Ŋiimna ŋnsumŋi pootlani
19
NYEEK jak Moises: 2 Antom alado na uzoñnor bowk Israel uzuuz, a jak boko: Nde ka pjiinz, zonkont nji NYEEK, Uzi nde nji jiinzi. 3 Nde Ka pmolo boniin nde na boliin nde, pbaap onu ni osi ksaaudu. Njoun NYEEK, Uzi nde. 4 Nde ika Hugl kil nde zu ze ŋnzi nkezŋi, ka nde ika lemp ŋnzi nde ŋyalaŋi. Njoun NYEEK, Uzi nde.5 Zoyar nde ambi psoond un onhaloi, nde psoond a ze mi NYEEK oi pdigzan olo. 6 Un onhaloi ominzun oka pdeo zonu ominzun osi ohulounk, zonu opugzan. Zoloŋ duklo anjau zonu oajzan opturo zuroo. 7 Ŋanun un ode ompozi deo zonu oajzan o pho un onzijrani. Uzi bozo pdigzan un ominzun onhalohi. 8 Ña andei olo, apho ña ankai pjwa, zonkont abeh un onhimni osi NYEEK, ña aminzun a puno ze psoof bopugi lo.
9 Zokitr nde zosaak nde, nde zo pkit zijok uzuuz isi isaal nde, ka nde zo psinz oknjetunk zozee. 10 Nde zo pfal isiŋru uzuuz zizanz nde isi mhuba ka nde zo psinz miknjetmunk zozee, nde phutnar boñagin ma na boya. Njoun NYEEK, Uzi nde.
11 Nde ika kiiji, nde ika jubi, ka nde ika dodoo udara. 12 Nde ika bisro klas ze ktiim ni, zonkont nde pbeh ktiim Uzi nde. Njoun NYEEK.
13 Ika de za sinzu, ka ika kiij un akahi. Uluk usi ntihun ika duko na wa ampjau ze nfa.
14 Ika ladar ndilum un onjoozi, ka ika zu un oloŋ zurun nkuul aki khut, uka pkalo Uzi nu. Njoun NYEEK.
15 Ika dol olado un ontuuntoi zun ze doli olado; ika soond kñago ze niñagin ka ika soond kñago ze ña aniri. Wo pdo asinzu olado na un onjaali.
16 Ika zu olado osi ujubl ohairo ze psoof bopugi nu, pzu ubido na ña aloŋ. Ika zu phila asinzu ze khuzin. Njoun NYEEK.
17 Ika baap oreu pzaro nu zujuuns nu. Sajzon asinzu un onjiinzi uki ka kfah ze pjwa lo.
18 Ika botun pko, ka ika baap oreu ze bowk bopugi nu, uka pfundar asinzu injaka wi zoleef nu. Njoun NYEEK.
19 Baapun ŋiimna ni; Ika zu ŋnsaam ŋnditŋi ŋmbuk na ŋnsinz ŋolo. Ika laal zun ze loŋ isepru 2 indithi. Ika horo yun inluthi na mmuz ŋndiima 2 ŋnditŋi.
20 Ze ñiinz piinz na ñaaz anhoi nnjuuk lo, anhoi pmado na ñiinz aloŋ, ka ñiinz aminzun azo luk unima ka ñaaz aminzun azo burburnoo, ñiinz aminzun na nnjuuk lo bo pnornorno bozo pfiŋo. Zonkont ñaaz hilun o nnjuuk ñiinz aminzun. 21 Ka ñiinz ka phya na ompalalu oiinz ze NYEEK zoneeji oku uzoñnor, injaka un onhaloi zonkont pjwa. 22 Na ompalalu ominzun osi un onhaloi zonkont pjwa, nmpenen Uzi opdo bol lo zurun NYEEK, zonkont pjwa adopunk; pjwa pminzpun opjouro.
23 Zoneejru zosaak, laal bun unkabi mbuk mnde, wopka ma injaka mbuk mnzopmi ŋnlur 3. Uzo pde mbuk minzmun. 24 Zolur owaknan mbuk wolo uzuuz mo piimna, mo pho un onhaloi antom pzah NYEEK. 25 Zolur oñenzan uhilun pde mbuk bolo. Hunkran bun oun pbuk maakrin. Njoun NYEEK, Uzi nde.
26 Ika doh oyemz onkai pñaak. Ika do pkooz, ka ika zuup ŋnzaafi.
27 Nde ika tih imbam isi weene, antom hutun isuuk ze psoof weene, ka nde ika tih ŋnjir urun nde. 28 Nde ika jes ŋnleef nde zonkont ña nkezi, ka nde ika zu ŋnlu ze ŋnleef nde. Njoun NYEEK.
29 Ika faasran awku ñaaz, zu lo ahap oleef ze khuzin, osaak ki kya ze khuzin, oki ksum khuzin. 30 Nde baapun ŋnu ni ŋnsi ksaaudu; nde moloon zun ni ze iimna. Njoun NYEEK, Uzi nde.
31 Nde ika ber bo zuup ŋnzaafi na boŋaj bokez. Ze nde do jaink nde pzop na baka. Njoun, NYEEK, Uzi nde.
32 Nazoon zurun baña bonkaki oyel ofasla, umolo nyeek,ukalo Uzi nu. Njoun NYEEK.
33 Zoyar nya bi o zosaak nde ika dola un onjoozi. 34 Nya anhoi na nde aka pbaapo injaka nmbukno osaak. Wo pfundar a injaka ween nu, zonkont nde hil o boya zosaak Ejitu. Njoun NYEEK, Uzi nde.
Ijawi injaalhi
Oiimna 25:13-16