Ŋiimna ŋnsi pfiŋ ŋnsaam.
17
NYEEK jak Moises: 2 Ladon na Aroŋ, bowk, na bowk Israel uzuuz, a jak boko: Uni oun un NYEEK jaki odolo: 3 Ñiinz ze Israel, adolin wojun na oiit okal, na owk ompalalu o opi ze mezu zun unaam uzoñnor, 4 ze ampbi na ŋolo zoneeji oku uzoñnor, antom psoond ŋolo injaka un onhaloi zurun oku NYEEK, ñiinz aminzun opiino injaka ña antuuntoi zonkont ahas pñaak, apuno ze psoof bopugi lo. 5 Bowk Israel ka pbi na wojun boko usi ŋnsaam bo fiŋi ze ksaal knfaski, bo soond NYEEK ŋolo, zoneeji oku uzoñnor, antom nmpenen Uzi soond ŋolo NYEEK injaka un onhaloi osi phyoŋ. 6 Nmpenen Uzi opgur pñaak duzu pkak psi NYEEK, zoneeji oku uzoñnor, aptur mnira injak un okñeeli un onliili osi NYEEK. 7 Ka bozi poto pdo wojun ze ŋnsai, pŋupr ŋolo. Uni opho oiimna oi pzañ oloŋ ze iiñ boko.8 Ña ze Israel o nya anhoi ze psoof boko, ansoondi wojun unturowi o un onhaloi osi wojun, 9 azi bina wa zoneeji oku uzoñnor, pdo wojun uminzun usi NYEEK, ñiinz aminzun aka puno ze psoof bopugi lo.
Pneeno pde pñaak
10 Ñiinz ze Israel o nya anhoi ze psoof nde, andei pñaak, njo phuglar ña minzun njo ptoom na yaa ze mi ademunk pñaak. 11 Zonkont phila ña njina phon ze pñaak; njo psoondu pñaak antom uhilun pdoon wojun duzu pkak, zonkont pñaak oun phila pkpunun pun pjwa. 12 Onkanun ka nji jak bowk Israel nin ña ze nde na nya anhoi ze psoof nde azi hilun pde pñaak. 13 Ñiinz ze Israel, o nya anhoi ze psoof nde angoŋari ogoŋar o okas okndeohi, aka punun na pñaak uzuuz, aler olo na mbool,
14 zonkont phila baña uzuuz phonz ze pñaak boko. Onkanun ka nji jak bowk Israel ogoŋar oloŋ, zonkont phila baña uzuuz on ze pñaak boko. Ña ndei polo, njo ptoom na yaa. 15 Ŋanun ña o nmbukno ozee o nya andei onsaam onkezi, o oyemz osi ogoŋar fal-falni, a ka pñou yun lo, añou oleef lo na mnzup, apduko na kzopi ampjau ze montna, antom ol ajiinzun. 16 Ka asampñou yun lo ka azi ñou oleef, aphya na pjwa lo.