khuzin zonkont pjwa
20
NYEEK pot jak Moises: 2 Usa o pjak bowk Israel uz: Ze ña ze bowk Israel o nya anhoi ze psoof bowk Israel, anjeki ña ze bowk don wojun ze uzi ukndwowi Moloki, aka pkez, uzoñnor usi bopugi optapa na ilaak. 3 Njo phuglo pbido na ñiinz aminzun, njo pununa ze psoof bopugi lo, zonkont mi ahulmunk Moloki ña ze bowkoliin, asok zun ni ze iimna, asok ktiim ni knjiinzki. 4 Ze bopugi osaak dis kil antom pham piin ñiinz aminzun ze mi akhulmunk Moloki ña ze bowkoliin, bozi fiŋa, 5 nji, njo phuglo pbido na ñiinz aminzun na bowkoliin, ptoom na yaa ze psoof bopugi lo, na baña uzuuz bonzalki lo, ze pdo pjwa pminzpi ze Moloki.6 Ñani phaz ze nji, ya ze bokooz o ze kfez bopenen bokez, zal boko, njo phuglo pbido na ña aminzun, njo pununa ze psoof bopugi lo. 7 Nde jinjinznan ŋnleef nde antom nde jiinz, zonkont njoun NYEEK, Uzi nde. 8 Nde baapun ŋiimna ni, nde do ze mi ŋnjakŋi. Njoun NYEEK anjinjinzni nde. 9 Ze ñiinz ladar aliin o aniin khuzin, aka pfiŋo; ze mi aladomunk, pñaak lo opho duzu lo.
10 Ze ñiinz ŋal ahar akiinz lo antom piinz na lo, boko 2, ñiinz na ñaaz boka pfiŋo. 11 Ze ñiinz piinz na aniin lo ampozi, abi na mmol duzu aliin; boko 2 uzuuz boka pfiŋo; pñaak boko opho duzu boko. 12 Ze ñiinz piinz na ahar awk, boko uzuuz 2 boka pfiŋo. Bo dol ohatat; pñaak boko opho duzu boko. 13 Ze ñiinz piinz na asinz injaka mi ñanka kpiinz na ñaaz, boko 2 bo dol un onzijrani. Boka pfiŋo; pñaak boko opho duzu boko. 14 Ze ñiinz piinz na ahar pot piinz na aniin ahar, uni oko khuzin. Ñiinz na bohaz 2 uzuuz bo pturo, antom khuzin pun ze psoof nde. 15 Ze ñiinz piinz na onsaam aka pfiŋo; nde sa ka pfiŋ onsaam ominzun uz. 16 Ze ñaaz ñog ze kwaŋ onsaam antom pka ukoulor kmpiinz na olo, nde ka pfiŋ ñaaz na onsaam ominzun uzuuz. Bo ka pfiŋo; pñaak boko opho duzu boko.
17 Ze ñiinz jek aza, awk aliin nmpili o awk ahar aliin nmpili, ka piinz na lo o mmol myeek. Bo pfiŋo zurun ikil bopugi uzuuz. Ñiinz aminzun faasran aza, aka pmindo zonkont pjwa pminzpun. 18 Ze ñiinz piinz na ahar ze klee lo ksi pñoo pli, ka pñaak um ka pun ze lo, boko 2 bo ka pfiŋo ze psoof bopugi boko. 19 Ika piinz na aza aliinu, ka ika piinz na aza aniinu, ze minzmi ña akfaasran awk aliin, boko 2 bo pmindo zonkont pjwa boko. 20 Ze ñiinz piinz na aza aliin ñaaz apbi na mmol ze aza aliin, boko 2 bo pmindo zonkont pjwa boko, bo pkez bozo pka nmpoz. 21 Ze ñiinz jek ahar amaka antom piinz na lo, uni oko un onzopi; apbina mmol duzu amaka. Bo pduko bozo pka nmpoz.
22 Nde baapun ilul ni uzuuz na ŋiimna ni, antom nde do un ŋnjaki, osaak osi njoi phya na nde, nde ya on, oki kbi kgas nde. 23 Nde ika yaanz ze mhagzin mnsi baña njoi pdook zurun nde. Ze mi bo domi ŋun ŋndaŋi uzuuz, nji zijro baka. 24 Ka nji jak nde, nde pka osaak boko: njo phul nde a injaka piij, osaak oniri okmbuki mtau na pnou. Njoun NYEEK, Uzi nde, unditni nde na ŋrasa ŋloŋo. 25 Nde pdiitun ŋnsaam ŋnjinzŋi na ŋnzopŋi, nkas ŋnjiinzŋi na ŋani pjiinz. Nde ika zop zonkont ŋnsaam ŋminzŋi, nkas o ngoŋar ŋi kmpuloŋi zozee, ŋnsi nji dituŋunk zojir ŋolo injaka ŋnzopŋi ŋnsi nde. 26 + \fr 20.26 \ft Nde pho baña bonjiinzuki ze nji, zonkont nji NYEEK, nji jiinzi. nji ditun nde ze ŋnrasa ŋloŋ antom nde o bosinin.
27 Ze ñiinz o ñaaz o nmpenen o nkooz, o ña ankai nkez, aka pfiŋo. Nde ptap baka na ilaak; pñaak boko opho duzu baka.