Kmar kani pho zoiimna
18
NYEEK pot jak Moises: 2 antom a lado na bowk Israel, a jak boko: Njoun NYEEK, Uzi nde. 3 Nde zo plemp injaka mi bo lempmi zosaak Ejitu, zun nde hili oni, ka nde ika lemp injaka mi bo klempmi zosaak osi Kanaan zun njoi phya na nde. Nde ika zal mhagzin boko. 4 Nde pdo ze mi ŋiimna ni jakŋi; antom nde yaanz ze ŋolo zonkont njoun NYEEK Uzi nde. 5 Nde baapun ŋiimna ni, nde dolun ze mi ŋnjakŋi, ze ñiinz baap ŋolo apka phila. Njoun NYEEK.6 Nin ñiinz aloŋ azi ka piinz na ña abootni ze pliin boko. Njoun NYEEK. 7 Ika piinz na aliinu o aniinu zonkont a oko aliinu o aniinu; un ominzi oko mmol zaliinu o aniinu: Ika bina mmol duzu boko. 8 Ika piinz na ahar aliinu, zonkont un ominzi akbina mmol zaliinu. 9 Ika piinz na azau nmpili, asi aliinu o aniinu buki, ambukoi ze mez o zuri, ika piinz na ya. 10 Ika piinz na nmpili asi awku ñiinz o ñaaz buki. Uni akbina mmol duzu nu. 11 Ika piinz na nmpili awk ahar aliinu mari asi aliinu buki na lo, zonkont a oko azau. 12 Ika piinz na aza aliinu, zonkont a oko na aliinu ze pliin boko. 13 Ika piinz na aza aniinu, zonkont a oko na aniinu ze pliin boko. 14 Ika piinz na ahar aza aliinu zonkont a oko aniinu. 15 Ika piinz na ahar awku, antom pbina mmol duzu lo. 16 Ika piinz na ahar azau zonkont, un ominzun akbina mmol duzu azau. 17 Ika piinz na ñaaz na awk uzuuz, ika jek nmpili awku ñiinz buki o nmpili awk lo ñaaz buki, antom piinz na boko, bo oko bowkoliinu; un ominzun oko pjwa. 18 Ika jek aza aharu piinz na lo, ika piinz na yaa ze mi aharu umunk hili.
Inim inzijranhi
19 Ika piinz na ñaaz akñohi pli. 20 Ika piinz na ahar akinz nu uki kzop na lo. 21 Ika hul ña ze bowku a o wojun ze Moloki, zonkont uzi hilun psok ktiim NYEEK. 22 Ika piinz na ñiinz injaka mi ña kpiinzmunk na ñaaz, oko pjwa. 23 Ika piinz na osaam, uki kzop na olo. Ñaaz azi hilun piinz na osaam, oko ohatat.
24 Ika zop na ŋun ŋminzŋi zonkont ŋnrasa njoi punun zurun nde bozop ze ŋun ŋminzŋi uzuuz. 25 Hunkran osaak dukodun na kzopi. Njo pzwa pjuuk zonkont pjwa olo an osaak opgas baña bonhoki ze olo. 26 Ka nde ka pte un nji jaki nde na ŋiimna ni. Nde ika lemp un oloŋ ze ŋun ŋnzijraŋi, nde bowkno osaak na nya anhoi ze psoof nde. 27 Zonkont boiinz bo hili o zosaak ominzi kero ndezo bili bo do ŋun ŋminzŋi uzuuz ŋnzijraŋi, hunkran osaak bilun o ze kzopi. 28 Nde ten ŋiimna ni, nde ki kzopun osaak, oki kbi kgas nde, injaka mi ogasmunk baña bonhoki nde urun ze olo. 29 Ña anleempi un oloŋ onzijrani ze ŋun ŋminzŋi, ña aminzun opuno ze psoof baña lo. 30 Nde zalun ŋiimna ni; nde ika lemp un oloŋ ze mhagzin boko mnzijrami bo hili lemp kero ndezo bili; nde ika zop ze mhagzin minzmi. Njoun NYEEK, Uzi nde.