun unhowi pturo zuroo zonkont NYEEK, un onhaloi osi wojun unturowi, na un onhaloi osi un ode, wojun na un onhaloi osi praan, ze mi ofiromi kana onu. 38 Ŋun ŋminzŋi ŋhaloŋi ŋho pho duzu ŋhuloŋunk zonu osi ksaaudu ksi NYEEK, duzu ŋun nde ŋhaloŋi uz ŋnsi nde binŋi na ijuuns nde uzuuz ze nde pdo phuuz, ka men nde sa jeu phul NYEEK.
39 Zoyar nde antom pjiiu ŋun isepru uzuuz isi nde kithi, nde pbaap onah ominzi osi NYEEK ŋnu 7, nde ptep ze ŋnu 15 ŋnsi pli pjaadun, zonu oseke na onu obakrin, ŋho pho ŋnu ŋnsi phyoŋ. 40 Zonu oseke nde pjek inah na mbuk yolo impei pnuro ze mmun uzuuz, na ikuñ mnkeme, inah isi mmun mmagmi na inah isi mmun mikndwomi salgeru mhomi ze kwaŋ iruuz; nde pliilun zurun NYEEK, Uzi nde ŋnu 7. 41 Nde pbaap onah ominzi osi NYEEK ze pli pjaandun kana olura, ze ŋnu 7. Ondai opho oiimna ze nkil uzuuz ŋkmbiŋi zurun. 42 Ŋnu 7 nde pho ze nku ŋnsi ikuñ; baña uzuuz bombukouki ze Israel bo pho ze nku, 43 antom iiñ nde ikmbihi zurun me pja nji zu bowk Israel bo o ze nku kero ka nji punun boko zosaak Ijitu. Nji njoun NYEEK, Uzi nde.
44 Hunkran Moises huldun bowk Israel ilul zonkont ŋnah ŋnsi NYEEK zuŋi.