Oiimna zonkont pde un onjiinzi
22
Antom ka NYEEK lado na Moises Jak lo: 2 Jakunk Aroŋ na bowk boki ksok ktiim ni knjiinzki. Hunkranda, bo bamb ze mi bo kdomi ŋun ŋiimna ŋnsi bowk Israel soondŋi nji. Njoun NYEEK. 3 Hankri phya na urun, ñiinz ze iiñ nde anzopi ambili ñog ze un onhaloi onhimni osi bowk Israel huli osi NYEEK, ña aminzun a puno zurun mnkil nin. Njoun NYEEK. 4 Ze ñiinz nnsi kiiñ ksi Aroŋ, ka iziñr iknluthi, o aka kzup ki kmpunki ze lo, azi hilun pde un onhimni an akint ajiinz injaka ña andaproi un onzopi osi kliks o ña undiu kpuni ze lo; 5 andaproi ogoŋar okmpuloi, o ze ñiinz anzopi; ze mizmun apduko na kzopi. 6 Ze ña dapro ña ze baña bominzki apduko na kzopi ampjau ze montna. Azo philun pde ŋun ŋiimna ampkint pñou oleef lo na mnzup. 7 Zoyar onu yowi apduko pjiinz. Antom ol adeun ŋun ŋiimna, zonkont ŋhoŋun kre lo. 8 Azo pde onsaam onkezi onkona olo o osi ogoŋar pgof falfalni oki kbi kzopzopun lo. Nji, njoun NYEEK. 9 Bopenen Uzi o pbaap ilul ni boki kbi iino na pjwa, bokez zonkont boyeel pdo ŋun ŋminzŋi. Nji, njoun NYEEK aknzui boko piimun.10 Ka ña ani pho ze phuk pliin nmpenen Uzi azi hilun pde un onhaloi onhiimni, nya nmpenen Uzi, ntihun lo azi hilun pde un onhaloi ominzun. 11 Ze nmpenen Uzi ganz ña na onsaam lo, o nnjuuk aloŋ sa buko ze mez lo, nnjuuk aminzun a hilun pde pre nmpenen Uzi. 12 Zoyar awk nmpenen Uzi nmpili mado na ñiinz nya azo pde ŋun ŋhaloŋi ŋnsi ŋun ŋiimuŋi. 13 Ze awk nmpenen Uzi ñaaz ankeznani ahina, o ahin bira kero azi ka bopoz, zabi kak mez aliin injaka mi a hilunk um o na ksuke, a hilun pde pre psi aliin. Ka ña ani pho awk aliin nmpenen Uzi azi hilun pde pre pminzpun. 14 Ze ña ziplan de un onhiimni, aka pluk nmpenen Uzi un oloŋo ze kfah ksi un adeunk; apbundar ojir oñinzan antom a hul nmpenen Uzi. 15 Nmpenen Uzi azi hilun psok kjiinzi ksi ŋun ŋhaloŋunk ŋiimuŋi ŋnsi bowk Israel oi psoond NYEEK. 16 Bozo phutun ña aloŋ de un oloŋ ze ŋun ŋhaloŋunk, ŋiimuŋi, antom ña aminzun ki kbi ktuunto, kbi ka pluk. Nji, njoun NYEEK aknzui un onhaloi ominzun antom oiimun."
Ŋnsaam Uzi ani pjeu ze wojun
17 NYEEK pot jak Moises: 18 antom a lado na Aroŋ, na bowk na bopugi Israel uzuuz, a jak boko: "Ña ze bowk Israel, o nya anhoi ze Israel, anhuli onsaam oloŋ injaka un onhaloi onturoi ze NYEEK, ŋanun ot o osi phuuz o zonkont ajeu psoond, 19 antom a hilun pdigzano, nmpenen Uzi ka psoond onsaam oiinz, onhani pka kzeu, ŋiit, ŋmpalalu, o osi ŋmpi. 20 Nde ika bina onsaam onkai kzeu zonkont ozo pdigzano zonkont nde. 21 Ze ña hul un onhaloi osi phyoŋ osi NYEEK, ze ŋiit lo o ŋmpalalu lo, zonkont a do phuuz o ajeu psoond, ozo pka kzeu o ktap antom o hilun pdigazono. 22 Nde ika hul NYEEK onsaam onkuuzi, ondiisoi, onzakmi, onkai olu zoleef, onkaszi, onkai kziñr. Ndezo pfiŋa duzu pkak injaka un onhaloi onturoi psoond NYEEK. 23 Zaphul oiit okal o ompalalu onhani phal na mnjona, nde hilun psoond NYEEK onsaam ominzun injaka un onhaloi na ujuuns uzuuz, ka ozo pdigzano ze nde pdo phuuz. 24 Onsaam osi mhaanz diisomi, jesomi, nfalomi, ndezo psoond NYEEK onsaam ominzun. Un ominzi ozo pdolo zosaak nde. 25 Ndezi hilun pdigzan ŋnsaam ŋnaamŋi na ŋminzŋi ze kñen nya, antom psoond ŋolo injaka un onhaloi osi un ode osi Uzi nde. Ŋozo pdigzano zonkont nde.
26 NYEEK jak Moises: 27 Zoyar oiit, ompalalu o opi bukoo, opduko na oniinolo ŋnu 7. Zonu obakrin zurun, o hilun pdigzano injaka un onhaloi onturoi psoond NYEEK. 28 Nde ika fiŋ oiit o ompalalu na owk olo zonu oloŋ. 29 "Ze nde psoond un onhaloi antom pjak NYEEK yota, nde ka pdola wojun ze mi NYEEK oi pdigzan nde wolo. 30 Nde pde a zonu ominzun; ndezo pduklan un oloŋ ampjau ze nfa. Nji, njoun NYEEK. 31 Nde pte ŋiimna nin, nde pyaanz ze ŋa. Nji, njoun NYEEK. 32 Nde ika sok ktiim nin knjiinzki; hunkran bopugi Israel oun pmolo nin injaka ña anhiimni. Nji, njoun NYEEK aknzui nde, nde iimna. 33 Ampuni nde zosaak Ijitu, antom pho Uzi nde. Nji, njoun NYEEK.