Ŋiimna zonkont bopenen Uzi
21
Ka NYEEK jak Moises antom alado na bopenen Uzi, bowk Aroŋ, a jak boko: "Nmpenen Uzi azo pzopun oleef lo zonkont pkez ña ze bopugi lo, 2 ze ampho ña lo, añogi ze lo maakrin, injaka aniin o aliin, awk ñiinz o awk nmpili, aza ñiinz; 3 o aza nmpili ani po maroo anhoi ze mez lo; ahilun pzop zonkont lo. 4 Nmpenen azi hilun pzopun oleef lo ze ñaaz ankai ahina, zonkont a o ña Uzi jiinjiinzni. 5 "Bopenen Uzi bozo ptih ŋyel boko ka bozo ptih oyel urun, nin bozo pjes ŋleef ze puma. 6 Bopenen Uzi ka pho baña bonjiinzuki zurun Uzi boko; bozo psok ktiim Uzi boko; zonkont boka psoond un onhaloi , onturoi osi NYEEK onhoi un onhaloi osi un ode osi Uzi boko. Un ominzi kaun bo ka pjiinz. 7 Bopenen Uzi bozo pmar ñaaz aknhapi oleef, nin ñaaz ai ña disi juuni, ka azo pmar ñaaz antomi unima na ahina, zonkont nmpenen Uzi o ña anjiinzi ze Uzi lo. 8 Hunkran woun pdo nmpenen Uzi injaka ña anhiimni, zonkont akhul un onhaloi ode osi Uzi nu. Wo pbupa injaka ña anhiimni zonkont njoun NYEEK aknjiinjiinzni nde, njo Uzi unjiinzwi. 9 Ze awk nmpenen Uzi nmpili ze hap oleef, a psok ktiim aliin; aka pturo na uroo.10 NYEEK bopenen Uzi ze psoof pzaro lo haso mnsitidos duzu ween lo, ka iimnanoo antom ptiimo yun isi bopenen Uzi, azo phutun oyel lo oŋuñŋuñ ze mez puma, ka azo pas yun atiimohi. 11 Azo pñog ze kwaŋ kliks, antom pzop, nin zonkont aliin o aniin. 12 Azi hilun pun zun ze iimna ze zesi Uzi lo, aki ksok kjiinzi zun ze minzun, zonkont mnsitidos mhimna mnsi Uzi lo o duzu lo. Nji, njoun NYEEK. 13 Nmpili ai pmar aka pho nmpili ani po me ñiinz. 14 Azo pmar ñaaz ahina oi o kezi ka azo pmar nmpili nnsi kiiñ lo, 15 aki ksok kjiinzi ksi bowk ze psoof bopugi lo, zonkont njoun NYEEK anjai ka zu lo aiimun.
16 NYEEK pot jak Moises: 17 Antom alado na Aroŋ a jak lo: Nin ña ze iiñ nu, ze iiñ boko, ankai kzeu zoleef azo psoond un onhaloi osi un ode osi Uzi lo. 18 Ka ñiinz ankai kzeu azo pñog: injaka ñiinz ankuuzi anzakmi ankai uhil unsunkowi ankai kñene, o psowo pnkañpi maakrin, 19 ñiinz ankitoi pzima o kñene, 20 nkuñ, ñiinz antiiŋzi maakrin, ankai kzeu ze pkil, upus, kziñr o ña ankai mhaanz mperomi. 21 Ŋanu ñiinz nnsi kiiñ ksi nmpenen Uzi akndwoi Aroŋ anhinoi na kzeu azo pñog antom psoond un onhaloi, onturoi osi NYEEK. Ankai kzeu zoleef lo; hunkran azo pñõg antom psoond un onhaloi osi un ode osi Uzi lo. 22 A hilun pde un ode osi Uzi lo, osi un onhaloi onhimni, o osi un onhaloi ompei piimun, 23 zonkont kzeu lo, azi hilun pñog ze kwaŋ knoŋt, nin knoŋt ksi pkak, ki ksok kjiinzi ksi zun ni ze iimunzi. Njoun NYEEK aknhimnani boko. 24 Moises lado ŋun ŋminzŋi na Aroŋ, na bowk, na bopugi Israel uzuuz.